1, 2. Bõe la a Zeova Kaset rãmbã paam n maandẽ tɩ yaa zu-zẽkre, la yãmb mengã tagsg ne rẽ yaa bõe?

NEB wʋsg sã n paam tɩ b kõ-b kũun sẽn wilgd tɩ b tʋma tʋʋm-kãsenga, b geta rẽ wa zu-zẽkre. Wala makre, kẽer modga sẽn na yɩl tɩ laafɩ zĩnd tẽns a yiib sẽn zabd taab sʋka, tɩ b kõ-b kũuni. La ned sã n paam tɩ Wẽnnaam tʋm-a t’a sõng a taabã sẽn na yɩl tɩ b maneg b yell ne yẽ, yaa zu-zẽkr menga.

² Tõnd sẽn yaa a Zeova Kaset rãmbã, d tʋmda tʋʋmd a woto. Wẽnnaam ne Kiristã kõo tõnd tʋʋmd sẽn yaa sõng neb a taabã tɩ b “maneg [b] yell ne Wẽnde.” (2 Kor. 5:20, Sebr Sõngo) Rẽnd a Zeova tũnugda ne tõnd n sõngd neb a taabã tɩ b baood a zoodo. Woto kɩtame tɩ rũndã-rũndã, neb milyõ-rãmb sẽn be sẽn yɩɩd tẽns 235 pʋsẽ tat Wẽnnaam yam, n saagd n na n wa paam vɩɩm sẽn kõn sa wã. (Tɩt 2:11) D moonda ne yẽesem, n boond sẽn dat-a fãa t’a wa “reeg vɩɩm koom zaalem.” (Wil. 22:17) D sũur sẽn noom ne tʋʋmd ning a Zeova sẽn kõ-dã, n paas d sẽn tʋmd ne d sũur fãa wã kɩtame tɩ d yaa neb sẽn ‘wɩngd ne tʋʋm-sõma maanego.’ (Tɩt 2:14) Bɩ d bao n bãng wãn to la wɩng ne tʋʋm-sõma maanegã tõe n sõng neb a taab tɩ b bãng Wẽnnaam. D na n deng n goma koe-moonegã yelle.

3. A Zeova yẽesmã kɩtame tɩ d tõe n kɩs sɩd ne bõe?

³ Ezai 9:6 pĩnd n togsame tɩ Wẽnnaam Bi-riblã na n yɩɩ rĩma, la t’a naamã na n nafa ãdem-biisã. Be, b wilgame tɩ d tõe n kɩsa sɩd tɩ rẽ na n pidsame, bala, “yaa Saasẽ-pãng-soabã [yẽesmã, MN] n na n maan woto.” Gom-kãensã wilgdame tɩ tõnd saasẽ Ba wã rat n fãaga ãdem-biisã ne a sũur fãa. A Zeova sẽn kõ mak-sõng yẽesmã wɛɛngẽ wã  wilgdame tɩ d segd n moonda koɛɛgã ne sũ-noogo, la ne yẽesem. Tõnd sẽn dat ne d sũur fãa n sõng nebã tɩ b bãng Wẽnnaamã, yaa yẽ mak-sõng la d rɩkda. D sẽn mi tɩ rẽ kɩtame tɩ d yaa Wẽnnaam tʋmd-n-taasã, pa segd n kɩt tɩ d moond koɛɛgã d pãng tɛk sɩda?—1 Kor. 3:9.

4. Wãn to la a Zezi tall yẽesem koe-moonegã pʋgẽ tɩ yaa mak-sõngo?

⁴ A Zezi me kõo mak-sõng yẽesmã wɛɛngẽ. A sẽn wa n moond koɛɛgã, neb wʋsg kɩɩs-a lame la b nams-a. La baasgo, a kell n talla yẽesem n tãag a kʋʋbã. (Zã 18:36, 37) A Zezi sẽn wa n bãng t’a kũumã kolgame wã, a maneg n tʋma wʋsg sẽn na yɩl tɩ nebã bãng a Zeova.

5. Wãn to la a Zezi maan wa makrã pʋgẽ pʋʋgã gũudã?

⁵ Yʋʋmd 32 soabã sẽn wa n kolg saabã, a Zezi rɩka makr n gom rao sẽn tar kankang a viyn pʋʋg pʋgẽ yelle. Kankangã maana yʋʋm a tã n pa wom ye. Raoã yeela pʋʋgã gũud t’a keeg tɩɩgã. Pʋʋgã gũud kosame t’a bas t’a ning kankangã birga, tɩ b ges a sã n pa na n wome. (Karm-y Luk 13:6-9.) A Zezi sẽn wa n gomd woto wã tɩ yaa neb a wãn bal n lebg a karen-biisi, n yaa a koe-moonegã biisi. La makrã a sẽn dɩkã wilgdame tɩ sẽn da ket bilf t’a ki wã, a ra rat n tʋma wʋsgo. Rẽ t’a kũumã ra keta kiis a yoob woto. Sɩd me, a maneg n moona Zide ne Peere soolmã pʋgẽ ne yẽesem. La rasem a wãn sẽn deng a kũumã, a yãbame, bala nebã wʋsg pa kelg-a ye.—Mat. 13:15; Luk 19:41.

6. Bõe yĩng tɩ d segd n maneg n moon koɛɛgã ne yẽesem?

⁶ D segd n maneg n moona koɛɛgã ne yẽesem, bala saabã ta n saame. (Karm-y Daniɛll 2:41-45.) D sẽn paam n yaa a Zeova Kaset rãmbã pa zu-zẽkr sɩda? Dũniyã gill zugu, yaa tõnd bal n tõe n sõng nebã tɩ b bãng ninsaalbã zu-loeesã tɩɩm sẽn na n yi zĩig ningã. Sẽn nan pa kaoose, kiba-kɩt a ye yeelame tɩ ned kae n tõe n bãng bũmb ning sẽn kɩt tɩ nin-sõma wã mi n namsdẽ wã ye. La Biiblã wilga tõnd rẽ, la a paas tɩ tõnd sẽn yaa kiris-nebã, tõnd n segd n sõng neb a taabã tɩ b bãnge. D segd n tʋma tʋʋm-kãngã Wẽnnaam sẽn kõ-dã ne d sũy fãa. (Rom 12:11) D sã n moond ne yẽesem, a Zeova na n ninga d tʋʋmdã barka. Sẽn paase, tõe n sõnga nebã tɩ b bãng-a la b nong-a.

7, 8. Wãn to la d sẽn mongd d mens bũmb kẽer koe-noogã yĩngã waoogd a Zeova?

⁷ Tʋm-tʋmd a Poll sẽn wa n moond koɛɛgã, a sega zu-loees wʋsgo. A yeelame tɩ yẽ mi n paame n pa gũsi, la tɩ kom mi n yõk-a lame. (2 Kor. 6:5) Rũndã-rũndã, tõnd me sakd n mongda d mens bũmb wʋsg koe-moonegã yĩnga. Wala makre, so-pakdb wʋsg segd n tʋmame n paam sẽn yaa tɩlae ne-ba. Baasgo, koɛɛgã mooneg n pak-b n yɩɩda. Misioneer-dãmbã me tɩ bee tẽn-zẽmse, n tʋmd wʋsg n sõngd nebã tɩ b bãngd Wẽnnaam. (1 Tes. 2:8) Wakat ninga, kãsem-dãmbã mi n basa rɩɩb wall gõeem sẽn na yɩl n ges tigingã neb yelle. D tẽed-n-taas kẽer sẽn kʋʋl wall sẽn tar laafɩ zu-loees maanda b sẽn tõe fãa n kẽnd tigissã la b moond koɛɛgã. D sã n get nin-kãensã sẽn modgd woto Wẽnnaam tũubã pʋgẽ wã, kengda d raoodo. Sẽn pa-b kiris-nebã meng neeme tɩ koɛɛgã mooneg tara yõod wʋsg ne tõndo.

⁸ Wala makre, rao a yembr n gʋls sebr n tool Ãngeletɛɛr zʋrnall a ye n  yeel woto: ‘Nebã pa le tẽed tɩ tũudmã tara yõod ye. Mam pa mi wẽnd-doogã taoor dãmb sẽn maand bũmb ning ye. Yaa vẽeneg tɩ b pa yit n babsd nebã wa Kiristã sẽn da maandã ye. Yaa a Zeova Kaset rãmbã bal n get tɩ nebã yell pak-b lame. B yitame n bʋʋgd nebã n moond-b sɩdã.’ Rũndã-rũndã neb wʋsg sẽn maand sẽn noom bãmb mens balã, tõnd sẽn sakd n mongd d mens bũmb kẽer koe-moonegã yĩnga, waoogda a Zeova.—Rom 12:1.

9. Bõe n tõe n sõng-d tɩ d ket n wɩngd ne tʋʋm-sõma maanego?

⁹ La d sã n wa mik tɩ d yẽesmã boogdame, d maanda a wãna? D sã n bʋgsd tõnd koe-moonegã sẽn nafd nebã to-to wã zugu, na n sõng-d lame. (Karm-y Rom dãmb 10:13-15.) Yɩl tɩ nebã wa paam fãagre, b segd n tẽ a Zeova, la b pʋʋsd ne a yʋʋrã. La d sã n pa moone, rẽ pa na n tõog ye. D sã n ning rẽ d yamẽ, na n kɩtame tɩ d rat n ket n wɩngd ne tʋʋm-sõma maanego, n moond Rĩungã koe-noogã ne yẽesem.

10. Bõe yĩng tɩ d tõe n yeel tɩ d sã n zãad d mens sõma, tõe n kɩtame tɩ nebã bao n bãng a Zeova?

¹⁰ Koe-moonegã pʋgẽ, yẽesem bal pa sek d na tõog n sõng nebã tɩ b bao n bãng Wẽnnaam ye. Bũmb a to sẽn tõe n sõng-b yaa d sẽn na n zãad d mens sõma. A Poll wilga bũmb ning sẽn kɩt tɩ d segd n zã d mens sõma wã, n yeel woto: “Tõnd maoodame n ka rat n lub neda, baa sẽn yaa ne bũmb ning ye, tɩ ned da gom Wẽnnaam tʋʋmdã wẽng ye.” (2 Kor. 6:3) D no-goamã ne d yel-manesmã sã n yaa sõma, tõe n kɩtame tɩ neb a taabã bao n bãng a Zeova. (Tɩt 2:10) Sɩd me, kibay wʋsg wilgdame tɩ neb sãnda sẽn yã tõnd yel-manesmã sẽn yaa sõma wã, b saka sɩdã.

11. Bõe yĩng tɩ d segd n tagsd d yel-manesmã zugu, la d pʋʋsd rẽ wɛɛngẽ?

 ¹¹ La d sã n pa zãad d mens sõma, tõe n kɩtame tɩ nebã pa bao n bãng a Zeova ye. Rẽ n so tɩ d sã n be d tʋʋm zĩigẽ, lekollẽ wã wall d yiri, d segd n gũusame n da wa tall manesem sẽn na n kɩt tɩ nebã paoog d koe-moonegã ye. D sã n “maand yel-wẽnã ne yamleoogo,” d tõe n sãama zood ning d sẽn tar ne a Zeova wã, tɩ tɩɩm ka le beẽ ye. (Heb. 10:26, 27) Woto segd n kɩtame tɩ d tagsd d yel-manesmã zugu, n get a sã n waoogda Wẽnnaam, la d pʋʋsd rẽ wɛɛngẽ. Dũniyã nebã yel-manesem sẽn tar sãoongã, pʋ-peelem dãmbã tõe n bãnga “ned sẽn sakd [Wẽnnaam,] ne ned sẽn ka sakd [Wẽnnaam] n bak” nana-nana. (Mal. 3:18) Vẽenega, d sã n zãad d mens sõma, sõngda nebã tɩ b bao n maneg b yell ne Wẽnnaam.

12-14. B sã n wa namsd tõnd d tẽebã yĩng tɩ d tõog toogo, tõe n waa ne bõe? Rɩk-y makre.

¹² A Poll gʋlsa Korẽnt kiris-nebã, n wilg tɩ kɩɩsdbã namsa yẽ, n pãb-a, la b kẽes-a bi-bees roog koe-moonegã yĩnga. (Karm-y 2 Korẽnt dãmb 6:4, 5.) B sã n wa namsd tõnd d tẽebã yĩng tɩ d tõog toogo, tõe n sõnga neb a taabã tɩ b sak sɩdã. Wala makre, wakat n zĩnd tɩ Ãngola tẽng a ye neb ra baood n menes a Zeova Kaset rãmbã b tẽngã pʋgẽ. B yõga a Zeova Kaset rãmb a 2 ne neb 30 sẽn wat tigissã n pãbe, hal tɩ b pogle. B pãba pagbã ne kambã menga. B sẽn da rat tɩ nebã yɛɛs n da le kelg a Zeova Kaset rãmbã, b modg-b lame tɩ b yals n ges pãbrã. La rẽ poor bilfu, tẽngã neb wʋsg n babs a Zeova Kaset rãmbã n kos tɩ b zãms-b Biiblã. Saam-biisã kell n moona koɛɛgã, tɩ neb wʋsg sak sɩdã.

¹³ Kiba-kãngã wilgdame tɩ d sã n tõog toog namsg pʋgẽ, tõe n kɩtame tɩ neb a taab yãk yam n lebg a Zeova Kaset rãmba. Tõe t’a Pɩɛɛr ne tʋm-tʋmdb a taabã sẽn tall raoodã yɩɩ sabab tɩ neb wʋsg bao Wẽnnaam zoodo. (Tʋʋ. 5:17-29) B sã n wa namsd tõnd me tɩ d tõog toogo, tõe n kɩtame tɩ d karen-bi-taase, d tʋmd-n-taas wall d roagdb sak sɩdã.

¹⁴ Tõnd saam-biis kẽer la b ket n namsdẽ. Rũndã-rũndã, na maan saam-biis 40 n be bãens-roog Armeni tẽngã b sẽn pa rat n kẽ sodaarã yĩnga. Tõe tɩ b na n le yõga wʋsg n page. Eritre tẽngã, saam-biis 55 n be bãens-roogo, tɩ kẽer tar yʋʋm 60 la zaka. Kooredisiid soolmẽ wã, a Zeova Kaset rãmb 700 la b yõg n pag b tẽebã yĩnga. B sẽn sɩng d tẽed-n-taasã namsg tẽn-kãng pʋgẽ wã taa yʋʋm 60 masã. Bɩ d ket n pʋʋsdẽ, tɩ d saam-biisã sẽn tõogd toog namsgã pʋgẽ wã kõ Wẽnnaam waoogre, la sõng neb a taab tɩ b sak n tũ Wẽnnaam.—Yɩɩl 76:9-11.

15. Togs-y kibar sẽn wilgd tɩ d sã n yaa pʋ-peelem dãmbã, tõe n kɩtame tɩ nebã sak n kelg koe-noogã.

¹⁵ Tõnd sã n yaa pʋ-peelem dãmb me, tõe n sõnga nebã tɩ b bao n bãng Wẽnnaam. (Karm-y 2 Korẽnt dãmb 6:4, 7.) Wala makre, tẽng a ye pʋgẽ, saam-bi-poak n da rat n kẽ biisi. A ra segd n deng n ninga ligd koglg pʋgẽ, t’a zoa yeel-a t’a tog n maana yam n da ning ligdã, bala a sẽn dabdẽ wã pa zãr ye. Saam-bi-poakã wilgame tɩ ned sã n kẽ biisã, baa a sã n pa rat n zãage, segdame t’a yao. Rẽ poore, a zoa wã sigame, tɩ sofɛɛrã sok saam-bi-poakã woto: “Fo yaa a Zeova Kaset soab la?” Saam-bi-poakã leokame tɩ “n-ye,” la a sok-a n na n bãng bũmb ning sẽn kɩt t’a sokd woto wã. Sofɛɛrã yeelame: “Mam da kelgda fo ne f zoa wã sẽn da kɩɩsd taab ligdã yaoob poorẽ wã. M miime tɩ  ka neb wʋsg n yaa pʋ-peelem dãmb wa a Zeova Kaset rãmbã ye.” Kiis a wãn poore, rao n wa n pʋʋs saam-bi-poakã Rĩungã roogẽ, n sok-a yaa: “Fo ket n tẽra mam yell sɩda? Maam la sofɛɛr ning sẽn da sõs ne foom biisã ligd yaoob poorẽ wã. Mam sẽn yã manesem ning fo sẽn tall baraarã, kɩtame tɩ m yãk yam n zãmsd Biiblã ne a Zeova Kaset rãmbã.” Kiba-kãngã wilgdame tɩ tõnd sã n yaa pʋ-peelem dãmbã, tõe n kɩtame tɩ nebã kelg koe-noogã d sẽn moondã.

16. a) D sã n tar zʋg-sõma wa sũ-mare, nonglem la sõmblem, tõe n waa ne bõe? b) Rɩk-y makr n wilg ziri tũudmã taoor dãmb manesem sẽn yaa a soaba.

¹⁶ D sã n tar zʋg-sõma wa sũ-mare, nonglem la sõmblem, tõe n sõnga nebã tɩ b bao n bãng a Zeova la a raabã, la kɩt me tɩ b rat n naag a Kaset rãmbã. Kiris-neb hakɩkã sẽn zãad b mens to-to wã waoogda Wẽnnaam. Tũudum taoor dãmb kẽer maanda wa b sakda Wẽnnaam, la b yaool n belgda b poorẽ dãmb n deesd b ligdã. B sãnda meta ro-bɛd la b raad mobil-neeba. A ye meng n me roog n ning kilimatizɛɛr n kõ a baaga. Nin-kãensã pa tũud a Zezi sẽn sagl a karen-biisã tɩ b “kõ zaalmã” ye. (Mat. 10:8) B yaa wa Israyɛll maan-kʋʋdb nins sẽn da yaa wẽn-kɩɩsdbã, n zãmsd nebã ziri Wẽnnaam zug “yaood yĩnga.” (Mii. 3:11) B manesmã pa tõe n sõng ned t’a maneg a yell ne Wẽnnaam ye.

17, 18. a) D sã n dɩkd a Zeova zʋg-sõma wã togs-n-taare, wãn to la waoogd-a? b) Bõe n kɩt tɩ yãmb rat n kell n wɩng ne tʋʋm-sõma maanego?

¹⁷ La nebã sã n wa bãng tɩ tõnd sẽn zãmsd-b bũmb ninsã yaa sɩda, la b ne tõnd sẽn maand d taabã neerã, noom-b-la wʋsgo. Wala makre, so-pakd n da moond koɛɛgã zak-zaka, n ta pʋg-yãang sẽn yaa pʋg-kõor zakẽ. Pʋg-yãangã pa kelg koɛɛgã ye. A yeela so-pakdã t’a sẽn wa n wẽ kʋɩlengã tɩ yẽ ra rʋʋ esɛll n dat n toeem ãmpulli. So-pakdã yeel-a lame t’a sã n maan woto, a tõe n baoa yell n kõ a menga. A kẽeme n sõng-a n toeem ãmpullã, la a yi n looge. Pʋg-yãangã bi-riblã sẽn wa n bãng rẽ wã, a sũur yɩɩ noogo, t’a bao saam-biigã zĩig n pʋʋs-a barka. A wa n sɩnga Biiblã zãmsgo.

¹⁸ Bõe yĩng tɩ y rat n ket n wɩngd ne tʋʋm-sõma maanego? Tõe tɩ yaa y sẽn mi tɩ y sã n tar yẽesem koe-moonegã pʋgẽ, n zãad y meng sõma, y waoogda a Zeova, la y sõngd neb a taab tɩ b tõe n wa paam fãagrã. (Karm-y 1 Korẽnt dãmb 10:31-33.) Wilgdame me tɩ y nonga Wẽnnaam la y taabã. (Mat. 22:37-39) D sã n wɩngd ne tʋʋm-sõma maanego, d paamda bark wʋsgo. Sẽn paase, d na n tõog n gũu wakat ning ninsaalbã fãa sẽn na n wɩngd ne tʋʋm-sõma maanego, a Zeova sẽn yaa d naandã waoogr yĩngã.