“B ka na n le tẽeg bũmb nins sẽn da zĩnd pĩndã yell ye”
Bao-y n pẽneg-y Wẽnnaam
“B ka na n le tẽeg bũmb nins sẽn da zĩnd pĩndã yell ye”
D SÃ N tẽeg bũmb kẽer yelle, d sũur yaa noogo. Wala makre, bũmb d sẽn da naag neb d sẽn nong n maan tɩ yɩ d noogo. La d sã n tẽeg bũmb sãnda yelle, sãamda d sũuri. Yãmb mi n tẽegda yɛl kẽer tɩ namsd-y bɩ? Sã n yaa rẽ, tõe tɩ y sokda y meng woto: ‘Rẽ yĩnga m na n wa tõog n yĩma bõn-kãensã fãa sɩda?’ No-rɛɛs a Ezai sebrã pʋgẽ, b leokda sok-kãngã tɩ kengd raood wʋsgo.—Karm-y Ezai 65:17.
A Zeova wilgame t’a na n menesa bũmb nins sẽn wat ne sũ-sãamsã. Wãn to la a na n maan dẽ? A na n sãama dũni kãngã ne a wẽnemã fãa, n ledg-a ne bũmb sõmblem sẽn ka to. A Zeova yeela a Ezai woto: “Mam na n maana yĩngr-paalga, la dũni-paalga.” D sã n wʋm gom-kãensã võore, d na n kɩsa sɩd tɩ manegr n wate.
“Yĩngr-paalgã” yaa bõe? D tõe n tika bũmb a yiib yell Biiblã sẽn gom n bãng rẽ. Pipi, Biiblã gʋlsdb a yiib me n gom yĩngr-paalgã yelle. B fãa sẽn gom a yell to-to wã wilgdame tɩ toeem-kãsems n na n zĩnd tẽngã zugu. (2 Pɩɛɛr 3:13; Wilgri 21:1-4) Yiib-n-soaba, Biiblã pʋgẽ, b sã n gom “yĩngr” bɩ “saas” yelle, tõe n yaa goosneema yell la b gomda. (Ezai 14:4, 12) Dẽnd yĩngr-paalgã yaa goosneema-paalle. Yaa goosneema sẽn tõe n kɩt tɩ tɩrlem zĩnd tẽngã zugu. La goosneema a ye bal n tõe n maan dẽ: Yaa Wẽnnaam Soolmã bɩ a Rĩungã sẽn yaa goosneema n be saasẽ wã. A Zezi yeela a karen-biisã tɩ b pʋʋs tɩ goosneema kãng wa. A sã n wa, a na n kɩtame tɩ Wẽnnaam daabã maan dũniyã gill zugu.—Matɩe 6:9, 10.
La tẽn-paalgã yaa bõe? Biiblã wilga bũmb a yiib sẽn tõe n sõng-d tɩ d paam sok-kãngã leoore. Pipi, Biiblã sã n gomd “tẽngã” yelle, mi n yaa ninsaalbã yell la a gomda, pa tẽn-gãongã yell ye. (Yɩɩl Sõamyã 96:1, Sebr Sõngo) Yiib-n-soaba, Biiblã wilgame tɩ Wẽnnaam Rĩungã naam sasa, wẽn-sakdbã na n maneg n zãmsa tɩrlem, tɩ dũniyã pid ne nin-tɩrse. (Ezai 26:9) Dẽnd tẽn-paalgã makda ninsaalb sẽn na n sak Wẽnnaam Rĩungã, n tũud a noyã sẽn yaa tɩrsã.
Masã, y ne a Zeova sẽn na n maan to-to n menes bũmb nins fãa sẽn wat ne sũ-sãamsã tɩ d ra le tẽeg b yellã bɩ? Ka la bilfu, a na n kɩtame tɩ yĩngr-paalg la tẽn-paalg zĩnd wa a sẽn pʋlmã, n wa ne dũni-paalga, tɩrlem sẽn na n zĩnd a pʋgẽ. * Sẽn na n vɩɩmd-b dũni-paalgã pʋgẽ wã na n yĩma bũmb nins fãa sẽn sãamd sũurã. Wẽn-sakdbã na n paama vɩɩm hakɩkã. Beoog sẽn vẽeg fãa, bũmb nins yell b sẽn na n tẽegdẽ wã na n kõt-b-la sũ-noogo.
La tood nins fãa sẽn sãamd d sũy rũndã-rũndã wã yẽ? A Zeova sẽn da yeel a Ezai bũmb ningã pʋgẽ, a paasa woto: “B ka na n le tẽeg bũmb nins sẽn da zĩnd pĩndã yell ye, b ka na n le tags b yell ye.” Dẽnd bilf-bilfu, d na n yĩma bũmb nins fãa sẽn sãam d sũur dũni kãngã pʋgẽ wã. Y pa rat n wa paam n vɩɩmd wakat kãng sɩda? Sã n yaa rẽ, bɩ y bao n bãng y sẽn tõe n pẽneg Wẽnnaam ning sẽn pʋlem woto wã to-to.
[Tẽngr note]
^ sull 7 Y sã n dat n bãng Wẽnnaam Rĩungã sẽn yaa bũmb ningã sõma, la bũmb nins a sẽn na n maan ka la bilfã, bɩ y ges Biiblã sɩd yetame tɩ bõe? sebrã sak a 3, a 8, la a 9. A Zeova Kaset rãmbã n yiis seb-kãnga.
[Goam sẽn tar pãnga, seb-neng 12]
A Zeova wilgame t’a na n menesa bũmb nins sẽn wat ne sũ-sãamsã
