Bao-y n pẽneg-y Wẽnnaam

‘Sõng-y tɩ m lebg n wa yãmb nengẽ’

Yãmb da tũuda a Zeova n wa bas bɩ? Y tʋll n lebs n sɩnga a tũub tɩ y yam yood ne a sã n na n sak n deeg-y lame bɩ? Sã n yaa rẽ, bɩ y maag y yĩng n karem sõs-kãngã tɩ b gʋls-a-la yãmb yĩnga.

PAG a ye roagdb n da zãms-a Biiblã hal a yãadmẽ t’a wa lebg kiris-neda. La a wa n basa a Zeova tũubu. Ad a sẽn yeele: “Mam pʋʋsa a Zeova n kos-a t’a sõng-m tɩ m lebg n wa a nengẽ, la t’a kõ-m sugr m sẽn beeg-a wã yĩnga.” Pʋg-kãngã nimbãaneg pa tar-y sɩda? Tõe tɩ y sokda y meng woto: ‘Wẽnnaam tagsg yaa wãn ne neb nins sẽn bas a tũubã? A tẽra b yell bɩ? A ratame tɩ b lebg n wa a nengẽ bɩ?’ Sẽn na yɩl n paam sogs-kãensã leoore, bɩ d vaees goam a Zeremi sẽn togs a sebrã pʋgẽ. D kɩsa sɩd tɩ na n bels-y-la wʋsgo.—Karm-y Zeremi 31:18-20.

D reng n ges bũmb ning sẽn kɩt t’a Zeremi wa gomd gom-kãensã. Yʋʋmd 740 soab sẽn deng a Zezi rogmã, a Zeova basame tɩ Asiri nebã wa yõg Israyɛll buud piigã neb n tall n kẽng yembdo. * Wẽnnaam tũnuga ne yel-kãngã n na n sɩbg-ba, bala, b ra maanda yel-wẽn-kãsemse, la b pa kelg no-rɛɛsdbã a sẽn tʋm naoor wʋsg tɩ b tɩ sagl-bã ye. (2 Rĩm dãmba 17:5-18) Rẽ yĩnga b sẽn tall-b n kẽng tẽn-zãrgẽ tɩ b tɩ paam toogo, la b ra pa le tar zood ne b Wẽnnaamã, b teka yam bɩ? A Zeova yĩma b yell fasɩ bɩ? A ra na n sõng-b lame tɩ b lebg n leb b ba-yirã bɩ?

“Tõnd yaool n teka yam”

Israyɛll nebã sẽn wa n tɩ be yembdã, b bãngame tɩ b sẽn maanã yaa wẽng wʋsgo, n tek yam n kot sugri. A Zeova yãame tɩ b sɩd teka yam. A boola b fãa t’a Efrayim, n bilg b manesem sẽn yɩ to-to yembdã pʋgẽ. Ad a sẽn yeele:

“Mam wʋma Efrayim nebã yãbre.” (Vɛrse 18) A Zeova wʋma Israyɛll nebã kelemse, b yel-wẽnã biis sẽn da namsd-bã yĩnga. Biibl-mit a yembr yeelame tɩ vɛrse wã gom-bil ning b sẽn lebg tɩ “yãbrã” võorã meng-meng yaa “wõosgo.” Nin-buiidã ra maanda wa bi-yoog sẽn zĩ n tagsd toog a sẽn bao n kõ a meng yelle, n gird a zug n maand a bãngẽ. (Luk 15:11-17) Bõe la Israyɛll nebã ra yeta?

“Yãmb sɩbga tõndo, . . . wa nag-bil sẽn nan ka wõre.” (Vɛrse 18) Nin-buiidã sak n deegame tɩ b segda ne sɩbgrã. B pʋd n yeelame tɩ bãmb yɩɩ wa nag-bil sẽn nan ka wõre. Woto tõe n dat n wilgame tɩ b sã n da pa yɩẽ tõatba, b ra pa na n tol n kẽng yembd ye.

“Kɩt-y tɩ d lebge. Tɩ bõe, yaa yãmb n yaa Zusoab a Wẽnnaam.” (Vɛrse 18) B sika b mens n kot Wẽnnaam sõngre, bala yel-wẽn nins b sẽn da maanã zãag-b-la ne Wẽnnaam.  La masã, b kot-a lame t’a sõng-b tɩ b lebg n wa a nengẽ. Biiblã a ye (Sebr Sõngo) yeelame tɩ b kosa Wẽnnaam woto: “Sõng-y tɩ d le lɛɛg n kẽ yãmba.”

“Tõnd yaool n teka yam. . . . Yãnd yõka tõndo.” (Vɛrse 19) Nin-buiidã sũy sãama b yel-wẽnã yĩnga. B sak n deegame tɩ b tara taale, n deeg sɩbgrã. B yeelame me tɩ bãmb ned kam fãa pĩisda a yãoogo, tɩ wilgdẽ tɩ b sũy sãamame.—Luk 15:18, 19, 21.

Israyɛll nebã teka yam n kos sugri. B sũy sãama wʋsgo, b vẽnega b yel-wẽnã n togs Wẽnnaam, la b bas b tʋʋm-wẽnsã. Rẽ yĩnga b sẽn maan woto wã sigsa Wẽnnaam sũur bɩ? A na n sak n le reeg-b lame bɩ?

“M na n zoee bãmb nimbãanega”

A Zeova ra nonga Israyɛll nebã wʋsgo. Ad a sẽn yeele: “Mam yaa Israyɛll nebã ba, la a Efrayim yaa m bi-kãsenga.” (Zeremi 31:9) Rẽ yĩnga biig sã n beeg a ba n wa kot sugr ne a sũur fãa, a kõn sak n deeg-a sɩda? A Zeova wilgame t’a nonga a nin-buiidã wa ba sẽn nong a biig to-to wã. A yeela woto:

“Efrayim nebã yaa m kom-nongdse. La wakat fãa, mam sã n leng bãmba, yaa tɩlae tɩ m kell n tẽeg b yelle.” (Vɛrse 20) Ad gom-kãensã sɩd kengda raoodo. Roagd sẽn nong a kamb pa basd-b tɩ b maan yaar ye. Woto me, yɩɩ tɩlae ne Wẽnnaam t’a wilg a nin-buiidã naoor wʋsg tɩ b sẽn maandã pa noom-a ye. La b sẽn pa sak n kelgã, a basame tɩ b yõg-b n kẽng ne yembdo, tɩ yaa wa b sẽn yi b ba wã zakẽ. La baa sẽn yɩ tɩlae t’a sɩbg-bã, a pa raag-b n bas ye. A pʋd n pa na n sak n maan dẽ ye. Bala, ba sẽn nong a kamb pa maand woto ye. La a Zeova sẽn yã t’a kambã teka yam n kot sugrã, a manesem yɩɩ wãna?

“Mam data bãmb ne m sũur fãa. La m na n zoee bãmb nimbãanega.” (Vɛrse 20) A Zeova ra rata a kambã ne a sũur fãa. B sẽn sɩd tek yam n kot sugrã yɩ-a-la noogo, t’a sɩd ra rat tɩ b lebg n wa a nengẽ. Wa a Zezi sẽn da gom biig sẽn sãam a ba paoong yell n wilg biigã ba sẽn zoe a nimbãaneg to-to wã, a Zeova “zoe a [kambã] nimbãaneg” woto, n da tʋll ne a sũur fãa tɩ b lebg n wa a nengẽ.—Luk 15:20.

Zeova, ‘kɩt-y tɩ m lebge’

Zeremi 31:18-20 goamã kɩtame tɩ d miẽ t’a Zeova sɩd yaa nimbãan-zoɛt la sugr soaba. A pa basd neb nins sẽn bas a tũubã ye. La nin-kãens buudã sã n dat n lebg n wa a nengẽ yẽ? A na n sak n ‘kõ-b-la sugri.’ (Yɩɩl Sõamyã 86:5) A pa na n tol n bas neb nins sẽn tek yam n kot sugrã ye. (Yɩɩl Sõamyã 51:19) A na n lebs n deeg-b-la ne sũ-noogo.—Luk 15:22-24.

Pag ning yell d sẽn gom sɩngrẽ wã yãka yam n na n lebg n wa a Zeova nengẽ. A kẽnga tigsg a Zeova Kaset rãmbã Rĩung roogẽ. Yɩɩ tɩlae ne-a t’a reng n dems tagsa nins a sẽn da tarã. Ad a sẽn yeele: “Mam da tagsdame tɩ m pa le tar yõod Wẽnnaam nifẽ ye.” Tigingã kãsem-dãmb kenga a raoodo, la b sõng-a t’a lebs n paam Wẽnnaam zoodo. A wa n yeela woto: “Mam sũur nooma hal wʋsgo, a Zeova sẽn sak tɩ m lebg n wa a nengẽ wã!”

Y sã n basa a Zeova tũub n dat n lebg n wa a nengẽ, d kot-y lame tɩ y kẽng tigsg a Zeova Kaset rãmbã Rĩung roogẽ. Tẽeg-y tɩ ned sã n beeg a Zeova n wa kot sugr n dat ‘n lebg n wa a nengẽ,’ a zoeta a nimbãaneg n kõ-a sugri, n lebs n deeg-a.

[Tẽngr note]