D tẽeg taab yell la d keng taab raoodo
D tẽeg taab yell la d keng taab raoodo
“Bɩ tõnd tẽeg taab yelle, la d yik taab ratem tɩ maan nonglem la tʋʋm-sõma.”—HEB. 10:24.
Y NA N LEOKAME TƖ BÕE?
‘Tẽeg taab yellã’ võor yaa bõe?
Bõe la d tõe n maan n “yik taab ratem tɩ maan nonglem la tʋʋm-sõma”?
Bõe la d tõe n maan n “keng taab raoodo”?
1, 2. Bõe n sõng a Zeova Kaset rãmb 230 tɩ b põse?
DŨNI gill zabr a yiib-n-soabã sẽn wa n kolg saabã, a Hitler sodaasã bãngame tɩ b pa na n tõog zabrã ye. A Hitler ne a poorẽ dãmbã kõo noor tɩ b kʋ neb nins b sẽn da yõg n pagã. B yeelame tɩ b tall sẽn da be-b kã de kõnsãntrasiõ a ye (Sachsenhausen) pʋgẽ n kẽng mogrã noor n tɩ kẽes batayo-rãmb pʋsẽ. B ra ratame n tɩ sãam batayo-kãens koomã sʋka, tɩ koomã rɩ-b fãa.
2 Yɩɩ bãmb tus pis-tã la a tãab la b yiis n yeel tɩ b kẽn ne nao n kẽng Alemayn tẽng a ye (Lübeck) sẽn be mogrã noore. B ra segd n kẽna kilo 250. A Zeova Kaset rãmb 230 sẽn yit tẽns a yoob n da be b sʋka. Sodaasã kɩtame t’a Zeova Kaset rãmbã naag taab n kẽne. Bãasã la rɩɩbã kaalem da kɩtame tɩ b fãa ka pãng ye. La saam-biisã fãa tõog n taame n pa ki ye. Bõe n sõng-ba? B nin-yɛng yeela woto: “Tõnd ra kengda taab raoodo.” B sẽn da nong taabã, n paas pãng ning Wẽnnaam sẽn kõ-bã n sõng-b tɩ b põse.—2 Kor. 4:7.
3. Bõe yĩng tɩ d segd n kengd taab raoodo?
3 Rũndã-rũndã, baa b sẽn pa modgd tõnd tɩ d kẽn woto wã, tõnd me segda zu-loees wʋsgo. Wẽnnaam Rĩungã sẽn sɩng naam rɩɩb yʋʋmd 1914 tɛka, b riga a Sʋɩtãan t’a sig dũniyã zugu. A “sũ-puugrã yaa kãsenga, a sẽn bãng t’a wakat yaa bilfã yĩnga.” (Wil. 12:7-9, 12) Armagedõ sẽn kolgdã, a Sʋɩtãan tũnugda ne makr buud toor-toor n dat n sãam zood ning d sẽn tar ne a Zeova wã. Sẽn paase, zu-loees nins sẽn namsd ninsaalbã fãa wã paamda tõnd me. (Zoob 14:1; Koɛ. 2:23) Wakat ninga, yel-kãens mi n komsa d raoodo, tɩ d pa le tar pãng n maood ne-b ye. Wala makre, saam-biig a ye kenga a tẽed-n-taas wʋsg raood tɩ b kell n tall tẽebo. La a sẽn wa n kʋʋlã, yẽ ne a pagã lʋɩɩ bãaga, t’a sũurã sãam wʋsgo. Wala saam-biigã, yaa tɩlae tɩ d paam pãng ning a Zeova sẽn kõtã. Sẽn paase, d ratame tɩ d taabã kengd d raoodo.
4. Sẽn na yɩl n kengd taab raoodo, tʋm-tʋmd a Poll sagl-bʋg la d segd n tũ?
4 Sẽn na yɩl n kengd taab raoodo, d segd n tũu sagl tʋm-tʋmd a Poll sẽn kõ hebre-rãmb nins sẽn da lebg kiris-nebã. A yeela woto: “Bɩ tõnd tẽeg taab yelle, la d yik taab ratem tɩ maan nonglem la tʋʋm-sõma. Bɩ d da bas taab tiging wa neb kẽer sẽn maandã ye. La bɩ d [“keng taab raoodo,” MN] . . . tõnd sẽn yã tɩ daarã kolgdame wã yĩnga.” (Heb. 10:24, 25) Wãn to la d tõe n tũ a saglgã?
“BƖ TÕND TẼEG TAAB YELLE”
5. ‘Tẽeg taab yellã’ võor yaa bõe, la rẽ baooda bõe maanego?
5 ‘Tẽeg taab yellã’ võor yaa tags neb a taabã raab yelle. D sã n pʋʋsd d tẽed-n-taasã yĩngr-yĩngr Rĩungã roogẽ wall d sõsd ne-b bũmb sẽn pa tar yõod zugu, d pa na n bãng bũmb nins sẽn pak-bã ye. Yaa sɩd tɩ d segd n gũusame n da wa kẽ neb a taabã yɛlẽ, pa rẽ bɩ n gomd sẽn ka pak-d ye. (1 Tes. 4:11; 1 Tɩm. 5:13) La d sã n dat n kengd d tẽed-n-taasã raoodo, d segd n bãng-b lame. D segd n bãnga b zu-loeesã, b zʋg-sõma wã, b tẽebã pãng sẽn ta zĩig ninga, b sẽn tõe n maan la b sẽn pa tõe n maane. D kɩt tɩ b bãng tɩ d yaa b zo-rãmba, la tɩ d nong-b lame. Woto baoodame tɩ d sõsd ne-b wakat buud fãa, pa b sẽn wat n tar zu-loees tɩ b raood koms bal ye.—Rom 12:13.
6. Bõe n tõe n sõng kãsem-dãmbã tɩ b ges tigingã neb yell sõma?
6 Biiblã wilgame tɩ kãsem-dãmbã segd n gesa tigingã neb yelle, la tɩ b segd n maana rẽ ne yamleoogo. (1 Pɩɛ. 5:1-3) Sẽn na yɩl n ges tigingã neb yell sõma, b segd n bãnga b tẽed-n-taasã. (Karm-y Yelbũn 27:23.) Kãsem-dãmbã tog n wilgdame tɩ tigingã neb sõsd-n-taar noom-b lame la tɩ b rat n sõng-b lame. B sã n maand woto, b tẽed-n-taasã sã n wa tar zu-loeese, na n yɩɩ nana tɩ b kos sõngre. B na n tõogd n togsda bũmb ning sẽn be b sũyẽ wã, tɩ kãsem-dãmbã me tõogd n sõngd b ned kam fãa.
7. Ned raood sã n koms t’a gomd n ka gũusdẽ, d manesem segd n yɩɩ wãn ne-a?
7 Tʋm-tʋmd a Poll yeela Tesalonik tigingã neb tɩ b “sõng ka pãng rãmbã.” (Karm-y 1 Tesalonik rãmba 5:14.) Neb nins sũy sẽn sãam wall sẽn koms raoodã naaga “ka pãng rãmbã.” Biiblã yeelame tɩ f raood sã n koms toog sasa, f pãngã na n boogame. (Yel. 24:10, MN) D sã n dat n sõng ned sẽn koms raoodo, d segd n tẽegame tɩ ned a woto mi n gomdame n ka gũusdẽ ye. (Zoob 6:2, 3) A tõe n yeela bũmb tɩ yaool n pa yit a sũurẽ ye. A Rachelle bãnga rẽ a ma wã sũur sẽn wa n sãam tɩ loog noorã. A yeela woto: “M ma ra mi n yeela bũmb sẽn yikd sũuri. M da modgdame n tẽegd m ma sẽn sɩd yaa ned ningã. A yaa nin-bʋgsg sẽn nong neba, la kõata. M wa n bãngame tɩ ned sũur sẽn sãam tɩ loog noor wae n yeta bũmb wʋsg sẽn pa yit a sũurẽ ye. A sã n yeel wall a maan-f bũmb tɩ f lebs-a, f yãngda yellã bala.” Yelbũn 19:11 yeta woto: “Yam soab sũur ka yikd tao-tao ye. Ned sã n beeg-a t’a bas taale, a sũur yaa noogo.”
8. Sẽn yɩɩd fãa, ãnd dãmb n dat tɩ d wilg tɩ d nong-b lame, la bõe yĩnga?
8 Neb kẽer nengẽ, yaa yel-wẽnd b sẽn da maan n namsd-b wʋsgo. Baa b sẽn tek yam n kos sugrã, b ket n ningda b mens taale. Wãn to la d tõe n sõng ned a woto? A Poll gʋlsa Korẽnt kiris-nebã n wilg b manesem sẽn segd n yɩ to-to ne b tigingã ned sẽn tek yam n kos sugri. A yeela woto: “Yãmb tog n kõo yẽ sugri la y bels-a, tɩ sũ-sãoong wʋsg ra gɩmb-a ye. Dẽ yĩnga, mam kota yãmb tɩ y wilg y nonglem ne-a.” (2 Kor. 2:7, 8) D pa segd n tags tɩ d tẽed-n-taagã miime tɩ d nong-a lame, la t’a yell pak-d lame ye. D segd n wilgda rẽ ne d no-goam la d manesem.
“D YIK TAAB RATEM TƖ MAAN NONGLEM LA TƲƲM-SÕMA”
9. Bõe la d tõe n maan n “yik taab ratem tɩ maan nonglem la tʋʋm-sõma”?
9 A Poll yeela woto: “Bɩ tõnd tẽeg taab yelle, la d yik taab ratem tɩ maan nonglem la tʋʋm-sõma.” Rẽ baoodame tɩ d sõng d tẽed-n-taasã tɩ b wilg nonglem la b maan tʋʋm-sõma. Bugum sã n dat n ki, d segd n ninga raado, la d fibi. Woto me, bũmb kẽer n be d sẽn tõe n maan n sõng d tẽed-n-taasã tɩ b kell n maan a Zeova raabã ne yẽesem. Wala makre, b sã n maan bũmb sẽn sek pẽgre, bɩ d pẽg-ba.
10, 11. a) Ãnd dãmb n dat pẽgre? b) Rɩk-y makr n wilg tɩ pẽgr tõe n sõnga ned sẽn tudg t’a lebs n maan sẽn yaa tɩrga.
10 Pa d sẽn wat n koms raood bal la d rat tɩ nebã pẽg-d ye. Kãsem-soab a ye yeela woto: “Mam ba wã pa tol n pẽg maam baa vugr ye.” Woto kɩtame t’a bɩʋʋng zugẽ, a ra tẽedame t’a pa tõe n maan bũmb tɩ yɩ sõma ye. Baa a sẽn tar yʋʋm 50 masã wã, ned sã n pẽg-a n yeel t’a tʋmda a kãsem-sobendã tʋʋm sõma, noom-a-la wʋsgo. A sẽn mi tɩ pẽgr kengda raoodã, a modgd n pẽgda a taabã. D yaa so-pakda, ned sẽn kʋʋl wall ned sẽn koms raoodo, d fãa rata pẽgre.—Rom 12:10.
11 Kãsem-dãmbã sã n wa rat n sõng ned sẽn tudgi, b tõe n tika tʋʋm-sõma nins a sẽn maan pĩndã n pẽg-a. Rẽ tõe n sõng-a lame t’a toeem n maan sẽn yaa tɩrga. (Gal. 6:1) Saam-bi-poak yʋʋr sẽn boond t’a Miriam kibarã wilgdame tɩ sɩd yaa woto. Ad a sẽn yeele: “M zo-rãmb kẽer wa n basa sɩdã, tɩ m baaba me lʋɩ bã-kɛgenga. Woto namsa maam wʋsgo, hal tɩ m yamã yi vɩɩmã.” Rẽ kɩtame t’a sak ned sẽn pa tũud a Zeova rolemdo, n tẽed tɩ rẽ n na n boog a sũ-sãamsã. La pa naf-a ye. A wa n tagsdame t’a Zeova pa le nong-a, la t’a sẽn basd sɩdã n são. La kãsem-soab n sõs ne-a n tẽeg-a bũmb nins a sẽn da maan a Zeova tʋʋmdã pʋgẽ wã. Woto kɩtame t’a sak tɩ kãsem-dãmbã sõng-a. A bãngame t’a Zeova ket n nong-a lame, tɩ rẽ sõng-a t’a lak a meng ne a rollã, n kell n tũ a Zeova.
12. Bõe yĩng tɩ d pa segd n ningd d tẽed-n-taasã taale, wall d makd b sẽn maandã ne b taabã?
12 La d segd n gũusa ne d sẽn maand to-to n dat n keng d tẽed-n-taasã raood tɩ b kell n tũ Wẽnnaam ne yẽesmã. D pa segd n makd bũmb nins b sẽn maandã ne neb a taabã, wall d ningd-b taal b sẽn pa maand yɛlã wa tõnd mengã sẽn datã, pa rẽ bɩ b sẽn pa modgd wʋsg yĩng ye. D sã n maan woto, tõe n kɩtame tɩ b modg wakat a wãn bal n lebg n maage. Bũmb sẽn tõe n keng b raood n yɩɩd yaa d sẽn na n wae n pẽgd-ba, la d tẽegd-b tɩ yaa tõnd sẽn nong Wẽnnaamã n kɩt tɩ d rat n tʋm a tʋʋmdã ne d sũur fãa wã.—Karm-y Filip rãmb 2:1-4.
BƖ D “KENG TAAB RAOODO”
13. Bõe la d tõe n maan n keng taab raoodo? (Ges-y fotã sẽn be sõsgã sɩngrẽ wã.)
13 A Poll sagl-d lame me tɩ d kengd taab raoodo, sẽn yɩɩd fãa d sẽn ne tɩ daarã kolgdame wã. D sã n kengd d taabã raoodo, yaa wa d sẽn ningd raad bugmẽ t’a yãng wall a ra ki ye. Rẽ na n sõngd-b lame tɩ b ket n tũud Wẽnnaam. D sã n wa rat n sõng ned sẽn koms raoodo, d segd n goma ne-a ne bʋgsem la d wilg tɩ d nong-a lame. (Yel. 12:18) Sẽn paase, d segd n ‘wɩnga ne kelgre, la d maag ne goama.’ (Zak 1:19) D sã n kelg d tẽed-n-taaga, d tõe n bãnga bũmb ning sẽn koms a raoodã, la d bãng d sẽn tõe n yeel bũmb ning tɩ naf-a.
14. Wãn to la kãsem-soab sõng saam-biig sẽn da koms raoodo?
14 Bɩ d ges kãsem-soab a ye sẽn maan to-to n sõng saam-biig sẽn da bas koɛɛgã mooneg n maan yʋʋma. Kãsem-soabã sẽn kelg-a wã, a bãngame tɩ saam-biigã ket n nonga a Zeova. A ra zãmsda Gũusg Gasgã sõma, la a modgd n kẽnd tigissã n pa vaandẽ ye. La tigingã neb kẽer manesem n da sãam a sũuri. Kãsem-soabã kelg-a lame n pa ning-a taal ye. A wilg-a lame t’a tẽed-n-taasã nong-a lame. Bilf-bilfu, saam-biigã bãngame tɩ yẽ basame tɩ yɛl sẽn loog kɩt t’a pa le tũud Wẽnnaam sõma ye. Kãsem-soabã yeel-a lame t’a wa tɩ b tũ taab n tɩ moon koɛɛgã. Ne kãsem-soabã sõngre, saam-biigã wa n tõog n le sɩnga koe-moonegã, la kaoosg zugẽ a le wa n lebga kãsem-soaba.
15. Mak-sõng bʋg la a Zeova kõ tõnd neb a taabã raood kengrã wɛɛngẽ?
15 D sã n sõngd ned sẽn koms raoodo, tõe t’a pa na n yɩ tao-tao n sak d sõngrã, wall a paam yẽesem zĩig pʋgẽ ye. A Poll yeela woto: ‘Sõng-y ka pãng rãmbã, la y maan sũ-mar ne nebã fãa.’ (1 Tes. 5:14) Dẽnd d pa na n yɩ tao-tao n bas ka pãng rãmbã sõngr ye. D na n maana sũ-mar ne-ba. A Zeova maana sũ-mar ne neb sẽn da tũud-a n wa koms raoodo. Wala makre, a maana sũ-mar ne a Eli, n kelg-a sõma. A sõng-a-la ne bũmb ning a sẽn da rat sẽn na yɩl n kell n tʋm a tʋʋmdã. (1 Rĩm 19:1-18) Ned a to yaa a Davɩɩd. A sẽn tek yam n kos sugr yel-wẽn nins a sẽn maanã yĩnga, a Zeova zoeya a nimbãaneg n kõ-a sugri. (Yɩɩl 51:9, 19) Yɩɩl Sõamyã 73 soabã gʋlsd me wa n komsa raoodo, hal tɩ ra ket bilf t’a bas Wẽnnaam tũubu, la a Zeova sõng-a lame. (Yɩɩl 73:13, 16, 17) A Zeova bʋkda a meng ne tõnd la a maand sũ-mar ne-do. Sẽn yɩɩd fãa d sã n wa koms raoodo. (Yik. 34:6) A “nimbãan-zoeerã ka tar tɛk ye. Yibeoog fãa, bãmb le lebgda paalse.” (Wiis. 3:22, 23) A Zeova ratame tɩ d rɩk a togs-n-taare, n bʋk d mens ne neb nins sẽn koms raoodã.
D KENG TAAB RAOOD N KELL N KẼN VƖƖMÃ SOR ZUGU
16, 17. Dũni-kãngã saab sẽn kolgdã, bõe la d segd n maandẽ, la bõe yĩnga?
16 Neb 33000 sẽn yi kã de kõnsãntrasiõ wã pʋgẽ n na n kẽnã, bãmb tusa n ki. La a Zeova Kaset rãmb 230 wã fãa põsame. Sã n da pa b sẽn teel taab la b keng taab raoodã, b ra pa na n põs ye.
17 Rũndã-rũndã, tõnd kẽnda sor ning sẽn ‘dabd vɩɩm zĩigẽ’ wã zugu. (Mat. 7:14) Ka la bilfu, neb nins sẽn maand a Zeova raabã na n naaga taab n kẽ dũni-paalgã pʋgẽ. Tɩrlem na n zĩnda be. (2 Pɩɛ. 3:13) Dũni-kãngã saab sẽn kolgdã, bɩ d fãa ket n sõngd taaba, n kell n kẽn vɩɩmã sor zugu.
[Zãmsgã sogsgã]
[Foto seb-neng 18]
[Foto seb-neng 20]
Naagd-y y tẽed-n-taasã n moond koɛɛgã
[Foto seb-neng 20]
Yik-y taab ratem tɩ maan nonglem la tʋʋm-sõma
[Foto seb-neng 21]
Bao-y tũud-n-ta-sõma
[Foto seb-neng 22]
Y sã n dat n sõng ned bɩ y maag y yĩng n kelg-a (Ges-y sull 14, 15)
