SEBRÃ GOM-ZUG SÕSGÃ: D RƖK YAM A MOIIZ MAK-SÕNGÃ PƲGẼ
A Moiiz sẽn yɩ ned ninga
Yãmb sã n wʋm tɩ b gomd a Moiiz yelle, bõe n wat y yamẽ?
-
Y tagsda bi-pɛɛlg ning a ma sẽn sagl peoog pʋgẽ, n tɩ solg Nill kʋɩlgẽ wã yell bɩ?
-
Y tagsda bi-ribl ning a Faraõ bi-pugl sẽn wub naar pʋgẽ Ezipti, la sẽn pa yĩm t’a yaa Israyɛll nedã yell bɩ?
-
Y tagsda pe-kɩɩm ning sẽn zĩnd Madiã yʋʋm 40 yell bɩ?
-
Y tagsda rao ning sẽn gom ne a Zeova * tuug sẽn dɩt bugum sɛɛgẽ wã yell bɩ?
-
Y tagsda rao ning sẽn tall raood n tɩ yeel Ezipt rĩmã t’a bas Israyɛll nebã sẽn da yaa a yembsã tɩ b loogã yell bɩ?
-
Y tagsda rao ning Wẽnnaam sẽn kɩt t’a yeel Ezipt rĩm-toaagã tɩ tood piig n na n paam a soolmã nebã yell bɩ?
-
Y tagsda rao ning sẽn lʋɩ Israyɛll nebã taoor tɩ b yi Eziptã yell bɩ?
-
Y tagsda Wẽnnaam sẽn tũnug ne rao ning n kɩt tɩ mog-miuugã welgã yell bɩ?
-
Y tagsda rao ning sẽn deeg tõod piigã Wẽnnaam nengẽ n kõ Israyɛll nebã yell bɩ?
Y SÃ N tagsda woto fãa yelle, y bee bʋʋm. La a Moiiz maana yɛl a taab me. Pa zaalem tɩ kiris-nebã, zʋɩf-rãmbã la moeembã nand-a wʋsg ye.
Sãmbg sẽn ka be, a Moiiz yɩɩ no-rɛɛs sẽn “tall pãng n maan tʋʋm-kãsemse.” (Tõodo 34:10-12) A saka Wẽnnaam t’a kõ-a pãng t’a maan bũmb wʋsgo. La a Moiiz yaool n da yaa ned bala. Wa Wẽnnaam no-rɛɛsdb a taabã, yẽ me ra yaa “ninsaal wa tõndo.” (Zak 5:17) A Moiiz tõog n maoa ne zu-loees tõnd wʋsg sẽn tare.
Y tʋll n bãnga a sẽn maan to-to n tõogã bɩ? D na n goma zʋg-sõma a tãab a Moiiz sẽn tall yelle, la d ges d sẽn tõe n dɩk yam a mak-sõngã pʋgẽ to-to.
^ sull 7 Biiblã wilgame tɩ Wẽnnaam tara yʋʋre. A yʋʋrã la a Zeova.
