Teeg-y-yã a Zeova sẽn yaa Wẽnnaam ning ‘sẽn so wakatã’

“Wakat fãa yaa bãmb n so. Bãmb lubda rĩm-dãmba, la yaa bãmb n kõt naam.”—DAN. 2:21.

Y NA N LEOKAME TƖ BÕE?

Wãn to la bõn-naandsã la bãngr-goam nins sẽn zoe n pidsã wilgd t’a Zeova la Wẽnnaam ning sẽn so wakatã?

D sẽn mi t’a Zeova la Wẽnnaam ning ‘sẽn so wakatã’ kɩtame tɩ d maand bõe?

Bõe yĩng tɩ yɛl nins sẽn maand dũniyã zugã, la ninsaalbã manesem pa tõe n toeem a Zeova raabã pidsg wakate?

1, 2. Bõe yĩng tɩ d tõe n yeel t’a Zeova mii wakatã sẽn yaa bũmb ningã?

YƲƲM wʋsg nand tɩ Wẽnnaam a Zeova naan ninsaala, a naana bũmb toor-toor b sẽn tõe n tik n bãng n mag wakatã. A sẽn wa n sɩng ãndũniyã bũmba fãa naanegã poore, rasem a naas-n-soabã, a “yeelame tɩ vẽenem-dãmb zĩnd saasẽ n welg wĩntoog ne yʋngo,” la tɩ “bãmb zĩnd n yɩ bãn n wilg wakat la dasma la yʋʋma.” (Sɩng. 1:14, 19, 26) La sɩd yɩɩ wa a Zeova sẽn da ratã bal kɛpɩ.

² Baasgo, hal n tãag masã, siãnsã bãngdb ket n pa tõe n bilg wakatã sẽn yaa bũmb ningã sõma ye. Sebr a ye yeela woto: “Wakatã naaga bũmb nins võor d sẽn pa tõe n wʋm sõma wã sʋka. Ned kae n tõe n bilg a sẽn yaa bũmb ningã vẽeneg ye.” La a Zeova yẽ mii wakatã sẽn yaa bũmb ningã. Sɩd me, yaa yẽ “n naan saasã,” la a “naan dũniyã.” Leb n yaa yẽ bal n tõe tɩ ‘hal sɩngr wakate, bɩ a wilg bũmb nins sẽn maan n loogã, la a reng n wilg bũmb nins sẽn nan ka maanã me.’ (Ezai 45:18; 46:10) Sẽn na yɩl tɩ d maneg n kɩs sɩd ne a Zeova la ne Biiblã sẽn yaa a Gomdã, d na n goma bõn-naandsã la bãngr-goam kẽer sẽn zoe n pids yelle. D na n yãame tɩ yaa a Zeova n sɩd so wakatã.

BŨMB NINS A ZEOVA SẼN NAANÃ WILGDAME TƖ YAA YẼ N SO WAKATÃ

3. Bũmb nins d sẽn tõe n tik n bãng n mag wakatã kẽer la bʋse?

³ Bõn-naandsã sʋka, bũmb wʋsg pa maand yaar ye. B tara wakat takɩ n maandẽ. Wala makre, ãdsã sẽn kẽnd to-to wã kɩtame tɩ d tõe n ges-b n bãng d sẽn be yʋʋmdã sasa ningã. So-toagd me tõe n ges-b lame n bãng a sore. Sẽn yaa a Zeova n naan bõn-kãensã d sẽn tõe n tik n bãng wakatã yĩnga, a  ‘pãngã yaa kãsenga,’ t’a zems ne waoogre.—Karm-y Ezai 40:26.

4. Wãn to la bõn-vɩɩsã sẽn tar wakat takɩ n maand bũmb kẽerã wilgd Wẽnnaam yamã?

⁴ Bõn-vɩɩsã sʋk me, d neeme tɩ bũmb wʋsg tara b wakate. Wala makre, rũmsã wʋsg tara wakat takɩ n maand bũmb sãnda. Liuuli wʋsg tara wakat n yɩkd n toeemd zĩiga. Tɩɩsã me tũuda wakatã. (Zer. 8:7) Ninsaalbã me tũuda wakatã n vɩ. Wala makre, sã n yaa wĩntoog wall sã n yaa yʋngo, tõnd yĩngã sẽn dat bũmb ninsã yaa toor-toore. D sã n kẽ nasaar-sɩlg n tog sor n zãag zĩiga, be wakatã sẽn pa ye ne d sẽn yiẽ wã yĩnga, maanda rasem a wãn tɩ d yĩngã yaool n minim. Dẽnd a Zeova bõn-naandsã sʋka, bũmb wʋsg n wilgd t’a yaa Wẽnnaam ning ‘sẽn so wakatã,’ la t’a tara pãng la yam wʋsgo. (Karm-y Yɩɩl Sõamyã 104:24.) Sẽn paase, a Zeova yamã la a pãngã sẽn ka koakã yĩnga, d tõe n kɩsa sɩd t’a raab buud fãa pidsdame.

BÃNGR-GOAM SẼN PIDS B WAKAT TƖ KENGD D TẼEBO

5. a) Bõe bal n tõe n sõng-d tɩ d bãng ninsaalbã beoog-daarã sẽn na n yɩ a soabã? b) Bõe yĩng t’a Zeova tõe n wilg bũmb sẽn nan pa maan la wakat ning a sẽn na n maanã?

⁵ A Zeova bõn-naandsã gesg tõe n sõng-d lame tɩ d bãng bũmb wʋsg a zugu, la d pa tõe n tik-b n bãng sogsg kẽer sẽn tar yõod leoor ye. Wala makre, d pa tõe n tik-b n bãng ninsaalbã beoog-daar sẽn na n yɩ a soab ye. (Rom 1:20) Sẽn na yɩl n bãng sogsg a woto leoore, d segd n gesa bũmb nins Wẽnnaam sẽn vẽneg tɩ b gʋls Biiblã sẽn yaa a Gomdã pʋgẽ wã. Biiblã tara bãngr-goama. B kẽer zoe n pidsame tɩ zems wakat ning Wẽnnaam sẽn da wilgã bal kɛpɩ! A Zeova tõe n bãnga bũmb t’a nan pa maan ye. Bala, a tõe n bãnga yɛl nins sẽn wat beoog-daarã sõma. Sẽn paase, Biiblã bãngr-goamã pidsda wakat ning Wẽnnaam a Zeova sẽn wilgã, bala a tõe n kɩtame tɩ yɛl kẽer maan n zems ne a raabã la wakat ning a sẽn yãkã.

6. Bõe n wilgd t’a Zeova ratame tɩ d wʋm Biiblã bãngr-goam võore?

⁶ A Zeova ratame t’a nin-buiidã wʋm Biiblã bãngr-goamã võor tɩ naf-ba. Rẽ n so tɩ baa Wẽnnaam sẽn magd wakatã to-to wã sẽn pa ye ne tõndã, a sã n wa na n togs bãngr-gomd n dat tɩ d bãng a sẽn na n pids wakat ningã, a tũnugda ne gom-biis d sẽn mi. (Karm-y Yɩɩl Sõamyã 90:4.) Wala makre, Wilgr sebrã pʋgẽ, b goma “malɛk-rãmb a naas” yelle, n yeel tɩ b ‘segl-b-la wakat la daare, la kiuug la yʋʋmd yĩngã.’ Tõnd mii wakate, daare, kiuug la yʋʋmd sẽn yaa bũmb ninsi. (Wil. 9:14, 15) D sã n tẽeg tɩ bãngr-goam nins sẽn zoe n pidsã pidsame tɩ zems wakat ning a Zeova sẽn da wilgã, d na n maneg n kɩsa sɩd t’a yaa Wẽnnaam ning ‘sẽn so wakatã,’ la d maneg n kɩs sɩd ne a Gomdã me. D na n goma bãngr-gom-kãens kẽer yelle.

7. Wãn to la a Zeremi bãngr-gomdã sẽn pids to-to wã wilgd t’a Zeova yaa Wẽnnaam ning ‘sẽn so wakatã’?

⁷ Bɩ d reng n gom bũmb sẽn zĩnd yʋʋmd 600 soab sẽn deng Kirist rogmã sẽnese. Yɩɩ “Zida naab a Zozɩas biig a Zozakim sẽn deeg naam tɩ yʋʋm-naasẽ.” Wakat kãnga, Wẽnnaam ning ‘sẽn so wakatã’ goma ne “a Zeremi Zida nebã yelle.” (Zer. 25:1) A Zeova togsame tɩ Babilon nebã na n wa sãama Zerizalɛm la b yõg zʋɩf-rãmbã Zida n tall n kulli. A paasame tɩ b na n “lebga Babilon nebã yembs yʋʋm pis-yopoe.” Yɩɩ yʋʋmd 607 soabã sẽn deng a Zezi rogmã la Babilon sodaasã sẽn sãam Zerizalɛm n tall zʋɩf-rãmbã n kẽng yembdã. La yʋʋm 70 wã loogr poore, bõe n da na n maane? A Zeremi yeela woto: “Zusoabã yeelame:  ‘Babilon yʋʋm pis-yopoe wã sã n wa pidi, mam na n wilga yãmb tɩ m tagsda y yelle, n kɩt tɩ y lebg n wa zĩ-kãngã wa m sẽn da kãab yãmbã.’” (Zer. 25:11, 12; 29:10) Bãngr-gomdã pidsame tɩ zems a wakatã bal kɛpɩ. Yʋʋmd 537 soabã sẽn deng a Zezi rogmã, meed-dãmbã la pɛrs-rãmbã kõo zʋɩf-rãmbã sor tɩ b leb b ba-yirã.

8, 9. Wãn to la a Daniɛll bãngr-goamã wilgd t’a Zeova yaa Wẽnnaam ning ‘sẽn so wakatã’?

⁸ D gom Biiblã bãngr-gomd a to yelle. Yaa bãngr-gomd Wẽnnaam sẽn kɩt tɩ no-rɛɛs a Daniɛll togs yʋʋm a yiib nand tɩ zʋɩf-rãmbã yi Babilon. A wilgame tɩ b sã n wa kõ noor tɩ b lebs n me Zerizalɛm, na n maana yʋʋm 483 tɩ Mesi wã yaool n wa. Meed-rãmbã la pɛrs-rãmbã rĩm kõo noor yʋʋmd 455 soabã sẽn deng a Zezi rogmã tɩ b lebs n me Zerizalɛm. Yʋʋm 483 poore, rat n yeel tɩ yʋʋmd 29 soabã pʋgẽ, Nazarɛt rao a Zezi paama vʋʋsem sõngã zaeeb a lisgã sasa, n lebg Mesi wã. *—Neh. 2:1, 5-8; Dan. 9:24, 25; Luk 3:1, 2, 21, 22.

⁹ Masã, tẽeg-y Biiblã sẽn pĩnd n yeel bũmb ning Wẽnnaam Rĩungã wɛɛngẽ wã. Biiblã ra togsame tɩ b na n lugla Mesi wã Rĩung saasẽ yʋʋmd 1914 soabã pʋgẽ. A kõo “bãnd” sẽn na n kɩt tɩ b bãng t’a Zezi reega naam saasẽ, la a paas tɩ wakat kãnga, toog n na n zĩnd dũniyã zugu, bala b na n diga a Sʋɩtãan t’a yi saasẽ n sigi. (Mat. 24:3-14; Wil. 12:9, 12) Biiblã bãngr-goam a taab me wilga “bu-zẽmsã wakat” sẽn da na n sɛ wakat ningã takɩ, tɩ Wẽnnaam Rĩungã naam sɩng saasẽ. Woto pidsa yʋʋmd 1914 soabã pʋgẽ.—Luk 21:24; Dan. 4:7-14. *

10. Yel-bʋs sẽn wat la d kɩs sɩd tɩ na n pidsame tɩ zems b wakate?

¹⁰ Ka la bilfu, “to-kãseng” ning yell a Zezi sẽn da gomã na n sɩngame. To-kãsengã poore, a Zezi na n dɩɩ naam yʋʋm tusri. Yaa vẽeneg tɩ woto fãa na n pidsa wakat ning Wẽnnaam sẽn yãkã bal kɛpɩ. A Zezi sẽn wa n be tẽng zugã t’a Zeova ra zoe n yãka ‘daar la wakat’ ning yel-kãensã sẽn na n maanã—Mat. 24:21, 36; Wil. 20:6.

TƲM-Y NE Y SẼKÃ SÕMA

11. D sẽn mi tɩ d vɩɩ sɛɛbã wakatã segd n kɩtame tɩ d maan bõe?

¹¹ D sẽn mi tɩ Wẽnnaam Rĩungã naam sɩngame, la tɩ d vɩɩ “sɛɛbã wakatã” segd n kɩtame tɩ d maan bõe? (Dan. 12:4) Neb wʋsg nee dũniyã yɛl sẽn tar kengrã, la b pa mi tɩ yaa Biiblã bãngr-goam nins sẽn gomd yaoolem dayã yellã n pidsd ye. Tõe tɩ kẽer tagsdame tɩ dũniyã yɛlã na n wa zẽname n loog noore, tɩ sãnda tẽed tɩ ninsaalbã na n wa tõogame tɩ “laafɩ la yĩn-maasem” wa. (1 Tes. 5:3) La tõnd yẽ? D sã n kɩsa sɩd t’a Sʋɩtãan dũniyã  sãoong ta n saame, pa segd n kɩt tɩ d rɩk sẽkã sẽn ketã n mao n tũ Wẽnnaam ning ‘sẽn so wakatã’ la d sõng neb a taab tɩ b bao n bãng-a sɩda? (2 Tɩm. 3:1) D segd n tʋmda ne d sẽkã sõma, n maand d sẽn tõe tɛk wakat fãa Wẽnnaam tʋʋmdã pʋgẽ.—Karm-y Efɛɛz rãmb 5:15-17.

12. A Zezi sẽn gom a Nowe wakatã yell n yeel bũmb ningã wilgda tõnd bõe?

¹² Dũni kãngã sẽn pid ne bũmb toor-toor sẽn tõe n tiis-dã yĩnga, yɩl n ‘maan d sẽn tõe tɛk wakat fãa’ pa nana ye. A Zezi ra yeela woto: “Bũmb ning sẽn zĩnd a Nowe wakatã na n zĩnda Ninsaal Biigã waoong wakat me.” Bõe n zĩnd a Nowe wakatẽ wã? Wẽnnaam da yeela a Nowe t’a na n sãama wakat kãng dũniyã. A ra na n kɩtame tɩ sa-kãseng ni dũniyã gill zug n sãam nin-wẽnsã fãa. A Nowe sẽn da yaa “tɩrlem koe-moondã” yĩnga, a moona nebã Wẽnnaam koɛɛga. (Mat. 24:37; 2 Pɩɛ. 2:5) La nin-kãensã ra “rɩtame la b yũuda, la b peesd pagba, la b kõt b kamb sɩdba. . . . Bãmb ka bãng hal tɩ sãoong sa-kãsengã wa n loog ne bãmb fãa.” Rẽ n so t’a Zezi keoog a karen-biisã n yeel woto: “Bɩ y segl tɩ Ninsaal Biigã wata wakat ning yãmb sẽn ka tẽeda.” (Mat. 24:38, 39, 44) D segd n yɩɩ wa a Nowe la d ra yɩ wa a wakatẽ nebã ye. La bõe n na n sõng-d tɩ d segl d mense?

13, 14. D sẽn gũud Ninsaal Biigã waoongã, yɩl n tõog n tũud a Zeova ne d sũurã fãa, bõe la d pa segd n yĩmi?

¹³ Baa Ninsaal Biigã sẽn na n wa wakat ning d sẽn pa tẽedã, d segd n tẽegda wakat fãa t’a Zeova yaa Wẽnnaam ning sẽn so wakatã. Yɛl nins sẽn maand tẽngã zugã la ninsaalbã manesmã pa tõe n kɩt t’a toeem a raabã pidsg wakat ye. A tõe n kɩtame tɩ yɛlã sẽn maand wakat ningã la b sẽn maand to-to wã zems ne a raabã pidsgu. (Karm-y Daniɛll 2:21.) Sɩd me, Yelbũn 21:1 wã yeta woto: “Rĩm sũur bee Zusoabã nug pʋgẽ wa ko-zoetem. Bãmb wẽnemded-a lame t’a kẽng zĩig ning bãmb sẽn data.”

¹⁴ A Zeova tõe n toeema yɛlã sẽn maand to-to wã sẽn na yɩl t’a raabã pids wakat ning a sẽn yãkã. Toeen-kãsems wʋsg sẽn zĩnd dũniyã zug kɩtame tɩ Biiblã bãngr-goam pidsi. Sẽn yɩɩd fãa bãngr-goam nins sẽn wilg tɩ Rĩungã koe-noogã na n moona dũniyã gillã. Tẽeg-y Iniyõ Sovietik lʋɩɩsã yelle, la rẽ sẽn wa ne bũmb ninsã. Politikã wɛɛngẽ toeen-kãsems nins sẽn wa ne yel-kãngã wã linga neb wʋsgo. La rẽ kɩtame tɩ masã, b moond koe-noogã tẽns wʋsg pʋsẽ b sẽn da gɩdg tɩ b ra moone. Woto yĩnga, bɩ d maand d sẽn tõe fãa n tʋmd ne d sẽkã sõma, n tõog n ket n tũud a Zeova sẽn yaa Wẽnnaam ning ‘sẽn so wakatã’ ne d sũurã fãa.

WILG-Y TƖ Y KƖSA SƖD T’A ZEOVA RAABÃ PIDSDA A WAKATE

15. A Zeova siglgã sã n mi n wa sagl-d tɩ d toeem d sẽn moond to-to wã, wãn to la d wilgd tɩ d tara tẽebo?

¹⁵ Sẽn na yɩl n tõog n ket n moond koɛɛgã yaoolem da-kãensã pʋsẽ, yaa tɩlae tɩ d kɩs sɩd t’a Zeova pidsda a raabã wakat ning a sẽn yãkã. Dũniyã yɛl sẽn tar toeengã, mi n wa yaa tɩlae tɩ tõnd me toeem d sẽn moond to-to wã. A Zeova siglgã mi n kõo tõnd sagls sẽn na yɩl n sõng-d tɩ d maand dẽ. D sã n sakd sagl-kãens la d tũud a Zeova Bi-riblã sẽn yaa “bãmb nebã Zu-soabã” sor-wilgrã ne d sũurã fãa, d wilgdame tɩ d kɩsa sɩd t’a Zeova la Wẽnnaam ning ‘sẽn so wakatã.’—Ef. 5:23.

16. Bõe yĩng tɩ d tõe n kɩs sɩd t’a Zeova na n sõng-d-la d sẽn dat sõngr wakate?

¹⁶ A Zeova ratame tɩ d pelgd d pʋs n pʋʋsd-a, n kɩs sɩd t’a na n sõng-d-la “d  sẽn dat sõngr wakate.” (Heb. 4:16) Woto pa wilgd t’a nonga tõnd ned kam fãa wʋsg sɩda? (Mat. 6:8; 10:29-31) D sã n pʋʋsd Wẽnnaam a Zeova n kot-a sõngr la d tũud a sor-wilgrã, d wilgdame tɩ d kɩs-a-la sɩda. Sẽn paase, segdame tɩ d pʋʋsd d tẽed-n-taasã me yĩnga.

17, 18. a) Ka la bilfu, bõe la a Zeova na n maan a bɛɛbã? b) D segd n gũusa ne tags-bʋgo?

¹⁷ Pa masã la d segd n “kong tẽeb” ye. D segd n talla tẽeb sẽn na n sõng-d tɩ d tũ Wẽnnaam ne raoodo. (Rom 4:20) A Sʋɩtãan ne a poorẽ dãmbã sẽn yaa Wẽnnaam bɛɛbã maanda b sẽn tõe fãa sẽn na yɩl tɩ d bas tʋʋmd ning a Zezi sẽn kõ a karen-biisã. (Mat. 28:19, 20) Baa a Sʋɩtãan sẽn zabd ne tõndã, d miime t’a Zeova yaa “Wẽnnaam sẽn vɩ n yaa nebã fãa Fãagda, la a yaa tẽedbã rẽnd n yɩɩda.” A mii a sẽn na n maan to-to n “fãag nin-sõamyã makr pʋgẽ.”—1 Tɩm. 4:10; 2 Pɩɛ. 2:9.

¹⁸ Ka la bilfu, a Zeova na n sãama dũni kãngã. Baa d sẽn pa mi rẽ sẽn na n yɩ to-to la sẽn na n yɩ wakat ningã, d miime tɩ na n yɩɩ wakat ning Wẽnnaam a Zeova sẽn yãkã takɩ, la tɩ Kiristã na n menesã Wẽnnaam bɛɛbã zãnga, n wilg t’a Zeova n tar sor n na n yɩ yĩngr la tẽng naaba. Rẽnd tara yõod wʋsg tɩ d bãng “wakat la zãmaan” ning pʋgẽ d sẽn vɩ wã! D pa segd n wa tudg n tagsdẽ tɩ “bũmb fãa ket n yaa wa dũniyã naaneg wakat” ye.—1 Tes. 5:1; 2 Pɩɛ. 3:3, 4.

WILG-Y TƖ Y GŨUDA A ZEOVA

19, 20. Bõe yĩng tɩ d segd n gũ a Zeova?

¹⁹ A Zeova sɩng n datame tɩ ninsaalbã vɩɩmd wakat fãa n tõog n baood n bãngd yẽ ne bũmb nins a sẽn naanã. Koɛɛg Soab 3:11 wã goma Wẽnnaam a Zeova yelle, n yeel woto: “Bãmb maana bũmb fãa sõma n zems a wakate. Bãmb ninga wakat sẽn ka sɛt tagsg ninsaal sũur pʋgẽ, baa ne yẽ sẽn ka tõe n tags n bãng tʋʋmd ning Wẽnnaam sẽn maan hal sɩngr tɩ ta sɛɛbã.”

²⁰ Ad d sũur yaa noogo, a Zeova sẽn pa toeem raab ning a sẽn sɩng n tar ne ninsaalbã! (Mal. 3:6) Wẽnnaam “yaa yembr daar fãa n ka tedgd baa bilf ye.” (Zak 1:17) Wakatã sẽn loogdã pa maand a Zeova baa fʋɩ. Yẽ la “Rĩm sẽn so zãmaan fãa” wã. (1 Tɩm. 1:17) Woto yĩnga, bɩ d ‘gũ Wẽnnaam, yẽ yaa tõnd fãagda.’ (Mii. 7:7) Sɩd me, Biiblã yeela woto: “Yãmb fãa sẽn tẽed Zusoabã, bɩ y maan daood n keng y sũyã.”—Yɩɩl 31:25.

[Tẽngr not rãmbã]

[Zãmsgã sogsgã]

[Foto seb-neng 25]

A Daniɛll ra kɩsa sɩd tɩ bãngr-goam nins Wẽnnaam sẽn togsã na n pidsame

[Foto seb-neng 27]

Yãmb tʋmda ne y sẽkã sõma n maand a Zeova raabã bɩ?