MAMS-Y wa yãmb sẽn na n tar y zoa, n nand-a wʋsgo. La a wa n maana bũmb y sẽn pa tõe n wʋm a võore. Neb kẽer sɩngame n wɩt y zoa wã, n yetẽ t’a sẽn maanã pa segde, la t’a pa nimbãan-zoɛt ye. Y na n yɩɩ tao-tao n maan wa nin-kãens bɩ, bɩ y na n deng n soka y zoa wã n bãng a manesmã võore? A sã n ka be yambẽ, y pa na n maag y yĩng n gũ t’a wa, n da yɩ tao-tao n ning-a taal sɩda?

Sẽn na yɩl n bãng y manesem sẽn na n yɩ to-to wã, tõe tɩ y na n soka y meng woto: ‘Mam sɩd mi m zoa wã sõma bɩ? Bõe n kɩt tɩ m nand-a?’ Y tõe n maana woto ne Wẽnnaam. Wall tɩ y yɩ tao-tao n yeel tɩ bũmb Wẽnnaam sẽn maan pa zemsã, yãmb pa tagsd tɩ sẽn são yaa y sẽn na n bao n wʋm yɛlã võor sõma sɩda?

Tõe tɩ bũmb kẽer Wẽnnaam sẽn maane, wall a sẽn bas tɩ maan võor la y pa wʋmda. Neb wʋsg tõe n yeta yãmb tɩ Wẽnnaam pa zoet ninsaalbã nimbãanega, n dat tɩ yãmb me ning Wẽnnaam taale. Yãmb na n kelg-b lame bɩ, bɩ y pa na n kelg-ba? Y sẽn na n leok sok-kãngã to-to wã bee ne yãmb sẽn mi Wẽnnaam to-to wã. Wala makre, sok-y y meng woto: ‘Bõe la Wẽnnaam maan n kõ maam tɩ wilgdẽ t’a nong-m lame?’

Yãmb sã n sega zu-loees wʋsgo, tõe tɩ y na n leokame tɩ Wẽnnaam pa nong-y ye. La tẽeg-y tɩ zu-loeesã pa yit Wẽnnaam nengẽ ye. Yita a Sʋɩtãan nengẽ. Wa d sẽn zoe n gom tɩ loogã, yaa a Sʋɩtãan la “dũniyã naaba.” Pa a Zeova ye. (Zã 12:31) Rẽnd bũmb nins sẽn wat ne namsgã la yel-kɛgã wʋsg yita a Sʋɩtãan nengẽ. Sẽn paase, d sẽn yaa koangdbã, d mi n baooda zu-loees n kõt d mense. Yel-lingdem me tõe n tiig n paam-d lame.

La bõe la Wẽnnaam maan n kõ-do? Biiblã yeelame tɩ yẽ n naan “yĩngr la tẽngã.” A paasame tɩ Wẽnnaam sẽn naan ninsaal la bõn-naands a taabã to-to wã yaa sõma wʋsgo, la tɩ yaa a Zeova la “Wẽnnaam [ning] sẽn so y vɩɩmã.” (Yɩɩl Sõamyã 124:8; 139:14; Daniɛll 5:23) Woto fãa rat n yeelame tɩ bõe?

Rat n yeelame tɩ yaa a Zeova la tõnd naanda. (Tʋʋma 17:28) Wilgdame me tɩ bũmb toor-toorã a sẽn naan tɩ b gesg be yamleoogã, tõnd vɩɩmã, d sẽn tõe n nong taabã, d sẽn tõe n wʋm yũugã, la d sẽn tõe n lemb bũmb n bãng a noomã yaa kũun sẽn yit Wẽnnaam nengẽ. (Zak 1:17) Woto fãa wilgdame t’a nonga tõndo, tɩ d segd n nan-a la d kɩs-a sɩda.

La baasgo, y tõe n ket n maanda sãmb-sãmb ne Wẽnnaam manesem kẽere. Tõe tɩ y tagsdame tɩ y sẽn mi-a to-to wã pa sek y na kɩs sɩd t’a manesem fãa zemsame ye. Sõs-kãensã pa gom bũmb nins fãa sẽn mi n kɩt tɩ kẽer tagsdẽ tɩ Wẽnnaam pa nimbãan-zoɛtã yell ye. La rẽ yĩnga y pa tagsd tɩ yaa sõma tɩ y bao n bãng Wẽnnaam n paas sɩda? * D kɩsa sɩd tɩ y sã n maan woto, y na n bãnga sɩdã Wẽnnaam zugu. Y na n bãngame t’a zoeta ninsaalbã nimbãanega. Y na n bãngame tɩ “Wẽnnaam yaa nonglem.”—1 Zã 4:8.