Bao-y sẽn kelgd-a pʋʋsgã zoodo

NEB wʋsg tẽedame tɩ Wẽnnaam beeme, la b pa tõe n wilg bũmb ning sẽn kɩt tɩ b tẽedã sõma ye. Sẽn paase, b pa tõe n wilg tũudmã sẽn mi n pa sõngd nebã tɩ b bas tʋʋm-wẽnsã võore, wall Wẽnnaam sẽn bas tɩ namsgã beẽ wã võor ye. B pʋʋsda Wẽnnaam n pa mi-a ye.

La y yaool n tõe n maaname tɩ zʋʋg woto. Y tõe n bãnga Wẽnnaam sõma tɩ paas y tẽebã pãnga. Woto na n kɩtame tɩ y nong-a la y nand-a. Tẽeb hakɩkã pa tik vɩʋʋg ye. (Hebre dãmba 11:1) Y sã n bãng sɩdã Wẽnnaam zugu, y na n tõogd n gomda ne-a wa y sẽn gomd ne y zoa. Neb kẽer da pʋʋsda Wẽnnaam n pa kɩs sɩd t’a beeme ye. Ad b sãnda sẽn yeele:

▪ A Patricia d sẽn da gom a yell pipi sõsgã pʋgẽ wã yeela woto: “Mam da yaa yɩɩn-yɩɩnda. La daar a yembre, maam da bee ne m zo-rãmb piiga, tɩ b wa wẽed no-koeemd tũudmã zugu. Mam yeel-b lame tɩ m ba wã pa tẽed tɩ Wẽnd beeme, la t’a Zeova Kaset soab n da wa n sõsd ne-a, tɩ mam yik n yi n bas-ba. Mam zo-rãmbã nin-yend yeelame tɩ tõe t’a Zeova Kaset rãmbã sẽn yet bũmb ningã yaa sɩda.

“A to yeelame tɩ d bao raar n kẽng b tigsgẽ n tɩ kelg n gese. D sɩd maana woto. Baa d sẽn da pa kɩs sɩd ne bũmb ning d sẽn wʋm b tigsgẽ wã, b sẽn deeg tõnd sõma wã yĩnga, kẽer da ket n kẽndame.

“La hat daar a ye, mam kelga sõsg sẽn kɩt tɩ m toeem tagsgo. Sõsdã wilga nebã sẽn namsdã võore. A wilgame tɩ Wẽnnaam naana ninsaal t’a ra zems zãnga, la tɩ yaa ned a ye n wa ne yel-wẽnã la kũumã, tɩ nebã fãa lebg yel-wẽn-maandb la kiidbã. Mam da pa mi woto fãa ye. Sẽn paase, sõsdã wilgame tɩ yɩɩ tɩlae t’a Zezi ki sẽn na yɩl tɩ ãdem-biisã lebs n paam bũmb nins pipi ninsaalã sẽn yɩ sabab tɩ b bõnã, la a wilg rẽ võore. * (Rom dãmba 5:12, 18, 19) Zĩig pʋgẽ, bũmba fãa lebga vẽeneg mam yamẽ. Mam sak n deegame tɩ Wẽnd sɩd beeme, la tɩ tõnd yell pak-a lame. Mam kell n zãmsa Biiblã, la pa yã n kaoos la m bas m yam tɩ Wẽnnaam kelgda m pʋʋsgã ye.”

▪ A Allan me yell d sẽn gom pipi sõsgã pʋgẽ wã yeela woto: “Daar a yembre, a Zeova Kaset rãmb n wa n na n sõs ne tõnd tɩ mam pagã reeg-ba, bala a ra rat n wʋma b sẽn yeel tɩ ãdem-biis n na n wa vɩɩmd tẽngã zug wakat sẽn kõn sa wã võore. Pa yɩ maam noog ye.  Mam boola m pagã n kẽ kuzĩndẽ wã n yeel-a woto: ‘Tags sõma koe! Gom-kãens pa sakd reegr ye.’

“La mam pagã leoka maam tɩ bɩ m yi n wilg-b tɩ b sẽn yetã pa sɩd ye.

“Mam sẽn yi wã, m pa tõog n wilg-b tɩ b goamã yaa ziri ye. Ne rẽ fãa, b maaga b yĩng n kelg maam, la b kõ-m sebr sẽn wilgd sẽn sɩng to-to tɩ bũmba fãa wa beẽ wã. Mam sẽn karem sebrã, m mikame t’a sẽn wilgd yɛlã to-to wã yaa vẽenega, tɩ m yãk yam n na n bao n bãng Wẽnnaam n paase. Mam sɩnga Biiblã zãmsg ne nin-kãensã, la pa yã n kaoos la m mik t’a sẽn yet bũmb ningã yaa toor fasɩ ne mam sẽn da tagsd to-to tũudmã zugã ye. Mam da bãngda a Zeova n paasdẽ, tɩ m pʋʋsgã me lebgd sõma tɩ m tõe n togs-a yɛl takɩ. Mam da tara manesem kẽer sẽn pa sõma, n pʋʋs a Zeova n kos sõngre. La mam yãame t’a reega m pʋʋsgã.”

▪ A Andrew sẽn vɩ Ãngeletɛɛrã yeela woto: “Baa mam sẽn da yaa ned sẽn pa nong n toeemd a tagsg la sẽn nong siãnsã, mam da tẽeda evolisiõ wã, nebã sẽn yet tɩ yaa sɩdã yĩng bala. Yaa yel-beed toor-toorã sẽn be wã n kɩt tɩ mam da pa rat n tẽ tɩ Wẽnd beeme wã.

 “La mam mi n yeta m meng woto: ‘Wẽnnaam sã n beeme, rẽnda m bao n bãng a sẽn naan tõndã võore. Bõe yĩng tɩ nin-kʋʋrã la zabã piuugi? M sã n da wa tar zu-loɛɛg me, m pʋʋsd n kota sõngre, la m pa mi m sẽn pʋʋsd a soabã ye.

“Daar a ye, ned n kõ mam pagã seb-vãoog a Zeova Kaset rãmbã sẽn yiisi, t’a gom-zugã yet woto: Dũni kãngã na n põsa sãoong bɩ? Mam da wae n sokda m meng sok-kãngã. Mam sẽn karem seb-vãoogã, mam soka m meng woto: ‘Rẽ yĩnga Biiblã sẽn yetã tõe n nafa ned sɩda?’ Kaoosg zugẽ, mam sẽn da wa n be vakãase, ned n kõ maam sebr t’a gom-zugã yet woto: La Bible : Parole de Dieu ou des hommes ? * Mam sẽn karm-a wã, m mikame tɩ Biiblã ne siãnsã goam kẽer pa kɩɩsd taaba, tɩ m tʋlg n na n bãng Biiblã n paase. Rẽ kɩtame t’a Zeova Kaset soab sẽn wa n yeel maam tɩ m sã n data, a na n sõng-m lame tɩ m zãms Biiblã, m sakame. Mam sẽn wa n bãng bũmb ning a Zeova sẽn dat n maanã, m kɩsa sɩd t’a beeme, la tɩ m tõe n pelga m pʋg n pʋʋs-a.”

▪ A Jan yaa pag sẽn vɩ Lõndr t’a roagdbã yaa portɛstã-rãmbã. A yeela woto: “Tũudmã taoor dãmb zãmbã, la namsgã sẽn be zĩig zãngã ra kɩtame tɩ mam yam yi tũudmã. Sẽn paase, mam basa karengã la m wẽed gitaar n yɩɩnd n baood ligdi. Yaa wakat kãng la mam bãng a Pat. A roagdbã yaa katolik-rãmba, la yẽ me yam da yii tũudmã wa maam.

“Tõnd ne karen-biis a taab sẽn bas karengã n da vɩ ne taab ro-vɩʋʋg pʋgẽ. Karen-bi-kãens ra nonga Aazi soolmã neb tũudum yɛla. Yʋng-yʋngo, d ra wae n sõsda ne taab vɩɩmã võor zug tɩ zĩigã zʋʋgdẽ. Baa maam ne a Pat sẽn da pa tẽed tɩ Wẽnnaam beeme wã, d ra tagsdame tɩ bũmb n yɩ sabab tɩ bũmba fãa wa beẽ.

“Tõnd wa n yik n kẽnga Ãngeletɛɛr soolmã rɩtg n na n tɩ bao tʋʋma. Yaa wakat kãng la tõnd dog d pipi biigã. La yʋng a ye, biigã yĩns wa n yik n zabdame. Baa ne m sẽn da pa tẽed Wẽnnaamã, m pa bãng la m sɩng pʋʋsg ye. Rẽ poore, maam ne a Pat wa n pa le noom ne taaba, tɩ mam wa kong n dɩk biigã n loog n bas-a. Sasa kãng me, mam pʋʋsame n kos sõngre, n saagdẽ tɩ Wẽnnaam sã n beẽ, a na n kelg-m lame. Mam pa bãng t’a Pat me pʋʋsame ye.

“Baraare, a Zeova Kaset rãmb a yiib n wa n sõs ne a Pat n wilg-a Biiblã sagls kẽere. A Pat boola maam ne telefõn n sok m sã n dat n naag-a lame n zãms Biiblã ne a Zeova Kaset rãmbã. Tõnd sẽn sɩng zãmsgã, sẽn pa yã n kaoose, d bãngame tɩ d sã n dat n ta Wẽnnaam yam, rẽnda d kẽ kãadem tɩ zems ne tẽngã noyã. La tõnd sẽn da pa noom ne taabã kɩtame tɩ ra wõnd yaa bũmb sẽn yaa toogo.

“Tõnd da rat n bãnga Biiblã bãngr-goam sẽn pidsd to-to wã, namsgã sẽn be wã võore, la Wẽnnaam Rĩungã sẽn yaa bũmb ninga. Bilf-bilfã, d wa n bãngame tɩ ãdem-biisã yell paka Wẽnnaam. Rẽ kɩtame tɩ d rat n tũ a raabã. D yãka yam n kẽ kãadem. Wẽnnaam Gomdã sagls sõnga tõnd tɩ d wub d kamb a tãabã sõma. D neeme t’a Zeova kelga d pʋʋsgã.”

Bao-y n bãng-y Wẽnnaam sã n sɩd kelgda pʋʋsgã

Neb milyõ-rãmb a taab me maana wa neb nins yell d sẽn gom sõs-kãngã pʋgẽ wã, n pa bas tɩ ziri tũudmã tudg-b ye. B bao n bãnga Wẽnnaam sẽn bas tɩ namsgã beẽ wã võore. Y sã n gũusame n gese, y mikdame tɩ yaa b ned kam fãa sẽn wa n bãng Biiblã sõma wã la a bãng t’a Zeova sɩd kelgda pʋʋsgã.

Y rat n bãnga bũmb nins sẽn wilgd tɩ Wẽnnaam sɩd beeme wã bɩ? Sã n yaa rẽ, bɩ y kos a Zeova Kaset rãmbã tɩ b na n sõng-y lame tɩ y bãng a Zeova, la y bãng y sẽn tõe n paam sẽn wʋmd-a pʋʋsgã zood to-to.—Yɩɩl Sõamyã 65:3.

[Tẽngr not rãmbã]

[Goam sẽn tar pãnga, seb-neng 10]

“Mam sẽn wa n bãng bũmb ning a Zeova sẽn dat n maanã, m kɩsa sɩd t’a beeme, la tɩ m tõe n pelga m pʋg n pʋʋs-a.”

[Foto seb-neng a 9]

Yaa d sã n bao n bãng sɩdã Wẽnnaam zug la d paamd tẽeb hakɩkã