Pagbã zu-loeese

“Mam sã n ne b sẽn namsd pagbã to-to wã, m pa tol n dat n bɩ n lebg pag ye.” —Woto la a ZAHRA sẽn tar yʋʋm 15 wã yeel zʋrnall a ye (GEO) pʋgẽ.

PƲG-SADÃ goam sẽn be rɩtgã yaa sɩda. Dũniyã gill zugu, b maanda pʋg-sadbã la pagbã pãnga, la b kis-ba. Ad kibay sẽn wilgd rẽnda:

● Kisgrã. Aazi soolmẽ wã, roagdbã fãa la bal pa rat kom-pugli ye. Nasiõzĩni wã wilgame tɩ yʋʋmd 2011 soabã, pʋsã yiisgu, kambã kʋʋbo, la b sẽn pa get pagbã la kom-pugli wã yell sõma wã yɩɩ sabaab tɩ sẽn kolg bãmb milyõ 134 ki Aazi soolmẽ wã.

● Karengã. Dũniyã gill zugu, neb nins sẽn pa karem baa bilf wall sẽn pa karem tɩ ta yʋʋm a naasã sʋka, pagbã n yɩɩde. B neb a tãab sʋka, yiibã yaa pagba.

● Pʋg-yõgrã. Tẽns wʋsg pʋsẽ, rao sã n maan a pag pãng n kẽ ne-a, nebã pa get tɩ yaa wẽng ye. Sẽn yɩɩd pagb milyaar a yi la pʋɩ-sʋk n vɩ tẽns a woto pʋsẽ.

● Laafɩ wã wɛɛngẽ. Tẽns nins sẽn yaa naongã pʋsẽ, minit a yiib fãa, pag n kiid ne pʋg wall rogem sasa, a sẽn pa paam tɩ logtor ges a yell sõma yĩnga.

● Laloa wã wɛɛngẽ. Dũniyã gill zugu, sẽn yɩɩd koodã pʋɩ-sʋk yaa pagbã n koode. La tẽns wʋsg laloa pa kõt pag sor t’a tõe n paam a toorẽ pʋʋgo, wall a soog a ba pʋʋg a ba wã kũum poor ye.

Bõe yĩng tɩ b wẽgd pagbã woto? Naoor wʋsgo, yaa tũudmã sẽn zãmsd nebã bũmb ningã n kɩt tɩ b wẽgd pagbã la b namsd-ba, wall b kõt neb nins sẽn maand woto wã bʋʋmã. Fãrens zʋrnall a ye wilgame tɩ Ẽnd avoka-poak a Chandra Rami Chopra yeela woto: “Bũmb a ye n kɩt tɩ tũudum toor-toorã neb sẽn tũud noy ninsã wõnd taaba: Yaa b sẽn kɩtd tɩ b pa nand pagbã.”

Yãmb me tagsda woto bɩ? Y tagsdame tɩ Biiblã yaa wa tũudum sɛb kẽer sẽn gomd n paoogd pagbã bɩ? Sãnda yetame tɩ Biiblã goam kẽer paoogda pagbã. La rẽ yĩnga Biiblã wilgame tɩ pagbã tara yõod Wẽnnaam nifẽ bɩ? Neb wʋsg tara b sẽn tagsd yel-kãngã zugu. La d sã n bao n bãng Biiblã sẽn yetã, d paamda sok-kãngã leoore.

[Foto rãmba, seb-neng a 3]

© G.M.B. Akash/Panos Pictures