Rũndã-rũndã, yoobã yɛl bee zĩig zãnga. * A bee piblisite-rãmbẽ, filim-dãmbẽ, mizik-rãmbẽ, sɛb pʋsẽ, televisiõ wã pʋgẽ, ze-video-rãmbẽ, portaabl-dãmbẽ, la ẽntɛrnetã pʋgẽ. Neb wʋsg pa le get rẽ wa bõn-wẽng ye. Tẽns wʋsg pʋsẽ neb nins sẽn get yoob yɛlã sõor tara paasgo. Yoobã yɛl ra nan zɩ n piuug n ta woto ye.—Ges-y zĩ-gũbr ning sẽn yaa:  “Yoobã yɛl bee zĩig zãnga.”

Yoobã yɛl sẽn da yaa to-to pĩndã ne masã wã leb n pa yembr ye. Pag a ye yeela a sebr pʋgẽ tɩ rũndã-rũndã, b sẽn wilgd yoobã yɛl to-to wã lebga wẽng wʋsgo, tɩ bũmb nins nebã sẽn da get tɩ pa sakd pĩndã be zĩig fãa masã.

Yãmb tagsg yaa wãn ne yoobã yɛl sẽn tar piuugri, tɩ neb wʋsg pa le get-a wa bõn-wẽngã? Yoobã yɛl yaa bũmb ned sẽn tõe n get n deemdẽ tɩ yell kae bɩ, bɩ a yaa wẽng wʋsgo? A Zezi yeela woto: “Tɩ-sõng fãa womda bi-sõma, la tɩ-wẽng fãa womda bi-wẽnse.” (Matɩe 7:17) Bi-bʋs buud la yoobã yɛl gesgã  womda? Sẽn na yɩl n bãnge, bɩ d leok sogsg kẽer yoobã yɛl gesg wɛɛngẽ.

BÃNGDBÃ SẼN YETE: Yoobã yɛl gesg tõe n yõka ned hal t’a lebg a yamba, tɩ bãngdb la logtoɛɛmb kẽer mak rẽ ne doroog sẽn maand ned bũmb ningã.

A Brian * sẽn da get yoobã yɛl ẽntɛrnetã pʋgẽ wã yeela woto: “Bũmb ra pa tõe n kɩt tɩ m bas gesg ye. Ra yaa wa m pa le so m meng ye. M sã n da ges n sa, m yĩnsã rigdame tɩ m zugã zabdẽ. Mam modga wʋsg n na n base, la maana yʋʋma, tɩ m pa tõog ye.”

Neb nins sẽn lebg yoobã yɛl gesg yemsã wae n solgdame n pa rat tɩ ned bãng ye. B wae n yagda ziri me. Rẽnd pa lingr la b wʋsg sũy sẽn sãamd ne b mense, la b yaa sũ-tʋʋlem dãmbã ye. Sãnda yam mi n yɩ b mense, tɩ b tagsdẽ tɩ b sẽn kiid n são. Daar fãa la bala, a Serge ra telesarzda filim-dãmb sẽn wilgd yoob yɛl n ningd a portaablẽ wã n getẽ. Ad a sẽn yeele: “Ra yaa mam mengã yell bal n pak-ma. Sẽn paase, m sũur da sãamda wakat fãa. M da ningda m meng taale, n getẽ tɩ m pa tar yõodo, tɩ m yell pa pak neda, la tɩ m pa le so m meng ye. La m da zoeta yãnde, n pa rat n kos sõngr ye.”

Baa ned sã n ges yoobã yɛl bilfu, tõe n waa ne zu-loeese. Etazĩni goosneema wã sull a ye sõsa ne pag sẽn maand vaeesg yoobã yɛl gesgã wɛɛngẽ. Pagã yeelame tɩ ned sã n ges yoob yɛla, paada a yamẽ wã, t’a rat t’a pa rat me bɩ a mi n lebg n tẽege. A paasame tɩ rẽ paada a soabã yamẽ n kaoose, tɩ yaa toog t’a yiis-ba. A Susan sẽn yaa bi-pugl sẽn tar yʋʋm 19 n da get yoobã yɛl ẽntɛrnetã pʋgẽ wã yeela woto: “Mam sẽn ges bũmb ninsã pa m yamẽ wã, tɩ m mi n tiig n tẽegdẽ. Mam tagsdame tɩ m pa na n tõog n yĩm-b fasɩ ye.”

D SẼN SEGD N BÃNGE: Ned sã n get yoob yɛla, a wat n lebga a yamba. Sẽn paase, sãamda a vɩɩmã.

BÃNGDBÃ SẼN YETE: “Yoobã yɛl gesgã sãamda kãadem, la a wãad zagse.”—The Porn Trap, by Wendy and Larry Maltz.

Yoobã yɛl gesg sɩd sãamda kãadem, la a wãad zagse. Bala,

• kɩtdame tɩ bas-yard la nonglem ka le be rao ne a pag sʋk ye.—Yelbũna 2:12-17.

• kɩtdame tɩ ned lebg rat-m-ye soaba, n zãagd a meng ne a pag wall a sɩda, t’a sũur pa le noom ne-a ye.—Efɛɛz rãmba 5:28, 29.

• kɩtdame tɩ ned tagsd yoob yell wakat fãa, la wat ne tʋls-wẽnse.—2 Pɩɛɛr 2:14.

• tõe n kɩtame tɩ ned rat n modg a pag bɩ a sɩd n tʋm tʋʋm-dẽgd ne-a.—Efɛɛz rãmba 5:3, 4.

• tõe n kɩtame tɩ ned zãmb a pag bɩ a sɩda.—Matɩe 5:28.

 Biiblã sagenda sẽn kẽ-b kãadmã tɩ b ra ‘sãam kaool’ ning b sẽn maan ne taabã ye. (Malaki 2:16) Ned sã n zãmb a pag bɩ a sɩda, a sãama kaoolã. La woto tõe n waa ne welgr bɩ kãadmã kaoobo, tɩ nams b kambã me.

La biig sã n ges yoob yɛla, tõe n sãam-a lame. A Brian d sẽn zoe n gom a soab yellã yeela woto: “Mam sẽn wa n zems yʋʋm piiga, maam ne m zo-rãmb n da reemde. D ra zoet n soondame tɩ d taabã gẽesd tõndo. La m wa n tɩ solga zĩiga, n yã m baaba sɛb sẽn tar fot-rãmb sẽn wilgd yoob yɛla. Rẽ tɛka, m da soosd n getame, n pa mi bũmb ning sẽn kɩt tɩ m nong fot-kãensã ye. Mam wa n bɩɩme n ket n getẽ.” Vaeesg b sẽn maan wilgame tɩ biig sã n get yoob yɛla, tõe n kɩtame t’a sɩng yoob pĩnda, n nong yoob wall a maand neb pãng lagengã wɛɛngẽ. Tõe n kɩtame me t’a pa tõe n yõg zood sẽn tar pãng ne ned ye.

D SẼN SEGD N BÃNGE: Yoobã yɛl gesg sãamda neb zĩid-n-taare, la wat ne sũ-sãams la zu-loees a taaba.—Yelbũna 6:27.

WẼNNAAN GOMDÃ SẼN YETE: “Bɩ y kɩɩs y yĩngã ratem . . . sẽn yaa yoobo, la rẽgdo, la wẽng ratem, la tags-wẽnse, la zoe-bõn sẽn yaa bõn-naands pʋʋsgo.”—Kolos rãmba 3:5.

Koɛɛg-koɛɛga, a Zeova * kisa yoobã yɛl gesgo. Woto pa rat n yeel t’a kisa pag ne rao sẽn na n lagemd taab ye. A naana raoolmã la poglmã, n dat tɩ rao ne pag sã n kẽ kãadem bɩ b tõe n kẽ ne taab n paam sũ-noogo, tɩ b nonglmã ne taabã paasdẽ, la b tõe n dog kamba.—Zak 1:17.

La bõe yĩng tɩ d yetẽ t’a Zeova kisa yoobã yɛl gesgo? Ad bʋʋm a wãna:

• A miime tɩ yoobã yɛl gesg tõe n sãama ned vɩɩm.—Efɛɛz rãmba 4:17-19.

• A nonga tõndo, n pa rat tɩ d paam zu-loees ye.—Ezai 48:17, 18.

• A Zeova pa rat tɩ kãadem kao, tɩ zak wã ye.—Matɩe 19:4-6.

• A pa rat tɩ d yo, n zãmb d taabã ye.—1 Tesalonik rãmba 4:3-6.

• A ratame tɩ d wilg tɩ d nanda tõog ning a sẽn kõ-d tɩ d tõe n dog kambã, la d ra tʋm dẽgd ye.—Hebre dãmba 13:4.

• A Zeova miime tɩ b sẽn wilgd yoobã yɛl to-to wã kɩtdame tɩ sẽn get-bã tar tags-wẽns pag ne rao lagengã zugu.—Sɩngre 6:2; Ziid 6, 7.

D SẼN SEGD N BÃNGE: Ned sã n get yoob yɛla, sãamda zood ning a sẽn tar ne Wẽnnaamã.—Rom dãmba 1:24.

La a Zeova zoeta neb nins sẽn maood n dat n bas yoobã yɛl gesgã nimbãanega. Biiblã yeta woto: “Zu-soabã yaa nimbãan-zoɛt la bark kõata, bãmb sũur ka puugd tao-tao ye. B tara nonglem wʋsgo. Tɩ bõe, bãmb mii bãmb sẽn yãk bũmb ning n naan tõndo, bãmb tẽegdame tɩ tõnd yaa tẽng tom.” (Yɩɩl Sõamyã 103:8, 14) A Zeova yeta sik-m-mens rãmbã tɩ b wa yẽ nengẽ, n “paam nimbãan-zoeer la barka,” la t’a na n sõng-b lame.—Hebre dãmba 4:16; ges-y sõsg ning gom-zug sẽn yaa:  “Y sẽn tõe n paam y meng ne yoobã yɛl gesg to-to.”

Neb wʋsg saka Wẽnnaam sor-wilgrã tɩ sõng-ba. Wãn to? Biiblã goma neb sẽn tõog n bas minim-wẽns yelle, n yeel woto: “Yãmb paama pekre, yãmb welgame tɩ yɩ sõma, la yãmb lebga tɩrs Zu-soab a Zezi Kirist yʋʋr yĩnga, la ne tõnd Wẽnnaam Sɩɩgã pãnga.” (1 Korẽnt dãmba 6:11) Neb a woto tõe n yeela wa tʋm-tʋmd a Poll tɩ ‘bãmb tõee fãa ne ned ning sẽn kõt bãmb pãnga’ maasem.—Filip rãmba 4:13, Sebr Sõngo.

A Susan sẽn tõog n bas yoobã yɛl gesgã yeela woto: “A Zeova bal n tõe n sõng yãmb tɩ y bas yoobã yɛl gesgo. Y sã n kos a sõngr la y tũ a sor-wilgrã, y na n lebga yɩlemd a nifẽ. A pa na n bas-y abada.”