‘Biigã rat n vẽnega nebã tɩ b bãng Ba wã’
‘Biigã rat n vẽnega nebã tɩ b bãng Ba wã’
“Ned baa a yembr ka mi Ba wã sẽn yaa a soab ye, sã n ka Biigã bala, la Biigã sẽn dat n vẽneg ned ning ne bãmba.”—LUK 10:22.
Y NA N LEOKAME TƖ BÕE?
․․․․․
Bõe yĩng tɩ yaa a Zezi bal n tõog n vẽneg nebã tɩ b bãng Ba wã sõma n yɩɩda?
․․․․․
Wãn to la a Zezi vẽneg nebã tɩ b bãng a Ba wã?
․․․․․
Wãn to la y tõe n dɩk a Zezi naoor n vẽneg nebã tɩ b bãng Ba wã?
1, 2. Sok-bʋg leokr la toog ne neb wʋsgo, la bõe yĩnga?
WẼNNAAM yaa ãnda? Sok-kãngã leokr yaa toog ne neb wʋsgo. Wala makre, wʋsg sẽn yet tɩ b yaa kiris-neb tẽedame tɩ Wẽnnaam yaa mens a tãabo, la tɩ rẽ võor wʋmb yaa toogo. Tũudum taoor soab a ye sẽn yaa seb-gʋlsd yeela woto: “Ninsaal yamã sẽn tar koakã pa tõe n wʋm zãms-kãngã võor sõma ye. A yɩɩda ninsaal sẽn tõe n tags n bãnge.” La neb a taab me tẽedame tɩ bũmb fãa wa n bee woto bala. B yetame tɩ Wẽnd kae, la tɩ ãndũniyã bũmba fãa sẽn yaa sõma wã wa n beeme tɩ pa tũ ne naand sabab ye. La a Charles Darwin pa yeel tɩ Wẽnd kae ye. A yeela woto: “Ne maam, ninsaalbã tõogã pa sek b na bãng Wẽnnaam sõma ye.”
2 Baa b sẽn tẽed bũmb ning me, sãnda sokda b mens Wẽnnaam sã n sɩd beeme. La wʋsg sã n mak sok-kãngã leokr n konge, b wat n pa le baood Wẽnnaam ye. A Sʋɩtãan sɩd ‘luda neb nins sẽn ka tẽebã yam.’ (2 Kor. 4:4) Pa zaalem tɩ ãdem-biisã wʋsg be zɩlem pʋgẽ, n pa tol n mi sɩdã Wẽnnaam sẽn yaa d Ba la ãndũniyã Naandã zug ye!—Ezai 45:18.
3. a) Ãnda n vẽneg tõnd tɩ d bãng Naandã? b) Sogs-bʋs la d na n leoke?
3 La yaool n tara yõod wʋsg tɩ ninsaal bãng sɩdã Wẽnnaam zugu. Bõe yĩnga? Bala, yaa neb nins sẽn “kot ne [a Zeova, MN] yʋʋrã” bal n na n paam fãagrã. (Rom 10:13) Kos ne Wẽnnaam yʋʋrã rat n yeelame me tɩ d bãng a soab ning yʋʋr sẽn yaa Zeova wã. A Zezi Kirist sõnga a karen-biisã tɩ b bãng Wẽnnaam sõma. A vẽneg-b lame tɩ b bãng Ba wã sẽn yaa a soabã. (Karm-y Luk 10:22.) Bõe yĩng tɩ yaa a Zezi bal n tõog n vẽneg nebã tɩ b bãng Ba wã sõma n yɩɩda? Wãn to la a maan dẽ? Wãn to la d tõe n dɩk a naoor n vẽneg nebã tɩ b bãng Ba wã? D na n leoka sogs-kãensã.
A ZEZI KIRIST BAL N TÕOG N VẼNEG NEBÃ TƖ B BÃNG BA WÃ SÕMA
4, 5. Bõe yĩng tɩ yaa a Zezi bal n tõog n vẽneg nebã tɩ b bãng Ba wã sõma n yɩɩda?
4 Yaa a Zezi n tõog n vẽneg nebã tɩ b bãng Ba wã sõma n yɩɩda. Bõe yĩnga? Bala nand tɩ Wẽnnaam naan bũmb a taabã fãa, a Zezi ra yaa malɛk n be saasẽ, n yaa “Wẽnnaam Biig sẽn ka to.” (Zã 1:14; 3:18) Sɩd me, a ka to ye! Wẽnnaam sẽn da wa n nan pa naan bũmb a taabã t’a Biigã ra bee a sɛɛgẽ, t’a get a yell hal sõma. Biigã me paam n bãnga Ba wã neere. Ba wã ne Biigã sẽn zĩnd ne taab n maan yʋʋm sẽn kõn bãng n sõdã, b paam n bãnga taab sõma, tɩ nonglem ning sẽn be b sʋkã me paam pãng wʋsgo. (Zã 5:20; 14:31) Yãmb we n tags n ges a Zezi sẽn paam n bãng Ba wã tɩ ta zĩig ningã!—Karm-y Kolos rãmb 1:15-17.
5 Ba wã yãka Biigã tɩ yaa a koe-taasda, tɩ b boond-a tɩ “Wẽnd Gomde.” (Wil. 19:13, Sebr Sõngo) Rẽnd yaa a Zezi bal n paam tɩ Wẽnnaam yãk-a t’a vẽneg malɛgsã la ninsaalbã tɩ b bãng yẽ. Rẽ n so t’a Zã yeel t’a Zezi bɩ “Gomdã” “bee ne Ba wã.” (Zã 1:1, 18) Tõe t’a Zã sẽn wa n yet woto wã t’a ra tagsda minung a wakatẽ nebã sẽn da tar yelle. B sã n da wa na n naag taab n dɩ, b mi n zĩniga ned n pẽneg a to sẽn na yɩl tɩ b paam n sõsd ne taaba. Woto me, a Zã sẽn yeel tɩ Biigã ra “bee ne Ba wã” rat n yeelame tɩ b ra pẽe taaba, n sõsd ne taab sõma.
6, 7. Wãn to la zood ning sẽn be Ba wã ne Biigã sʋkã tall paasgo?
6 Zood ning sẽn be Ba wã ne Biigã sʋkã kell n tall paasgo. Biigã ra “kõta [Ba wã] sũ-noog raar fãa,” rat n yeel tɩ yẽ n lebg a soab ning Ba wã sẽn nong n yɩɩda. (Karm-y Yelbũn 8:22, 23, 30, 31.) Rẽnd pa zaalem la b zoodã pãng sẽn tall paasgã ye. B tʋma ne taaba, t’a Zezi paam n zãms a Ba wã togs-n-taar dɩkre. A Zeova sẽn wa n naan malɛgsã la ninsaalbã poore, a Biigã yãa a sẽn get b ned kam fãa yell to-to wã, la yaa vẽeneg tɩ rẽ kɩtame t’a maneg n nand a Ba wã la a waoogd-a.
7 Baa a Sʋɩtãan sẽn wa n kɩɩs t’a Zeova pa tar sor n na n yɩ yĩngr la tẽng naabã, Biigã paam n yãa a Zeova sẽn wilg t’a yaa Wẽnnaam sẽn tar nonglem, tɩrlem, yam la pãng to-to yellã pʋgẽ. Sãmbg sẽn kae, rẽ sõnga a Zezi t’a wa tõog n mao ne zu-loees nins a sẽn seg tẽngã zug a koe-moonegã sasa wã.—Zã 5:19.
8. Wãn to la kibay nins sẽn be evãnzill-dãmbã pʋsẽ wã tõe n sõng-d tɩ d bãng Ba wã sõma?
8 A Zezi ne a Ba wã zood sẽn tar pãng wʋsgã yĩnga, yẽ n tõog n vẽneg nebã tɩ b bãng a Ba wã sõma n yɩɩda. Bũmb sẽn tõe n sõng-d tɩ d bãng Ba wã sõma n yɩɩd yaa d sẽn na n bao n bãng a Bi-ribl sẽn ka to wã sẽn wilg nebã bũmb ninsã, la a tʋʋm-tʋmdɩ wã. D rɩk makre. Rẽ yĩnga d sã n lak gom-biis võor wʋmb sebr n karem b sẽn bilg “nonglem” võor to-to wã, seka d na bãng nonglem sõma sɩda? Na n yɩɩ toogo. La d sã n bʋgs a Zezi koe-moonegã kibay sẽn be evãnzill-dãmbã pʋsẽ wã zugu, n yã a manesem sẽn da yaa to-to ne nebã, d tõe n bãnga Biiblã sẽn yeel tɩ “Wẽnnaam yaa nonglmã” võore. (1 Zã 4:8, 16) La a Zezi pa sõng a karen-biisã tɩ b bãng Wẽnnaam nonglmã bal ye. A vẽneg-b lame tɩ b bãng Ba wã sẽn yaa Wẽnnaam ning buudã hal sõma.
A ZEZI SẼN VẼNEG NEBÃ TO-TO TƖ B BÃNG A BA WÃ
9. a) A Zezi vẽnega nebã tɩ b bãng Ba wã ne bõe maasem? b) Mak-bʋg n wilgd a Zezi sẽn vẽneg nebã ne a zãmsgã maasem tɩ b bãng a Ba wã?
9 Wãn to la a Zezi vẽneg a karen-biisã tɩ b bãng Ba wã, tɩ na n naf neb nins sẽn da na n wa lebg a karen-biisã me? A maana rẽ ne bũmb a yiib maasem: Yaa ne a sẽn zãms-b bũmb ninsã la ne a manesmã. Bɩ d reng n gom a zãmsgã yelle. A Zezi sẽn zãms a karen-biisã bũmb ninsã sõngda tõnd tɩ d bãng a Ba wã manesem, a tagsa, la a sẽn get yɛlã to-to. Wala makre, a Zezi maka a Ba wã ne rao sẽn tar pe-bãgre, t’a pesg a ye meneme. A sẽn nong a pesg fãa wã yĩnga, a basa piis a taabã, n kẽng n na n tɩ bao sẽn menem-a wã. A Zezi yeelame tɩ pe-kɩɩmã sẽn yã a pesgã, a “maana sũ-noog pe-kãng yĩng n yɩɩd pis-wɛ la a wɛ wã sẽn ka menemã.” Bõe yĩng t’a Zezi rɩk mak-kãngã? A yeela woto: “Yãmb Ba sẽn be [saasẽ wã, MN] ka rat tɩ kom-bõon-kãens ned a yembr sãam ye.” (Mat. 18:12-14) Mak-kãngã sõngda yãmb tɩ y bãng bõe a Zeova zugu? Y tõe n wa tagsdame tɩ y pa tar yõodo, la tɩ ned baa a ye pa tagsd y yell ye. La tẽeg-y tɩ y saasẽ Ba wã nifẽ y tara yõodo, la t’a geta y yelle. Y naaga “kom-bõon-kãens” a sẽn pa rat tɩ sãamã sʋka.
10. Wãn to la a Zezi vẽneg nebã tɩ b bãng Ba wã ne a manesmã maasem?
10 Manesem ning a Zezi sẽn da tar ne nebã me sõnga a karen-biisã tɩ b bãng a Ba wã. Rẽ n so tɩ tʋm-tʋmd a Filip sẽn wa n kos a Zezi t’a ‘wilg bãmb Ba wã,’ a leok woto: “Ned ning sẽn yã maam, a yãa m Ba.” (Zã 14:8, 9) Ad kibay sẽn wilgd a Zezi manesem sẽn kɩt tɩ b bãng a Ba wã sẽn yaa Wẽnnaam ning buudã. Daar a yembre, wãoor n kos a Zezi t’a sãoog-a. A tẽega a nug n tik-a, n yeel woto: “Mam datame. Paam f menga.” Yaa vẽeneg tɩ wãoorã sẽn paam laafɩ wã, a bãngame tɩ yaa a Zeova n kõ a Zezi tõog t’a sãoog-a. (Luk 5:12, 13) Sẽn paase, a Lazaar kũumã poore, a Zezi karen-biisã sẽn wa n yã a sẽn ‘wẽ sir-kãsenga, la a sũurã sẽn sãam’ t’a ‘yãbã,’ b bãngame t’a Ba wã sɩd yaa nimbãan-zoɛta. Baa a Zezi sẽn da mi t’a na n vʋʋga a Lazaarã, a sẽn yã a Lazaar doagdbã la a zo-rãmbã sũ-sãoongã, yẽ me sũur sãamame. (Zã 11:32-35, 40-43) Biiblã kibay nins sẽn wilgd a Zezi manesem sẽn kɩt tɩ nebã bãng a Ba wã nimbãan-zoeerã sõor waoogame. Tõe tɩ b sʋkã, y tara y sẽn nong b rãmb n yɩɩda.
11. a) A Zezi sẽn dig lɛɛbdbã wẽnd-doogẽ wã wilgda bõe a Ba wã zugu? b) Bõe yĩng t’a Zezi sẽn dig lɛɛbdbã wẽnd-doogẽ wã kengd tõnd raoodo?
11 La y sã n karem kibar ning sẽn wilgd a Zezi sẽn da rig lɛɛbdbã wẽnd-doogẽ wã, bõe la y bãngda? Tags-y n ges-y rẽ sẽn yɩ to-to wã. A Zezi maana kalwaas ne wĩy n dig sẽn koosd-b niigã la piisã n yiisi. A sãeega ligd tekdbã ligdi, la a lub b taabl-dãmbã. (Zã 2:13-17) A Zezi sẽn maan woto wã kɩtame t’a karen-biisã tẽeg bãngr-gomd rĩm a Davɩɩd sẽn da togse. A ra yeela woto: “Yãmb doogã nonglem n so maam zãnga.” (Yɩɩl 69:10) A Zezi sẽn tʋm raood woto wã, kɩtame tɩ d miẽ t’a sɩd ra tʋll n kogla tũudum hakɩkã ne a sũur fãa. Yãmb nee kiba-kãngã sẽn wilgd tõnd bũmb ning Ba wã zug bɩ? A tẽegda tõnd tɩ Wẽnnaam tara pãn-kãseng n tõe n menes wẽnemã dũniyã zugu, la t’a rata ne a sũur fãa n maan rẽ me. Tags-y n ges-y-yã a Zeova sũurã sẽn sãamd to-to, a sã n get wẽnemã sẽn be dũniyã gill zugã! B sã n wa wẽg-do, d sã n tẽeg a Zeova ne a Zezi tagsg sẽn yaa a soab ne rẽ wã, na n kenga d raood wʋsgo.
12, 13. A Zezi sẽn tall manesem ning ne a karen-biisã wilgda tõnd bõe a Zeova zugu?
12 D gom a Zezi sẽn da tall manesem ning ne a karen-biisã me yelle. B ra wae n wẽeda no-koɛɛm n dat n bãng sẽn ya-a kãseng n yɩɩd bãmb sʋka. (Mark 9:33-35; 10:43; Luk 9:46) A Zezi sẽn zĩnd ne a Ba wã n kaoos wʋsgã, a ra mi a tagsg sẽn yaa a soab ne wuk-m-menga. (2 Sãm. 22:28; Yɩɩl 138:6) A Zezi yã a Sʋɩtãan sẽn da wukd a meng to-to wã. A Sʋɩtãan tagsda a meng yell bala, la a nong naam me. Rẽnd a Zezi sũur tog n da sãamda wʋsgo, a sẽn da ne a karen-biisã sẽn dat n lʋɩ b taabã taoorã. Neb nins a sẽn da yãk tɩ yaa a tʋm-tʋmdbã meng ra tara zʋg-kãngã! B kell n tall-a lame n tãag a Zezi yõkrã daare. (Luk 22:24-27) La a Zezi ra bʋkda a meng n sagend-ba. A zɩ n tags tɩ b pa na n tol n wa lebg sik-m-mens rãmb wa yẽ ye.—Fil. 2:5-8, MN.
13 A Zezi sẽn maag a yĩng n sagl a karen-biisã sẽn da tar tagsg sẽn pa zemsã, pa sõng-y tɩ y bãng a Zeova sẽn yaa Wẽnnaam ning buudã sɩda? A Zezi goamã la a manesem sẽn yɩ to-to wã pa kɩt tɩ d bãng tɩ Ba wã pa basd a nin-buiidã, baa b sã n wae n kongdẽ sɩda? Rẽ yĩnga d sẽn bãng woto fãa wã pa keng d raoodo, tɩ d sã n wa kong bɩ d tʋll n tek yam la d pʋʋs a Zeova n kos sugr sɩda?
BIIGÃ SAK N VẼNEGA NEBÃ TƖ B BÃNG BA WÃ
14. Bõe la a Zezi maan n wilg t’a rat n vẽnega nebã tɩ b bãng a Ba wã?
14 Nanambs wʋsg sẽn yaa toos sẽn dat n ket n so b nin-buiidã yĩnga, b pa rat n taas-b kibay kẽer sẽn na n kɩt tɩ b yamã yok ye. La a Zezi yẽ pa woto ye. A sak n wilga nebã bũmb toor-toor a Ba wã zugu, n vẽneg-b tɩ b bãng-a sõma. (Karm-y Matɩe 11:27.) Sẽn paase, a Zezi sõng a karen-biisã ‘tɩ b tõog n bãng soab ning sẽn yaa sɩdã’ sẽn yaa Wẽnnaam a Zeova wã. (1 Zã 5:20, Kãab-paalgã Koe-noogo) Woto rat n yeelame tɩ bõe? A Zezi yoka a karen-biisã yam tɩ b wʋm a sẽn wilg-b bũmb nins a Ba wã zugã võore. A pa bao n na n bilg a Ba wã ne manesem sẽn na n kɩt tɩ ra tol n bãng-a ye. Wala makre, a pa yeel-b t’a yaa mens a tãab ye.
15. Bõe yĩng t’a Zezi pa wilg a karen-biisã bũmb nins fãa a sẽn da mi a Ba wã zugã?
15 La rẽ yĩnga a Zezi wilga a karen-biisã bũmb nins fãa a sẽn da mi a Ba wã zugã bɩ? Ayo. A basa yɛl kẽer n pa wilg-b ye. (Karm-y Zã 16:12.) Bõe yĩnga? Bala, wakat kãng tɩ b ra nan pa “tõe n deeg” rẽ, bɩ n wʋm b võor ye. La wa a Zezi sẽn bilg-bã, “sõngdã” sẽn yaa vʋʋsem sõngã sã n da wa waa, a na n sõng-b lame tɩ b bãng bũmb wʋsgo, la a yãag-b ‘sɩdã fãa pʋga.’ (Zã 16:7, 13) Wa roagdb sẽn basd tɩ b kambã bɩ n wa sek b na n wʋm yɛl kẽer võor tɩ b yaool n wilg-bã, a Zezi me basame t’a karen-biisã wa tõe n wʋm yɛl kẽer võor a Ba wã zug n yaool n wilg-ba. A ra miime t’a karen-biisã pa tõe n wʋm yɛlã fãa võor zĩig pʋgẽ ye.
D RƖK A ZEZI NAOOR N SÕNG NEBÃ TƖ B BÃNG A ZEOVA
16, 17. Bõe yĩng tɩ y tõe n vẽneg neb a taab tɩ b bãng Ba wã?
16 Yãmb sã n wa bãng tɩ ned yaa nin-sõngo, y pa na n dat n gom a yell ne y taabã sɩda? A Zezi sẽn wa n be tẽngã zugã, a ra gomda a Ba wã yelle. (Zã 17:25, 26) Rẽ yĩnga tõnd me tõe n maana woto n vẽneg nebã tɩ b bãng a Zeova bɩ?
17 Wa d sẽn zoe n wilgã, yaa a Zezi n mi a Ba wã sõma n yɩɩda. La a sak n wilga nebã bũmb kẽer a sẽn mi Ba wã zugã, hal n sõng a karen-biisã tɩ b tõog n bãng Ba wã sẽn yaa Wẽnnaam ning buudã sõma. Rẽ yĩnga ne a Zezi sõngre, d pa paam n mi d Ba wã sõma tɩ neb wʋsg rũndã-rũndã pa mi-a sɩda? Ad d sũur yaa noogo, a Zezi sẽn sak n vẽneg tõnd ne a zãmsgã la a manesmã maasem tɩ d bãng a Ba wã! Sɩd me, d tõe n zẽka d zug d sẽn paam n mi Ba wã. (Zer. 9:23; 1 Kor. 1:31) D maana modgr wʋsg sẽn na yɩl n paam zood sõma ne a Zeova, la d sɩd paama a zoodo. (Zak 4:8) Woto kɩtame tɩ d tõe n zãms neb a taab bũmb nins d sẽn mi a Zeova zugã masã. Wãn to la d tõe n maan dẽ?
18, 19. Ne bõe maasem la d tõe n vẽneg nebã tɩ b bãng Ba wã? Wilg-y d sẽn tõe n maan dẽ to-to.
18 D tõe n dɩka a Zezi togs-n-taare, n vẽneg nebã ne d no-goamã la d manesmã tɩ b bãng Ba wã. Tẽegd-y tɩ neb wʋsg d sẽn segd koe-moonegã sasa pa mi Wẽnnaam ye. B sẽn zãms-b bũmb toor-toor sẽn yaa ziri Wẽnnaam zugã yĩng kɩtame tɩ b tar tags-kɛga. D tõe n talla Biiblã n sõng-b tɩ b bãng Wẽnnaam yʋʋrã, raab ning a sẽn tar ne ninsaalbã, la a sẽn yaa Wẽnnaam ning buudã. Sẽn paase, d sã n karemd Biiblã kibay kẽere, tõe n sõng-d lame tɩ d bãng bũmb Wẽnnaam zug d sẽn da pa mi. D tõe n sõssa ne d tẽed-n-taasã kiba-kãens zug tɩ bãmb me rɩ a yõodo.
19 La wãn to la d tõe n dɩk a Zezi naoor n vẽneg nebã ne d manesmã tɩ b bãng Ba wã? Nebã sã n ne d manesmã pʋgẽ tɩ d rɩkda Kiristã togs-n-taar n nong-ba, tõe n kɩtame tɩ b tʋlg n bao n bãng a Zezi ne a Ba wã. (Ef. 5:1, 2) Tʋm-tʋmd a Poll sagl-d lame tɩ d ‘yɩ yẽ togs-n-taas wa yẽ me sẽn yaa Kirist togs-n-taagã.’ (1 Kor. 11:1) Ad d sẽn paam n tõe n sõng nebã ne d manesmã tɩ b bãng a Zeova wã sɩd yaa zu-zẽkr bũmbu! Bɩ d fãa ket n dɩkd a Zezi togs-n-taare, n vẽnegd nebã tɩ b bãngd Ba wã.
[Zãmsgã sogsgã]
