“Bɩ y maan bõn-kãng n tẽegd mam yelle”
“Bɩ y maan bõn-kãng n tẽegd mam yelle”
“[A Zezi] sẽn ning [burã] barka, b kaoome n yeele: ‘Bɩ y reeg n dɩ. Yãoã yaa mam yĩng sẽn sãam yãmb yĩnga. Bɩ y maan bõn-kãng n tẽegd mam yelle.’”—1 KOR. 11:24.
Y NA N LEOKAME TƖ BÕE?
Wãn to la d bãngd a Zezi kũumã tẽegr sẽn segd n yɩ daar ningã yʋʋmd fãa?
Soaalã zaabr dɩɩbã sasa, burã makda bõe, la divẽ wã makda bõe?
Bõe yĩng tɩ tẽegrã kẽngr tar yõod ne sẽn na n kẽng-b saasẽ wã, la ne sẽn na n vɩɩmd-b tẽngã zugã?
1, 2. A Zezi sẽn wa n dabd Zerizalɛm a yaoolem so-toakã, tõe tɩ bõe n da be a tʋm-tʋmdbã yamẽ?
NEB la b ra yãk Zerizalɛm tɩ b gẽegd kiuugã yiibu, sẽn na yɩl tɩ b bãng Nizã kiuugã sɩngre. Nebã sẽn yã kiuugã, b tɩ togsa Sãnedrẽ wã, tɩ Sãnedrẽ wã wilg tɩ Nizã kiuugã sɩngame. B yeelame tɩ b widg bugum wall b tʋm koe-taasdb n togs nebã. A Zezi tʋm-tʋmdbã bãngame tɩ Pakã kolgame. Yaa vẽeneg tɩ b bãngame me t’a Zezi rat n taa Zerizalɛm nand tɩ Pakã ta.
2 Rẽ t’a Zezi ra bee Peere sẽn be Zʋrdẽ kʋɩlgã rʋʋndã, n wat Zerizalɛm. Ra yaa a yaoolem so-toaka. (Mat. 19:1; 20:17, 29; Mark 10:1, 32, 46) Zʋɩf-rãmbã sẽn bãng Nizã kiuugã pipi daare, b bãngdame me tɩ Pakã keta rasem 13, wĩndgã kõom poore, rat n yeel tɩ Nizã kiuug rasem 14.
3. Bõe yĩng tɩ Nizã kiuug rasem 14 tar yõod ne kiris-nebã?
3 Yʋʋmd 2014, Nizã kiuug rasem 14 sɩngda tʋʋl-nif kiuug rasem 14 wĩndgã kõom poore. Yaa raar-n-kãng la d na n maan Soaalã zaabr dɩɩbã. Ra-kãng na n talla yõod wʋsg ne kiris-neb hakɩkã la neb nins sẽn na n wa naag-bã. Bõe yĩnga? Bala 1 Korẽnt dãmb 11:23-25 yeta woto: “Yʋng ning b sẽn zãmb Zu-soab a Zezi wã, bãmb dɩka buri. La b sẽn ning-a barka, b kaoome n yeele: ‘Bɩ y reeg n dɩ. Yãoã yaa mam yĩng sẽn sãam yãmb yĩnga. Bɩ y maan bõn-kãng n tẽegd mam yelle.’” A maana woto me ne bõn-yũudla.
4. a) A Zezi kũumã tẽegr wɛɛngẽ, sogs-bʋs la y tõe n sok y menga? b) Wãn to la d bãngd a Zezi kũumã tẽegr sẽn segd n yɩ daar ningã yʋʋmd fãa? (Ges-y zĩ-gũbrã gom-zug sẽn yaa: “Yʋʋmd 2014, a Zezi kũumã tẽegr na n yɩɩ rabʋre?”)
4 Sãmbg kae tɩ y na n kẽnga a Zezi kũumã tẽegr ye. Yaa rẽ bal la a Zezi yeel a karen-biisã tɩ b maan yʋʋmd fãa. La nand tɩ ra-kãng ta, sok-y y meng woto: ‘Wãn to la m na n segl m menga? Bõe la b na n tall n maan Soaalã zaabr dɩɩbã? Wãn to la b na n maan a Zezi kũumã tẽegrã? Bõe yĩng tɩ Soaalã zaabr dɩɩbã ne bũmb nins d sẽn na n tall n maan-a wã segd n tall yõod ne maam?’
BŨMB NINS D SẼN NA N TALL N MAAN SOAALÃ ZAABR DƖƖBÃ
5. Bõe la a Zezi yeel a tʋm-tʋmdbã tɩ b maan n segl Pakã?
5 A Zezi sẽn wa n yeel a tʋm-tʋmdbã tɩ b tɩ bao roog n segl Pakã, a pa yeel tɩ b segd n nagsa roogã ne teed wʋsg ye. A sẽn da rat yaa roog sẽn yaa yɩlemde, t’a yalmã me sek yẽ ne a tʋm-tʋmdbã. (Karm-y Mark 14:12-16.) Tʋm-tʋmdbã ra segd n baoa bũmb kẽer Pakã rɩɩb yĩnga, tɩ bur sẽn ka ning rabɩll la divẽ naag bõn-kãense. B sẽn wa n dɩ Pakã n sa, a Zezi goma burã ne divẽ wã yelle.
6. a) A Zezi ne a tʋm-tʋmdbã sẽn dɩ Pakã n sa wã, bõe la a yeel burã wɛɛngẽ? b) A Zezi kũumã tẽegr burã yaa wãn to?
6 Tʋm-tʋmd a Matɩe sẽn zĩnd be wã wa n yeelame: “A Zezi rɩka bur n ning barka, n kao n kõ b karen-biisã n yeele: ‘Bɩ y reeg n dɩ.’ ” (Mat. 26:26) ‘Burã’ ra yaa bur sẽn ka ning rabɩlle, wa Pakã burã. (Yik. 12:8; Tõo. 16:3) Yaa ble zom ne koom bal la b tall n maan-a n pa ning yamsem bɩ bũmb a to ye. B sẽn pa ning rabɩllã, burã pa wuk ye. Burã ra yaa koɛɛnga, t’a kaoob yaa nana. Rũndã-rũndã, a Zezi kũumã tẽegr sã n wa kolgdẽ, tigingã kãsem-dãmb na n kosa ned t’a maan bur a woto buudu. A segd n maan-a-la ne bur-zom la koom. Tõe t’a na n sõoga poɛllã ne kaam bilfu. A sã n pa tõe n paam bur-zom, a tõe n maana burã ne mui zom, kamaan-zom, ki wall baning zom.
7. Bõn-yũudla a Zezi sẽn kõ a tʋm-tʋmdbã yaa bõe, la divẽ bʋg buud la kiris-nebã segd n tall n maan tẽegrã?
7 A Matɩe paasame t’a Zezi “dɩka bõn-yũudla, la bãmb sẽn ning barka, bãmb kõo bãmba n yeele: ‘Bɩ yãmb fãa yũ.’ ” (Mat. 26:27, 28) Bõn-yũudla a Zezi sẽn kõ a tʋm-tʋmdbã yaa divẽ miuugu. D miime tɩ ra pa nasaar-sib koom b sẽn nan wẽk paalem ye. Bala, rẽ tɩ nasaar-sibã wobr wakat looga hal daar zãra. Pipi Pakã b sẽn maan Eziptã sasa, b pa yũ divẽ ye. La a Zezi pa yeel tɩ yaa wẽng tɩ b yũ divẽ Pakã rɩɩb sasa ye. A pʋd n talla divẽ n maan Soaalã zaabr dɩɩbã. Rẽ n so tɩ kiris-nebã me talld divẽ n maand a Zezi kũumã tẽegre. La yaa divẽ bʋg buud la b segd n tall n maan tẽegrã? Segd n yɩɩ divẽ sẽn pa pul rã-toos wall bũmb a to, wa a Zezi zɩɩmã sẽn pa baood tɩ b paas bũmb t’a yaool n lebg sõma wã. Tõe n yɩɩ divẽ b sẽn maan yiri, bɩ divẽ kẽer b sẽn koosde, wala b sẽn boond b rãmb tɩ Cabernet, Bourgogne wall Bordeaux wã.
BURÃ NE DIVẼ WÃ SẼN MAKD BŨMB NINSI
8. Bõe yĩng tɩ burã ne divẽ wã sẽn makd bũmb ninsã tar yõod wʋsg ne kiris-nebã?
8 Tʋm-tʋmd a Poll wilga vẽeneg tɩ tʋm-tʋmdbã sẽn yãk b toogo, kiris-neb a taabã me segd n maana Soaalã zaabr dɩɩbã. A gʋlsa a tẽed-n-taasã sẽn da be Korẽntã n yeel woto: “Mam deega bũmb ning mam sẽn zãms yãmbã Zu-soabã nengẽ. A yaa tɩ yʋng ning b sẽn zãmb Zu-soab a Zezi wã, bãmb dɩka buri. La b sẽn ning-a barka, b kaoome n yeele: ‘Bɩ y reeg n dɩ. Yãoã yaa mam yĩng sẽn sãam yãmb yĩnga. Bɩ y maan bõn-kãng n tẽegd mam yelle.’” (1 Kor. 11:23, 24) Rẽ n so tɩ rũndã-rũndã, kiris-nebã maand Soaalã zaabr dɩɩbã yʋʋmd fãa, tɩ burã ne divẽ wã sẽn makd bũmb ninsã tara yõod wʋsg ne-ba.
9. Bõe la neb kẽer tẽed burã wɛɛngẽ tɩ pa zemse?
9 A Zezi sẽn yeel tɩ ‘yãoã yaa yẽ yĩngã’ kɩtame tɩ neb kẽer tẽed tɩ burã sɩd lebga a Zezi yĩngã. La pa yɩ woto ye. * A Zezi ra zĩi tʋm-tʋmdbã taoore, tɩ bur sẽn ka ning rabɩllã me rɩg b taoore. Rẽnd yaa vẽeneg t’a maka burã ne a yĩngã, wa a sẽn da wae n dɩkd makr n zãmsd nebã.—Zã 2:19-21; 4:13, 14; 10:7; 15:1.
10. Soaalã zaabr dɩɩbã sasa, burã makda bõe?
10 Burã sẽn da rig tʋm-tʋmdbã taoor tɩ b na n wãbã makda a Zezi yĩngã. Pĩndã, kiris-neb hakɩkã ra tagsdame tɩ burã makda sẽn paam-b vʋʋsem sõng zaeebã, Biiblã sẽn boond b rãmb tɩ “Kirist yĩngã.” B ra tagsda woto, bala a Zezi kao burã n kõ a tʋm-tʋmdbã, tɩ b yaool n pa kao yẽ mengã kõbr baa a ye a kũumã sasa ye. (Ef. 4:12; Rom 12:4, 5; 1 Kor. 10:16, 17; 12:27) La b sẽn maan vaeesgo, b bãngame tɩ burã makda a Zezi yĩngã. Biiblã wilga a Zezi ‘sẽn nams a yĩngã pʋgẽ’ to-to, hal n ki kũum da-luk zugu. Rẽnd Soaalã zaabr dɩɩbã sasa, burã makda a Zezi yĩngã a sẽn kõ tɩ yɩ maoong tõnd yel-wẽnã yĩngã.—1 Pɩɛ. 2:21-24; 4:1; Zã 19:33-36; Heb. 10:5-7.
11, 12. a) Bõe la a Zezi yeel divẽ wã wɛɛngẽ? b) Soaalã zaabr dɩɩbã sasa, divẽ wã makda bõe?
11 D sẽn bãng burã sẽn makd bũmb ningã sõngd-d lame tɩ d wʋm a Zezi sẽn yeel bũmb ning divẽ wã wɛɛngẽ wã võore. Biiblã yeela woto: “[A Zezi] rɩka bõn-yũudlã me n yeele: ‘Bõn-yũudl-kãngã yaa kãab-paalg sẽn yaa mam zɩɩm.’” (1 Kor. 11:25) Bõn-yũudlã yaa divẽ. La a Zezi yeelame tɩ divẽ wã makda bõe? Makda a zɩɩmã sẽn na n daag tɩ yɩ maoongã.
12 A Mark Evãnzillã wilgame t’a Zezi yeela woto: “Yãoã yaa mam zɩɩm sẽn yaa kãab-paalg zɩɩm sẽn daag neb wʋsg yĩnga.” (Mark 14:24) A Matɩe Evãnzillã paasame t’a Zezi zɩɩmã ‘raaga neb wʋsg yel-wẽnã sugr yĩnga.’ (Mat. 26:28) Rẽnd divẽ wã makda a Zezi zɩɩmã. A Zezi zɩɩmã maasem yĩnga, d tõe n paama d “yel-wẽnã sugri.”—Karm-y Efɛɛz rãmb 1:7.
WÃN TO LA D TẼEGD A ZEZI KŨUMÃ?
13. Wãn to la d maand Kirist kũumã tẽegre?
13 Y sã n nan zɩ n naag a Zeova Kaset rãmbã n tẽeg a Zezi kũumã, tõe tɩ y rat n bãnga sẽn na n yɩ to-to. B na n maana tẽegrã zĩig sẽn yaa yɩlemde, t’a yalmã me sekd neb nins fãa sẽn na n wa wã, tɩ ned kam fãa tõog n kelg sõma. Tõe tɩ b na n nagsa zĩigã ne filɛɛr-dãmb bilfu, la b pa na n nags-a tɩ loog noor ye. Pa na n yɩ wa saoog zĩigẽ me ye. Kãsem-soab n na n maag a yĩng n bilg Biiblã sẽn yet bũmb ning Soaalã zaabr dɩɩbã wɛɛngẽ wã. A na n wilgame tɩ Kirist kiime tɩ yɩ maoong sẽn na yɩl tɩ tõnd paam vɩɩm.—Karm-y Rom dãmb 5:8-10.
14. Soaalã zaabr dɩɩbã sasa, bõe la sõsdã na n wilg kiris-nebã sẽn saagd n na n wa paam bũmb ningã wɛɛngẽ?
14 Sõsdã na n wilgame me tɩ kiris-nebã sʋka, kẽer na n kẽnga saasẽ, tɩ sãnda pa tẽngã zugu. Sẽn na n kẽng-b saasẽ wã na n tɩ rɩɩ naam ne Kiristã. B sõorã pa waoog ye. Tʋm-tʋmdb nins sẽn kell n pa ne a Zezi wã naaga nin-kãense. (Luk 12:32; 22:19, 20; Wil. 14:1) La rũndã-rũndã, kiris-neb hakɩkã fãa la bal saagd n na n wa vɩɩmda wakat sẽn kõn sa, tẽngã sẽn na n lebg arzãnã zugu. Wakat kãnga, Wẽnnaam daabã na n maana tẽngã zug wa sẽn maand saasẽ wã. Kiris-nebã sɩng n pʋʋsd n kota rẽ hal daar zãra. (Mat. 6:10) Sẽn paase, Biiblã wilgda bark nins sẽn na n vɩɩmd-b tẽngã zugã sẽn na n paam wakat sẽn kõn sa yĩngã.—Ezai 11:6-9; 35:5, 6; 65:21-23.
15, 16. Bõe la b maand ne burã Soaalã zaabr dɩɩbã sasa?
15 Sõsgã sã n wa kolg saabo, sõsdã na n wilgame tɩ wakat taame tɩ d na n maan wa a Zezi sẽn yeel a tʋm-tʋmdbã tɩ b maanã. Wa d sẽn da togsã, bur sẽn ka ning rabɩlle, la divẽ la b talld n maand Soaalã zaabr dɩɩbã. Y na n mikame tɩ rẽ zoe n bee taabl zugu, sõsdã sɛɛga. Sõsdã na n karma Biiblã n wilg a Zezi sẽn maan to-to ne burã, la a sẽn yeel bũmb ningã. Wala makre, a Matɩe Evãnzillã yeta woto: “A Zezi rɩka bur n ning barka, n kao n kõ b karen-biisã n yeele: ‘Bɩ y reeg n dɩ, yãoã yaa mam yĩnga.’ ” (Mat. 26:26) A Zezi kaoa burã, sẽn na yɩl n kõ a tʋmd-tʋmdbã sẽn da zĩ a goabg la a rɩtgã. Tʋʋl-nif kiuug rasem 14 daare, y na n mikame tɩ b zoe n kaoa bur sẽn ka ning rabɩlle, tɩ be asiɛt-rãmb pʋsẽ.
16 Nand tɩ b pɩʋʋg ne burã, saam-biig n na n wa pʋʋse. B na n ninga burã asiɛt-rãmbã sõor sẽn sek b na pɩʋʋg nebã fãa taoore, tɩ ra rɩk sẽk wʋsgo, la tɩ zũnd-zãnd ra zĩnd ye. B sã n wa pɩʋʋgd ne burã, yel-maandɩ ka be ned kam fãa sẽn segd n maan ye. Yʋʋmd 2013 d sẽn wa n maand a Zezi kũumã tẽegrã, sẽn wãb-b burã sõor pa yɩ wʋsg ye. Tigims wʋsg pʋsẽ, ned baa a ye pa wãb ye. Tõe tɩ rõandã me na n yɩɩ woto.
17. Soaala zaabr dɩɩbã sasa, bõe la b maand ne divẽ wã, tɩ zems ne a Zezi sẽn maanã?
17 B sã n wa pɩʋʋg ne burã n sa, sõsdã na n karma Matɩe Evãnzillã n wilg a Zezi sẽn maan to-to ne divẽ wã. Ad b sẽn yete: “Bãmb yaool n dɩka bõn-yũudla, la bãmb sẽn ning barka, bãmb kõo bãmb n yeele: ‘Bɩ yãmb fãa yũ. Tɩ bõe, yãoã yaa mam zɩɩm sẽn yaa kãab-paalg zɩɩm sẽn daag neb wʋsg yel-wẽnã sugr yĩnga.’” (Mat. 26:27, 28) Wa a Zezi sẽn maanã, saam-biig n na n wa pʋʋs tɩ b yaool n pɩʋʋg ne divẽ wã nebã fãa taoore.
18. Baa kiris-nebã fãa la bal sẽn pa wãbd burã la b pa yũud divẽ wã, bõe yĩng tɩ tar yõod tɩ b wa a Zezi kũumã tẽegre?
18 Yaa neb nins sẽn na n tɩ rɩ naam ne Kirist saasẽ wã bal n na n wãb burã la b yũ divẽ wã. Dẽnd tẽegrã sasa, nebã fãa la bal pa na n wãb burã la b yũ divẽ wã ye. (Karm-y Luk 22:28-30; 2 Tɩm. 4:18) Baasgo, tara yõod tɩ bãmb me wa a Zezi kũumã tẽegre. Bõe yĩnga? Bala wilgdame tɩ b sũy noomame, a Zezi sẽn sak n kõ a vɩɩmã tɩ yɩ maoongã. Tẽegrã sasa, b tagsda bark nins b sẽn tõe n paam a Zezi maoongã maasem yĩngã. Wala makre, b tõe n wa naaga kʋʋn-kãsengã sẽn na n põs “to-kãsengã” sasa wã. Kʋʋn-kãsengã na n yɩɩ neb nins sẽn na n ‘pek b fut tɩ lebg peels ne Pe-bilã zɩɩmã.’—Wil. 7:9, 14-17.
19. Bõe la d tõe n maan n segl d mens tẽegrã yĩnga, la bõe la d tõe n maan n dɩ a yõodo?
19 Dũniyã gill zugu, a Zeova Kaset rãmbã segenda b mens tẽegrã yĩnga. Semen a wãn nand tɩ daarã ta, d na n sɩnga nebã boolgo, sẽn na yɩl tɩ neb wʋsg wa tẽegrã. Tẽegrã sã n wa ket rasem a wãna, d na n karemda Biiblã kibay n tẽeg bũmb nins a Zezi sẽn maan yʋʋmd 33 Nizã kiuug rasem 14 daar sẽn wa n kolgdẽ wã, la bũmb nins sẽn maan daar-n-kãngã. D na n maana d sẽn tõe fãa n tõog n zĩnd tẽegrã daare. Yɩta sõma tɩ d ta pĩnda, n paam n deeg sãambã la d rɩ tigsgã fãa yõodo. Sõsdã sã n wa karemd vɛrse-rãmbã la a wilgd b võore, tigingã neb la sãambã sã n tũud karengã Biiblã pʋgẽ, na n naf-b lame. La sẽn tar yõod n yɩɩda, d sã n kẽng tẽegrã, d wilgdame tɩ d sũur yaa noog wʋsgo, a Zezi sẽn kõ a vɩɩmã tɩ yɩ maoongã. D wilgdame me tɩ d tũuda noor ning a sẽn kõ wã. A yeelame yaa: “Bɩ y maan bõn-kãng n tẽegd mam yelle.”—1 Kor. 11:24.
[Tẽngr note]
^ sull 9 Alemayn bãngd a ye yeelame tɩ tʋm-tʋmdbã ra pa na n tags tɩ yaa a Zezi yĩngã la b sẽn wãbdã, wall tɩ yaa a zɩɩmã la b sẽn yũudã ye. Bala, a Zezi yĩngã ra nan pa sãame, rat n yeel t’a ket n vɩɩme. A paasame t’a Zezi tũnuga ne goam sẽn yaa nana n na n wilg burã ne divẽ wã sẽn makd bũmb ninsã, la t’a Zezi ra pa rat t’a tʋm-tʋmdbã wʋm a goamã neng a to ye.
[Zãmsgã sogsgã]
[Foto seb-neng 23]
[Zĩ-gũbri, seb-neng 24]
Yʋʋmd 2014, a Zezi kũumã tẽegr na n yɩɩ rabʋre?
Rasem 30 fãa, kiuugã gilda tẽngã n soge. A sã n wa gilgdẽ, wakat n wat n zĩnd t’a be tẽngã ne wĩntoogã sʋka, tɩ ned pa tõe n pa tẽngã zug n yã-a ye. Na n kell n yɩɩ woto n kaoos lɛɛr-dãmba. Wakat ninga, zemsda lɛɛr 18, tɩ wakat ning bɩ ta lɛɛr 30. Rẽ poor la kiuugã yita.
Yʋʋmd 2014 tʋʋlg kiuugã, ned sã n be Zerizalɛm, a na n mikame tɩ wakat ning kiuugã sẽn wat n be wĩntoogã ne tẽngã sʋkã na n yɩɩ tʋʋlg kiuug rasem 30, yʋng wakat a 8 sẽn loog minit 45. Rẽ poore, na n maana lɛɛr 21 tɩ wĩntoogã yi n tɩ kẽ. La Nizã pipi daarã pa na n sɩng wakat kãng ye. Bõe yĩnga? Bala, rẽ tɩ kiuugã ket n bee wĩntoogã ne tẽngã sʋka, tɩ ned pa tõe n pa tẽngã zug n yã-a ye. Na n yɩɩ tʋʋl-nif kiuugã pipi daarã zaabr la b na n yã kiuugã Zerizalɛm. D sã n maan wa zʋɩf-rãmbã sẽn da maandã, d tõe n yeelame tɩ Nizã kiuugã pipi daarã na n sɩnga tʋʋl-nif kiuug pipi daare, wĩndgã kõom poore.
Yaa rẽ yĩng la b sẽn togs a Zeova Kaset rãmbã sẽn be dũniyã gill zugã tɩ yʋʋmd 2014, Nizã kiuug rasem 14 na n sɩnga tʋʋl-nif kiuug rasem 14, wĩndgã kõom poore. Yaa tẽne daare, ki-pɛɛlg wakate.
[Foto seb-neng 25]
Tʋm-tʋmdbã yũu divẽ wã sẽn makd a Zezi zɩɩmã sẽn yaa kãab-paalgã zɩɩmã (Ges-y sull 11, 12)
