1, 2. A Zezi sẽn wa n wilgd yaoolem wakatã bãndã, tõe t’a gom-bʋg võor la a karen-biisã ra baood n wʋm n yɩɩda, la bõe yĩnga?

A ZEZI sẽn yeel a karen-biisã tɩ b ra na n wa sãama wẽnd-doogã poor bilfu, a Pɩɛɛre, a Zak ne a Zã la a Ãndere bao n na n wʋma rẽ võore. (Mark 13:1-4) Rẽ n so tɩ b sẽn wa n be ne a Zezi tɩ neb a taab ka be be, b yeel-a woto: “Bɩ y togs tõnd bõn-kãens sẽn na n zĩnd wakat ninga, la bãnd ning sẽn na n wilg yãmb waoongo, la dũniyã sɛɛb wakate.” (Mat. 24:1-3) A Zezi leok-b lame n wilg-b yɛl sẽn na n zĩnd nand tɩ b sãam Zerizalɛm, la yɛl a taab sẽn na n wa zĩnd tɩ wilg t’a Sʋɩtãan dũniyã sãoong kolgame. Tõe tɩ bũmb nins a Zezi sẽn sõdgã sʋka, a ye võor la a karen-biisã ra baood n na n wʋm n yɩɩda. A sẽn wilg tɩ yel-beed wala zaba, kom, la tʋʋm-wẽns n na n zĩndã poore, a wilgame tɩ bõn-sõng me n na n maan yaoolem wakatã sasa, n yeel woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Mat. 24:7-14.

² A Zezi karen-biisã ra zoe n naagd-a lame n moond Rĩungã koe-noogã. (Luk 8:1; 9:1, 2) Tõe t’a Zezi gomdã tẽeg-b-la bũmb a sẽn da yeele. A ra yeela woto: “Tigsg yaa wʋsgo, la tigisdbã yaa bilfu. Woto yĩnga, bɩ y kos tigsgã soab tɩ b tʋm tigisdb tɩ b kẽng b tigsgã.” (Luk 10:2) La tõe tɩ b ra sokda b mens woto: ‘Wãn to la d na n tõog n moon “dũniyã tɛk fãa” tɩ “yɩ kaset buud fãa yĩnga”? Yɛ la koe-moondbã na n yi?’ Ad karen-biisã sã n da bãng Matɩe 24:14 goamã sẽn na n pids to-to wã, b sũy ra na n yɩɩ noogo!

3. Wãn to la Luk 21:34 goamã pidsd rũndã-rũndã, la rẽ wɛɛngẽ, sogs-bʋs la d segd n sok d mense?

 ³ A Zezi bãngr-gomdã pidsda rũndã-rũndã. Neb milyõ-rãmb n moond Rĩungã koe-noogã dũniyã gill zugu. (Ezai 60:22) La a Zezi reng n togsame tɩ na n yɩɩ toog ne kẽer tɩ b kell n lʋɩɩs koe-moonegã taoore. A wilgame tɩ nin-kãens na n basame tɩ yɛl a taab ‘pak-ba.’ (Karm-y Luk 21:34.) A gomdã tara yõod ne tõnd rũndã-rũndã n yɩɩda, bala Wẽnnaam nin-buiidã sʋka, kẽer pa le lʋɩɩsd bũmb nins sẽn tar yõod n yɩɩdã taoor ye. Yaa b sẽn yãkd yam n maand bũmb nins tʋʋmã wɛɛngẽ, karengã la laogã baoob wɛɛngẽ wã n wilgd rẽ. Kẽer me sãamda b sẽk pemsmã kokr la ɛspoorã pʋgẽ. Sãnda basame tɩ vɩɩmã zu-loees kɩt tɩ b pa le maand b sẽn tõe fãa Wẽnnaam tʋʋmdã pʋgẽ ye. Sok-y y meng woto: ‘Mam yẽ nengẽ yaa wãna? Mam lʋɩɩsda Wẽnnaam daabã taoor bɩ?’

4. a) Bõe la a Poll kos Wẽnnaam Filip kiris-nebã yĩnga, la bõe yĩnga? b) Bõe yell la d na n gom sõs-kãngã la sẽn pʋgda wã pʋgẽ, la wãn to la rẽ na n naf-do?

⁴ Pipi kiris-nebã ra segd n maoa wʋsgo, n tõog n lʋɩɩs Wẽnnaam tʋʋmdã taoore. Yaa rẽ yĩng la tʋm-tʋmd a Poll sẽn kos Wẽnnaam t’a sõng Filip kiris-nebã tɩ b “bãng bũmb nins sẽn yaa sõma n yɩɩdã.” (Karm-y Filip rãmb 1:9-11.) Kiris-neb wʋsg ra “togsda Wẽnnaam koɛɛgã ne daood n yɩɩd pĩndã tɩ rabeem kaẽ,” wa tʋm-tʋmd a Polle. (Fil. 1:12-14) Rũndã-rũndã me, tõnd fãa la bal moonda Wẽnnaam koɛɛgã ne raoodo. La sõs-kãngã pʋgẽ, d na n goma a Zeova sẽn tũnugd ne a siglgã n pidsd Matɩe 24:14 goamã to-to wã yelle. Rẽ na n kenga d raoodo, tɩ d maneg n moon koɛɛgã ne yẽesem. Bõe la a Zeova siglgã lʋɩɩsd taoore, la wãn to la rẽ bãngr tõe n naf tõnd ne d zagsã rãmba? Sõsg ning sẽn pʋgdã na n wilga bũmb sẽn tõe n sõng-d tɩ d tõog toog Wẽnnaam tʋʋmdã pʋgẽ, la sẽn na n sõng-d tɩ d sak a siglgã sor-wilgri.

5, 6. a) Bõe yĩng t’a Zeova vẽneg a no-rɛɛsdb tɩ b yã a siglgã babg ning sẽn be saasẽ wã bõn-makr pʋgẽ? b) Bõe la a Ezekɩɛll yã bõn-makr pʋgẽ?

⁵ Yɛl wʋsg la a Zeova pa kɩt tɩ b gʋls Biiblã pʋgẽ ye. Wala makre, a pa wilg ninsaal zugã sẽn tʋmd to-to wã, wall ãdsã ne ãndũniyã bũmb a taabã sẽn kẽnd to-to wã ye. La a wilga bũmb nins sẽn yaa tɩlae ne-d sẽn na yɩl tɩ d bãng a raabã la d sak-a wã. (2 Tɩm. 3:16, 17) A sõnga tõnd tɩ d bãng bũmb kẽer a siglgã babg ning sẽn be saasẽ wã zugu. Woto pa noom yãmb sɩda? Bõn-kãens bee Ezai ne Daniɛll la Wilgr sebrã pʋgẽ. (Ezai 6:1-4; Eze. 1:4-14, 22-24; Dan. 7:9-14; Wil. 4:1-11) Bõe yĩng t’a Zeova wilg tõnd bũmb kẽer sẽn maand saasẽ?

⁶ A Zeova ratame tɩ d bãng tɩ d yaa a siglgã neba. Sigl-kãng babg ning sẽn be saasẽ wã tʋmda wʋsg a Zeova raabã pidsg yĩnga. Wala makre, Wẽnnaam vẽnega a Ezekɩɛll t’a yã a siglgã bab-kãng b sẽn mak ne saar sẽn yaa kãsenga. Saarã kẽnda ne  tʋʋlem, n tõe n wẽnemd zĩig pʋgẽ. (Eze. 1:15-21) A Ezekɩɛll yãa sẽn be-a saarã zugã me n bilg-a woto: “Sẽn sɩng ne a soabã sɛɛg n ta a zugã wẽnda wa zũud sẽn maneg t’a pɩnd n gũbg-a wa bugum. . . . A wẽnda wa Zu-soabã ziiri.” (Eze. 1:25-28) Vẽenega, a Ezekɩɛll sẽn yã bũmb ningã yɛɛs-a-la wʋsgo. A sẽn yã wã wilgdame t’a Zeova n so a siglgã n wilgd-a sor ne a vʋʋsem sõngã maasem. Saarã sẽn kẽnd to-to wã bilgda a Zeova siglgã babg ning sẽn be saasẽ wã sẽn tʋmd to-to wã.

7. A Daniɛll sẽn yã bũmb ningã kɩtame tɩ d kɩs sɩd ne bõe?

⁷ A Daniɛll me yãa bõn-makr sẽn kengd raoodo. A yã a Zeova tɩ b bool-a tɩ “wakat fãa naaba,” t’a zao geer sẽn yaa bug-witim. Geerã tara nao. (Dan. 7:9) Woto wilgdame t’a Zeova ra ratame t’a Daniɛll bãng t’a siglgã pa yas zĩ-yend ye. A tʋmda a raabã pidsg yĩnga. A Daniɛll leb n yãa “bũmb sẽn wẽnd ninsaala,” tɩ b kõ-a naam t’a soog a Zeova siglgã babg ning sẽn be tẽngã zugã. Yaa a Zezi la a sẽn yã wã. Kiristã naamã pa na n kaoos yʋʋm a wãn bal ye. “A na n dɩɩ naam wakat fãa n ka bas ye, la a soolmã ka na n tol n sɛ ye.” (Dan. 7:13, 14) A Daniɛll sẽn yã bũmb ningã kɩtame tɩ d bãng a Zeova sẽn maand bũmb ninsã, la kɩt me tɩ d maneg n kɩs-a sɩda. Bõn-makrã sẽn wilgd tɩ yaa a Zeova n kõ a Zezi naamã segd n kɩtame tɩ d kɩs a Zezi me sɩda, la d sak t’a yaa d Zu-soaba.

8. A Ezekɩɛll ne a Ezai sẽn yã a Zeova siglgã bõn-makr pʋgẽ wã kɩtame tɩ b maan bõe, la tog n kɩtame tɩ tõnd me maan bõe?

 ⁸ Bõe la yãab kãens segd n kɩt tɩ d maane? Yaa vẽeneg tɩ b segd n kɩtame tɩ d maan wa a Ezekɩɛlle. A sẽn yã bũmb ningã kɩtame t’a sak n deeg t’a Zeova yaa kãsenga. (Eze. 1:28) D sã n bʋgs a Zeova siglgã sẽn tʋmd to-to wã zug me, tõe n kɩtame tɩ d paam yẽesem wa a Ezai. A Zeova sẽn wa n dat ned sẽn na n tɩ wilg bũmb nins yẽ sẽn maandã, a Ezai saka zĩig pʋgẽ. (Karm-y Ezai 6:5, 8.) A ra kɩsa sɩd t’a Zeova sẽn be ne-a wã, bũmb pa tõe t’a pa tõog a tʋʋmdã ye. Bũmb ning a Ezai sẽn yã wã tog n kɩtame tɩ tõnd me tʋm Wẽnnaam tʋʋmdã ne yẽesem. D sã n tags siglgã sẽn tʋmd to-to a Zeova raabã pidsg yĩngã, sɩd kengda raoodo!

9, 10. Bõe yĩng t’a Zeova siglgã tog n tall babg tẽngã zugu?

⁹ A Zeova tũnuga ne a Biigã n sigl a nebã tẽngã zug tɩ b tʋmd ne a siglgã babg ning sẽn be saasẽ wã. Bõe yĩng t’a Zeova siglgã segd n tall babg tẽngã zugu? Yaa sẽn na yɩl tɩ tʋʋmd ning yell b sẽn gom Matɩe 24:14 tõog n pidsi. Bʋʋm a tãab n wilgd rẽ.

¹⁰ Pipi, a Zezi yeelame t’a karen-biisã tog n moona koɛɛgã “dũniyã tɛk fãa.” (Tʋʋ. 1:8) Yiib-n-soaba, yaa tɩlae tɩ sẽn na n moon-b koɛɛgã paam tɩ b sõngd-b tɩ b bãngd a Zeova la a raabã, la b kengd b raoodo. (Zã 21:15-17) Tãab-n-soaba, yaa tɩlae me tɩ koe-moondbã paamd n tigimd taab n waoogd a Zeova la b zãmsd b sẽn tõe n tʋm b tʋʋmdã to-to. (Heb. 10:24, 25) Sẽn na yɩl t’a Zezi karen-biisã tõog n tʋm b tʋʋmdã, rẽnda b sigl sõma.

11. Wãn to la d tõe n teel a Zeova siglgã?

¹¹ Wãn to la d tõe n teel a Zeova siglgã? Bũmb a ye sẽn tar yõod yaa d sẽn na n kɩs saam-biis nins a Zeova ne a Zezi sẽn yãk tɩ b lʋɩt koe-moonegã taoorã sɩda. Saam-bi-kãensã ra tõe n maoa wʋsg sẽn na yɩl n sõng n welg dũni-kãngã zu-loeesã, la b pa maand woto ye. La bõe la a Zeova siglgã babg ning sẽn be tẽngã zugã sɩng n lʋɩɩsd taoore?

12, 13. Wãn to la kãsem-dãmbã tʋmd b tʋʋmdã, la bõe yĩng tɩ rẽ kengd yãmb raoodo?

¹² Dũniyã gill zugu, b yãka kãsem-dãmb sẽn tar minim tɩ b get Rĩungã koe-mooneg yell tẽns nins pʋsẽ b sẽn be wã. Sẽn na yɩl n bãng bũmb nins sẽn yaa tɩlae bãmb babgẽ wã, nin-kãensã tũuda a Zeova la a Zezi sor-wilgri. Nand tɩ b rɩk sardo, b baooda sor-wilgr Wẽnnaam Gomdã pʋgẽ n kɩt t’a yɩ b ‘nao fɩtl la b sor vẽenem,’ la b pʋʋs a Zeova n kos sõngre. B sẽn maand woto wã, b rɩkda a Zeova siglgã babg ning sẽn be saasẽ wã naoore.—Yɩɩl 119:105; Mat. 7:7, 8.

¹³ Wa kãsem-dãmb nins sẽn da lʋɩt pipi kiris-nebã taoorã, yaa “koɛɛgã togsg” n pak kãsem-dãmb nins sẽn get koe-moonegã yell rũndã-rũndã wã n yɩɩda. (Tʋʋ. 6:4) B sẽn ne koe-moonegã sẽn kẽngd taoor to-to b tẽnsã pʋsẽ la dũniyã gill zugã noogda b sũy wʋsgo. (Tʋʋ. 21:19, 20)  B pa kõt Wẽnnaam nin-buiidã noy ka tɛk ye. B sã n wa rat n maan bũmb koe-moonegã na kẽng taoor yĩnga, b baooda Gʋlsg Sõamyã la vʋʋsem sõngã sõngre. (Karm-y Tʋʋm 15:28.) Saam-bi-kãensã sẽn maand woto wã, b kõta tigimsã neb mak-sõngo.—Ef. 4:11, 12.

14, 15. a) Bõe la b maand sẽn na yɩl n sõng tɩ koɛɛgã moon dũniyã gilli? b) Y tagsg yaa wãn y sẽn paam n moond Rĩungã koɛɛgã?

¹⁴ Beoog sẽn vẽeg fãa, d saam-biis wʋsg n tʋmd sẽn na yɩl tɩ b wa tõog n yiis sɛba, la b sigl tigissã la tigis-kãsemsã me. Wala makre, d tẽed-n-taas tusa sẽn yaa yamleoog tʋm-tʋmdb n tʋmd wʋsg n lebgd d sɛbã buud-goam sẽn yɩɩd 600 pʋgẽ. Woto kɩtame tɩ neb wʋsg tõe n paam n wʋm “Wẽnnaam tʋʋm-kãsemsã” kibar b buudã gomd pʋgẽ. (Tʋʋ. 2:7-11) Saam-biis la saam-bi-pogs sẽn yaa kom-bɩɩs n tʋmd sɛbã yiisg zĩigẽ. B toonda seb-kãens tigimsã fãa, baa tigims nins sẽn zãrã pʋsẽ.

¹⁵ Tõnd babgẽ wã me, neb wʋsg n tʋmd sẽn na yɩl tɩ d tõog n moon koe-noogã sõma. Yamleoog tʋm-tʋmdb tusa n met Rĩungã rot la tigis-kãsems roto, tɩ b taab sõngd d tẽed-n-taasã sabab-wẽns poore. Kẽer sõngda sẽn mi n dat-b tɩbsg ne yãgbã. Sãnda yaa karen-saam-dãmb siglgã lekoll-dãmbẽ, tɩ b taab sigind tigis-kãsemsã. Woto fãa yaa bõe yĩnga? Yaa sẽn na yɩl n sõng-d tɩ d moon koɛɛgã sõma, n paas d tẽebã pãnga, la d tõog n sõng neb wʋsg tɩ b bãng a Zeova la b sak-a. Woto fãa pa wilgd t’a Zeova siglgã babg ning sẽn be tẽngã zugã lʋɩɩsda bũmb nins sẽn tar yõod n yɩɩdã taoor sɩda?

16. Bõe la y tõe n yãk n zãms tɩ naf-yã?

¹⁶ Yãmb mi n bʋgsda tʋʋm nins a Zeova siglgã sẽn tʋmdã zug bɩ? Y tõe n mi n baoa d sɛb nins sẽn gomd a Zeova siglgã yellã n zãms y yembre, wall ne y zakã rãmba, la y bʋgs rẽ zugu. Bõn-makr nins a Ezai, a Ezekɩɛll, a Daniɛll la a Zã sẽn yã wã zãmsg tõe n yɩ-y-la noogo. Les Témoins de Jéhovah : Prédicateurs du Royaume de Dieu sebrã, n paas sɛb a taab la filim-dãmb kẽer tõe n sõng-y lame tɩ y bãng bũmb wʋsg a Zeova siglgã zugu.

17, 18. a) Wãn to la sõs-kãngã sõng yãmba? b) Sogs-bʋs la y segd n sok y menga?

¹⁷ Bũmb nins a Zeova sẽn tũnugd ne a siglgã n maandẽ wã zug bʋgsg tõe n naf-d lame. Bɩ d rɩk a siglgã togs-n-taare, n lʋɩɩsd bũmb nins sẽn yaa sõma n yɩɩdã taoore. Rẽ, d na n yɩɩ wa a Polle. A ra yeela woto: “Tõnd sẽn tar tʋʋm-kãngã sẽn zems nimbãan-zoeer ning b sẽn kõ tõndã, tõnd ka tadgd ye.” (2 Kor. 4:1) A sagla a tʋmd-n-taasã woto: “Bɩ tõnd da yɛ ne tʋʋm-sõma maaneg ye, tɩ bõe, wakat sã n ta, tõnd na wʋk yaoodo, tõnd sã n ka yɛ ye.”—Gal. 6:9.

¹⁸ Y getame tɩ bũmb n be yãmb sẽn tõe n maane, wall yãmb ne y zakã rãmb sẽn tõe n maan sẽn na yɩl n lʋɩɩs bũmb nins sẽn yaa sõma n yɩɩdã taoor bɩ? Y tõe n basa yɛl kẽer sẽn na yɩl n tõog n moon koɛɛgã sõma n paas bɩ? Sõsg ning sẽn pʋgdã pʋgẽ, d na n yãa bũmb a nu sẽn tõe n sõng-d tɩ d rɩk a Zeova siglgã togs-n-taare, n ket n tʋmd a tʋʋmdã ne yẽesem.