SẼN na yɩl n paam sok-kãngã leoor bɩ d tẽeg Biiblã kibay a yiib yelle. Yaa a Nowe wakatẽ sa-kãsenga, la Kanaã nebã sãoongã.

NEB KẼER SẼN YETE: “Wẽnnaam sẽn kogl a Nowe ne a zakã rãmb la a kɩt tɩ sa-kãsengã sãam neb a taabã fãa wã pa zems ye.”

BIIBLÃ SẼN YETE: Wẽnnaam yeela woto: “M ka rat tɩ nin-wẽng ki ye. Mam datame t’a tek yam n bas a manesem-wẽngã n vɩɩmde.” (Ezekɩɛll 33:11) Rẽnd sa-kãsengã sẽn sãam nin-wẽnsã  pa yɩ Wẽnnaam noog ye. La bõe yĩng t’a maan woto?

Biiblã wilgame tɩ Wẽnnaam sẽn sãam nin-wẽnsã pĩnd wẽndẽ wã, a maana rẽ sẽn na yɩl tɩ wẽn-kɩɩsdbã sẽn na n yaool n zĩndã bãng bũmb ning sẽn gũud-bã. (2 Pɩɛɛr 2:5, 6) Bõe yĩng tɩ d tõe n yeel woto?

Pipi, wilgame tɩ baa nin-wẽnsã sãoong sẽn pa noom Wẽnnaamã, a nee b wẽnemã sẽn namsd b taabã to-to wã, n ningd-b taale. Wilgame me t’a na n wa kɩtame tɩ wẽgbã la wẽnemã fãa sa.

Yiib-n-soabã, wilgame tɩ Wẽnnaam sẽn yaa nonglmã yĩnga, nand t’a sãam nin-wẽnse, a rengd n keoog-b lame. A Nowe sẽn da yaa tɩrlem koe-moondã, a keooga nebã, la b fãa la bal pa kelg ye. Biiblã yeelame tɩ b ra pa ‘tẽed tɩ bũmb na maan ye, n tãag sa-kẽengã sẽn wa n loog ne b fãa gilli.’—Matɩe 24:39, Sebr Sõngo.

La rẽ yĩnga, Wẽnnaam kell n keooga neb woto bɩ? N-ye. Wala makre, a reng n keooga Israyɛll nebã tɩ b sã n kɩɩs yẽ n maan wẽng wa b tẽn-yagsã, a na n basame tɩ b bɛɛbã wa zab ne-ba, n sãam Zerizalɛɛm sẽn yaa b na-tẽngã, la b yõg bãmb mensã n kẽng yembdo. La Israyɛll nebã kɩɩsame n tʋm wẽnga. B kʋʋ b kamb meng n maan maand n kõ ziri wẽnnaam-dãmba. A Zeova sɩbg-b lame bɩ? N-ye. La a reng n tʋma no-rɛɛsdb b nengẽ naoor wʋsgo, tɩ b sagl-b tɩ b toeeme, tɩ ra wa kẽ n bõog ye. Biiblã yeela woto menga: “Zu-soabã ka maand bũmb n ka wilg b no-rɛɛsdbã sẽn yaa b tʋm-tʋmdbã ye.”—Amos 3:7.

RẼ SẼN NA N NAF YÃMB TO-TO: A Zeova sẽn sɩbg nin-wẽnsã pĩnd wẽndẽ wã wilgdame tɩ manegr n wate. D tõe n kɩsa sɩd tɩ Wẽnnaam na n sãama neb nins sẽn namsd b taabã n pa zoet b nimbãanegã. Biiblã yeta woto: “Tʋʋm-wẽns maandbã na n sãamame . . . La sũ-maasem dãmbã na n sooga dũniyã, n maan sũ-noog laafɩ wʋsg yĩnga.” (Yɩɩl Sõamyã 37:9-11) Yãmb pa tagsd tɩ Wẽnnaam sã n sãam nin-wẽnsã sẽn na yɩl tɩ ãdem-biisã paam yolsgo, yaa bũmb sẽn zems sɩda? Pa wilgd t’a yaa nimbãan-zoɛt sɩda?

NEB KẼER SẼN YETE: “Wẽnnaam sẽn kɩt tɩ b sãam Kanaã nebã yaa wẽnem. Wõnda rũndã-rũndã, buud ning sẽn mi n kisg buud a to neb n yik n kʋʋd-bã.”

BIIBLÃ SẼN YETE: “[Wẽnnaam] soɛyã fãa yaa tɩrse. Bãmb yaa Wẽnnaam sẽn maand sɩda, n ka maand wẽng ye.” (Tõodo 32:4) Wẽnnaam sã n kao neb bʋʋd n wilg tɩ b segda ne kũum, d pa tõe n dɩk rẽ n mak ne ninsaalb zabr ye. Bõe yĩnga? Bala Wẽnnaam tõe n gesa ned sũurẽ, n bãng a sẽn sɩd yaa ned ning buudã, tɩ ninsaalbã yaool n pa tõe n maan dẽ ye.

Wala makre, Wẽnnaam sẽn wa n yãk yam n na n sãam Sodom ne Gomoorã, a Abrahaam ra maanda yɩɩre. A bao n na n bãnga Wẽnnaam sã n na n “lagma nin-tɩrsã ne nin-wẽnsã n sãame.” Wẽnnaam maaga a yĩng n kelg-a, la a wilg tɩ baa yaa nin-tɩrs piig n be Sodom tẽngã pʋgẽ, nin-kãens maasem yĩnga, a pa na n sãam-a ye. (Sɩngre 18:20-33) Woto wilgda vẽeneg tɩ Wẽnnaam deng n gesa tẽns a yiibã neb sũy pʋsẽ, n bãng tɩ b wẽnemã yaa wʋsgo.—1 Kibaya 28:9.

Woto me, Wẽnnaam kaoa Kanaã nebã bʋʋdo, n yeel Israyɛll nebã tɩ b sãam-ba. Kanaã nebã ra tʋmda tʋʋm-beedo, n da losd b kãmb vɩɩs bugmẽ, n maand maoong menga. * (2 Rĩm dãmba 16:3) Kanaã nebã ra miime t’a Zeova ra kõo Israyɛll nebã noor tɩ b reeg tẽngã. Rẽnd sẽn yãk-b yam n na n pa tẽngã pʋgẽ n zabã ra pa zabd ne Israyɛll nebã bal ye. B ra zabda ne a Zeova me, baa ne a sẽn da maan yel-soalem wʋsg n wilg t’a bee ne Israyɛll nebã.

Sẽn paase, Kanaã neb nins sẽn bas b wẽnemã n sak n tũ a Zeova noyã paamame t’a zoe b nimbãanega. Wala makre, pʋg-yoodr a Rahaab paamame tɩ b fãag yẽ ne a zakã rãmba. Gabaõ nebã me sẽn kos tɩ b zoe b nimbãanegã, a Zeova fãaga bãmb ne b kambã fãa.—Zozue 6:25; 9:3, 24-26.

 RẼ SẼN NA N NAF YÃMB TO-TO: D tõe n dɩka yam Wẽnnaam sẽn kao Kanaã nebã bʋʋd to-to wã pʋgẽ. ‘Bʋʋdã kaoob la Wẽn-kɩɩsdbã sãoongã daar’ ta n saame. (2 Pɩɛɛr 3:7) A Zeova na n sãama neb nins sẽn pa sakd a naamã, tɩ namsgã sa. D sã n nong-a la d tũud a noyã, a na n fãag-d lame.

A Zeova wilgd-d lame me tɩ roagdbã sẽn maand bũmb ninsã tõe n nafa b kambã wall wã-ba. A Gomdã yeela woto: ‘Bɩ y yãk vɩɩm tɩ yãmb ne y yagensã tõe n vɩɩmde. La y nong Zu-soab a Wẽnnaam la y sak bãmb koɛɛgã n gãd bãmba.’ (Tõodo 30:19, 20) Sagl-kãngã pa wilgd t’a Zeova yaa Wẽnnaam sẽn zoet d nimbãanega, n nong tõnd la a rat tɩ d yãk yam sẽn na n naf-d sɩda?