A Zeova tigimda a zakã rãmba

“Bɩ y mao tɩ fãa sak Sɩɩg Sõng ratem tɩ laafɩ zĩndi.”—EF. 4:1, 3.

WÃN TO LA Y NA N LEOKE?

Bõe la a Zeova maand a raabã pidsg yĩnga?

Wãn to la d tõe nmao tɩ “fãa sak Sɩɩg Sõng ratem tɩ laafɩ zĩndi”?

Bõe n na n sõng-d tɩ d ‘maand d taabã neere’?

1, 2. A Zeova raabã ne tẽngã la ne ninsaalbã la bʋgo?

B SÃ N gomd zak yelle, bõe n wat y yamẽ? Yaa nonglem bɩ? Sũ-noog bɩ? Y tagsda neb sẽn naag taab n tʋmd ne yam a yembr yell bɩ? Bɩ sẽn wat y yamẽ yaa zĩig biig sẽn tõe npaam koglg a bɩʋʋng sasa, n paasd a bãngre, la a tõe ntogs a tagsgo? Y zakã neb sã n nonga taaba, tõe tɩ y tagsda woto fãa yelle. Yaa a Zeova la zak fãa Lugunda. (Ef. 3:14, 15, MN) A sɩng n datame tɩ malɛgsã sẽn be saasẽ wãzemsd taaba, tɩ ninsaalbã sẽn be tẽngã zugã me zemsd taaba, tɩ bãan la bas-yard be b fãa sʋka.

² A Ãdem ne a Hawa yel-wẽndã tɛka, ninsaalbã pa le yaa Wẽnnaam zakã neb ye. La rẽ pa toeem a raabã ye. A na n kɩtame tɩ tẽngã lebg arzãna, n pid ne a Ãdem la a Hawa yagense. (Sɩng. 1:28; Ezai 45:18) A maana bũmb wʋsg raab kãng pidsg yĩnga. Efɛɛz rãmb sebrã sẽn gomd zems-n-taarã yell wʋsgã wilgda a Zeova sẽn maanã kẽere. Bɩ d gom Biiblã seb-kãng vɛrse-rãmb sãnda yelle, tɩ d na bãng d sẽn tõe nmaan to-to n sõng t’a Zeova tigim a zakã rãmba.

A ZEOVA SẼN MAAND BŨMB NING A RAABÃ PIDSG YĨNGA

3. Efɛɛz rãmb 1:10 wilgame tɩ wakat sẽn ta, bõe la Wẽnnaam sɩng maanego, la bõe la a maan pipi?

³ Wakat fãa, bũmb nins a Zeova sẽn maandã yaa a raabã pidsg yĩnga. Rẽ so tɩ ‘wakat sẽn ta,’ a sɩnga bũmb toor-toor maanego, sẽn na yɩl n tigim sẽn na n vɩɩmd-b saasẽ wãla sẽn na n vɩɩmd-b tẽngã zugã wa zag-yɛng neba. (Karm-y Efɛɛz rãmb 1:8-10.) A sẽn maand bũmb ninsã yaa bugs a yiibu. Pipi, a zaeeda neb sẽn na n wa tɩ vɩɩmd saasẽ  ne a Zezi Kirist sẽn yaa b Zusoabã. Yɩɩ yʋʋmd 33 Pãntekotã sasa la a sɩng nin-kãensã sẽn na n wa tɩ rɩ naam ne a Zezi wãtigingu. (Tʋʋ. 2:1-4) Kiristã maoong maasem yĩnga, b yaa nin-tɩrs Wẽnnaam nifẽ n na n wa paam vɩɩm. B miime tɩ b lebga “Wẽnnaam kamba.”—Rom 3:23, 24; 5:1; 8:15-17.

4, 5. Bũmb a yiib-n-soab a Zeova sẽn maand n na n tigim a zakã rãmbã la bʋgo?

⁴ Yiib-n-soaba, a Zeova sõngda neb nins sẽn na n wa vɩɩmd tẽngã sẽn na n lebg arzãnã zug Mesi wãnaam sasa, tɩ Kiristã ne sẽn paam-b zaeebã na n soog-bã. “Kʋʋn-kãsengã” sẽn yaa neb nins sẽn na n põs to-kãsengã sasa wãn na n yɩ pipi n vɩɩmd arzãnã pʋgẽ. (Wil. 7:9, 13-17; 21:1-5) A Zezi naamã sẽn na n kaoos yʋʋm tusrã sasa, neb milyaar-dãmb n na n vʋʋge. (Wil. 20:12, 13) Tags-y n ges-y rẽ sẽn na n kõ-d weer tɩ d maneg n wilg tɩ d zemsda taab to-to wã! La yʋʋm tusrã poore, yaoolem makr n na n zĩndi. B na n maka nebã fãa, tɩ sẽn na n kell n yɩ-b sakdbã paam n lebg “Wẽnnaam kamba.”—Rom 8:21; Wil. 20:7, 8.

⁵ Rũndã-rũndã, a Zeova ket n sõngda sẽn paam-b vʋʋsem sõng zaeebã tɩ b na n wa tɩ vɩɩmd saasẽ, la piis a taabã me tɩ b na n wa vɩɩmd arzãnã pʋgẽ tẽngã zugu. La wãn to la tõnd ned kam fãa tõe nsõng t’a Zeova tigim a zakã rãmba?

“BƖ Y MAO TƖ FÃA SAK SƖƖG SÕNG RATEM TƖ LAAFƖ ZĨNDI”

6. Biiblã vɛrse bʋs n wilgd tɩ kiris-nebã segd n tigimda taaba?

⁶ Biiblã sagenda kiris-nebã tɩ b tigimd taaba. (1 Kor. 14:23; Heb. 10:24, 25) La sẽn na yɩl tɩ zems-n-taar hakɩk zĩnd d sʋka, d pa segd n tigimd taab zĩ-yend bal wa neb sẽn yekd taab raagẽ wall reem zĩigẽ ye. D segd n tũuda bũmb nins a Zeova sẽn wilgd tõndã, la d basdẽ t’a vʋʋsem sõngã toeemd-do.

7. Wãn to la d tõe nmao tɩ “fãa sak Sɩɩg Sõng ratem tɩ laafɩ zĩndi”?

⁷ Tõnd sẽn tẽed Kiristã maoongã yĩnga, d yaa nin-tɩrs a Zeova nifẽ. D sã n paama vʋʋsem sõngã zaeebo, d lebga a kamba. La d sã n bee piis a taabã sʋka, d yaa a zo-rãmba. Baasgo, d sẽn nan ket n vɩ dũni-kãngã pʋgẽ wã, d mi n maana bũmb n sãam d to sũuri. (Rom 5:9; Zak 2:23) Yaa rẽ yĩng la Biiblã sẽn sagend tɩ d tall sũ-mar ne taabã. La wãn to la d tõe tɩ zems-n-taar zĩnd tõnd ne d tẽed-n-taasã sʋka? D segd n talla “sik-m-meng la sũ-bʋgsem.” Sẽn paase, a Poll sagl-d lame tɩ d “mao tɩ fãa sak Sɩɩg Sõng ratem tɩ laafɩ zĩndi.” (Karm-y Efɛɛz rãmb 4:1-3.) Yɩl n tũ sagl-kãngã, rẽnda d sakd Wẽnnaam vʋʋsem sõngã sor-wilgri, n paamd zʋg-sõma nins a sẽn kõtã. Tõnd ne d to moor sã n yõsge, zʋg-sõma kãens sõngdame tɩ d tõog n maneg yellã. La yĩngã ratem biis welgda neb ne taabã.

8. Wãn to la yĩngã ratem biis welgd neb ne taaba?

⁸ Wãn to la “yĩngã ratem biis” welgd neb ne taaba? (Karm-y Galat dãmb 5:19-21.) Wala makre, yoobo: Ned sã n yo, sãamda zood ning a sẽn tar ne a Zeova la ne tigingã nebã. Sã n yaa ned sẽn kẽ kãadem, tõe nwelg-a-la ne a pagã bɩ a sɩdã wall ne b kambã. Nin-yoolem bɩ rẽgdo: Ned sã n tʋmd rẽgdo, zãagd-a-la ne Wẽnnaam la ne neb nins sẽn nong-a wã. Yaa wa y sẽn na n dat n kol bũmb a yiib ne taaba. Rẽndame tɩ b yiibã fãa yaa yɩlma. Raglem *: Ned sẽn tʋmd raglem tʋʋm wilgdame t’a pa nand Wẽnnaam  noyã baa bilf ye. Ned sã n sakd yĩngã ratem biis a taabã me, zãagd-a-la ne Wẽnnaam, la welgd-a ne a taaba. A Zeova kisa yĩngã ratem biisã fãa.

9. Wãn to la d tõe nfees d meng n bãng d sã n sɩd baooda zems-n-taar ne d taabã?

⁹ Rẽnd tõnd ned kam fãa segd n soka a meng woto: ‘Mam sɩd maanda modgr sẽn na yɩl tɩ zems-n-taar zĩnd maam ne m tẽed-n-taasã sʋk bɩ? Maam ne m to moor sã n yõsge, m manesem yaa wãna? M togsda m zo-rãmbã wʋsg yellã n dat tɩ b kõ-m bʋʋm bɩ? M basda m na kẽng n tɩ yã-a tɩ d maneg yellã, n gũudẽ tɩ kãsem-dãmbã kẽng bɩ? Mam sã n mi tɩ m maana bũmb n sãam ned sũuri, m ginda a soabã m sẽn pa rat n wa gom dẽ yell yĩng bɩ?’ D sã n maand woto, d pa wilgd tɩ d rat n sõngame t’a Zeova tigim a zakã rãmbã fãa tɩ b sak Kiristã ye.

10, 11. a) Bõe yĩng tɩ tar yõod tɩ d mao tɩ laafɩ zĩnd tõnd ne d taabã sʋka? b) Bõe la d tõe nmaan tɩ laafɩ zĩnd d sʋka, la d paam a Zeova barka?

¹⁰ A Zezi yeela woto: “Fo sã n wa ne f kũun tẽn-kugrã taoore, n zĩnd be n tẽeg tɩ f tara yell ne f ba-biiga, bɩ f bas f kũunã tẽn-kugrã taoore, n kẽng n deng n maneg f yellã ne f ba-biigã n yaool n wa n kõ f kũunã. Maneg f yell ne f zabd-n-taag tao-tao.” (Mat. 5:23-25) A Zak me yeelame tɩ “neb nins sẽn baood laafɩ wãbʋta tɩrlem biis ne laafɩ.” (Zak 3:17, 18) Dẽnd laafɩ sã n pa be tõnd ne d taabã sʋka, d pa tõe nyeel tɩ d maanda tɩrg ye.

¹¹ Ad makr sẽn wilgd rẽ: Tẽns wʋsg pʋsẽ zab sẽn da be, b busa bõn-pusdum zĩis wʋsgo, tɩ yɩl n paam zĩig n ko lebg toogo. Bõn-pusdum sã n pusgi, koaadbã basda b pʋtã. Woto kɩtame tɩ b pa le tar tʋʋma, tɩ sẽn be-b galʋ-tẽnsã pʋsẽ wã me pa le paamd rɩɩb ye. Woto me, d sã n tara manesem sẽn kɩt tɩ zems-n-taar ka be tõnd ne d taabã sʋka, na n yɩɩ toog tɩ d paam zʋg-sõma. D lebga wa pʋʋg b sẽn bus bõn-pusdum a pʋgẽ. La d segd n toeemame. D sã n sakd n kõt d taabã sugr la d maand-b neere, laafɩ na n zĩnda d sʋka. D na n paamda a Zeova bark me.

12. Wãn to la kãsem-dãmbã sõngd tɩ zems-n-taar be d sʋka?

¹² Sẽn paase, “kũun sẽn yaa nebã,” rat n yeel tɩ kãsem-dãmbã tõe nsõngame tɩ zems-n-taar zĩnd d sʋka. Wẽnnaam yãk-b lame n na n sõng tɩ d “fãa paam tẽeb a yembre.” (Ef. 4:8, MN, 13) Kãsem-dãmbã sã n wa tʋmd ne tõnd a Zeova tʋʋmdã pʋgẽ, wall b sã n wa kõt-d sagls sẽn tik Wẽnnaam Gomdã zugu, yaa sẽn na yɩl n sõng-d tɩ d paam zʋg-sõma  n paase. (Ef. 4:22-24) B sã n wa sagend-yã, bɩ y tẽeg tɩ yaa a Zeova n tũnugd ne-b n dat n sõng-y tɩ y wa paam n vɩɩmd dũni-paalgã pʋgẽ. La kãsem-dãmbã, yãmb me segd n modgdame tɩ y sẽn sagend y tẽed-n-taasã to-to wãwilgdẽ tɩ y rata b neere.—Gal. 6:1.

“BƖ YÃMB MAAN TAAB NEERE”

13. D sã n pa tũ Efɛɛz rãmb 4:25-32 saglsã, bõe n na n maane?

¹³ Efɛɛz rãmb 4:25-29 wãwilgda yɛl kẽer sẽn pa segde. Wala ziri yagbo, sũ-yikri, kʋɩɩngo. B leb n wilgame tɩ d segd n gomda goam sẽn yaa sõma d taabã sõngr yĩnga, la d ra gomd põos ye. Ned sã n pa tũud sagl-kãensã, a wata ne welgre. A beegda vʋʋsem sõngã, bala, a Zeova kõo tõnd a vʋʋsem sõngã n na n sõng tɩ zems-n-taar zĩnd d sʋka. (Ef. 4:30) Sẽn na yɩl tɩ laafɩ la zems-n-taar zĩnd d sʋka, d segd n tũu sagls nins a Poll sẽn kõ rẽ zugẽ wãme. A yeela woto: “Bɩ y bas sũ-toog ne kisgri, la sũ-yikri, la no-koɛɛma, la kãnegre, la pʋ-toog fãa. Bɩ yãmb maan taab neere, la paam sũ-bʋgsem, la kõ taab sugri, wa Wẽnnaam sẽn kõ yãmb sugr Kirist yĩngã.”—Ef. 4:31, 32.

14. a) A Poll sẽn yeel tɩ “bɩ yãmb maan taab neerã” wilgda bõe? b) Bõe n na n sõng-d tɩ d maand d taabã neere?

¹⁴ ‘Bɩ yãmb maan taab neerã’ wilgdame tɩ tõe tɩ pa wakat fãa la d maand d taabã neere, la tɩ d segd n modga rẽ wɛɛngẽ n paase. Rẽ n so tɩ d segd n tagsd d taabã yell n yɩɩda. (Fil. 2:4) Wala makre, d tõe nwa rat n togsa gomd n wilg d bãngre, bɩ n maan laado. La d sã n mik tɩ tõe nsãama d to sũuri, bɩ d sĩndi. D sã n maand woto, na n sõng-d lame tɩ d ‘maand d taabã neere.’

D NONG TAAB LA D WAOOGD TAAB D ZAGSÃ PƲSẼ

15. Kiristã manesem bʋg yell la a Poll gom Efɛɛz rãmb 5:28 pʋgẽ wã, la rẽ wilgda pʋg-sɩdbã bõe?

¹⁵ Biiblã pʋgẽ, b wilgame tɩ rao ne a pag manesem sẽn yaa to-to ne taabã wõnda Kiristã ne a tẽedbã manesem sẽn yaa to-to ne taabã. Woto tẽegda tõnd tɩ rao segd n wilgda a pag sore, n nong-a la a get a yelle, la tɩ pag segd n sakda a sɩda. (Ef. 5:22-33) A Poll sẽn yeel tɩ ‘woto, rapã tog n nonga b pagbã wa bãmb mens yĩnsã,’ “woto” wãvõor yaa bõe? (Ef. 5:28) Bũmb ning a sẽn deng n yeel Kiristã la tigingã zugã tõe nsõng-d lame tɩ d paam sok-kãngã leoore. A yeelame tɩ Kiristã nonga a tẽedbã hal n sak n ki b yĩnga, la t’a pek-b-la wa b sẽn “pek bũmb ne koom la ne bãmb goamã.” Dẽnd rao segd n sõnga a zakã ned kam fãa t’a tall zood sõma ne a Zeova, n wilg t’a ratame t’a Zeova raabã sẽn yaa a tigim a zakã rãmb fãa tɩ b sak Kiristã pidsi.

16. Kambã wubr wɛɛngẽ, roagdbã sã n tũud Biiblã noyã, wata ne bi-bʋse?

¹⁶ Roagdbã segd n tẽegdame t’a Zeova yeelame tɩ yaa bãmb n segd n wub b kambã. Bʋko, rũndã-rũndã nebã wʋsg pa “tar nimbãan-zoeer” ye. (2 Tɩm. 3:1, 3) Ba-rãmb wʋsg pa get b zagsã yell neere, tɩ namsd b kambã la sãamd b sũyã. La a Poll sagla roagdb nins sẽn yaa kiris-nebã woto: “Ba-rãmba, bɩ y ra maan bũmb sẽn yikd yãmb kambã sũy ye, la bɩ y wub bãmb ne Zusoabã saglg la a zãmsgo.” (Ef. 6:4) Yaa zagsã pʋsẽ la kambã rengd n bãng nonglmã la zu-sobendã sakr sẽn dat n yɛɛlga. Roagdb nins sẽn sõngd b kambã tɩ b bãngd bõn-kãensã sõma wãsõngdame t’a Zeova na n pids a raabã sẽn yaa tigim a zakã rãmbã. Zagsã pʋsẽ, roagdbã segd n modgdame tɩ b kambã neẽ tɩ b sɩd nong-b lame. Rẽ n so tɩ b segd n mao  n bas sũ-toog la sũ-yikri, la tʋya. B sã n maand woto, b kambã na n bãnga ned sẽn tõe nwilg to-to t’a nonga a to, la b wilg me tɩ b yaa sakdba. Rẽ sõngd-b lame tɩ b na n wa paam n vɩɩmd Wẽnnaam dũni-paalgã pʋgẽ.

17. Yɩl n tõog n mao ne a Sʋɩtãanã, bõe n yaa tɩlae?

¹⁷ Segdame tɩ d tẽegdẽ t’a Sʋɩtãan sɩng n datame tɩ nebã kɩɩsd Wẽnnaam, la t’a na n maana a sẽn tõe fãa sẽn na yɩl tɩ d bas Wẽnnaam sakre. Sɩd me, a tõogame tɩ neb wʋsg maand a raabã. Wala makre, pagb la rap wʋsg kaooda b kãadem wall b vɩ ne taab n pa kẽ kãadem, tɩ sãnda getẽ tɩ pa wẽng tɩ pag ne pag wall rao ne a rao kẽ kãadem ye. La pa dũniyã neb yel-manesem wall b tagsg la tõnd tũud ye. Yaa Kiristã mak-sõngã la d tũuda. (Ef. 4:17-21) Rẽ n so tɩ b sagend tõnd tɩ d “bob Wẽnnaam zab-teed fãa” n tõog n mao ne a Sʋɩtãan la a zĩn-dãmbã.—Karm-y Efɛɛz rãmb 6:10-13.

‘KẼND-Y NE NONGLEM’

18. Sẽn yɩɩd fãa, bõe n kɩt tɩ zems-n-taar be d sʋkã?

¹⁸ Sẽn yɩɩd fãa, yaa nonglmã n kɩt tɩ kiris-nebã zemsd taabã. Tõnd Zusoabã yaa a yembre, tɩ d Wẽnnaamã me yaa a yembre. D sẽn nong-b la d nong d taabã, d maanda d sẽn tõe fãa sẽn na yɩl tɩ d “fãa sak Sɩɩg Sõng ratem tɩ laafɩ zĩndi.” (Ef. 4:3-6) Rẽ n so t’a Zezi pʋʋs a Zeova n kos t’a sõng a karen-biisã tɩ b nong taaba, n yeel woto: “Mam ka pʋʋsd bãmb yĩng bal ye. La yaa neb nins sẽn na n tẽ maam bãmb kasetã yĩngã me yĩnga. Yaa sẽn na yɩlg tɩ bãmb fãa yɩ yembr wa yãmba, m Ba sẽn be mam pʋgẽ, la mam sẽn be yãmb pʋgẽ, tɩ bãmb me na yɩ yembr tõnd pʋsẽ. . . . Mam wilga bãmb yãmb yʋʋre, la mam na n le wilga bãmba, tɩ yãmb sẽn nong maam ne nonglem ningã zĩnd bãmb pʋsẽ, tɩ mam me pa ne bãmba.”—Zã 17:20, 21, 26.

19. Bõe la yãmb yãk yam n na n maane?

¹⁹ D sã n tar zʋg d sẽn dat n toeem tɩ yaa toogo, d sẽn nong Wẽnnaam la d taabã, d na n pʋʋsame n kos bũmb ning yɩɩl-gʋlsdã sẽn kosã. A yeela a Zeova woto: “Kõ maam yam a yembr bal y yʋʋrã zoees yĩnga.” (Yɩɩl 86:11) Bɩ d yãk yam n mao d pãng tɛk t’a Sʋɩtãan ra tõog n welg-d ne d Ba wãsẽn nong-dã, la ne d tẽed-n-taasã ye. Woto yĩnga, zagsã pʋsẽ, koe-moonegã pʋgẽ la tigingã pʋgẽ, bɩ d mao n yɩ “Wẽnnaam togs-n-taas wa kom-nongdse, la [d] kẽn ne nonglem.”—Ef. 5:1, 2.

[Tẽngr note]

[Zãmsgã sogsgã]

[Foto seb-neng 29]

A basa a kũunã tẽn-kugrã taoore, n na n tɩ bao laafɩ ne a saam-biigã

[Foto seb-neng 31]

Roagdba, sõng-y y kambã tɩ b bãng neb waoogre