Ned sã n ki, yaa wa a sẽn gõe. A pa mi bũmbu, a pa tõe n maan fʋɩ me ye. La d Naandã tõe n vʋʋga ned sẽn ki. Kaset sẽn wilgd rẽ yaa t’a kõ a Zezi pãng t’a vʋʋg kũ-rãmba.—Karm-y Koɛɛg Soab 9:5; Zã 11:11, 43, 44.

Wẽnnaam pʋlmame t’a na n vʋʋga neb nins sẽn maan kaalem t’a tẽr b yellã, tɩ b vɩɩmd dũni-paalg pʋgẽ tɩrlem sẽn na n zĩndi. Wẽnnaam sẽn na n vʋʋg-b rãmbã bee yaoogẽ n gũud wakat ning a sẽn na n vʋʋg-bã. Pãng sẽn ka to soab a Wẽnnaam yãgdame n dat n wa vʋʋg sẽn ki-bã.—Karm-y Zoob 14:14, 15.

Wẽnnaam sã n wa vʋʋg-ba, b ned kam fãa na n tẽr bũmb nins a sẽn da maanã. A na n mi a zo-rãmbã la a roagdbã. Baa ned sã n ki n lebg tẽng tom, Wẽnnaam tõe n lebs n naan-a lame n kõ-a yĩng a to.—Karm-y 1 Korẽnt dãmb 15:35, 38.

Neb sõor bilf bal n na n vʋʋg n tɩ vɩɩmd saasẽ. La sẽn na n vʋʋg-bã wʋsg na n vɩɩmda tẽngã sẽn na n lebg arzãnã zugu. (Wilgri 20:6) Nin-kãens tõe n paam n vɩɩmda wakat sẽn kõn sa.—Karm-y Yɩɩl Sõamyã 37:29; Tʋʋm 24:15.