Kẽer pa tẽed yel-soalmã ye: Bũmb a tãab b sẽn tik n pa tẽeda

PIPI SOABA: B yetame tɩ yel-soalmã pa zems ne noy nins sẽn so ãndũniyã ye. D sẽn wʋmd noy nins sẽn so ãndũniyã võor to-to wã tika siãnsã bãngdb sẽn vaees n bãng bũmb ninsã. La tõnd pa mi ãndũniyã yɛl fãa ye. Rẽnd d sẽn wʋmd no-kãens võor to-to wã tara kogse. (Zoob 38:4) Wala makre, bãngd tõe n dɩka sẽk wʋsg n bao n na n bãng noy nins sẽn so ãndũniyã noor a yembre. La rẽ poore, a tõe n wa yãa bũmb sẽn pa wõnd a sẽn da sɩng n miẽ wã, n bãng t’a ket n pa wʋmd no-kãng võorã zãng ye.

Kibar sẽn maand laad n wilgd tɩ ned bãngr sã n tar koaka, a tõe n tudga nana-nana. Rao yʋʋr sẽn boond t’a John Locke (1632-1704) togsa Peyiba ãmbasadɛɛr ne Siam rĩm a ye kibare. A wilgame tɩ ãmbasadɛɛrã sẽn wa n bilgd b tẽngã sẽn yaa to-to wã, a yeela rĩmã tɩ bãmb tẽngẽ wã, wakat ninga, wobg tõe n kẽna koom zugu. Rĩmã tagsame tɩ ãmbasadɛɛrã yagdame. La ãmbasadɛɛrã yaool n da gomda bũmb rĩmã sẽn zɩ n yã yelle. Rĩmã ra pa mi tɩ koom tõe n maaga wʋsg n lebg galaase, tɩ wobg tõog n kẽn a zug ye. A sẽn tẽ tɩ yaa bũmb sẽn pa tõeyã, yaa a sẽn da pa wʋm yɛlã fãa võorã.

Ad bũmb kẽer bãngdbã sẽn tõog n maane, tɩ nebã ra tagsdẽ tɩ pa tõe ye:

● B tõog n maana sɩls sẽn tõe n dɩk neb 800 n yi Niuyork n kẽng Paari n pa tol n yalse, n tõe n maan kilo 900 lɛɛr a ye.

● B maana masĩn-dãmb tɩ ned tõe n zĩnd a tẽngẽ n sõs ne ned sẽn be tẽn-zẽnga, la b ne taaba.

● B tõe n dɩka yɩɩl kobs DVD zugu.

● Logtor tõe n wopeera neda, n yãk a yĩngã will n ning ned a to.

Woto fãa wilgda tõnd bõe? Ninsaalbã sẽn tõog n maan bũmb nebã sẽn da tagsd tɩ pa tõeyã, yaa vẽeneg tɩ Wẽnnaam sẽn naan ãndũniyã ne bũmb nins fãa sẽn be a pʋgẽ wã tõe n maana yɛl sẽn lingd tõndo, yɛl tõnd sẽn nan pa tõe n maane. *—Sɩngre 18:14; Matɩe 19:26.

YIIB-N-SOABA: B yetame tɩ Biiblã gomda yel-soalmã yell sẽn na yɩl tɩ nebã tẽ Wẽnnaam. Biiblã pa wilg tɩ d segd n tẽe yel-solemd fãa ye. A pʋd n keooga tõnd tɩ d ra yɩ yãg-yãg n tẽ yel-soalem la bõn-bãn ye. Ad a sẽn yeele: “Kɩɩsg soab kãng na n waa ne Sʋɩtãanã pãnga, n maan yel-soalem la bõn-bãn buud fãa sẽn pa sɩda, ne wẽng buud fãa n belg nebã.”—2 Tesalonik rãmba 2:9, 10, New International Version.

A Zezi Kirist me wilgame tɩ neb n da na n wa yetẽ tɩ b yaa yẽ karen-biisi, n yaool n pa a karen-biis hakɩk ye. B kẽer na n wa sok-a-la woto: “Zusoaba, Zusoaba, tõnd da ka togs bãngr-goam ne yãmb yʋʋre, la d rig zĩn-dãmb ne yãmb yʋʋre, la d maan yel-soalem wʋsg ne yãmb yʋʋr sɩda?” (Matɩe 7:22, NIV) La a Zezi na n yeelame tɩ b pa a karen-biis ye. (Matɩe 7:23) Dẽnd vẽenega, a Zezi wilgame tɩ pa yel-soalmã fãa n maand ne Wẽnnaam pãng ye.

Wẽnnaam pa yeel nebã tɩ b tik yel-soalmã zug bal n tẽ yẽ ye. A ratame tɩ b tẽebã tik bãngr hakɩk zugu.—Hebre dãmba 11:1.

D gom Biiblã yel-solemd nebã wʋsg sẽn mi yelle. Yaa a Zezi Kirist vʋʋgrã. Yʋʋm wʋsg a Zezi vʋʋgrã poore, Korẽnt kiris-neb n wa n  sãmbd a sã n sɩd vʋʋgame. Wãn to la tʋm-tʋmd a Poll sõng kiris-nin-kãense? A yeel-b lame bal tɩ b we n tẽ bɩ? Ayo! A tẽeg-b-la yɛl sẽn wilgd t’a Zezi sɩd vʋʋgame. A yeelame tɩ b muma a Zezi, la tɩ “dasem a tãab raare, bãmb vʋʋga wa Gʋlsg Sõamyã sẽn yeelã. La bãmb vẽnega b meng ne a Sefas n yaool n vẽneg b meng ne piig la a yiibã. Dẽ poore, bãmb vẽnega b meng ne ba-biis sẽn yɩɩd kobs-nu, la sẽn yɩɩd pʋɩ-sʋk ket n vɩɩme.”—1 Korẽnt dãmba 15:4-8.

Rẽ yĩnga ra tara yõod tɩ nin-kãensã tẽ a Zezi vʋʋgrã bɩ? A Poll yeela woto: “Kirist sã n ka vʋʋge, tõnd koe-moonegã yaa zaalem, la yãmb tẽebã me yaa zaalem.” (1 Korẽnt dãmba 15:14) A Poll ra miime tɩ pa reem bũmb ye. Bãng a Zezi sã n vʋʋgame bɩ a pa vʋʋgã tara yõod wʋsgo. A Poll ra miime t’a sɩd vʋʋgame, bala wakat kãng tɩ neb kobs sẽn maan kaset ne rẽ n ket n vɩ. Sɩd me, baa na tũ ne b yõore, neb nins sẽn maan kaset ne rẽ wã ra pa sakd n kɩɩs bũmb ning b sẽn yã wã ye.—1 Korẽnt dãmba 15:17-19.

TÃAB-N-SOABA: B yetame tɩ yel-soalmã yaa yɛl sẽn maane, tɩ neb nins sẽn pa karmã pa wʋm b võore, n tagsdẽ tɩ yaa yel-soalma. Bãngdb kẽer yetame tɩ Biiblã pʋgẽ yel-soalmã yaa yɛl sẽn maan tɩ pa tũ ne Wẽnnaam pãng ye. B tagsdame tɩ yaa b sã n yeel tɩ pa tũ ne Wẽnnaam pãng la bãmb tõe n tẽ Biiblã. Yaa sɩd tɩ yel-soalem kẽer tõe n naaga ne yɛl sẽn mi n maandẽ wala tẽn-digimds la bã-longdse. La neb nins sẽn tẽed tɩ yaa yɛl sẽn maan woto balã yĩmdame tɩ yaa yɛl sẽn maan wakat takɩ.

Wala makre, kẽer yeelame tɩ pipi toog ning sẽn paam Ezipt nebã, rat n yeel tɩ Nill kʋɩlgã koom sẽn lebg zɩɩmã pa sɩd ye. B yetame tɩ yaa tãn-miuug ne bõn-vɩɩlɩ sẽn yaa miid n tũ koomã n wa kʋɩlgẽ wã, t’a koomã fãa lebg miuugu. La Biiblã yaool n yeelame tɩ kʋɩlgã koom lebga zɩɩm. D sã n karem Yikr 7:14-21 wã, d yãtame tɩ yel-solemdã maana wakat ning a Moiiz sẽn kɩt t’a Aarõ wẽ Nill kʋɩlgã koom ne a rasaarã. Baa kʋɩlgã koom sẽn lebg miuugã sã n tũu ne tãn-miuug la bõn-vɩɩlɩ sẽn yaa miid sababo, yaa yel-solemde. Bala yɩɩ wakat ning a Aarõ sẽn wẽ koomã.

Makr a to me n wilgd tɩ yel-soalmã sẽn maan wakat ningã tara yõodo. Yaa bũmb ning sẽn maan Israyɛll nebã sẽn wa n dat n kẽ kãabg tẽngã pʋgẽ wã. B ra segd n pasga Zʋrdẽ kʋɩlgã, la rẽ t’a koomã pidame n puugdẽ. Biiblã wilgame tɩ ‘maan-kʋʋdb nins sẽn zãad kãabg koglgã nao sẽn kẽ koomẽ wã,’ koomã yalsame, n zẽk n “lebg wa lalga.” (Zozue 3:15, 16) Rẽ yĩnga yaa tẽngã n digimd tɩ yɩ sabab tɩ woto maan bɩ? Biiblã pa wilg rẽ ye. La koomã sẽn yals wakat ningã yaa yel-solemde. Yɩɩ wakat ning a Zeova sẽn da yeelã bal kɛpɩ.—Zozue 3:7, 8, 13.

Woto fãa sɩd yaa yel-soalem bɩ? Biiblã wilgame tɩ b yaa yel-soalma. B pa yel-kãsems sẽn maan woto bal ye. D pa tõe n yeel tɩ b buud sẽn pa maand daar fãa wã, b pa tõe n zĩnd ye.

[Tẽngr note]