“Sãamb” sẽn naag taab tũudum hakɩkã pʋgẽ
“Sãamb” sẽn naag taab tũudum hakɩkã pʋgẽ
“Sãamb . . . n na n wa ko yãmb pʋtã la b maneg y tɩɩsã. B na n boola yãmb tɩ Zusoabã maan-kʋʋdba.”—EZAI 61:5, 6.
Y NA N LEOKAME TƖ BÕE?
Neb kẽer manesem yaa wãn ne sãamba, la bõe la Biiblã yeta?
Koe-bʋg la a Zeova Kaset rãmbã taasd buud toɛy-toɛyã neba?
Bõe yĩng tɩ d tõe n yeel tɩ baa rũndã-rũndã, a Zeova Kaset rãmbã pa get taab wa sãamba?
1. Neb kẽer manesem yaa wãn ne sãamba, la bõe yĩng tɩ woto pa zemse?
WA SÕSG ning sẽn loogã sẽn wilgã, neb n be n kis sãamb bɩ tẽn-zẽng neba. Tõe tɩ b tagsdame tɩ b sãoã tẽns a taabã neba, la woto pa zems ye. Bala, ãdem-biig pa yɩɩd a to ye. Sebr a ye (The Races of Mankind) yeelame tɩ baa ninsaalbã sẽn yaa buud toor-toorã, b fãa yaa saam-biis wa Biiblã sẽn yeelã. Sɩd me, baa ned ne a saam-biig pa wõnd taaba, b yaa saam-biisi.
2, 3. Wãn to la a Zeova ra get sãambã sẽn da vɩ Israyɛllã?
2 Tẽnsã fãa pʋsẽ, sãamb beeme. Ra yaa woto pĩnd wẽndẽ Israyɛllã pʋgẽ me. Wẽnnaam da maana kaool ne Israyɛll nebã tɩ b yaa a nin-buiidu. Yaa sɩd tɩ Israyɛlle, yɛl kẽer la sãan da pa tõe n maan ye. La tõogã ra wilgame tɩ b pa segd n wẽg sãana, la tɩ b segd n waoog-a lame. Tõnd me tog n maana woto. Bu-welsg pa segd n zĩnd kiris-neb hakɩkã sʋk ye. Bõe yĩnga? Tʋm-tʋmd a Pɩɛɛr yeela woto: “Wẽnnaam ka tũusd neb ye. La buud fãa sʋka, ned ning sẽn zoet bãmba la sẽn maand tɩrga, yẽ soab tata bãmb yam.”—Tʋʋ. 10:34, 35.
3 Sãambã sẽn da vɩ Israyɛllã ra naagda tẽng-n-dãmbã n paamd bark toor-toore. Woto wilgdame t’a Zeova pa kis sãan ye. Tʋm-tʋmd a Poll wilga rẽ, n yeel woto: “Wẽnnaam yaa zʋɩf-rãmbã Wẽnnaam bal bɩ? Bãmb ka bu-zẽmsã Wẽnnaam me la? N-ye, bãmb yaa bu-zẽmsã Wẽnnaam me.”—Rom 3:29; Zoɛll 3:5.
4. Bõe yĩng tɩ d tõe n yeel tɩ “Israyɛll sẽn yaa Wẽnnaam dẽndã” neb sʋka, sãan kae?
4 A Zeova sẽn maan kaool-paalgã ne kiris-neb nins sẽn paam vʋʋsem sõng zaeebã poore, bãmb n ledg pĩnd wẽndẽ Israyɛllã n yaa buud Wẽnnaam sẽn so. Rẽ tɛka, b boond-b lame tɩ “Israyɛll sẽn yaa Wẽnnaam dẽnda.” (Gal. 6:16) A Poll yeelame tɩ bu-paal-kãng nebã sʋka, “gɛrk wall zʋɩf ka le be ye, zũng wall moaag ka le be ye, weoog neb wall sit ka le be ye, yamb wall burkĩn ka le be ye, la Kirist yaa fãa la b bee fãa pʋgẽ.” (Kol. 3:11) Woto wilgdame tɩ sẽn paam-b vʋʋsem sõng zaeebã sʋka, sãan kae ye.
5, 6. a) Sok-bʋg la d tõe n sok Ezai 61:5, 6 goamã wɛɛngẽ? b) Ãnd dãmb la a Ezai sẽn bool tɩ “Zusoabã maan-kʋʋdbã,” la ãnd dãmb la “sãambã”? d) Bõe la nin-kãensã fãa maanda?
5 La Ezai sak 61 bãngr-gomdã võor yaa bõe? Yaa bãngr-gomd sẽn pidsd kiris-nebã zug rũndã-rũndã. Vɛrse a 6 gomda neb sẽn na n yɩ “Zusoabã maan-kʋʋdb” yelle, tɩ vɛrse a 5 wã yeel tɩ “sãamb” n na n wa sõng “maan-kʋʋdbã” n tʋme.
6 D miime tɩ yaa kiris-neb nins sẽn paam vʋʋsem sõng zaeebã la b sẽn bool tɩ “Zusoabã maan-kʋʋdbã,” bala, bãmb n na n paam “dẽenem kũum vʋʋgrã,” n yɩ “Wẽnnaam ne Kirist maan-kʋʋdba,” n dɩ naam ne Kiristã “yʋʋm tusri.” (Wil. 20:6) La kiris-neb wʋsg saagdame n na n wa vɩɩmd tẽngã zugu. Baa b sẽn sõngd sẽn na n wa tɩ vɩɩmd-b saasẽ wã, b sẽn pa “Israyɛll sẽn yaa Wẽnnaam dẽndã” nebã, b yaa sãamba. La b teenda “Zusoabã maan-kʋʋdbã” ne sũ-noogo, tɩ yaa wa b sẽn kood b pʋt la b manegd b tɩɩse. B sõngda sẽn paam-b vʋʋsem sõng zaeebã n moond koɛɛgã la b zãmsd nebã Biiblã, tɩ pẽgd Wẽnnaam. Sɩd me, sẽn paam-b vʋʋsem sõng zaeebã la “piis a taabã” fãa sõngda nebã tɩ b bãngd sɩdã, la b sõngd-b tɩ b tũud rẽ.—Zã 10:16.
D YƖ “SÃAMB” WA A ABRAHAAM
7. Bõe n kɩt tɩ rũndã-rũndã kiris-nebã yaa wa a Abrahaam la pĩnd wẽn-tũudb a taabã?
7 Wa d sẽn yã sõsg ning sẽn loogã pʋgẽ wã, kiris-neb hakɩkã yaa “sãamb” dũni-kãngã pʋgẽ. B yaa wa a Abrahaam la pĩnd wẽn-tũudb a taabã Biiblã sẽn bool tɩ “sãamb la pa-wetã.” (Heb. 11:13) D saagd n na n wa tɩ vɩɩmda saasẽ tɩ yaa tẽngã zug me, d ned kam fãa tõe n paam n yɩ a Zeova zoa wa a Abrahaam. A Zak yeela woto: “A Abrahaam tẽe Wẽnnaam, la bãmb geelga yẽ tẽebã wa tɩrlem. La b boola yẽ tɩ ‘Wẽnnaam zoa’”—Zak 2:23.
8. Bõe la a Zeova ra pʋlem a Abrahaam, la rẽ poore, a Abrahaam manesem yɩɩ wãna?
8 Wẽnnaam da pʋlmame tɩ na n tũu ne a Abrahaam la a yagensã tɩ buudã fãa neb paam barka. (Karm-y Sɩngr 22:15-18.) Baa rẽ sẽn da pa na n pids a Abrahaam nifẽ wã, a tẽe ne a sũur fãa tɩ na n pidsame. Yʋʋm koabg pʋgẽ, yẽ ne a zakã rãmb talla zĩis toeengo. Sẽn paase, a kell n yɩ a Zeova zoa.
9, 10. a) Wãn to la d tõe n dɩk a Abrahaam naoore? b) Bõe la d tõe n sõng nebã tɩ b maane?
9 Baa a Abrahaam sẽn da pa mi sẽn na n kaoos to-to tɩ pʋlengã yaool n pidsã, a kell n wilga a Zeova a nonglem la a tũ-a ne a sũur fãa. A sẽn taẽ fãa, a pa bao n na n lebg tẽng-n-ned ye. (Heb. 11:14, 15) Yɩta sõma tɩ d rɩk a Abrahaam naoore, n da bas tɩ lebg arzɛka, yʋʋr wall tʋʋm sẽn yaood sõma baoob n pak-d ye. Dũni-kãngã sẽn na n sa ka la bilfã, bao n vɩɩmd wa neb wʋsg sẽn datã pa tar yõod ye. Dũniyã pʋgb yaa faoore. Wa a Abrahaam, tõnd gũuda bũmb yõod sẽn yɩɩd dũni-kãngã. D gũuda Wẽnnaam pʋlemsã pidsg ne sũ-mare.—Karm-y Rom dãmb 8:25.
10 Sor ket n pakame tɩ buud fãa neb tõe n paam bark nins Wẽnnaam sẽn na n tũnug ne a Abrahaam la ne a yagensã n wa ne wã. Rẽ n so tɩ sẽn paam-b vʋʋsem sõng zaeebã b sẽn bool tɩ “Zusoabã maan-kʋʋdbã” la piis a taabã bɩ “sãambã” moond koɛɛgã n wilgd nebã bark kãense. Dũniyã gill zugu, b taasda koɛɛgã sẽn yɩɩd buud-goam 600 pʋgẽ.
NONG-Y BUUDÃ FÃA NEBA
11. A Salomo yeelame tɩ sãambã me tõe n maana bõe?
11 Yʋʋmd 1026 soabã, a Salomo sẽn wa n pʋʋsd a Zeova Zerizalɛm wẽnd-doogã pakr daarã, a yeela bũmb sẽn wilgd tɩ buudã fãa neb yell paka a Zeova. A kosa a Zeova t’a kelg bu-zemsã ned ning fãa sẽn na n tees wẽnd-doogã n pʋʋse. Woto yaa bũmb bu-zẽmsã neb sẽn da tõe n maan n dɩ kaool ning a Zeova sẽn maan ne a Abrahaamã nafa. A Salomo yeela: “Sãamb sẽn ka Israyɛll neb na n yii tẽn-zãrsẽ n wa ka y yʋʋrã yĩng n pʋʋs ro-kãngã pʋgẽ, tɩ bala, b na n wʋma y yʋ-kãsengã ne y pãngã tʋʋmã kibare. Bɩ y zĩnd y yirã sẽn be yĩngrã n kelg n kõ sãanã a sẽn datã, tɩ dũniyã nebã fãa bãng y yʋʋrã la b zoe yãmb wa Israyɛll nebã sẽn zoetã.”—1 Rĩm 8:41-43.
12. Bõe n kɩt t’a Zeova Kaset rãmbã yaa wa sãamb b tẽnsã pʋsẽ?
12 Sãan yaa ned sẽn kẽng tẽn-zẽnga, wall sẽn tɩ vɩ be. A Zeova Kaset rãmbã vɩɩ wa sãamba. B bee tẽns wʋsg pʋsẽ la yaa Wẽnnaam Rĩungã ne Kiristã sẽn yaa a rĩmã bal la b teenda. Rẽ n so tɩ b pa kẽesd b toog b tẽnsã politikã yɛl pʋsẽ, baa rẽ sẽn pa noom neb kẽerã.
13. a) Bõe n tõe n sõng-d tɩ d ra ges d to wa sãana? b) Bõe n wilgd t’a Zeova ra pa rat tɩ sãan zĩndi?
13 Naoor wʋsgo, yaa sãambã no-goama, b fu-yerdi wall b minimd n kɩtd tɩ b bãng-b n welge. La bũmb nins sẽn kɩt tɩ buud toɛy-toɛyã nebã wõnd taabã yɩɩda bũmb nins sẽn kɩt tɩ b pa wõnd taabã. Yaool n yaa sãan sẽn pa wõnd tẽng-n-ned to-to wã la b wae n getẽ. La d sã n bas rẽ gesgo, d yĩmdame t’a yaa sãana. Sã n da yaa goosneema a yembr bal n so dũniyã gilli, ned ra pa na n bool a to tɩ sãan ye. Yaa woto la a Zeova sɩng n data. A ratame tɩ ãdem-biisã fãa zems taab wa zag-yɛng neb tɩ yẽ soog-ba. La rẽ yĩnga, buud toɛy-toɛy neb tõeeme n pa get taab wa sãamb bɩ?
14, 15. Bõe la a Zeova Kaset rãmbã fãa pa maanda?
14 Rũndã-rũndã nebã wʋsg yaa rat-m-ye rãmb la neb sẽn nong b tẽns tɩ looge. La d sẽn mi tɩ neb n be n nong tẽnsã fãa nebã kengda raoodo. Yaa vẽeneg tɩ yɩl n toeem d sẽn get bu-zẽmsã neb to-to wã baooda modgre. Rao a ye sẽn pak televiziõ tɩ wʋsg nong n getẽ goma yẽ sẽn tʋmd ne tẽns toɛy-toɛy nebã yelle, n yeel woto: “Mam wa n pa le get tẽn-zẽmsã neb wa sãamb ye.” A paasame t’a miime tɩ b fãa yaa ninsaalb wa yẽ, la tɩ b sã n bool ned tɩ sãana, b paoog-a lame. Woto kɩtame t’a yiis noor n wilg a tʋm-tʋmdbã tɩ b ra tol n maan woto ye.
15 A Zeova Kaset rãmbã rɩkda Wẽnnaam togs-n-taare, n pa maand bu-welsg ye. Dũniyã gill zugu, sull a to ka be t’a nebã fãa pa maand bu-welsg ye. A Zeova Kaset rãmbã sẽn get nebã wa a Zeova sẽn get-b to-to wã kɩtame tɩ b nong ned buud fãa la b nand-a. B pa kis tẽn-zẽng neb wall b tagsdẽ tɩ b pa tõe n teeg-b ye. Nebã sẽn pa wõnd taabã, la b pãn-tõodã sẽn pa ye wã noom-b lame. Yãmb zoe n bʋgsa a Zeova Kaset rãmbã sẽn tõog n pa maand bu-welsgã zugu, la rẽ sẽn nafd-y to-to wã bɩ?
NED PA NA N LE WA BOOL A TO TƖ SÃAN YE
16, 17. Wilgr 16:16 la Daniɛll 2:44 goamã sã n wa pidsi, vɩɩmã na n yɩɩ wãna?
16 Ka la bilfu, dũniyã nanambsã fãa na n tigma taab n zab ne a Zezi Kirist la a tãb-biisã. B boonda zab-kãng ne “hebre goam tɩ Armagedõ.” (Wil. 16:14, 16; 19:11-16) Sẽn yɩɩd yʋʋm 2500 woto, Wẽnnaam vẽnega no-rɛɛs a Daniɛll t’a wilg bũmb ning sẽn na n paam rĩm-dãmbã zabrã sasa wã, n yeel woto: “Rĩm-dãmb-kãens sẽn dɩt naam wakate, Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem-kãens fãa tɩ b menem n bas-a t’a yaas wakat fãa.”—Dan. 2:44.
17 Yãmb nee rẽ sẽn na n wa ne toeeng ningã bɩ? Rũndã-rũndã, ãdem-biisã sẽn pʋɩ dũniyã tɩ yaa tẽns toor-toorã yĩnga, tõnd fãa yaa sãamb la bala. La Armagedõ poore, pa na n le yɩ woto ye. Baasgo, yɛl kẽer n na n kell n kɩt tɩ nebã pa wõnd taaba, la yaa Wẽnnaam sẽn naan bũmba fãa woto sẽn na yɩl tɩ tall rasãndã yĩnga. D sẽn gũud bark a woto wã segd n kɩtame tɩ d fãa ket n maand a sẽn tõe tɛk n pẽgd Wẽnnaam a Zeova sẽn yaa d Naandã.
18. Mak-bʋg n wilgd t’a Zeova Kaset rãmbã pa get taab wa sãamba?
18 Rẽ yĩnga yaa toog tɩ y tẽ tɩ wakat watame tɩ dũniyã ned baa a ye pa na n le maan bu-welsg bɩ? D tõe n kɩsa sɩd tɩ toeeng a woto n wate. Baa rũndã-rũndã menga, a Zeova Kaset rãmbã pa get bu-zẽng ned wa sãan ye. Wala makre, sẽn nan pa kaoose, b fãooga filiyall-dãmb kẽer taab sẽn na yɩl tɩ b tõog n ges b tɩ Rĩungã koɛɛg mooneg yɩ sõma. (Mat. 24:14) B pa ges tẽnsã todsã n fãoog filiyall-dãmb taaba, sã n pa mikame tɩ laloa wã n kɩt tɩ yaa tɩlae tɩ b maand dẽ ye. Yaa a Zezi Kirist sẽn yaa Wẽnnaam Rĩungã rĩmã n sõng a Zeova Kaset rãmbã tɩ b tõog tɩ bu-welsg pa bee b sʋkã. Ka la bilfu, a zabrã tõogr poore, toadg pa na n le zĩnd ye.—Wil. 6:2, MN.
19. Sɩdã sõnga a Zeova nin-buiidã tɩ b tõog n maan bõe?
19 A Zeova Kaset rãmbã yaa tẽns toɛy-toɛy neba, n gomd buud-goam toɛy-toɛya. La b tũuda Wẽnnaam ne yam a yembre, tɩ ned pa tõe n welg-b ye. (Karm-y Sofoni 3:9.) Baa b sẽn yaa tẽns toɛy-toɛy neb n vɩ dũni-wẽng pʋgẽ wã, b pa kẽesd b toog a yɛlã pʋsẽ ye. B zemsda taab wa zag-yɛng neba. Woto yaa bũmb ning sẽn na n zĩnd dũni-paalgã pʋgẽ wã reng-n-lɛmbga. Ned pa na n le bool a to tɩ sãan ye. Wakat kãnga, neb nins fãa sẽn be tẽngã zugã na n geta buud toɛy-toɛyã neb wa b saam-biisi.
[Zãmsgã sogsgã]
[Foto seb-neng 31]
Yãmb gũuda wakat ning tẽnsã tods sẽn pa na n le zĩndi, tɩ ned pa le bool a to tɩ sãanã bɩ?
[Foto seb-neng 28]
Yãmb gũuda Wẽnnaam pʋlemsã pidsg ne y sũur fãa wa a Abrahaam bɩ?
[Foto seb-neng 30]
A Zeova pa get nin-kãensã baa a ye wa sãan ye
