“Ãnda la mam na n zoe?”
“Ãnda la mam na n zoe?”
“B sã n yik zabr ne maam, baasgo mam sũur kɛɛma.”—YƖƖL 27:3.
WÃN TO LA VƐRSE KÃENSÃ KENGD Y RAOODO?
1. Sogs-bʋs leoor la Yɩɩl Sõamyã 27 soabã tõe nsõng-d tɩ d paame?
BÕE yĩng tɩ d koe-moonegã pãng paasdẽ, baa vɩɩmã sẽn lebgd kãn-kãeyã? Bõe yĩng tɩ d sakd n dɩkd d sẽkã la d keelmã n tʋmd tʋʋm-kãngã, baa laogã zu-loees sẽn tar paasgã? Bõe yĩng tɩ tõnd sũy keem ne beoog sẽn na n yɩ to-to wã, tɩ neb wʋsg yaool n yɛɛsdẽ? Goam nins Wẽnnaam sẽn vẽeneg rĩm a Davɩɩd t’a togs Yɩɩl Sõamyã 27 soabẽ wãleokda sogs-kãensã.
2. Bõe la rabeem tõe nmaan neda, la tõnd kɩsa sɩd ne bõe?
2 Yɩɩllã sɩngrẽ, a Davɩɩd yeela woto: “Zusoabã yaa mam vẽenem la mam fãagda. Ãnda la mam na n zoe? Zusoabã yaa mam vɩɩm tebendeda. Yaa ãnda la mam na n zoe?” (Yɩɩl 27:1) Rabeem tõe nkomsa ned raood n kɩt t’a pa tõe nmaan baa fʋɩ. La ned sẽn teeg a Zeova pɛlg yaa kãn-kãe, t’a pa maand yɩɩr ye. (1 Pɩɛ. 3:14) D sã n sak t’a Zeova yaa d “vɩɩm tebendeda,” rat n yeel tɩ d zĩ-lilldga, d “na n zĩnda bãan tɩ rabeem kaẽ ye.” (Yel. 1:33; 3:25) Bõe yĩnga?
A ZEOVA “YAA MAM VẼENEM LA MAM FÃAGDA”
3. Biiblã sẽn yeel t’a Zeova yaa tõnd vẽenemã rat n yeelame tɩ bõe, la bõe la tõnd me segd n maane?
3 Yɩɩl-gʋlsdã sẽn yeel t’a ‘Zeova yaa yẽ vẽenemã’ wilgdame t’a Zeova sõngda tõnd tɩ d yit zɩɩlem la lik pʋgẽ. (Yɩɩl 27:1) D sã n kẽnd sor zugu, vẽenem tõe nsõng-d lame tɩ d yã bũmb wall yell n gili, la a pa tõe nkɩt tɩ bũmbã yi sorã zug ye. Yaa tõnd n segd n gil bũmbã. Woto me, a Zeova sõngda tõnd tɩ d wʋmd yɛl sẽn maand dũniyã zug võore. A sõngd-d lame tɩ d bãngd bẽds nins sẽn be dũni-kãngã pʋgẽ wã. A kõt-d-la sagls sẽn tõe nnaf-d wakat fãa, la yaa tõnd n segd n tũ sagl-kãense. Rẽ la d na n paam yam, wa yɩɩl-gʋlsdã sẽn yeel t’a paama ‘yam n yɩɩd a bɛɛbã’ wall ‘a karen-saam-dãmbã.’—Yɩɩl 119:98, 99, 130.
4. a) Bõe yĩng t’a Davɩɩd tõog n yeel t’a ‘Zeova yaa yẽ fãagda’? b) Wakat bʋg la a Zeova na n yɩ a nin-buiidã fãagda?
4 A Davɩɩd goamã wilgdame me t’a pa yĩm a Zeova sẽn da fãag-a yɛl kẽer pʋsẽ wãye. Wala makre, a Zeova ‘fãag-a-la ne gɩgma la kata.’ Sẽn paase, a Zeova sõng-a lame t’a tõog a Goliat sẽn da yaa nin-wobgã. Rĩm a Sayull me baoome n na n kʋ-a, n tão-a ne kãnd naoor a tãabo, la a Zeova sõng-a lame t’a põse. (1 Sãm. 17:37, 49, 50; 18:11, 12; 19:10) Dẽnd a Davɩɩd sẽn yeel t’a ‘Zeova yaa yẽ fãagdã,’ a bee bʋʋm. Ka la bilfu, a Zeova na n yɩ a nin-buiidã fãagda, wa a sẽn da yɩ a Davɩɩd fãagdã. Wãn to? A na n fãag-b-la “to-kãsengã” sẽn watã sasa.—Wil. 7:14; 2 Pɩɛ. 2:9.
TẼEG-Y-YÃ A ZEOVA SẼN ZOE N SÕNG-Y TO-TO WÃ
5, 6. a) Bõe yĩng tɩ d sã n tẽeg a Zeova sẽn sõng-d to-to bɩ kengd raoodo? b) Bõe yĩng tɩ d sã n tẽeg a Zeova sẽn sõng a nin-buiidã bɩ kengd raoodo?
5 Yɩɩl Sõamyã 27:2, 3 wãpʋgẽ, b wilga bũmb sẽn tõe nsõng-d tɩ d maneg n tall raoodo. (Karm-y-yã.) A Davɩɩd tẽega a Zeova sẽn fãag-a to-to yɛl kẽer pʋsẽ. (1 Sãm. 17:34-37) Woto kõ-a-la raood t’a ra tõe nmao ne yɛl wẽnem sẽn yɩɩd rẽ. Yãmb zoe n tẽega a Zeova sẽn da sõng-y yɛl kẽer pʋsẽ bɩ? Rẽ kenga y pɛlg bɩ? Wala makre, y zoe n pʋʋsa yell sẽn da namsd-y poorẽ bɩ? Y wa n yãame t’a Zeova kõ-y-la yam la raood tɩ y tõog n mao ne y zu-loɛɛgã bɩ? Y tẽra zu-loees sẽn da kɩt tɩ y pa tõe nmaan a raabã ne sũ-noog t’a sõng-y tɩ y welg bɩ? Wall y tẽra a sẽn pak sor n kõ-y tɩ y tõog n tʋm a tʋʋmdã sõma bɩ? (1 Kor. 16:9) Y sã n tẽegd rẽ, wãn to la nafd-yã? Rẽ yĩnga pa kɩtd tɩ y maneg n kɩs sɩd t’a Zeova tõe nsõng-y lame tɩ y paam y zu-loeesã kẽer tɩɩm, wall a sõng-y tɩ y tõog toog baa yel-kɛgems taoor sɩda?—Rom 5:3-5.
6 La tẽng ning taoor dãmb sã n wa rat n menes a Zeova Kaset rãmbã yẽ? Yʋʋm sẽn nan pa zãage, neb wʋsg sɩd maka woto n pa tõog ye. D sã n tẽeg kibay sẽn wilgd a Zeova sẽn sõng a nin-buiidã to-to, na n kenga d raood tɩ d wa tõog n mao ne toog buud fãa.—Dan. 3:28.
NAND-Y TŨUDUM HAKƖKÃ
7, 8. a) Yɩɩl Sõamyã 27:4 soabã pʋgẽ, bõe la a Davɩɩd kos a Zeova? b) A Zeova roog ning sẽn pa ninsaal nug n me wãyaa bõe, la wãn to la d waoogd-a beenẽ?
7 Bũmb a to sẽn tõe nsõng-d tɩ d tall raood yaa d sẽn na n nong tũudum hakɩkã. (Karm-y Yɩɩl Sõamyã 27:4.) A Davɩɩd wakatẽ wã, yaa sɛk-roogã la b sẽn da boond t’a Zeova roogã. La a Davɩɩd baoa bũmb toor-toor n bĩng a biig a Salomo, t’a wa me wẽnd-do-kãseng sẽn yaa neere. Yʋʋm wʋsg poore, a Zezi wilgame tɩ wakat n da wate, tɩ pa na n le yɩ tɩlae tɩ nebã kẽnd zĩig takɩ n pʋʋsd a Zeova ye. (Zã 4:21-23) Hebre rãmb sak a 8 n tɩ ta 10 pʋgẽ, tʋm-tʋmd a Poll wilgame t’a Zezi sẽn deeg lisg yʋʋmd 29 soabã pʋgẽ wã, a yeelame tɩ yẽ waame n na n maan a Zeova raabã. A paasame tɩ wakat kãnga, b tilga wẽnd-do-kãseng sẽn pa ninsaal nug n me. (Heb. 10:10) Wẽnd-do-kãng yaa bũmb nins fãa Wẽnnaam sẽn maane, tɩ tõnd sẽn tẽed a Zezi maoongã, d tõe ntũ-a tɩ zems a raabã. La wãn to la d waoogd Wẽnnaam do-kãng pʋgẽ? Yaa d sẽn na n pʋʋsd-a ne “sũur sẽn yaa sɩda, sẽn pid ne tẽeb zãnga,” n moond koɛɛgã ne yẽesem, la d kengd d tẽed-n-taasã tẽeb la b raood tigissã sasa, la zak pʋgẽ zaabr Biibl zãmsgã sasa. (Heb. 10:22-25) D sã n nand tũudum hakɩkã, na n sõng-d lame tɩ d ket n maand bõn-kãens yaoolem dayã sẽn yaa toogã pʋsẽ.
8 Dũniyã gill zugu, a Zeova Kaset rãmbã moonda koɛɛgã n yɩɩd pĩnda. Kẽer zãmsda buud-goam a taaba, tɩ sãnda yik n kẽng zĩis koe-moondbã sẽn pa waooge. B sẽn maand woto wãwilgdame tɩ b rɩka yɩɩl-gʋlsdã naoore, n kot a Zeova t’a ning-b barka, la a sõng-b tɩ b tõog n ket n waoogd-a baa sẽn wa n yaa a soaba.—Karm-y Yɩɩl Sõamyã 27:6.
KƖS-Y SƖD TƖ WẼNNAAM NA N SÕNG-Y LAME
9, 10. Yɩɩl Sõamyã 27:10 goamã kɩtame tɩ d tõe nbas d yam ne bõe?
9 A Davɩɩd wilgame t’a kɩsa sɩd t’a Zeova na n sõng-a lame, n yeel woto: “Mam ba ne m ma sã n bas maam, Zusoabã na n reega maam.” (Yɩɩl 27:10) Pipi Sãmwɛll sak 22 goamã kɩtame tɩ d tõe nyeel t’a Davɩɩd roagdbã pa bas-a ye. La rũndã-rũndã, a Zeova Kaset rãmb wʋsg roagdb raag-b lame n base. Nin-kãensã wʋsg paama sõngr la koglg b tẽed-n-taasã nengẽ.
10 A Zeova Kaset soab roagdb sã n bas-a, a Zeova sõngd-a lame. Rẽnd d tõe nkɩsa sɩd t’a sã n wa tar zu-loees a taaba, a na n sõng-a lame. Wala makre, d sã n wa maand yɩɩr n pa mi d sẽn na n maan to-to n ges d zakã rãmb yelle, d tog n tẽegame t’a Zeova na n sõng-d lame. (Heb. 13:5, 6) A mii d yɛlã sẽn yaa to-to wã, la a mi bũmb nins sẽn yaa tɩlae ne-dã me.
11. Nebã sã n ne tõnd sẽn kɩs a Zeova sɩd to-to wã, b get-d-la wãna? Rɩk-y makre.
11 A Victoria kibarã wilgda rẽ. Yaa Liberia pag sẽn da zãmsd Biiblã. A ra vɩɩ ne rao tɩ b tar kamb a tãabo. La raoã wa n bas-a-la ne a kambã, t’a pa tar do-gãaga, la a pa tar tʋʋmd me ye. La baasgo, a pa bas Biiblã zãmsg ye. A wa n deega lisgu. Daar a yembre, a yʋʋm 13 bi-pugl yãa korg sẽn pid ne ligd n dɩke. A Victoria ne a biigã sẽn da pa rat n lʋɩ kʋɩɩbg pʋgẽ wã, b pa bao n na n sõd ligdã meng ye. B baoa korgã soab tao-tao, n mik tɩ yaa sodaaga. B tɩ lebs-a-la korgã. Raoã yeelame tɩ nebã fãa sã n da yaa pʋ-peelem dãmb wa a Zeova Kaset rãmbã, laafɩ la sũ-noog na n zĩnda dũniyã zugu. A Victoria karma Biiblã vɛrse-rãmb n wilg sodaagã t’a Zeova pʋlmame tɩ dũni-paalg n wate. A sẽn yãa a Victoria tẽebã la a pʋ-peelmã, a sũurã yɩɩ noog hal t’a yãk ligdã wʋsg n kõ-a. Sɩd me, a Zeova Kaset rãmbã sẽn kɩs sɩd t’a tõe nkɩtame tɩ b paam bũmb nins sẽn yaa tɩlae ne-bã, b yaa pʋ-peelem dãmba, tɩ nebã fãa mi rẽ.
12. D tʋʋmd sã n wa sãam wall d bõna ligdi, bõe yĩng tɩ d segd n ket n tũud a Zeova? Rɩk-y makre.
12 D goma a Thomas me yelle. Yaa koe-moond sẽn pa reeg lisgu, n be Sieraleon. B ra rɩk-a-la kolɛɛs pʋgẽ t’a karemd kamba. La maana yʋʋmd la bal tɩ b pa yao-a, a sɛbã sẽn da nan pa maneg n sa wãyĩnga. Bũmb a sẽn da segd n maan yaoolem, yaa sõs ne kolɛɛsã taoor soab sẽn yaa prɛtrã. Prɛtrã yeel-a lame tɩ bãmb pa sakd a Zeova Kaset rãmbã sẽn tẽed bũmb ninsã b kolɛɛsẽ wãye. A yeela a Thomas t’a sã n dat tʋʋmdã, rẽnda a bas a tũudmã. A Thomas sak n basa tʋʋmdã n bõn a ligdã me. A tʋg n manegda radio-rãmb la a selilɛɛr-dãmba. Kiba-kãngã la a taab wilgdame tɩ d sã n kɩs a Zeova sɩda, d pa segd n yɛɛs tɩ d pa na n paam sẽn yaa tɩlae ne-dã ye. Bala, sẽn yaa a Zeova n naan bũmba fãa, la a kogend a nin-buiidã wakat fãa wã, d kɩsa sɩd t’a na n gesa d yelle.
13. Bõe yĩng tɩ koe-moonegã paamd pãng tẽns nins pʋsẽ paam-n-kõ-noorã yell sẽn yaa toogã?
13 Tẽns kẽer pʋsẽ, yɩl n paam n kõ noorã lebga toogo. La tõnd tẽed-n-taasã sẽn be tẽn-kãens pʋsẽ wãmoonda koɛɛgã wʋsgo. Bõe yĩnga? Filiyall a yembr yeela woto: “Neb wʋsg sẽn sakd n na n zãms Biiblã sẽn pa tar tʋʋmã, b tõe npaama sẽk zãmsgã yĩnga. Saam-biisã me tara sẽk n moondẽ. B sã n yeel nebã tɩ d vɩɩ yaoolem dayã pʋsẽ, b sakd n deegame, bala, b nee yɛlã sẽn sɩd kengã.” Tẽng a to pʋgẽ, koe-moondbã ned kam fãa tara sẽn yɩɩd Biibl karen-biis a tãabo. Misioneer a ye sẽn be be hal sẽn yɩɩd yʋʋm 12 yeelame tɩ koe-moondbã tara sẽk n moondẽ la b zãmsd nebã Biiblã, bala tiisgã pa waoog ye.
14. Wãn to la kʋʋn-kãsengã paamd Wẽnnaam koglgo?
14 A Zeova pʋlma a nin-buiidã t’a na n sõng-b lame, n kogl-b la a fãag-ba. D tõe nkɩsa sɩd ne rẽ. (Yɩɩl 37:28; 91:1-3) Sɩd me, neb nins sẽn na n põs “to-kãsengã” sasa wãna n yɩɩ neb kʋʋngo. (Wil. 7:9, 14) Dẽnd Wẽnnaam na n kogla kʋʋn-kãsengã neb yaoolem wakatã pʋgẽ tɩ b bɛɛbã ra menes-b ye. A na n sõng-b lame tɩ b tõog toog buud fãa, la b kell n tall zood sõma ne yẽ. Sẽn paase, Armagedõ, a Zeova na n kogla a nin-buiidã tɩ b põse.
ZEOVA, “BƖ Y ZÃMS MAAM YÃMB SORÔ
15, 16. D sã n tũud Wẽnnaam saglsã, wãn to la d nafda? Rɩk-y makre.
15 Yɩl n kell n tall raoodo, rẽnda d paamd zãmsg ning sẽn yit Wẽnnaam nengẽ wã. A Davɩɩd pʋʋsame n kos woto: “Zusoaba, bɩ y zãms maam yãmb sorã. Tɛ-y maam so-buk sẽn yaa tɩrg pʋgẽ mam gũusdbã yĩnga.” (Yɩɩl 27:11) D sã n dat t’a Zeova zãms-do, d segd n tũuda Biiblã sẽn yetã sõma, la d sakd sor-wilgr ning a siglgã sẽn kõtã ne d sũur fãa. Wala makre, neb wʋsg tũu sagl-kãense, n yao b sam la b koos b teed sẽn pa tɩlae ne-ba. Woto kɩtame tɩ laog zu-loees sẽn wa n kẽ b tẽnsã, b ra pa maand yɩɩr wʋsg ye. Ra pa tɩlae tɩ b tʋm wʋsg n paam n yao sam b sẽn dɩk n da teed yõod sẽn pa waoog ye. B tara sẽk n tõe nmoon koɛɛgã wʋsg me. Bɩ d ned kam fãa soka a meng woto: ‘Rẽ yĩnga mam sã n karem saglg Biiblã pʋgẽ wall tʋm-tʋmd sẽn tũud sɩd la sẽn tar yamã sɛb pʋsẽ, m tũud-a-la zĩig pʋgẽ, baa sã n yaa toog ne-m bɩ?’—Mat. 24:45.
16 D sã n sakdẽ t’a Zeova zãmsd-d la a wilgd-d d sẽn segd n vɩɩmd to-to wã, rabeem pa na n yõk-d ye. Etazĩni, wakat fãa so-pakd a ye n bao n na n toeem tʋʋmd a tʋʋmã zĩigẽ, sẽn na yɩl n tõog n sõng a zakã rãmb tɩ b kell n yɩ so-pakdba. La a taoor soabã yeel-a lame t’a sã n dat tʋʋmdã, rẽndame t’a paam inivɛrsite dipolom. Sã n da yaa yãmba, y na n maana y bãngẽ y sẽn bas karengã n lebg so-pakdã bɩ? Semen a yiib poore, b basa taoor soabã tʋʋma, la b rɩk ned a to. Nin-kãng soabã soka tõnd saam-biigã a sẽn magd n na n maane, t’a leok tɩ yẽ ne a pagã yaa a Zeova Kaset rãmba, n yaa wakat fãa so-pakdba, la tɩ b rat n kell n yɩɩ so-pakdba. Taoor soabã kʋʋga a gomdã n yeel woto: “Mam sɩng n miime tɩ fo yaa toor ne f taabã. Mam ba wãsẽn wa n bẽed a yõor bãagã, fo tẽed-n-taas a yiib n da wat n karemd Biiblã daar fãa t’a kelgdẽ. Mam da pʋlmame tɩ m sã n wa paam segb n tõe nsõng a Zeova Kaset soaba, m na n sõng-a lame.” Vẽkembeoogo, a kõo saam-biigã tʋʋmd ning taoor soab a ye wãsẽn da pa rat n kõ-a wã. Hakɩka, d sã n lʋɩɩs Rĩungã yɛl taoore, a Zeova na n gesame tɩ d paam bũmb nins sẽn yaa tɩlae ne-dã wa a sẽn pʋlmã.—Mat. 6:33.
TẼEB LA SAAGR YAA TƖLAE
17. Bõe n na n sõng-d tɩ d tõog n gũ beoog-daarã ne raoodo?
17 A Davɩɩd yeela bũmb sẽn wilgd tɩ tẽeb la saagr yaa tɩlae. A yeela woto: “N-ye, mam sũur kɛɛm tɩ mam na n yãa Zusoabã bark mam sẽn ket n vɩ dũniyã zugu.” (Yɩɩl 27:13) Tags-y n ges-y-yã! Wẽnnaam sã n da pa sõng-d tɩ d bãng tɩ manegr n wate, tɩ d pa mi bũmb nins yell b sẽn gomd Yɩɩl Sõamyã 27 soabẽ wãme, d ra na n maana wãna? Woto yĩnga, d sẽn vɩ yaoolem dayã sasa wã, bɩ d ket n pʋʋsd a Zeova n kotẽ t’a kõ-d raoodo, la tɩ Armagedõ sã n wa ta bɩ a fãag-do.—Karm-y Yɩɩl Sõamyã 27:14.
[Zãmsgã sogsgã]
[Foto seb-neng 23]
A Davɩɩd tẽega a Zeova sẽn fãag-a to-to yɛl kẽer pʋsẽ, tɩ keng a raoodo
[Foto seb-neng 25]
Laog zu-loees sã n kẽ d tẽnga, d tũnugda ne rẽ n moond koɛɛgã wʋsg bɩ?
