Laafɩ sẽn na n zĩnd yʋʋm tusr la wakat fãa yĩnga
Laafɩ sẽn na n zĩnd yʋʋm tusr la wakat fãa yĩnga
“Tɩ Wẽnnaam yɩ fãa ne fãa.”—1 KOR. 15:28.
Y TÕE N WILGA A VÕOR BƖ?
Vɛrse nins sẽn pʋgdã goam sã n pidsi, bõe n na n yɩ yãmb noogo?
1. Bõe la kʋʋn-kãsengã neb gũuda?
TAGS-Y n ges-y goosneema sẽn na n tar pãnga, t’a taoor soabã yaa nin-tɩrg la nimbãan-zoɛta, n na n dɩ naam yʋʋm tusri. A nin-buiidã kõn paam bark wʋsg sɩda? Woto n gũud kʋʋn-kãsengã nebã. Yaa bãmb n na n põs “to-kãseng” ning sẽn na n kɩt tɩ dũni-kãngã sa wã sasa.—Wil. 7:9, 14.
2. Ninsaalbã sẽn sɩng n so b mens na maan yʋʋm 6000 woto wã waa ne bõe?
2 Ninsaalbã sẽn sɩng n so b mens na maan yʋʋm 6000 woto wã waa ne toog la namsg wʋsgo. Hal sẽn kaoose, Biiblã yeelame tɩ “ninsaal tõe a to n maand-a wẽnga.” (Koɛ. 8:9) La rũndã-rũndã yẽ? Zabã la pãn-soaadbã kɩɩsgã toor sẽn ka be, zu-loees wala naongã, bãasã, tẽn-gãongã sãoongã la yɛl a taab n namsd ninsaalbã. Goosneema-rãmbã neb kẽer yetame tɩ ninsaalbã sã n pa bas tẽn-gãong sãoongo, yel-beed n na n paam-ba.
3. Kiristã naam sẽn na n kaoos yʋʋm tusrã na n waa ne bõe?
3 A Zezi Kirist sẽn yaa Mesi wã ne neb 144000 naam sasa, Wẽnnaam Rĩungã na n maana bũmb toor-toor tɩ bũmb nins sẽn namsd ninsaalbã sa, la a maneg tẽngã. B naamã sẽn na n kaoos yʋʋm tusrã sasa, Wẽnnaam a Zeova sẽn da pʋlem bũmb ningã na n pidsame. A ra yeela woto: “Mam na n maana yĩngr-paalga, la dũni-paalga. B ka na n le tẽeg bũmb nins sẽn da zĩnd pĩndã yell ye, b ka na n le tags b yell ye.” (Ezai 65:17) Yel-bʋs sẽn yaa kãsems n nan wate? Baa b sẽn yaa yɛl ‘nin sẽn nan ka ne wã,’ Biiblã bãngr-goam tõe n sõng-d lame tɩ d bãng-ba.—2 Kor. 4:18.
‘NEBÃ NA N MEE ZAGS LA B SEL TƖƖSE’
4. Bõe yĩng tɩ d tõe n yeel tɩ zak paoong yaa toog rũndã-rũndã?
4 Ned fãa rata a toorẽ zaka, zĩig yẽ ne a neb sẽn tõe n zĩnd bãane. La rũndã-rũndã, zak paoong yaa toog wʋsgo. Nebã tɩ sũu taab galʋ-tẽnsã pʋsẽ. Wʋsg vɩɩ ro-põos pʋsẽ, wall non-lotɩ-rãmbẽ. Ne nin-kãense, paam f toorẽ zak yaa toogo.
5, 6. a) Wãn to la Ezai 65:21 wã la Miise 4:4 na n pidsi? b) Bõe la d segd n maan n wa paam bark kãensã?
5 La Wẽnnaam Rĩungã naam sasa, ned fãa na n paama a toorẽ zaka. Bala, no-rɛɛs a Ezai pĩnd n togsame tɩ nebã “na n mee zags n zĩnd b pʋsẽ,” la tɩ b “na n sela tɩɩs n dɩ b biisã.” (Ezai 65:21) La pa rot bal la b na n paam ye. Baa rũndã-rũndã neb kẽer tara b toorẽ zagse, tɩ sãnda tar zag-bɛd menga. La b yam pa gãe bãan ye. Bala b yɛɛsda laog zu-loees na n wa kɩt tɩ b koos b zagsã, pa rẽ bɩ bi-bees na n wa kao b rotã. La Wẽnnaam Rĩungã naam sasa, pa na n le yɩ woto ye. No-rɛɛs a Miise yeelame tɩ “ned kam fãa na n zĩnda a viyn tɩɩg ne a kankang tẽngr tɩ ned ka yɛɛs-b ye.”—Mii. 4:4.
6 La bõe la d segd n maan n wa paam bark kãensã? Yaa vẽeneg tɩ tõnd ned kam fãa nong n paama a yam zaka. La d pa na n bao rẽ ne d sũur fãa ye. Wala makre, d pa na n sak n dɩk sam wʋsg rẽ yĩng ye. Wall tɩ d maan woto wã, yɩta sõma tɩ d wilgdẽ tɩ d gũuda a Zeova pʋlemsã pidsgu. Tẽeg-y t’a Zezi ra goma a mengã yelle, n yeel woto: “Waas tara bogdo, la liuuli tara tʋgdo, la Ninsaal Biigã ka tar zĩig sẽn na n gãneg b zug ye.” (Luk 9:58) A Zezi ra tõe n mee roog sõmblem sẽn ka to wall a ra. La bõe yĩng t’a pa maan woto? A ra pa rat n maan bũmb sẽn na n kɩt t’a pa lʋɩɩs Rĩungã yɛl taoor ye. Bɩ d rɩk a togs-n-taare, n da bas tɩ laogã baoob pak-d ye.—Mat. 6:33, 34.
“DIGD-N-YĨIDS NE PE-BI NA N LAGMA TAAB N WÃBE”
7. Tõ-bʋg la a Zeova kõ a Ãdem ne a Hawa?
7 A Zeova sẽn wa n na n naan tẽng zug bõn-naandsã, yaa ninsaal la a naan yaoolem. A togsa a tʋʋm-mitã sẽn yaa a Zezi wã bũmb ning sẽn kɩt t’a naan ninsaalã, n yeel woto: “D naan ninsaal t’a yɩ wa tõnd n wẽneg tõndo, la a soog zĩmã sẽn be koomã pʋgẽ wã ne bõn-yɩgdɩ wã sẽn yɩgd yĩngrã, la rũmsã ne dũniyã fãa, la bõn-saagdsã fãa sẽn be tẽngã zugã.” (Sɩng. 1:26) Wẽnnaam kõ a Ãdem ne a Hawa tõog tɩ b soog rũmsã. Ninsaalbã fãa ra na n talla tõ-kãnga.
8. Rũmsã manesem yaa wãn-wãna?
8 Rẽ yĩnga ninsaalbã tõe n sooga rũmsã fãa tɩ laafɩ zĩnd b sʋk sɩda? Neb wʋsg zagsẽ, b tara rũms b sẽn nonge, wala baas la yũusi. La we-rũmsã yẽ? Bãngdb nins sẽn pẽneg we-rũms n na n bao n bãng-b sõma wã mikame tɩ b mii sũ-noog wall sũ-sãoongo. D wae n yãta rũms sẽn yɛɛs wall sẽn dat n zabe, b sẽn get tɩ yell n yegd-b yĩnga. La rẽ yĩnga, b mii nonglem bɩ? Bãngdbã wilgame tɩ rũmsã sã n wa tar kamba, b geta b yell sõma.
9. Bõe n na n toeem rũmsã manesmẽ?
9 Rẽnd Biiblã sẽn yeel tɩ laafɩ na n wa zĩnda ninsaalbã ne rũmsã sʋkã, pa tog n ling-d ye. (Karm-y Ezai 11:6-9; 65:25.) Bõe yĩnga? Tẽeg-y-yã a Zeova sẽn yeel a Nowe ne a zakã rãmb bũmb ning b sẽn wa n yi koglgã pʋgẽ sa-kãsengã poorã. A yeel-b-la woto: “Rũms nins fãa sẽn be dũniyã zugã na n zoee yãmba.” Rẽ yaa rũmsã koglg yĩnga. (Sɩng. 9:2, 3) La a Zeova tõe n kɩtame tɩ rabeem kãng sa, tɩ laafɩ zĩnd ninsaalbã ne rũmsã sʋk wa a sẽn sɩng n datã. (Oze 2:20) Wakat kãnga, tẽngã zug vɩɩm sɩd na n talla yamleoogo.
‘WẼNNAAM NA N YẼESA NINTÃMÃ FÃA’
10. Bõe n mi n kɩt tɩ ned raag nintãm?
10 A Salomo sẽn yã “neb nins b sẽn maand pãng dũniyã zug ka wã,” a sũur sãamame t’a yeel woto: “Gese, b sẽn namsd b rãmbã nintãm yitame, la ned ka belsd bãmb ye.” (Koɛ. 4:1) Rũndã-rũndã, yɛlã wẽnem yɩɩda rẽ. D fãa mi n daaga nintãm. Yaa sɩd tɩ sũ-noog nintãm beeme. La naoor wʋsgo, yaa sũ-sãoong n wat ne nintãm.
11. Biiblã kiba-bʋg n kẽed yãmb n yɩɩda?
11 Tẽeg-y Biiblã kibay nins sẽn gomd neb sẽn yãb yellã. Wala makre, a Saara sẽn wa n ki a yʋʋm 127 zugẽ wã, “a Abrahaam kẽeme n yãb n wiis a Saara yĩnga.” (Sɩng. 23:1, 2) A Naomi kom-dibli wã kũum poore, a sẽn wa n pʋʋsd a bi-pagb a yiibã wẽnd-na-taasã, b “zẽka b koees n yãb nintãm.” A sẽn le wa n gomd ne-ba, b “leb n zẽka b koees n yãbe.” (Rut 1:9, 14) Rĩm a Ezekɩas sẽn wa n lʋɩ bãag n wa bãng t’a na n kiime, a pʋʋsame, n ‘yãb nintãm wʋsgo,’ t’a Zeova kelg a pʋʋsgã. (2 Rĩm 20:1-5) D fãa tẽra kibar ning sẽn gomd tʋm-tʋmd a Pɩɛɛr sẽn kɩɩs a Zezi wã yellã. A Pɩɛɛr sẽn wʋm no-raoog kɛlengã, a “yii yɩng n yãb ne sũ-sãoong kãsenga.”—Mat. 26:75.
12. Wãn to la Rĩungã naam na n yols ãdem-biisã?
12 Yel-beed toor-toor sẽn paamd ãdem-biisã yĩnga, b fãa rata belsg la yolsgo. La Rĩungã naam sẽn na n kaoos yʋʋm tusrã sasa, nebã na n paama rẽ. Bala, Wẽnnaam “na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye.” (Wil. 21:4) Yaa sɩd tɩ sũ-sãoongo, yãbr la toog sẽn ka na n le zĩndã yaa bũmb sẽn be yamleoogo. La Wẽnnaam sẽn pʋlem t’a na n kɩtame tɩ kũumã sẽn yaa ãdem-biisã bɛ-kãsengã ra le zĩndã n be yamleoog n yɩɩda. Wãn to la rẽ na n pidsi?
‘NEB NINS FÃA SẼN BE YAAD PƲSẼ WÃ NA N YIIME’
13. A Ãdem kɩɩsgã tɛka, wãn to la kũumã namsd ninsaalbã?
13 A Ãdem kɩɩsgã tɛka, kũum tara pãng wʋsg ninsaalbã zugu, n wat ne toog la sũ-sãoongo. A yaa bɛ-kãseng ninsaalbã sẽn yaa yel-wẽn-maandbã baa a ye sẽn pa tõe n põse. (Rom 5:12, 14) Sɩd me, neb milyõ-rãmb n “zoet kũum n be yembd pʋgẽ b yõor tɛka.”—Heb. 2:15.
14. Kũumã sẽn na n sãamã na n waa ne bark bʋse?
14 Biiblã wilgame tɩ wakat n wat tɩ kũum sẽn yaa ‘yaoolem bɛyã na n sãame.’ (1 Kor. 15:26) Woto na n waa ne bark bugs a yiibu. Pipi, kʋʋn-kãsengã neb sẽn vɩ rũndã-rũndã wã na n põsame n kẽ dũni-paalgã pʋgẽ, n tõe n kell n vɩɩmd wakat sẽn ka sɛta. Yiib-n-soaba, neb milyaar-dãmb sẽn zoe n ki n na n vʋʋge. Tags-y n ges-y sũ-noog ning kʋʋn-kãsengã neb sẽn na n paame, b sã n wa pʋʋsd sẽn vʋʋg-bã ne b waoongo. D sã n maag d yĩng n karem Biiblã kibay nins sẽn gomd neb sẽn vʋʋg yellã, d bãngda kũum vʋʋgrã sẽn na n wa ne sũ-noog ningã bilfu.—Karm-y Mark 5:38-42; Luk 7:11-17.
15. Y ned sẽn ki sã n vʋʋge, y manesem na n yɩɩ wãna?
15 Kibay nins d sẽn karmã pʋgẽ, b wilgame tɩ “nebã yɛɛsa wʋsgo,” la tɩ “bãmb waooga Wẽnnaam.” Y sã n da zĩnda nin-kãensã vʋʋgrẽ wã, tõe tɩ ra na n yɩɩ woto me ne yãmba. Sɩd me, d neb nins sẽn ki wã sã n vʋʋge, d sũurã na n yɩɩ noog wʋsgo! A Zezi yeela woto: “Wakat watame tɩ fãa sẽn be yaad pʋsẽ na n wʋm bãmb koɛɛg n yi.” (Zã 5:28) Baa tõnd ned baa a ye sẽn nan pa yã a buudã, vʋʋgrã bee yel-kãsems nins ‘nin sẽn nan ka ne wã’ sʋka.
WẼNNAAM NA N YƖƖ FÃA NED KAM FÃA YĨNGA
16. a) Bõe yĩng tɩ d segd n gomd bõn-sõma nins d sẽn gũudã yell ne yẽesem? b) Bõe la a Poll yeel Korẽnt kiris-nebã n na n keng b raoodo?
16 Vẽenega, bark wʋsg n gũud neb nins sẽn sakd a Zeova rũndã-rũndã sẽn yaa toog wakatã. Baa d sẽn nan pa ne bark kãensã, yɩta sõma tɩ d tagsd b yelle. Rẽ na n sõng-d lame tɩ d wɩngd ne bũmb ning sẽn tar yõodã maanego, n tõog tɩ dũni-kãngã bũmb baa a ye da tiis-d ye. (Luk 21:34; 1 Tɩm. 6:17-19) Woto yĩnga, d sã n maand d zak pʋgẽ zaabr Biibl zãmsgã, d sã n sõsd ne d tẽed-n-taasã, d sã n zãmsd ned Biiblã wall d moond koɛɛgã, yɩta sõma tɩ d gomd bõn-sõma nins d sẽn gũudã yell ne yẽesem. Rẽ na n sõngame tɩ bõn-kãens ket n yaa vẽenes d yamẽ. Yaa woto la tʋm-tʋmd a Poll maan n keng a tẽed-n-taasã raoodo. A yeel-b-la bũmb n sõng-b tɩ b tags yɛl sẽn na n zĩnd Kiristã naam sẽn na n kaoos yʋʋm tusrã baasgẽ yelle. Yãmb wʋmda a Poll gomdã võor sõma bɩ? Traduction du monde nouveau wã pʋgẽ, 1 Korẽnt dãmb 15:24 yeta woto: “Dẽ poore, a sã n lub goosneema-rãmbã la zu-soben-dãmbã ne naam buud fãa n sa, a na n lebsa rĩungã a Wẽnnaam la a Ba wã. Rẽ la baasgã.”—Karm-y 1 Korẽnt dãmb 15:25, 28.
17, 18. a) Bõe yĩng tɩ b yetẽ tɩ sɩngrẽ wã, a Zeova n da yaa “fãa ne fãa”? b) Bõe la a Zezi na n maan tɩ yɛlã lebs n yɩ wa sɩngrẽ wã?
17 A Poll sẽn yeel tɩ ‘Wẽnnaam na n yɩɩ fãa ne fãa’ wã, a wilga vɩɩmã sẽn na n yɩ to-to Kiristã naam sẽn na n kaoos yʋʋm tusrã baasgẽ wã sõma. La woto rat n yeelame tɩ bõe? Tẽeg-y wakat ning a Ãdem ne a Hawa sẽn da wa n be Edɛn n yaa a Zeova zakã nebã. Rẽ tɩ yaa a Zeova n dɩt naam malɛgsã la ninsaalbã zugu. B ra tõe n sõsa ne a Zeova, n maand a raabã la b paamd a barka. Woto la a Zeova ra yaa fãa ned kam fãa yĩnga.
18 Yaa a Sʋɩtãan sẽn wa n belg ninsaalbã tɩ b kɩɩs a Zeova wã la yɛlã toeem-yã. La yʋʋmd 1914 tɛkã, Mesi wã Rĩung maanda bũmb toor-toor n na n kɩt tɩ yɛlã lebs n yɩ wa sɩngrẽ wã. (Ef. 1:9, 10) Kiristã naam sẽn na n kaoos yʋʋm tusrã sasa, bõn-sõma ‘nin sẽn nan ka ne’ la d na n yã. Dẽ poor la “baasgã,” rat n yeel tɩ Kiristã naamã baasgo. La bõe n na n maane? Baa b sẽn kõ a Zezi “pãng fãa” bɩ tõog fãa saasẽ la tẽngã zugã, a pa nong naam ye. A pa baood n na n deeg a Zeova zĩig ye. A na n sika a meng n ‘lebs soolmã Wẽnnaam sẽn yaa a Ba wã nugẽ.’ Rẽnd a na n tʋma ne pãng ning b sẽn kõ-a wã “Wẽnnaam waoogr” yĩnga.—Mat. 28:18; Fil. 2:9-11.
19, 20. a) Wãn to la neb nins sẽn na n vɩɩmd Rĩungã naam sasa wã na n wilg tɩ b sakda a Zeova? b) Bark bʋs la d gũuda?
19 Wakat kãng tɩ neb nins sẽn vɩ tẽngã zugã zemsa zãnga. B na n dɩka a Zezi togs-n-taare, n sik b mens n sak a Zeova. Yaoolem makr n na n zĩndi, tɩ b paam n wilg b sã n sɩd ratame t’a Zeova yɩ b naaba. (Wil. 20:7-10) Rẽ poore, b na n sãama malɛgs nins la ninsaalb nins sẽn na n yɩ tõatbã fãa. Ad sɩd na n yɩɩ sũ-noog wakate! A Zeova zakã rãmb fãa, sẽn be-b saasẽ la sẽn be-b tẽngã zugã na n pẽgd-a lame, t’a yɩ fãa ned kam fãa yĩnga.—Karm-y Yɩɩl Sõamyã 99:1-3.
20 Rẽ yĩnga, y sẽn bãng bõn-kãsems nins Rĩungã sẽn na n maan ka la bilfã pa kɩt tɩ y rat n lʋɩɩs Wẽnnaam daabã taoor sɩda? Pa sõng-y tɩ y na n maan y sẽn tõe fãa n da bas t’a Sʋɩtãan dũniyã belg-y sɩda? Y pa maneg n kɩs sɩd tɩ y segd n zĩnda a Zeova poorẽ sɩda? Bɩ y mao tɩ y tʋʋmã wilgdẽ tɩ y tʋll n maana woto wakat fãa. Rẽ la y na n wa paam laafɩ la sũ-noog sẽn na n kaoos yʋʋm tusri, la wakat fãa yĩnga.
[Zãmsgã sogsgã]
[Foto seb-neng 16]
Rĩm a Zezi sã n wa sa a tʋʋmdã, a na n sika a meng n lebs naamã a Ba wã
