Mam doga Sẽndomeng sẽn be Repiblik Dominikɛn soolmẽ wã. Mam doagdbã kamb yaa a naase, tɩ maam la naas-n-soabã. B ra yaa neb sẽn karem n zãage, la sẽn da rat tɩ b kambã tũud nin-sõma la pʋ-peelem dãmba. Yʋʋm a naas mam dogmã poore, mormo-rãmbã misioneer-dãmb n wa n sõs ne mam roagdbã. Nin-kãensã sẽn da maneg b mens sõma la b sẽn da waoogd nebã, yɩɩ m doagdbã noogo. Sẽn pa yã n kaoose, b yãka yam n na n lebg mormo-rãmba. Tõnd zakã rãmb naaga neb nins sẽn yɩ pipi n kẽ tũudum kãng tõnd tẽngã pʋgẽ wã. B boonda mormo-rãmbã tɩ Les Saints des derniers jours me.

M sẽn wa n bɩtẽ wã, reem nins b sẽn maand b wẽnd-dotẽ wã ra nooma maam. B sẽn gomd zak pʋgẽ vɩɩmã la noy nins ninsaal sẽn tog n tũ wã yell to-to wã me ra noom-m lame. M sũur da yaa noog m sẽn yaa mormo wã, hal n da rat n lebg misioneere.

Mam sẽn wa n tar yʋʋm 18, tõnd zakã rãmb yik n kẽnga Floriid sẽn be Etazĩni wã, sẽn na yɩl tɩ mam paam n karem inivɛrsite-bedr pʋgẽ. Na maan yʋʋmd poore, mam ma wã yao ne a sɩd sẽn yaa a Zeova Kaset rãmb n wa n kaag tõndo. B boola maam tɩ m tũ-b n kẽng b tigis-kãsenga. Kɛlgdbã fãa sẽn da tũud Biiblã vɛrse-rãmb kareng la b gʋlsd tagsa kẽerã yɩɩ maam noogo. Rẽ kɩtame tɩ mam kos bik la sebr n sɩng woto maanego.

Tigis-kãsengã poore, m ma-bil ne a sɩdã yeela maam tɩ m sẽn dat n wa lebga misioneerã, b tõe n sõng-m lame tɩ m bãng Biiblã sẽn yet bũmb ninsã. M tagsame tɩ rẽ yaa bõn-sõngo, bala wakat kãng tɩ mam da mii mormo-rãmbã sebrã n yɩɩd Biiblã.

M ma-bil ne a sɩdã sã n mi n bool maam ne telefõn tɩ d zãmsd Biiblã, b wae n yetame tɩ m mak mam sẽn tẽed bũmb ninsã ne Biiblã sẽn  yetã n gese. B sẽn da rat yaa mam sak n deeg tɩ Biiblã sẽn yetã la sɩda.

Yɛl wʋsg mormo-rãmbã sẽn tẽed la mam da sak-yã, n yaool n da pa kɩs sɩd tɩ b zemsa ne Biiblã sẽn yetã ye. M ma-bil toola maam yʋʋmd 1995 sɩpaolg kiuug rasem a 8 Réveillez-vous ! wã. Yaa a Zeova Kaset rãmbã n yiis seb-kãnga, la a pʋgẽ wã sõsg n be be n gomd mormo-rãmbã sẽn tẽed bũmb ninsã yelle. Mam sẽn karem sebrã, linga maam. Bala m mikame tɩ bũmb wʋsg la mormo-rãmbã tẽed tɩ mam pa miẽ ye. Rẽ kɩtame tɩ mam bao mormo-rãmbã sɩt wɛɛbã ẽntɛrnɛtã pʋgẽ, n na n ges bũmb nins Réveillez-vous ! wã sẽn yetã sã n yaa sɩda. La m mikame tɩ yaa sɩda. Sẽn paase, mam wa n kẽng n tɩ kaaga mormo-rãmbã miize sẽn be Utah soolmẽ wã, n maneg n kɩs sɩd ne Réveillez-vous ! wã goam.

Mam da sɩng n tẽedame tɩ mormo-rãmbã sebrã sẽn yet bũmb ninsã pa kɩɩsd Biiblã ye. La mam sẽn maag m meng n karem Biiblã, m mikame tɩ b kɩɩsda taab zĩis kẽere. Wala makre, Matɩe 10:28 wilgame tɩ sɩɩg kiidame. La mormo-rãmbã sebrã yeela woto: “Sɩɩgã pa tol n tõe n ki ye.”—Alma 42:9

Mormo-rãmbã sẽn tẽed bũmb ninsã kẽer sẽn kɩɩsd Biiblã sẽn yetã toor sẽn ka be, b sẽn yaa neb sẽn nong b tẽngã tɩ loogã me ra sãamda m sũuri. Wala makre, b yetame tɩ Edɛn ra bee Etazĩni, Zaksõn Kãonty sẽn be Misuuri wã. Sẽn paase, b taoor-dãmbã yetame tɩ daar n wat tɩ Wẽnnaam na n kɩt tɩ Etazĩni goosneema wã soog dũniyã gilli.

M da sokda m meng mormo-rãmbã sẽn yet bũmb ningã sẽn tõe n paam tẽns a taabã, baa tẽng ning pʋgẽ mam sẽn dogã to-to. Daar a ye zaabre, bi-bɩɩg sẽn yaa mormo la sẽn da karemd n dat n wa lebg misioneer n bool maam telefõnnẽ, tɩ mam kell n sõs ne-a yel-kãngã zugu. Mam sok-a lame tɩ zabr sã n wa be yẽ tẽngã ne tẽn-zẽng sʋka, a na sak n zab ne a tẽed-n-taas nins sẽn be be wã sɩda? A leokame tɩ n-yẽe, tɩ ling maam wʋsgo. Rẽ poore, mam bao n na n wʋma mormo-rãmbã zãmsgã võor sõma, la m tɩ sõs ne b taoor dãmba. B yeela maam tɩ mam sogsgã leoor naaga yɛl nins võor wʋmb sẽn yaa toogã, la tɩ vẽenemã sẽn tar paasgã, m na n wa paama b leoorã.

B sẽn yeelã sãama m sũurã wʋsgo, tɩ m maneg n tags bũmb ning sẽn kɩt tɩ mam dat n lebg misioneerã zugu. Mam yãame tɩ yaa m sẽn dat n sõng neb nins sẽn namsdã yĩnga, la sẽn na n kɩt tɩ nebã waoogd-mã yĩng me. La mam da pa mi Wẽnnaam sõma ye. Baa mam sẽn da mi n karemd Biiblã, m da pa nand a goamã woto ye. Sẽn paase, m da pa mi raab ning Wẽnnaam sẽn tar ne ninsaalbã la ne tẽngã ye.

Mam sẽn sɩng Biiblã zãmsg ne a Zeova Kaset rãmbã, mam bãnga bũmb wʋsgo. Wala makre, m bãnga Wẽnnaam yʋʋrã, sɩdã kũumã wɛɛngẽ, la tʋʋmd ning a Zezi sẽn tar Wẽnnaam daabã pidsg pʋgẽ wã. M bãnga bũmb wʋsg Biiblã sẽn yaa sebr sẽn ka to wã zugu. Kɩtame tɩ m nong n sõsd rẽ zug ne m taabã. M da sɩng n tẽeda Wẽnnaam, la masã a yaa m zoa, tɩ m tõe n pʋʋs-a ne pʋ-peelem. Yʋʋmd 2004 sẽoog kiuug rasem 12 wã daare, m deega lisg n lebg a Zeova Kaset soaba. Kiis a yoob poore, m lebga so-pakda.

Yʋʋm a nu la woto m sẽn be Bruklin sẽn be Niuyork soolmẽ wã, n tʋmd a Zeova Kaset rãmbã biru-kãsengã pʋgẽ. M sẽn sõngd tɩ b yiisd Biibl-dãmb la sɛb sẽn gomd Biiblã yellã noom-m lame. Bala, nafda neb milyõ-rãmb dũniyã gill zugu. Sẽn paase, m ket n sõngda m taabã ne yamleoog tɩ b bãngd Wẽnnaam.