Biiblã yaa sebr sẽn wae, n yɩɩd sɛb a taabã fãa. Bõe yĩng tɩ d yet woto? Bala neb wʋsg sã n karem-a, b wʋmda a goamã võore. Neb kibay n be a pʋgẽ, tɩ d sã n karem bɩ d tõe n bãng nin-kãens manesem sẽn yɩ to-to ne b taabã la ne Wẽnnaam. Kiba-kãensã kõta ned yam. B sẽn togs-b to-to wã yaa vẽenega, hal tɩ b tõe n lebg Biiblã ne buud-goam wʋsgo, tɩ neb buud toor-toor sẽn be zĩis toɛy-toɛy tõe n karem n wʋm a võore. Baa ne rũndã, a saglsã nafda nebã.

Sẽn tar yõod n yɩɩda, Biiblã pa sebr sẽn gomd Wẽnnaam yell bal ye. Yaa sebr sẽn yit Wẽnnaam nengẽ. Be la d tõe n ges n bãng Wẽnnaam yʋʋrã, a sẽn yaa a soabã, a sẽn nonge, a sẽn kisi, la bʋʋm ning sẽn kɩt t’a naan tẽngã la ninsaalbã. Biiblã leb n wilgda sẽn sɩng to-to tɩ wẽng wa beẽ, la sẽn na n yɩ to-to tɩ wẽng buud fãa wa sa. D sã n karem Biiblã ne pʋ-peelem, d na n tõog n tẽe Wẽnnaam la d kɩs sɩd tɩ beoog na n yɩɩ neere.

Biiblã togsda yɛl kẽere, tɩ d pa tõe n yã rẽ sɛb a taab pʋsẽ ye. Wala makre, Biiblã sõngda tõnd tɩ d bãng:

• Sẽn sɩng to-to tɩ ninsaal wa beẽ, la bũmb ning sẽn kɩt tɩ nebã namsdẽ wã.

• Wẽnnaam sẽn maan bũmb ning ninsaalbã fãagr yĩngã.

• A Zezi sẽn maan bũmb ning tõnd yĩnga.

• Tẽngã sẽn na n wa yɩ to-to, la ninsaalbã beoog daarã sẽn na n yɩ to-to.

Karm-y seb-kãngã tɩ y na n bãnga Biiblã sẽn taasd tõnd koɛɛg ningã.