1, 2. a) Bõe la b sẽn bool t’a “Davɩɩd doogã,” la wãn to la b lebs n me-a? b) Ãnda rãmb la a Zeova nebã rũndã-rũndã?

YƲƲMD 49 soabã pʋgẽ, pipi kiris-nebã taoor lʋɩtb sull talla tigsg Zerizalɛm. Tigsgã sasa, karen-biig a Zak yeela woto: “A Sɩmo [Pɩɛɛr] da wilga yãmb Wẽnnaam sẽn yɩ wãn n tũus nebã bu-zẽms sʋk b meng yʋʋrã yĩnga. La yãoã zemsa Wẽnnaam no-rɛɛsdbã sɛbã koees sẽn gʋlsã: ‘Dẽ poore, mam na n lebgame n tɩ me a Davɩɩd doogã sẽn da lʋɩ wã. Mam na n manega yẽ ra-boogã n yiki, tɩ neb nins sẽn ketã bao Zusoabã. La a na n yɩɩ woto me ne ninsaalbã buud fãa sẽn pʋʋsd ne mam yʋʋrã. Yaa Zusoabã sẽn wilg bõn-kãens hal yʋʋm ka tɛkã n yeel woto.’”—Tʋʋ. 15:13-18.

² Yaa rĩm-dãmb nins sẽn da yit a Davɩɩd pendẽ wã la b sẽn bool t’a “Davɩɩd doogã.” Ro-kãng lʋɩɩ wakat ning b sẽn sik Zida yaoolem rĩm a Sedesias naamẽ wã. (Amos 9:11) La bãngr-gomdã wilgame tɩ Wẽnnaam da na n le wa lebs n mee ro-kãnga, rat n yeel t’a Davɩɩd yageng a to n da na n wa reeg naamã n soog wakat sẽn kõn sa. Yagen-kãng yaa a Zezi. (Eze. 21:32; Tʋʋ. 2:29-36) A Zak wilgame tɩ bãngr-gomdã togsame me tɩ zʋɩf-rãmb la bu-zems neb la b ra na n yãk tɩ b naag a Zezi n dɩ naam saasẽ. Yaa nin-kãens la a sẽn bool tɩ “neb” a Zeova sẽn tũus a yʋʋrã yĩngã. Rũndã-rũndã, b kẽer sẽn ket tẽngã zug n paas neb milyõ-rãmb a Zezi sẽn boond t’a “piis a taab” n moond Biiblã koɛɛgã.—Zã 10:16.

3, 4. Zʋɩf-rãmbã sẽn da wa n be Babilonnã, bõe n sõng-b tɩ b tõog n kell n tũ a Zeova?

³ Babilon nebã sẽn wa n yõg zʋɩf-rãmbã n tɩ maan b yembsã, ra yaa vẽeneg t’a “Davɩɩd doogã”  lʋɩɩme. Babilon nebã sẽn da tũud ziri wẽnnaam-dãmbã, wãn to la Wẽnnaam nin-buiidã tõog n kell n tũ-a b yembdã sẽn kaoos yʋʋm 70 wã sasa? Yaa wa tõnd me sẽn maan to-to n tõog n tũud a Zeova a Sʋɩtãan dũniyã pʋgẽ wã. (1 Zã 5:19) Yaa bũmb a Zeova sẽn kõ a nin-buiidã n sõngd tõndo.

⁴ Rũndã-rũndã, d tara Biiblã sẽn yaa Wẽnnaam Gomdã. Zʋɩf-rãmbã sẽn wa n be Babilonnã, b ra pa tar Biiblã tõrã ye. La b ra mii tõod piigã la a Moiiz tõogã noy a taabã. B ra mii ‘Siõ yɩɩlã,’ yel-bũn wʋsgo, n paas wẽn-tũudb nins sẽn deng bãmbã kibaya. Zʋɩf-rãmbã ra yãbda nintãm b sẽn da rat n leb Siõ wã. Sẽn paase, b pa yĩm a Zeova yell ye. (Karm-y Yɩɩl Sõamyã 137:1-6.) Rẽ sõng-b lame tɩ b kell n sak a Zeova baa Babilon sẽn da pid ne ziri tũudum yɛlã.

5. Bõe n wilgd tɩ Babilon nebã la Ezipt nebã ra waoogda tãablem wẽnnaam-dãmba?

⁵ Babilon nebã ra naagda b wẽnnaam-dãmbã tãab-tãab n waoogdẽ. Wala makre, b ra naaga a Sin sẽn yaa kiuugã wẽnnaamã, ne a Samas sẽn yaa windgã wẽnnaamã, la a Istaar sẽn yaa rogem la zabr wẽnnaamã n waoogdẽ. Ezipt nebã me ra tara tãablem wẽnnaam-dãmb tɩ yaa ba, ma la biig sẽn naag taaba. La pa wakat fãa la b ra tẽed tɩ tãablem wẽnd fãa zema a to ye. Ezipt nebã tãablem wẽnnaam a yembr da yaa a Oziris ne a pag Izis n paas b biig a Horis.

6. Tãablmã yaa bõe, la wãn to la a Zeova kogl tõnd tɩ d pa tẽed rẽ?

⁶ Rũndã-rũndã, kiris-neb ne yʋʋrã me tara b tãablem. B taoor dãmbã yetame tɩ Ba la Biig la vʋʋsem sõngã naaga taab n yaa Wẽnde. La woto boogda a Zeova naamã, bala, kɩtdame tɩ nebã pa get-a wa Wẽnnaam sẽn ka to ye. A Zeova kogla a nin-buiidã tɩ b pa tẽed woto sẽn yaa ziri wã, bala a Gomdã yeelame tɩ “tõnd Wẽnnaam a Zeova yaa Zeova a yembre.” (Tõo. 6:4, MN) A Zezi meng lebs n togsa gom-kãngã tɩ kiris-neb hakɩkã tẽed rẽ.—Mark 12:29.

7. Nand tɩ ned reeg lisg n lebg kiris-ned hakɩka, bõe la a segd n tẽ Wẽnnaam zugu?

⁷ A Zezi yeela a karen-biisã tɩ b “kẽng n maan nebã buud fãa tɩ b yɩ [yẽ] karen-biisi, n lis bãmb ne Ba la Biiga la Sɩɩg Sõng yʋʋre.” (Mat. 28:19) Woto rat n yeelame tɩ nand tɩ ned reeg lisg n lebg kiris-ned hakɩk n yɩ a Zeova Kaset soaba, a segd n tẽeme t’a Zeova sẽn yaa Ba wã yɩɩda a Zezi. A segd n tẽeme t’a Zezi yaa Wẽnnaam Biiga, la t’a kiime tɩ yɩ maoong tõnd yel-wẽnã yĩnga. Sẽn dat n deeg-a lisgã pa segd n tẽ tɩ vʋʋsem sõngã yaa Wẽnnaam sẽn naag tãablem pʋgẽ ye. A segd n sak n deegame t’a yaa pãng ning Wẽnnaam sẽn tũnugd ne n maand a raabã. (Sɩng. 1:2) Yaa bũmb nins Wẽnnaam sẽn wilg tõndã n sõng-d tɩ d pa tẽed tãablmã sẽn paoogd-a wã.

8. Bõe la Babilon nebã ra tẽed wẽnnaam-dãmbã la zĩn-dãmbã zugu?

⁸ Babilon nebã ra pa tẽed b wẽnnaam-dãmbã bal ye. B ra tẽeda zĩn-dãmbã me, n tagsdẽ tɩ b tara pãnga. Sebr a yembr (The International Standard Bible Encyclopaedia) yeelame tɩ Babilon nebã ra tẽedame tɩ zĩn-dãmbã tõe n kɩtame tɩ ned lʋɩ bãag wall a gãeeme, la tɩ b ra pʋʋsda b wẽnnaam-dãmbã tɩ b kogl-b ne zĩn-dãmbã.

9. a) Sɩnga wãn tɩ zʋɩf-rãmb wʋsg wa tẽed yɛl sẽn pa sɩd zĩn-dãmbã zugu? b) Zĩn-dãmbã yɛl wɛɛngẽ, wãn to la d paamd koglgo?

 ⁹ Zʋɩf-rãmbã sẽn wa n yaa yembs Babilonnã, b wʋsg zãmsa yɛl sẽn pa sɩda. Kaoosg zugẽ, b wʋsg n wa n tẽed tɩ zĩn-dãmb kẽer yaa sõma, wa gɛrk-rãmbã sẽn da tẽedã. La Wẽnnaam wilg-d lame tɩ zĩn-dãmbã yɛl fãa yaa wẽnga. Rẽ naaga pʋɩɩr ning Wẽnnaam sẽn kõ-dã. (Ezai 47:1, 12-15) Sẽn paase, tõnd zãagda d mens ne zĩn-dãmbã yɛl wa a Zeova sẽn saglã, tɩ yaa koglg n kõ-do.—Karm-y Tõod 18:10-12; Wilgr 21:8.

10. Bõe la d tõe n yeel Babilon-kãsengã neb sẽn tẽed bũmb ninsã la b yel-maandɩ wã wɛɛngẽ?

¹⁰ Rũndã-rũndã, ziri tũudmã neb wʋsg kota zĩn-dãmbã sõngr wa Babilon nebã sẽn da maandã. Yaa rẽ yĩng la Biiblã sẽn boond dũniyã gill ziri tũudmã fãa tɩ Babilon-kãsengã. (Wil. 18:21-24) Tũudum kãens sɩd yaa wa pĩnd wẽndẽ Babilon nebã tũudmã, bala, b nebã sẽn tẽed bũmb ninsã wʋsg la b yel-maandɩ kẽer sɩnga Babilon. Ka la bilfu, Wẽnnaam na n sãama Babilon-kãsengã, a zĩn-dãmbã yɛl maaneg yĩnga, a bõn-naands pʋʋsgã n paas a yel-wẽn a taabã yĩnga.—Karm-y Wilgr 18:1-5.

11. Zĩn-dãmbã yɛl wɛɛngẽ, sagl-bʋs la tõnd sɛbã kõ-yã?

¹¹ A Zeova ra yeela woto: “Bɩ y ra maan poeer bɩ bagr ye.” (Maan. 19:26) Yʋʋmd 1800 soabã loogr poore, nebã ra nonga zĩn-dãmbã yɛl maanego. Rẽ n so tɩ La Tour de Garde de Sion ning sẽn yi yʋʋmd 1885 sig-noy kiuugã ne ãngilindã gom dẽ yelle. A yeelame tɩ pĩnd wẽndẽ nebã ra tẽedame tɩ ninsaal tara sɩɩg sẽn pa kiidi, la tɩ buud toɛy-toɛyã soalem wilgdame tɩ sẽn ki-bã tara zĩig n kẽngdẽ. A paasame tɩ neb wʋsg sẽn tẽed tɩ sẽn ki-bã tõe n goma ne sẽn vɩ-bã, paka sor tɩ zĩn-dãmbã belgd-ba, bala zĩn-dãmbã maanda wa bãmb la kɩɩmsã, n paamdẽ tɩ b maand bãmb daabã. Sẽn deng rẽ, tõnd sebr a yembr (Que disent les Écritures du spiritisme ?) wilgame tɩ zĩn-dãmbã yɛl yaa wẽnga, wa tõnd sɛb kẽer sẽn yi tɩ nan pa kaoosã me sẽn wilgdã.

12. Wẽnnaam vẽnega a Salomo t’a yeel bõe sẽn ki-bã wɛɛngẽ?

¹² “Neb nins fãa . . . sẽn bãng sɩdã,” tõe n leoka sok-kãngã. (2 Zã 1) Tõnd kɩsa sɩd ne bũmb ning a Salomo sẽn yeelã. A yeela woto: “Baag sẽn vɩ n são gɩgemd sẽn ki. Bala, nin-vɩɩs miime tɩ b na n kiime. La kũum ka mi bũmb ye, . . . Bũmb ninga fo nug sẽn tõe n maan ne fo pãngã, bɩ f maan-a. Tɩ bõe, tʋʋmd ne tagsg la yam ne bãngr ka be kɩɩm-kulg fo sẽn dabd zĩig ningã ye.”—Koɛ. 9:4, 5, 10.

13. Gɛrɛk-rãmbã tẽeb bʋg la zʋɩf-rãmbã sak-yã?

¹³ A Zeova wilga zʋɩf-rãmbã sɩdã kũumã wɛɛngẽ. La Gɛrɛs soolmã sẽn wa n welg t’a Alɛgsãndr Legarã soda-nanambs rɩt naamã, sẽn da so-b Zida ne Siiri wã baoome tɩ tẽn-kãens nebã sak gɛrɛk-rãmbã tũudum la b rog-n-migsi. Woto kɩtame tɩ zʋɩf-rãmbã wa tẽed tɩ ninsaal tara sɩɩg sẽn pa kiidi, la tɩ zĩig n be tɩ sẽn ki-bã sɩɩs kẽngdẽ tɩ b namsd-ba. La tẽeb-kãngã pa sɩng ne Gɛrɛs nebã ye. Sebr a yembr (The Religion of Babylonia and Assyria) yeelame tɩ Babilon nebã ra tẽedame tɩ ned kũum poore, zĩig n be a sẽn kẽngde, tɩ wẽnnaam-dãmb la zĩn- dãmb sẽn tar pãens la sẽn yaa toos be be n namsd kiidbã sɩɩse. Rẽnd Babilon nebã me ra tẽedame tɩ ninsaal tara sɩɩg sẽn pa kiidi.

14. Bõe la a Zoob ne a Abrahaam da mi kũumã la vʋʋgrã wɛɛngẽ?

¹⁴ Baa nin-tɩrg a Zoob sẽn da pa tar Biiblã, a ra mii sɩdã kũumã wɛɛngẽ. A leb n da miime t’a sã n ki, yẽ Wẽnnaam a Zeova sẽn nong-a wã na n wa vʋʋg-a lame. (Zoob 14:13-15) A Abrahaam me ra tẽeda kũum vʋʋgrã. (Karm-y Hebre dãmb 11:17-19.) Nin-kãensã ra pa tẽed tɩ sẽn ki-bã vɩɩ zĩig a to ye. Bala, sã n da yaa woto, b pa tõe n gom vʋʋgr yell ye. Sãmbg sẽn ka be, yaa Wẽnnaam vʋʋsem sõngã n sõng a Zoob ne a Abrahaam tɩ b bãng sɩdã kũumã wɛɛngẽ la b tẽ vʋʋgrã. D sẽn mi sɩdã kũumã wɛɛngẽ la d tẽed kũum vʋʋgrã naaga pʋɩɩr ning Wẽnnaam sẽn kõ tõndã.

15, 16. Wãn to la tõnd paam fãagre?

¹⁵ Wẽnnaam sõng-d lame me tɩ d bãng sɩdã bũmb ning a sẽn maan n na n fãag tõnd ne yel-wẽndã la kũumã wɛɛngẽ, tɩ d sũy yaa noogo. (Rom 5:12) D bãngame t’a Zezi “ka wa tɩ b sõng-b ye, b waame n na n sõng nebã, la kõ bãmb vɩɩm n yao neb wʋsg yĩnga.” (Mark 10:45) Ad d sẽn mi tɩ ‘Wẽnnaam barkã kɩtame tɩ d zems fãagr Kirist Zezi maasem yĩngã’ noom-d-la wʋsgo!—Rom 3:22-24.

¹⁶ Pipi kiris-nebã wakate, ra yaa tɩlae ne zʋɩf-rãmbã la bu-zẽmsã neb tɩ b reng n tek yam la b tall tẽeb ne a Zezi maoongã n yaool n paam b yel-wẽnã sugri. Rũndã-rũndã me yaa woto. (Zã 3:16, 36) Ned sã n tẽed yɛl sẽn pa sɩda, wala makre, a sã n tẽed tɩ Wẽnnaam yaa mens a tãabo, wall tɩ ninsaal tara  sɩɩg sẽn pa kiidi, a pa tõe n dɩ rondã yõod ye. Tõnd yẽ rɩta rondã yõodo. Bala, d mii sɩdã Wẽnnaam Bi-nongrã zugu. D miime tɩ “yaa ne bãmb la tõnd paam fãagre, sẽn yaa yel-wẽnã sugri.”—Kol. 1:13, 14.

17, 18. Yɛ la d tõe n paam kibay a Zeova Kaset rãmbã kʋdemdã wɛɛngẽ, la wãn to la kiba-kãens tõe n naf-do?

¹⁷ D tõe n kell n goma Wẽnnaam sẽn wilg tõnd bũmb ninsã yelle, a sẽn sõngd tõnd sẽn yaa a nin-buiidã to-to wã, la bark nins d sẽn paamdã me yelle. Wala makre, tõnd Anniyɛɛr-dãmbã wilgda a Zeova Kaset rãmbã sẽn tʋmd to-to dũniyã gill zugã. Tõnd tʋʋmdã sẽn sɩng to-to la a sẽn paam pãng to-to wã bee DVD-rãmb a yiib (La foi en action, 1^re partie et 2^e partie) pʋsẽ, n paas Les Témoins de Jéhovah : Prédicateurs du Royaume de Dieu sebrã pʋgẽ. Gũusg Gasgã la Réveillez-vous ! wã me gomda d tẽed-n-taas kẽer kibay yelle.

¹⁸ D sã n bao n bãng a Zeova Kaset rãmbã kʋdemdã yɛla, naf-d-la wa Israyɛll nebã sẽn da tẽegd Wẽnnaam sẽn sõng-b to-to tɩ ra nafd-bã. (Yik. 12:26, 27) A Moiiz kʋʋlem zugẽ, a yeela Israyɛll nebã woto: “Tẽeg-y kʋdemd wakatã yelle. Tẽeg-y zamaan nins sẽn loogã yelle. Sok f ba t’a wilg-fu. Sok f nin-kẽembã tɩ b togs-fo.” (Tõo. 32:7) D sẽn yaa ‘a Zeova neb la piis sẽn be a wãbneg zĩigẽ’ wã, d fãa pẽgd-a-la ne sũ-noogo, la d moond a tʋʋm-kãsemsã. (Yɩɩl 79:13) Yam ning d sẽn dɩkd a Zeova nin-buiidã kʋdemdã yɛlẽ wã na n sõng-d lame tɩ d ket n maand a raabã.

19. Wẽnnaam sẽn vẽneg-d tɩ d bãng sɩdã, bõe la d segd n maane?

¹⁹ Wẽnnaam sẽn kõt tõnd vẽenem tɩ d pa kẽnd lik pʋgẽ wa dũniyã nebã, d sũy yaa noogo. (Yel. 4:18, 19) Bɩ d ket n zãmsd Wẽnnaam Gomdã la d moond a koɛɛgã, n dɩkd yɩɩl-gʋlsdã sẽn da pẽgd d Zusoab a Zeova wã togs-n-taare. A ra yeela woto: “Mam na n waa ne Zusoabã sẽn yaa tõnd Soaalã pãnga. La m na n togsa yãmb tɩrlmã sẽn yaa yãmb dẽndã bala. Wẽnnaam, yãmb zãmsa maam hal m yãadem wakate. La hal tɩ ta masã mam wilgda yãmb tʋʋm-kãsemse. Mam Wẽnnaam, baa mam sã n kʋʋl tɩ m zug pelge, bɩ y ra bas maam ye, hal tɩ m tõog n wilg zamaan-kãnga nebã yãmb nug tʋʋma, la m wilg zamaan ning sẽn watã yãmb pãngã.”—Yɩɩl 71:16-18.

20. No-koeem-bʋg la a Sʋɩtãan wa ne, la yãmb manesem yaa wãn dẽ wɛɛngẽ?

²⁰ D sẽn yaa neb sẽn dɩk b mens n kõ a Zeova wã, d mii no-koeemd ning a Sʋɩtãan sẽn wa ne a Zeova naamã poorẽ, la ninsaalbã sẽn sakd-a to-to wã wɛɛngẽ wã. Sɩd me, d moond n wilgda nebã t’a Zeova la yĩngr la tẽng Naaba, la t’a segda ne pẽgr la waoogre. (Wil. 4:11) A kõt-d-la a vʋʋsem sõngã tɩ d moond koe-noogã, n belsd nebã la d wilgd-b tɩ manegr n wate. (Ezai 61:1, 2) Baa a Sʋɩtãan sẽn modgd n dat n soog Wẽnnaam nin-buiidã la ãdem-biis a taabã, d sũy yaa noog ne bũmb nins tõnd Zusoab a Zeova sẽn kõ tõnd tɩ yaa d pʋɩɩrã, tɩ d rat n sak-a ne d sũur fãa, la d pẽg-a masã la wakat sẽn kõn sa yĩnga. Yɩɩl Sõamyã 26:11 (MN) yeta woto: “Maam yẽ, mam na n kẽna m burkĩndã pʋgẽ. Bɩ f fãag maam la f maan maam lohorem.”—Karm-y Yɩɩl Sõamyã 86:12.