Kell-y n sak-y-yã a Zeova ne y sũurã fãa
Kell-y n sak-y-yã a Zeova ne y sũurã fãa
“M biiga, . . . bãng f ba Wẽnnaam la f sak bãmb ne f sũur fãa.”—1 KIB. 28:9.
BAO-Y SOGS-KÃENSÃ LEOORE:
․․․․․
Sũurã makda bõe?
․․․․․
Bõe n tõe n sõng-d tɩ d fees d menga?
․․․․․
Bõe n tõe n sõng-d tɩ d kell n tũ a Zeova ne d sũur fãa?
1, 2. a) Ninsaal yĩngã wilã sʋka, bʋg yell la b gomd Biiblã pʋgẽ n yɩɩda? b) Bõe yĩng tɩ tar yõod tɩ d bao n bãng sũurã sẽn makd bũmb ningã?
WẼNNAAM GOMDÃ pʋgẽ, b mi n goma ninsaal yĩngã will ning yelle, tɩ yaool n pa willã meng-meng yell la b gomd ye. Ad makr a wãna. A Davɩɩd yeela woto: “Kɩt-y tɩ bãmb ninã koms hal tɩ b ka tõe n yã ye, la tɩ bãmb kars rigi.” Biiblã wilga bũmb toor-toor a Zeova sẽn kisi, n naag “nao sẽn zoet n dabd wẽng maaneg zĩigẽ” bõn-kãens sʋka. A Zeova ra goma Zerizalɛm yell n yeel tɩ yẽ ‘gʋlsa a yʋʋrã a nusã pʋsẽ ne kɩtga.’ No-rɛɛs a Zeremi ra yeela Israyɛll nebã woto: “Yalemb sẽn ka tar bãngre, yãmb tara nini, la y ka ne ye. Yãmb tara tʋba, la y ka wʋmd ye.”—Yɩɩl 69:25; Yel. 6:16-19; Ezai 49:16; Zer. 5:21.
2 La ninsaal yĩngã will a yembr yell la b wae n gomd Biiblã pʋgẽ n yɩɩda: Yaa sũurã. Wẽn-sakd a Ana goma a yell pʋʋsg pʋgẽ n yeel woto: ‘Mam sũur nooma ne Zusoabã.’ (1 Sãm. 2:1) Biiblã gʋlsdb goma sũurã yell naoor tusa, la zĩisã fãa la bala, pa sũurã meng yell la b sẽn gomã ye. Tara yõod wʋsg tɩ d bãng “sũurã” sẽn makd bũmb ningã, bala Biiblã yeelame tɩ d segd n kogl-a lame.—Karm-y Yelbũn 4:23.
SŨURÃ SẼN MAKD BŨMB NINGÃ
3. Wãn to la d tõe n bãng “sũurã” sẽn makd bũmb ningã? Rɩk-y makre.
3 Yaa sɩd tɩ Wẽnnaam Gomdã pa wilgd “sũurã” sẽn makd bũmb ningã vẽeneg ye. La a tõe n sõng-d lame tɩ d bãng a võore. Wãn to? D rɩk makr wa b sẽn na n maan imaaz ne kaaro-bõoneg sẽn yaa kulɛɛr toor-toore, roog lalg zugu. F sã n dat n ges n bãng imaazã sẽn yaa bũmb ningã, rẽnda f targ n leb poorẽ n ges kaaro-rãmbã fãa sẽn ning to-to wã. Tõnd me sã n dat n bãng “sũurã” sẽn makd bũmb ningã, rẽnda d ges Biiblã zĩis nins b sẽn gomd a yellã wʋsgo. Woto wã, sũurã makda bõe?
4. a) “Sũurã” makda bõe? b) A Zezi goam nins sẽn be Matɩe 22:37 wã võor yaa bõe?
4 Biiblã gʋlsdb sã n gomd “sũurã” yelle, nong n yaa nedã sẽn sɩd yaa a soabã yell la b gomda. Rat n yeel t’a tʋlsmã, a tagsa wã, a zʋgã, a sẽn get yɛlã to-to wã, a pãn-tõodã, la a magb toor-toorã. (Karm-y Tõod 15:7; Yelbũn 13:12; Tʋʋm 2:26.) Sɩd me, sebr a yembr yeelame tɩ sũurã makda “ninsaalã sẽn sɩd yaa ned ningã.” La pa wakat fãa la a makd ninsaalã tõr ye. Wala makre, a Zezi yeela woto: “Nong Zusoabã, fo Wẽnnaamã ne f sũur fãa, la ne f sɩɩg fãa, la ne f yam fãa.” (Mat. 22:37) Ka wã, “sũurã” makda ninsaal tʋlsmã, la a tagsa toor-toorã. A Zezi sẽn yeel tɩ d segd n nonga Wẽnnaam ne d sũur fãa, d sɩɩg fãa la d yam fãa wã, rat n yeelame tɩ d nonglmã pa segd n pa d sũurẽ wã bal ye. D segd n wilga rẽ ne d sẽn vɩ to-to wã la d sẽn tagsd to-to wã. (Zã 17:3; Ef. 6:6) La sã n yaa “sũurã” yell bal la b gomda, yaa ninsaalã sẽn sɩd yaa a soabã yell la b gomda.
D SẼN SEGD N KOGL D SŨURÃ VÕORE
5. Bõe yĩng tɩ d rat n mao d pãng tɛk n tũ a Zeova ne d sũur fãa?
5 Rĩm a Davɩɩd da yeela a Salomo woto: “M biig a Salomo, bɩ f bãng f ba Wẽnnaam la f sak bãmb ne f sũur fãa la ne f yam fãa. Bala, Zusoabã feesda nebã fãa sũyã, n mi tõnd fãa tagsg la d ratem.” (1 Kib. 28:9) Sɩd me, a Zeova feesda nebã fãa sũyã, rat n yeel tɩ tõnd ned kam fãa sũuri. (Yel. 17:3; 21:2) La yaa bũmb ning a sẽn yãt d sũurẽ wã sã n tat a yam bal la d tõe n paam a zoodo, la d tõe n saag tɩ beoog-daarã na n yɩ neere. Dẽnd d bee bʋʋm n na n sak a Davɩɩd saglgã, n mao d pãng tɛk n tũ a Zeova ne d sũur fãa.
6. D sẽn dat n maand a Zeova raabã, bõe la d pa segd n yĩmi?
6 D sẽn yaa a Zeova Kaset rãmb n tʋmd a tʋʋmdã ne yẽesmã zoe n wilgdame tɩ d tʋll n maana a raabã ne d sũur fãa. La d miime t’a Sʋɩtãan dũniyã la tõnd tʋls-wẽnsã tõe n talla pãng d zugu, tɩ d pa le tõe n tũ a Zeova ne d sũur fãa ye. (Zer. 17:9; Ef. 2:2) Sẽn na yɩl t’a buud ra wa paam-do, segdame tɩ d feesd d meng wakat fãa. Wãn to la d tõe n maan dẽ?
7. Bõe n wilgd tõnd sẽn sɩd yaa ned ning buudã?
7 Wa d sẽn pa tõe n ges tɩɩg n yãa a sũurã, ned pa tõe n ges tõnd me n bãng d sẽn sɩd yaa ned ning buudã ye. La a Zezi sẽn wa n sõsd ne nebã tãngã zugã, a yeel-b lame tɩ tɩɩg biis n wilgd a sã n yaa tɩ-sõng bɩ a pa tɩ-sõngo. Dẽnd yaa bũmb nins tõnd sẽn maandã n wilgd d sẽn sɩd yaa ned ning buudã. (Mat. 7:17-20) Bɩ d gom bũmb a yembr yelle.
BŨMB SẼN TÕE N SÕNG-D TƖ D FEES D MENGA
8. Sã n yaa ne a Zezi goam nins sẽn be Matɩe 6:33 wã, wãn to la ned wilgd sẽn be a sũurẽ?
8 A Zezi sẽn wa n sõsd ne nebã tãngã zugã, a wilga a kɛlgdbã bũmb ning b sẽn tõe n maan n wilg tɩ b rat n tũ a Zeova ne b sũur fãa me. A yeela woto: ‘Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.’ (Mat. 6:33) Sɩd me, bũmb ning tõnd sẽn lʋɩɩsd taoorã wilgda d tʋlsem, d tagsg la d sẽn magd bũmb ning d sũurẽ wã. Dẽnd bũmb d sẽn tõe n maan n bãng d sã n tũuda Wẽnnaam ne d sũur fãa, yaa d sẽn na n baood n bãngd bũmb ning sẽn tar yõod ne-d n yɩɩdã.
9. A Zezi boola rap tɩ b wa maan bõe, la b manesem sẽn yɩ to-to wã wilgda bõe?
9 A Zezi sẽn sagl a karen-biisã tɩ b reng n bao Wẽnnaam Rĩungã poor bilfu, bũmb n maane, tɩ wilgdẽ tɩ bũmb ning d sẽn lʋɩɩsd taoorã tõe n kɩtame tɩ b bãng d sẽn sɩd yaa ned ningã. Evãnzill-gʋlsd a Luk goma bõn-kãng yell n yeel t’a Zezi ‘yãka yam n na n kẽng Zerizalɛm,’ baa a sẽn da mi bũmb ning sẽn na n paam-a be wã. Yẽ ne a tʋm-tʋmdbã sẽn wa n “be sorẽ n dabda,” a sega rap n bool-b tɩ b wa tũ yẽ. Nin-kãens yeelame tɩ b na n tũ-a lame, la b ned kam fãa ra tara bũmb a sẽn dat n deng n maane. Ned a yembrã leoka a Zezi woto: ‘Bɩ y bas maam tɩ m deng n kẽng n tɩ mum m ba la m yaool n wa.’ T’a to wã yeel woto: ‘Zusoaba, mam na n tũu yãmba, la bɩ y bas maam tɩ m deng n kẽng n tɩ pʋʋs m yirã rãmb Wẽnd-na-taas la m wa.’ (Luk 9:51, 57-61) Ad d sɩd nee welgr ning sẽn be a Zezi ne nin-kãensã sʋka. A Zezi ra tʋll n maana Wẽnnaam daabã ne a sũur fãa, la ra-kãensã sẽn leok to-to wã wilgdame tɩ b yam da pa be Wẽnnaam daabã maaneg ye. B sẽn lʋɩɩs b mensã raab taoorã, b wilgame tɩ b ra pa rat n tũ Wẽnnaam ne b sũur fãa ye.
10. a) A Zezi sẽn bool tõnd tɩ d wa lebg a karen-biisã, d manesem yɩɩ wãna? b) Mak-bʋg la a Zezi rɩk-yã?
10 Tõnd yẽ pa maan wa nin-kãensã ye. D saka a Zezi boollã n lebg a karen-biisi, n maand a Zeova raabã daar fãa. D sẽn maan woto wã, d wilgame tɩ d nonga a Zeova ne d sũur fãa. La baa d sẽn maand a Zeova raabã, d segd n tẽegame tɩ d tog n ket n gũusdame. Bõe yĩnga? A Zezi sẽn dɩk makr ning n leok rap nins a sẽn bool tɩ b padmã wilgda rẽ. A yeel-b-la woto: “Ned sã n zãad wãk n kood la a rat n wẽnemd n ges a poorẽ, a ka zems tɩ kẽ Wẽnnaam soolmẽ ye.” (Luk 9:62) Sagl-bʋg la d tõe n dɩk mak-kãng pʋgẽ?
Y ‘GÃDA SẼN YAA SÕMA WÃ KÃN-KAE’ BƖ?
11. Makr ning a Zezi sẽn dɩkã pʋgẽ, koaadã tʋʋmd yɩɩ wãna, la bõe yĩnga?
11 Bɩ d maneg n tags a Zezi makrã zugu, tɩ na n sõng-d lame tɩ d bãng saglg ning a sẽn kõt-dã. Nedã balga rũng n kooda, la a ket n tagsd bũmb ning sẽn be yirã yelle. A tagsda a sẽn da tõe n be ne a zakã rãmb la a zo-rãmba, tɩ b zĩ maasmẽ n dɩtẽ la b kelgd mizik tɩ yaa laado. A rata ne a sũur fãa n da be yiri. A sẽn tar koobã, bõn-noodã tʋlsem wa n paama pãng a sũurẽ, hal t’a ‘wẽnemd n get a poorẽ.’ Baa pʋʋgã a sẽn da segd n ko tɩ b bʋdã sẽn da ket wʋsgã, a basame t’a tʋlsem toor-toorã tiisd-a t’a pa tõe n tʋm a tʋʋmdã sõma ye. Vẽenega, pʋʋgã soab sũur na n sãama ne koaadã a sẽn pa tʋm ne yẽesmã yĩnga.
12. Wãn to la bũmb ning sẽn paam koaad ning yell a Zezi sẽn gomã tõe n paam kiris-ned rũndã-rũndã?
12 Bɩ d ges bũmb ning sẽn paam koaadã sẽn tõe n paam ned rũndã-rũndã to-to. Kiris-ned tõe n wa wõnega koaadã, a sã n maand wa a tũuda Wẽnnaam sõma tɩ yaool n pa woto ye. Wala makre, tags-y n ges-y saam-biig sẽn na n kẽnd tigissã la a moond koɛɛgã. La ne rẽ fãa, a ket n tagsda bũmb kẽer sẽn be dũniyã pʋgẽ tɩ b yamleoog tar-a, n tʋll bõn-kãens ne a sũur fãa. Saam-biigã sẽn tũ Wẽnnaam yʋʋm a wãn poore, a tʋlsmã paama pãng a sũurẽ wã, t’a ‘wẽnemd n get a poorẽ.’ Baa koɛɛgã sẽn ket n dat moonegã, a basame n pa le “talld vɩɩm koɛɛgã kãn-kãe,” n pa le tʋmd Wẽnnaam tʋʋmdã sõma me ye. (Fil. 2:16) A Zeova sẽn yaa “tigsgã soabã” sũur pa noom ne a tʋm-tʋmd sẽn pa le tʋmd ne yẽesem ye.—Luk 10:2.
13. Tũ a Zeova ne f sũur fãa wã baooda bõe maanego?
13 Saglgã yaa vẽenega. D sã n kẽnd tigissã wakat fãa la d moond koɛɛgã n pa vaandẽ, yaa sõma. La tũ Wẽnnaam ne f sũur fãa wã pa tek woto ye. (2 Kib. 25:1, 2, 27) Kiris-ned sã n ‘wẽnemd n get a poorẽ,’ rat n yeel t’a sã n get bũmb nins sẽn be dũniyã pʋgẽ wã kẽer n dat-ba, zood ning a sẽn tar ne a Zeova wã tõe n wa sãamame. (Luk 17:32) Yaa d sẽn na n ‘kisg sẽn yaa wẽnga, la d gãd sẽn yaa sõma kãn-kae’ bal la d na n yɩ ned sẽn “zems tɩ kẽ Wẽnnaam soolmẽ” wã. (Rom 12:9; Luk 9:62) Yaa sɩd t’a Sʋɩtãan dũniyã bũmb kẽer tõe n wõnda b tara yõod wall b tara yamleoogo. La d segd n modgame tɩ baa fʋɩ ra wa kɩt tɩ d pa maan Wẽnnaam daabã ne d sũur fãa ye.—2 Kor. 11:14; karm-y Filip rãmb 3:13, 14.
KET-Y N GŨUSD-Y!
14, 15. a) Wãn to la a Sʋɩtãan maood n dat n boog yẽesem ning d sẽn tar a Zeova tʋʋmdã pʋgẽ wã? b) Rɩk-y makr n wilg bũmb ning sẽn kɩt t’a Sʋɩtãan sɩlmã yaa wẽng wʋsgã.
14 Tõnd sẽn nong a Zeova wã kɩtame tɩ d rɩk d meng n kõ-a. Tõnd sʋkã, wʋsg sẽn deeg lisg kaoosa yʋʋma. La b ket n wilgdame tɩ b sɩd tʋll n tũ a Zeova ne b sũur fãa. Baasgo, a Sʋɩtãan ket n pa basd-d laafɩ ye. A sẽn dat yaa a we n paam tɩ d pa le maand a Zeova raabã ne d sũur fãa ye. (Ef. 6:12) Yaa vẽeneg t’a miime t’a pa tõe tɩ d bas a Zeova zĩig pʋgẽ ye. Rẽ n so t’a maand sɩlem n tũnugd “ne dũniyã yɛl” n dat n boog d yẽesmã bilf-bilfu. (Karm-y Mark 4:18, 19.) Bõe yĩng t’a Sʋɩtãan sɩlem-kãng tar pãnga?
15 Sẽn na yɩl n leok sok-kãngã, d rɩk makr wa yãmb sẽn na n sui nangur laag piig yolg pʋgẽ, n bas n loog weoogo. Yãmb biig n yõd n kẽ n yõng nangurã nug noore. Rẽ yĩnga y sã n wa, y na bãng tɩ ned n yãk nangurã sɩda? Y pa tõe ye. La vẽkembeoogo, a yãka nug noor a yi. Y na bãng sɩda? Tõe tɩ y ket n pa na n bãng ye. Bala, nangurã boogda bilf-bilfu. Woto me, a Sʋɩtãan dũniyã tõe n kɩtame tɩ d yẽesmã boogd bilf-bilfu. A buudã sã n wa paam kiris-neda, a Sʋɩtãan tõog n booga yẽesem ning a sẽn tar a Zeova tʋʋmdã pʋgẽ wã, wa nangurã sẽn boogã. Kiris-ned sã n pa gũusda, a buudã tõe n wa paam-a lame t’a pa tol n bãng ye.—Mat. 24:42; 1 Pɩɛ. 5:8.
PƲƲSGÃ YAA TƖLAE
16. Bõe la d tõe n maan t’a Sʋɩtãan da tõog-do?
16 Bõe la d tõe n maan t’a Sʋɩtãan da tõog-do, la d ket n tũud a Zeova ne d sũur fãa? (2 Kor. 2:11) Pʋʋsgã yaa tɩlae. A Poll sagla a tẽed-n-taasã tɩ b mao n “tõog Sʋɩtãanã sɩlem fãa.” Rẽ poore, a paasa woto: “Bɩ y maan pʋʋsg la kosg wakat fãa . . . n da bas ye.”—Ef. 6:11, 18; 1 Pɩɛ. 4:7.
17. A Zezi sẽn da pʋʋsd to-to wã wilgda tõnd bõe?
17 Sẽn na yɩl t’a Sʋɩtãan da tõog-do, d segd n dɩka a Zezi togs-n-taare, n pʋʋsd a Zeova wakat fãa tɩ wilgdẽ tɩ d tʋll n sak-a-la ne d sũur fãa. A Luk goma a Zezi sẽn pʋʋs to-to a yõkrã daar yʋngã yelle, n yeel woto: “B sẽn paam sũ-sãoong hal wʋsgã, bãmb pʋʋsa ne pãng n yɩɩd pĩnda.” (Luk 22:44) A Zezi ra minim n pʋʋsda ne a sũur fãa. La a sẽn da be makr ning taoorã sẽn yaa toog n yɩɩd makr nins fãa a sẽn paam tẽngã zugã yĩnga, a pʋʋsa ne a sũur fãa ‘n yɩɩd pĩndã.’ Wẽnnaam deega a pʋʋsgã. A Zezi makrã wilgdame tɩ sasa ninga, d tõe n pʋʋsa ne d sũur fãa n yɩɩge. Rẽnd d makr sã n wa lebgd kɛgenga, t’a Sʋɩtãan me maneg n maood a na tõog-do, d segd n maneg n pʋʋsa ne d sũur fãa “n yɩɩd pĩndã,” n kos a Zeova sõngre.
18. a) Pʋʋsgã wɛɛngẽ, sogs-bʋs la d segd n sok d menga, la bõe yĩnga? b) Bõe n tõe n naf-do, la wãn to? (Ges-y zĩ-gũbrã sẽn be seb-neng 22 wã.)
18 Wãn to la pʋʋs-kãens buudã nafd tõndo? A Poll yeela woto: ‘Ne pʋʋsgo, la ne bark pʋʋsgo, bɩ y wilg Wẽnnaam yãmb sẽn dat bũmb ninsi. La Wẽnnaam laafɩ sẽn yɩɩd nebã bãngr fãa na gũ yãmb sũyã.’ (Fil. 4:6, 7) Sɩd me, d sã n dat n tũ a Zeova ne d sũur fãa, d segd n pelgda d pʋg n pʋʋsd-a n pa vaandẽ ye. (Luk 6:12) Rẽnd segdame tɩ d sok d meng woto: ‘Mam pʋʋsgã pãng taa zĩ-bʋgo? Rẽ yĩnga mam pʋʋsdame n pa vaandẽ bɩ?’ (Mat. 7:7; Rom 12:12) Y sẽn na n leok sogs-kãensã to-to wã wilgda y sã n sɩd tʋll n tũu Wẽnnaam ne y sũur fãa.
19. Bõe la y na n maan n tõog n kell n tũ a Zeova ne y sũur fãa?
19 Wa d sẽn yã wã, bũmb nins d sẽn lʋɩɩsd taoorã tõe n kɩtame tɩ b bãng d sẽn sɩd yaa ned ning buudã. D segd n gũusame tɩ bũmb nins d sẽn bas poorẽ wã la a Sʋɩtãan sɩlmã ra wa kɩt tɩ d toeem yam, n pa le tũud a Zeova ne d sũur fãa ye. (Karm-y Luk 21:19, 34-36.) Woto yĩnga, bɩ d rɩk a Davɩɩd togs-n-taare, n kot a Zeova t’a ‘kõ-d yam a yembre.’—Yɩɩl 86:11.
[Zãmsgã sogsgã]
[Zĩ-gũbri, seb-neng 22]
Bũmb a tãab sẽn tõe n naf d sũurã
Bũmb toor-toor n be d sẽn tõe n maan tɩ naf d sũurã. Rẽnd bũmb toor-toor me be d sẽn tõe n maan tɩ naf sũurã sẽn makd bũmb ningã. Bɩ d gom b tãab sẽn tar yõod yelle:
1 Rɩɩbã: Sẽn na yɩl tɩ d sũurã tall laafɩ, d segd n dɩta sõma. Woto me, d segd n baooda Wẽnnaam bãngrã sẽn yaa wa rɩɩb sẽn nafd d sũurã sẽn makd bũmb ningã, n zãmsd Wẽnnaam Gomdã n pa vaandẽ, n bʋgsd a zugu, la d kẽnd tigissã me n pa vaandẽ ye.—Yɩɩl 1:1, 2; Yel. 15:28; Heb. 10:24, 25.
2 Yĩn-wɩsgrã: Sẽn na yɩl tɩ d sũurã ket n tar laafɩ, d segd n mi n maana bũmb n kɩt t’a tʋm wʋsgo. Woto me, d sã n maood wʋsg koɛɛgã mooneg pʋgẽ, n moond d sẽn tõe tɛka, nafda d sũurã sẽn makd bũmb ningã.—Luk 13:24; Fil. 3:12.
3 Tũud-n-taarã: D sẽn vɩ wẽn-kɩɩsdb sʋk la d tʋmd ne ne-bã, tõe n namsa d sũurã, la d sũurã sẽn makd bũmb ningã. La d sã n nong n be ne d tẽed-n-taasã sẽn nong-d la b tũud Wẽnnaam ne b sũy fãa wã, nafd-d lame. —Yɩɩl 119:63; Yel. 13:20.
