A tara sagls sẽn zems ne siãnsã
A tara sagls sẽn zems ne siãnsã
“Mam gʋlsa saglg ne bãngr koees pis-tã fo yĩnga, n wilg foom bãngr ne sɩda.”—YELBŨNA 22:20, 21.
BIIBLÃ SƖD YAA TOOR BƖ? Pĩnd wẽndẽ sɛbã wae n tara sagl-yoodo, tɩ siãnsã maasem yĩnga, d mi masã tɩ yaa ziri fasɩ. Baa rũndã-rũndã, sɛb-gʋlsdbã wae n yiisda seb-paal n demsd b sẽn da gʋlse. La Biiblã wilgame t’a goamã yita Naandã nengẽ, la tɩ b “paada wakat sẽn ka sɛta.”—1 Pɩɛɛr 1:25.
WALA MAKRE: A Moiiz tõogã ra wilga Israyɛll nebã tɩ b sã n na n kẽng we-kɛɛng bɩ b bao zĩig sẽn ‘vẽsg bilf ne b tãb-sikã,’ la tɩ b bus bĩndã. (Tõodo 23:13, 14) B sã n da sɩɩs ned bɩ rũng sẽn ki, b lebga rẽgdo. (Maankʋʋre 11:27, 28; Sõdbo 19:14-16) Wãoor me ra segd n vɩɩmda kɛɛnga, hal tɩ ta wakat ning b sẽn na n ges-a n mik t’a bãagã pa le tõe n long nedã.—Maankʋʋre 13:1-8.
LOGTOƐƐMBÃ SẼN WILGI: Logtoɛɛmbã sagend-d lame tɩ d tuud bĩn-bogdo, tɩ d pɛgd d nusã, la tɩ ned sã n bẽed bã-loangdg bɩ d welg-a ne a taabã. Siglg a yembr (CDC) sagla neb nins sẽn pa tar bĩn-bogdã woto: “Y sã n na n maan we-kɛɛng bɩ y zãag ne koom zĩig fãa sẽn na ta metr 30, la y bus bĩndã.” Nasiõzĩni wã siglg ning sẽn get laafɩ wã yellã me wilgame tɩ zĩis nins nebã sẽn maneg b bĩn-bogdã sõma wã, sẽn bẽed-b sãagã sõor booga wʋsgo. Yʋʋm koabg la zak sẽn looge, logtoɛɛmbã bãngame tɩ b sã n sɩɩs kũum n pa pek b nusã, bãag ning sẽn kʋ kũumã longda neb wʋsg b sẽn tɩpde. CDC wã wilgame tɩ nusã pɛgsg yaa “bũmb sẽn kogend-d ne bãasã n yɩɩda.” La bõe la logtoɛɛmbã yet wãoobã wall bãad-rãmb kẽer welgrã wɛɛngẽ? Sẽn nan pa kaoose, sebr a yembr (Saudi Medical Journal) yeela woto: “Bã-loangdg sã n kẽ tẽng paalem, wakat ninga, yaa b sẽn na n welg bãagã sẽn zoe n yõk-b rãmbã bal la b na n tõog t’a ra piuugi.”
YÃMB TAGSG YAA WÃNA? Yãmb mi tũudum sebr a to goam sẽn zemsd ne logtoɛɛmbã goam sɩda? Vẽenega, Biiblã yaa sebr sẽn pa wõnd a taaba.
[Goam sẽn tar pãnga seb-neng a 6]
“Ned pa tõe n karem a Moiiz tõogã noy nins sẽn gomd yɩlemdã yellã n pa pẽg ye.”—MANUAL OF TROPICAL MEDICINE, BY DRS. ALDO CASTELLANI AND ALBERT J. CHALMERS
