1, 2. a) Bõe n kɩt tɩ yãmb yãk yam n tũud Wẽnnaam? b) Sogs-bʋs la sõs-kãngã na n leoke?

TÕND yaa neb milyõ-rãmb sẽn yãk yam n tũud a Zeova la d rɩkd a Zezi Kirist naoore. (Mat. 16:24; 1 Pɩɛ. 2:21) D miime tɩ d sẽn dɩk d mens n kõ Wẽnnaamã pa reem bũmb ye. Leb n pa vɛrse a wãn bal d sẽn bãng Biiblã pʋgẽ n kɩt tɩ d maan dẽ ye. D zãmsa Biiblã sõma, n bãng rogem-pʋɩɩr ning a Zeova sẽn pʋlem wẽn-sakdbã tɩ keng d tẽebo. Yaa neb nins sẽn baood n bãngd yẽ la a Zezi Kiristã n na n paam rogem-pʋɩɩr kãnga.—Zã 17:3; Rom 12:2.

² La d sã n dat n kell n tall zood sõma ne a Zeova, d segd n modgdame tɩ d sẽn yãkd yam n maand bũmb ninsã fãa tat a yam. Sõs-kãngã na n leoka sogs-kãensã sẽn tar yõodã: Tõnd rogem-pʋɩɩrã yaa bõe? Bõe yĩng tɩ d segd n nand-a? Wãn to la d tõe n kogl-a? Bõe n na n sõng-d tɩ d yam-yãkr fãa tat Wẽnnaam yam?

3. a) Sẽn paam-b vʋʋsem sõng zaeebã rogem-pʋɩɩr yaa bõe? b) ‘Piis a taabã’ rogem-pʋɩɩr yaa bõe?

³ Kiris-neb sõor sẽn yaa bilf n gũud “dogem-pʋɩɩr sẽn ka tõe n sãame, la sẽn ka rẽgemda, la sẽn ka loogda.” B paamame n na n wa tɩ naag Kiristã saasẽ n dɩ naam. (1 Pɩɛ. 1:3, 4) Nin-kãensã paama “dogem-paalga.” (Zã 3:1-3) La neb milyõ-rãmb n sõngd sẽn paam-b vʋʋsem sõng zaeebã n moond koe-noogã. A Zezi bool-b lame t’a “piis a taaba.” (Zã 10:16) Bãmb rogem-pʋɩɩrã yaa bõe? B na n wa paama bũmb ning a Ãdem ne a Hawa sẽn  ka paama, rat n yeel tɩ vɩɩm sẽn kõn sa, arzãnã pʋgẽ tẽngã zugu, tɩ kũum, sũ-sãoong la yãbr ka le beẽ ye. (Wil. 21:1-4) A Zezi sẽn wa n be kũum da-lukã zugã, a pʋlma rao b sẽn da ka n yɛgl-a t’a na n wa paama rogem-pʋɩɩr kãnga. A yeela woto: “Fo na n wa zĩnda ne maam arzãnã pʋgẽ.”—Luk 23:43, MN.

4. Bark bʋs la d zoe n paamdẽ?

⁴ La rũndã-rũndã menga, d rɩta d rogem-pʋɩɩrã yõodo. D sẽn tẽed t’a Zezi kii tõnd yel-wẽnã yĩnga, d yam gãeyã bãane, tɩ d tar zood ne a Zeova me. (Rom 3:23-25) D mii Wẽnnaam sẽn pʋlem bũmb nins a Gomdã pʋgẽ wã. Sẽn paase, d sẽn be a siglgã pʋgẽ n yaa saam-biis sẽn nong taabã kõt-d-la sũ-noogo. D sẽn paam n yaa a Zeova Kaset rãmbã me yaa zu-zẽkre. Woto fãa pa segd n kɩt tɩ d nand d rogem-pʋɩɩrã sɩda?

5. Bõe la a Sʋɩtãan dat tɩ wẽn-tũudbã maane, la bõe n tõe n sõng-d tɩ d gil a sɩlmã?

⁵ Sẽn na yɩl n da wa kong d rogem-pʋɩɩrã, d segd n modgdame n gind a Sʋɩtãan bẽdsã. A Sʋɩtãan sɩng n bẽta wẽn-tũudbã, n dat tɩ b maan wẽnga, n bõn b rogem-pʋɩɩrã. (Sõd. 25:1-3, 9) A sẽn mi tɩ Wẽnnaam na n sãam-a-la ka la bilfã, a maneg n maanda rẽ n yɩɩd pĩndã. (Karm-y Wilgr 12:12, 17.) La d sã n nand d rogem-pʋɩɩrã, d na n ‘tõoga Sʋɩtãanã sɩlem fãa.’ (Ef. 6:11) Bɩ d tẽeg a Izaak bi-kãseng a Ezayu sẽn tall manesem ning ne a rogem-pʋɩɩrã, tɩ tõe n sõng-d lame tɩ d ra wa bõn d rogem-pʋɩɩrã ye.

6, 7. A Ezayu ra yaa ãnda, la bõe n da tõe n wa lebg a rogem-pʋɩɩre?

⁶ Sẽn na maan yʋʋm 4000 woto, a Izaak pag a Rebeka roga a Ezayu ne a kĩnkir-taag a Zakoob. B sẽn wa n bɩtẽ wã, mikame tɩ b zʋgdã yaa toor-toore. “A Ezayu yaa tãoos sẽn mi a tʋʋmd neere, la a gõoda weoogo,” t’a “Zakoob yaa [“ned sẽn pa tar yelle, la” MN] ned sẽn paad yiri.” (Sɩng. 25:27) Biibl-mit a yembr (Robert Alter) yeelame tɩ hebre wã gom-bil ning b sẽn lebg ka tɩ “ned sẽn pa tar yellã” rat n yeelame tɩ “burkĩna, wall ned sẽn pa maand wẽnga.”

⁷ A Ezayu ne a Zakoob sẽn wa n tar yʋʋm 15, a Abrahaam maana kaalem. La a Zeova pa yĩm bũmb ning a sẽn da pʋlem a Abrahaamã ye. A wa n pʋlma a Izaak t’a na n pidsa kaool ning a sẽn da maan ne a Abrahaamã. A yeel-a lame tɩ dũniyã buud fãa na n paama bark a Abrahaam yagensã maasem yĩnga. (Karm-y Sɩngr 26:3-5.) Woto wilgdame tɩ “yageng” ning yell b sẽn gom Sɩngr 3:15 pʋgẽ wã, rat n yeel tɩ Mesi wã na n yi a Abrahaam pendẽ wã. A Ezayu sẽn da yaa a Izaak bi-kãsengã, ra segd n tũu ne yẽ yagensã. Woto n da yaa a Ezayu rogem-pʋɩɩre. La manesem bʋg la a tall ne a rogem-pʋɩɩrã?

8, 9. a) Manesem bʋg la a Ezayu tall ne a rogem-pʋɩɩrã? b) A Ezayu sẽn wa n bãng t’a sẽn maanã yaa yalemdã, a manesem yɩɩ wãna?

⁸ Daar a yembre, a Ezayu gõo weoog n yɛ n lebg n wa mik t’a Zakoob rʋga bɛnga, t’a yeel woto: “M kota foom tɩ f yãk bɛng-miida n kõ-m tɩ m wãbe. Tɩ bõe, kom tara maam.” A Zakoob leokame: “Bɩ y koos y rogem-pʋɩɩrã ne maam dũndã.” A Ezayu manesem yɩɩ wãna? A yeelame: “Gese, mam dat n kiime. Dẽ, mam dogem-pʋɩɩrã yõod na n yɩɩ bõe ne maam?” A gesame tɩ  bɛngã yõod yɩɩda a rogem-pʋɩɩrã. A Zakoob sẽn da rat n bas a yam t’a Ezayu sɩd koosa a rogem-pʋɩɩrã ne yẽ wã, a yeela woto: “Bɩ y reng n wẽen ne maam.” Tao-tao bala a Ezayu wẽename n koos a rogem-pʋɩɩrã. Rẽ poore, “a Zakoob kõ a Ezayu bur ne bɛnga, la yẽ wãbame la a yũ n yik n looge. Yaa woto t’a Ezayu geelg a rogem-pʋɩɩrã wa zaalem.”—Sɩng. 25:29-34.

⁹ Yʋʋm a wãn poore, a Izaak sẽn wa n bãng t’a kũumã kolgame wã, a baoome n na n ning a bi-kãsengã barka, t’a Rebeka maan sɩlem t’a Zakoob paam rogem-pʋɩɩrã a Ezayu sẽn koos ne-a wã. A Ezayu sẽn wa n bãng t’a sẽn maanã yaa yalemdã, a kosa a ba wã n yeel woto: “M ba, bɩ y ning mam me zug barka. . . . Bark ka le ket yãmb nengẽ mam yĩng la?” A Izaak yeela a Ezayu t’a pa tõe n deeg barkã a sẽn ning a Zakoobã, t’a ‘Ezayu zẽk a koɛɛg n yãbe.’—Sɩng. 27:30-38.

10. Bõe la a Zeova yeel a Ezayu la a Zakoob zugu, la bõe yĩnga?

¹⁰ Kibarã wilgda tõnd bõe a Ezayu zugu? A Ezayu wilgame t’a raabã pidsg n tar yõod n yɩɩd bark nins a rogem-pʋɩɩrã sẽn da na n wa ne wã. A Ezayu ra pa nand a rogem-pʋɩɩrã ye. A ra pa nong Wẽnnaam me ye. Sẽn paase, a pa tags a manesmã sẽn tõe n wa ne bi-wẽns nins a yagensã zugã ye. La a Zakoob ra pa woto ye. A ra nanda a rogem-pʋɩɩrã. Wala makre, a sẽn wa n na n kẽ kãadmã, a tũ a roagdbã saglse. (Sɩng. 27:46–28:3) Rẽ pa yɩ nana ne-a ye. La a Zeova ning-a-la barka, t’a paam tɩ Mesi wã yi a pendẽ wã. A Ezayu ne a Zakoob sẽn tall manesem ningã kɩtame t’a Zeova yeel woto: “Mam nonga a Zakoob la m kisg a Ezayu.”—Mal. 1:2, 3.

11. a) Yam bʋg la d tõe n dɩk a Ezayu kibarã pʋgẽ? b) A Poll sẽn wa n gomd a Ezayu yellã, bõe yĩng t’a gom yoob yell me?

¹¹ D tõe n dɩka yam a Ezayu kibarã pʋgẽ. Tʋm-tʋmd a Poll keooga kiris-nebã woto: “Bɩ y gũus tɩ nin-yoodr walla ned sẽn ka sõma ra zĩnd yãmb sʋk wa a Ezayu sẽn koos a rogem-pʋɩɩr n paam dɩɩb vugr balã ye.” (Heb. 12:16) Dẽnd sẽn na yɩl n da bas tɩ bũmb kʋɩɩb-d tɩ d bõn d rogem-pʋɩɩrã, d segd n nanda bũmb nins sẽn yaa sõng a Zeova nifẽ wã. A Poll sẽn wa n gomd a Ezayu yellã, bõe yĩng t’a gom yoob yell me? Bala ned sã n maand wa a Ezayu n basdẽ t’a tʋlsmã tõogd-a, a tõe n lʋɩɩ yoob pʋgẽ nana-nana, n bõn a rogem-pʋɩɩrã.

12. a) Wãn to la a Sʋɩtãan makd tõnd ned kam fãa? b) Bũmb sã n wa rat n kʋɩɩb-do, Biiblã kiba-bʋs n tõe n sõng-do?

¹² D sẽn yaa a Zeova Kaset rãmbã, d modgdame n gind bũmb buud fãa sẽn tõe n kɩt tɩ d maan yel-wẽnde. Ned sã n wa rat n tus-d tɩ d maan yel-wẽnd me, d pʋʋsda Wẽnnaam n kos sõngre. (Mat. 6:13) Baa ne d sẽn modgd n na n kell n sak Wẽnnaamã, a Sʋɩtãan maanda a sẽn tõe fãa n na n kɩt tɩ zood ning d sẽn tar ne a Zeova wã sãame. (Ef. 6:12) A sẽn yaa dũni-kãngã wẽnnaamã, a mii makr nins sẽn tõe n kʋɩɩb ninsaalbã. (1 Kor. 10:8, 13) A makda tõnd ned kam fãa. Bũmb sã n wa rat n tus yãmb tɩ y yo, y maanda wãna? Y na n basame tɩ y tʋlsmã tõog-y wa a Ezayu bɩ, bɩ y zãagda y meng ne-a wa a Zakoob biig a Zozɛf sẽn zoe n bas a Potifaar pagã?—Karm-y Sɩngr 39:10-12.

13. a) Wãn to la neb wʋsg maan wa a Zozɛfe, tɩ kẽer maan wa a Ezayu? b) Sẽn na yɩl n da rɩk a Ezayu togs-n-taare, bõe la d segd n maane?

¹³ D tẽed-n-taas wʋsg paama makre, n tog n wilg b sã n na n yɩɩ wa a Ezayu wall a Zozɛf. Bãmb wʋsg maana wa a Zozɛf tɩ noog a Zeova sũuri. (Yel. 27:11) Kẽer yẽ maana wa a Ezayu, n pa kogl b rogem-pʋɩɩrã ye. Yʋʋmd fãa, neb nins b sẽn yiisd tigingã pʋgẽ bɩ b sẽn lengdã wʋsg yaa yoob poorẽ. Dẽnd tara yõod wʋsg tɩ d reng n segl d mens d sũyã pʋsẽ, nand tɩ kʋɩɩbg wa. (Yɩɩl 78:8) Bũmb a yiib n tõe n sõng-d tɩ d ra lʋɩ kʋɩɩbg pʋgẽ, la sõng-d me tɩ d sã n na n yãk yam bɩ yɩ sõma.

14. Sogs-bʋs n tõe n sõng-y tɩ y “kisg sẽn yaa wẽnga, la y gãd sẽn yaa sõma kãn-kãe”?

¹⁴ Pipi, d segd n tagsa yel-wẽndã biis yelle. Tõnd sẽn nong a Zeova to-to wã pãng sã n paasdẽ, d na n maneg n nanda d rogem-pʋɩɩrã. Sɩd me, d sã n nong neda, d pa na n dat n sãam a sũur ye. D na n modgdame n maand bũmb sẽn noogd a sũuri. Woto yĩnga, bɩ d tagsd yel-wẽnd maaneg sẽn tõe n wa ne zu-loees ninsã yelle. Rẽ wɛɛngẽ, d tõe n soka d meng woto: ‘Mam sẽn na n maan bũmb ningã pa na n sãam zood ning m sẽn tar ne a Zeova wã sɩda? M zakã rãmb sũur pa na n sãam sɩda? Pa na n sãam m saam-biisã me sũur sɩda? Pa na n kɩt tɩ neb kẽer pa kelg koe-noogã sɩda?’ (Fil. 1:10) D tõe n soka d meng woto me: ‘Sũ-noog ning yel-wẽndã sẽn na n kõ-m wakat bilf pʋgẽ wã seka m bao zu-loees n kõ m meng bɩ? Mam datame n wa maand m bãngẽ, n yãbd wa a Ezayu bɩ?’ (Heb. 12:17) Y sã n tagsd sogs-kãensã zug neere, na n sõng-y lame tɩ y “kisg sẽn yaa wẽnga, la y gãd sẽn yaa sõma kãn-kãe.” (Rom 12:9) La sẽn yɩɩd fãa, yaa d sã n nong a Zeova la d na n modg n kogl d rogem-pʋɩɩrã.—Yɩɩl 73:28.

15. Bõe n tõe n sõng-d tɩ d ra lʋɩ kʋɩɩbg pʋgẽ, n sãam tõnd ne Wẽnnaam zoodã?

¹⁵ Yiib-n-soaba, yaa tɩlae tɩ d segl d mens nand tɩ kʋɩɩbg wa. A Zeova kõo tõnd bũmb wʋsg sẽn na yɩl tɩ d tõog n maan dẽ, la d kogl zood ning d sẽn tar ne-a wã. Wala makre, Biiblã, tigissã, koe-moonegã la pʋʋsgã. (1 Kor. 15:58) D sã n pelgd  d pʋg n pʋʋsd a Zeova la d moond koɛɛgã ne d sũur fãa, bũmb sã n wa rat n kʋɩɩb-do, d na n tõog n yalsa kãn-kãe. (Karm-y 1 Tɩmote 6:12, 19.) Yaa d sã n modgd n maand bõn-kãensã la d na n tõog n yals kãn-kãe kʋɩɩbg sasa. (Gal. 6:7) Yelbũn sebrã sak a yi wã gomda rẽ yelle.

16, 17. Bõe n tõe n sõng-d tɩ d yãkd yam tɩ zemsdẽ?

¹⁶ Yelbũn sebrã sak a 2 wã pʋgẽ, b sagenda tõnd tɩ d bao yam la bãngre. Yamã ne bãngrã na n sõng-d lame tɩ d bãng sõma la wẽng n bake, n tõogd n kibind d menga, n da maand sẽn pa segd ye. La rẽ baooda modgr wʋsgo. Biiblã yeela woto: ‘M biiga, fo sã n deeg mam goamã, la f tẽeg bũmb ning mam sẽn wilg foomã n kelg yam neer la f bao bãngr ne f sũur fãa, n-ye, fo sã n bao bãngr ne yam wa ned sẽn baood wanzuri ne arzɛgse, fo na n bãnga Zu-soabã zoees sẽn yaa bũmb ninga, la f na n yãa b bãngrã sẽn yaa to-to. Tɩ bõe, Zu-soabã kõta yam, la bãngr ne yẽesem bee bãmb goamã pʋgẽ.’—Yel. 2:1-6.

¹⁷ D sã n sɩd maan wa vɛrse kãensã sẽn wilgdã, d na n tõog n yãkda yam tɩ zemsdẽ. Yaa d sẽn na n kelgd Wẽnnaam goamã, n basdẽ t’a toeemd-do, n pʋʋsd Wẽnnaam n kot sor-wilgri, la d baood bãngr wa ned sẽn baood arzɛgs bal la bũmb pa na n tõog n kʋɩɩb-do.

18. Bõe la yãmb dat n ket n maandẽ, la bõe yĩnga?

¹⁸ Ned sã n baood yam la bãngr ne a sũur fãa, a Zeova sõngd-a lame. D sã n sɩd baood bõn-kãensã, tɩ d manesmã me wilgdẽ tɩ d tar-b lame, zood ning d sẽn tar ne a Zeova wã pãng na n paasdame. La rẽ na n sõng-d lame tɩ d ra lʋɩ kʋɩɩbg pʋgẽ ye. Sẽn paase, d sã n nong a Zeova n pa rat n maan bũmb sẽn sãamd a sũuri, d na n maana d sẽn tõe fãa n da maan yel-wẽnd ye. (Yɩɩl 25:14; Zak 4:8) Bɩ d ket n baood yam ning a sẽn kõtã, tɩ sõngd-d tɩ d yãkd yam sẽn noogd a sũuri, la sẽn kogend d rogem-pʋɩɩrã.