Mam daa gãngãad n bao neb tɩ d naag taab n yɩɩndẽ, tɩ maam la b taoor soaba. Mam sã n da wa yɩɩnd zãma taoore, m da nong n maanda yaare. Tõnd sullã sẽn da nong nen-kɛglem la d sẽn da zãad d mens to-to wã kɩtame tɩ kiba-kɩtbã ra gomd tõnd yell wʋsgo. Pa yã n kaoos la neb wʋsg wat d kõnsɛɛr-dãmbã ye. D yiisa kasɛt-rãmb menga, tɩ yaoolem soabã yɩ neb wʋsg noogo. Yʋʋmd 1990 soabã sẽn wa n kolgdẽ, tõnd tɩ reema Etazĩni sẽn na yɩl tɩ d yʋʋr yi wʋsgo. Tõnd reema Niuyork ne Losãnzelɛs. D paam n bãnga beenẽ kasɛt yiisdbã kẽere, n yaool n leb Fẽnlãnde.

Baa yɩɩlã sẽn da noom maamã, mam da baooda vɩɩm bark sẽn yɩɩd rẽ. Mam sẽn da ne kasɛt yiisdbã sẽn wagsd taab la b maand taab wẽngã ra sãamda m sũuri. Sẽn paase, m sũur da pa noom ne m vɩɩmã sẽn yaa to-to wã ye. Mam da getame tɩ m yaa nin-wẽnga, n yɛɛsd m na n wa kẽng bug-tẽnga. Mam karma tũudum toor-toor sɛb sẽn na yɩl n wʋm yɛlã võore. Baa m sẽn da tagsd tɩ m pa tol n tõe n ta Wẽnnaam yamã, m pʋʋs-a-la ne m sũur fãa me n kos sõngre.

 Mam yeela sẽn zãmsd-a maam Biiblã tɩ m data ne m sũur fãa n yiis kasɛt a ye n paas la m yaool n wɩsg m meng n tũ Biiblã noyã. A pa wilg maam m sẽn segd n maaneg ye. A yeelame bal tɩ m karem Matɩe 6:24. Be, a Zezi yeela woto: “Ned ka be sẽn tõe n sak zu-soben-dãmb a yiib ye.” A Zezi gom-kãensã linga maam wʋsgo. La rasem a wãn poore, mam yeela sẽn zãmsd-a maam Biiblã bũmb tɩ ling yẽ me. Mam yeel-a lame tɩ m sẽn dat n tũ a Zezi wã, mam wilga m sullã neb tɩ m pa na n le naag-b n yɩɩl ye.

Biiblã yɩɩ wa nin-gɛtg n sõng maam tɩ m bãng bũmb nins m sẽn da segd n demsã. (Zak 1:22-25) Mam mikame tɩ m da yaa nin-toaaga, wuk-m-meng soab la ned sẽn dat n yɩ nin-kãseng ne a sũur fãa. Sẽn paase, mam da nonga gom-yoodo, zaba, la m yũud sɩgaare. Mam da yũuda rãam wʋsg me. Mam yãame tɩ m vɩɩmã sɩd pa zems ne Biiblã noyã ye. Woto namsa maam wʋsgo. La m da rata ne m sũur fãa n toeeme.—Efɛɛz rãmba 4:22-24.

Baasgo, mam da ningda m meng taal tɩ looge. La sẽn da zãmsd-a maam Biiblã sõng-m-la wʋsgo. A wilga maam Biiblã sẽn yeel bũmb ning Ezai 1:18 wã. Be, b yeela woto: “Baa yãmb yel-wẽnã sã n yaa miuug wa saag-pag-a-mina-mina, b na n lebga pɛɛlg wa lam-paalga.” Biiblã vɛrse kãngã la a taab kɩtame tɩ m bas m yam tɩ tõnd saasẽ Ba wã yaa nimbãan-zoɛta, la t’a tʋll n belsa sẽn tek-b yam n kot sugrã.

M sẽn wa n bãng a Zeova sõma wã, m tʋlgame n na n dɩk m meng n kõ-a. (Yɩɩl Sõamyã 40:9) Rẽ n so tɩ yʋʋmd 1992 soabã, m deeg lisg a Zeova Kaset rãmbã tigis-kãseng sẽn zĩnd Sẽnpetɛrsbʋʋr sẽn be Risi soolmẽ wã.

Mam sã n da pa lebg a Zeova Kaset soaba, tõe tɩ woto tɩ m kiime. Pĩnda, mam da baooda yɛl n kõt m menga. La masã, mam vɩɩmã tara barka.