Bãngdb kẽer wilgame tɩ tʋlsem a ye la ninsaalbã tar n segd n pidsi, n tõog n paam sũ-noog hakɩka. Sɩd me, d neeme tɩ ninsaalbã tʋl n teega ned bɩ bũmb pãng sẽn yɩɩd bãmb mensã. Rẽ n so tɩ sẽn na yɩl n pids tʋlsem kãngã, kẽer nonga weoogã, mizikã la bũmb a taaba, hal n waoogd bõn-kãense. Baasgo, b wʋsg mikdame tɩ pa pidsd b tʋlsmã ye.

Ninsaal fãa sẽn tʋl n teeg Wẽnnaam bɩ bũmb pãng sẽn yɩɩd yẽ wã pa lingd sẽn karemd-b Biiblã ye. Sɩngr sebrã pipi sagsã wilgdame tɩ Wẽnnaam sẽn wa n naan d yaab a Ãdem ne a Hawa wã, a ra gomda ne-b wakat fãa, tɩ b ra tõe n paam t’a yɩ b zoa. (Sɩngre 3:8-10) Wẽnnaam pa naan ninsaalbã n dat tɩ b vɩ tɩ b toog kae ne-a ye. Ninsaal ratame n gomd ne a Naandã, la a kelgd-a. Biiblã goam wʋsg n wilgd rẽ.

Wala makre, a Zezi yeelame tɩ “sũ-noog rãmba la sẽn teeg-b Wẽnde.” (Matɩe 5:3, Sebr Sõngo) Gom-kãensã sõngda tõnd tɩ d bãng tɩ ned sã n dat n paam sũ-noog la vɩɩm sẽn tar barka, yaa tɩlae t’a teeg Wẽnnaam. Wãn to la d wilgd tɩ d teega Wẽnnaam? A Zezi yeela woto: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:4) Wẽnnaam goamã, rat n yeel tɩ sagls nins sẽn be Biiblã pʋgẽ wã tõe n sõnga ned t’a paam sũ-noog la vɩɩm sẽn tar barka. Bɩ d ges bʋʋm a tãab sẽn kɩt tɩ d yet woto.

Rũndã-rũndã, bãngdb wʋsg n be n kõt nebã sagls zems-n-taarã wɛɛngẽ, nonglmã, zak pʋgẽ vɩɩmã, zabã, sũ-noogã, la baa vɩɩmã yõod wɛɛngẽ menga. La ãnd n sɩd tõe n kõ ninsaalbã sagls sẽn yaa sõma yel-kãensã fãa pʋgẽ, n zʋʋg b Naandã sẽn yaa Wẽnnaam a Zeova wã?

Makre: Yãmb sã n da aparɛy foto bɩ ordinatɛɛr paalle, a wʋʋgã pʋgẽ, sẽn maan-a teoogã ningda sebr n paase, tɩ y tõe n ges n bãng y sẽn segd n  maan to-to n tõog n tall teoogã n tʋm tɩ naf-yã. Biiblã yaa wa seb-kãngã. Wẽnnaam sẽn naan tõndã, a kõo tõnd Biiblã n paase, sẽn na yɩl tɩ d bãng d sẽn tog n vɩɩmd to-to tɩ naf-do. Biiblã sẽn wõnd te-paall sebrã wilgda Wẽnnaam sẽn naan tõndã võore, la a sẽn dat tɩ d vɩɩmd to-to tɩ tall barka.

Wa sebr sẽn be n wilgd d sẽn segd n maan to-to n zã bõn-paall tɩ ra sãamã, Biiblã me sõngda neb nins sẽn karemd-a wã tɩ b bãng yel-manesem kẽer sẽn tõe n sãam b vɩɩmã. Neb kẽer tõe n kõ-d-la sagls sẽn wõnd yaa sõma, tɩ ne wa b tũub yaa nana menga. La y pa tagsd tɩ yaa d sã n tũ d Naandã saglsã la a sor-wilgrã la na n naf-d n yɩɩda, la sõng-d tɩ d gill zu-loees sɩda?

A Zeova sagenda tõnd la a wilgd-d sore. La a pa modgd tõnd tɩ d tũ ye. A sẽn nong-d la a rat d neerã yĩnga, a pʋd n yet-d lame yaa: “Mam yaa Zu-soaba, yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tũ wã zugu. Yãmb sã n da sak mam tõodã, yãmb laafɩ wã ra na n yɩɩ wa kʋɩls koom, la yãmb tɩrlmã ra na n yɩɩ wa ko-kãsengã ko-wiisi.” (Ezai 48:17, 18) Rat n yeelame bal tɩ d sã n sak Wẽnnaam sor-wilgrã, d vɩɩmã na n talla barka. Dẽnd koɛɛg-koɛɛga, sẽn na yɩl tɩ d vɩɩmã yɩ sõma tɩ d paam sũ-noogo, Wẽnnaam sõngr yaa tɩlae.

Neb kẽer sẽn tẽed tɩ Wẽnnaam sõngr pa tɩlae ne-bã yaa b sẽn ne zu-loees wʋsg vɩɩmã pʋgẽ, n tagsdẽ tɩ Wẽnnaam sã n sɩd yaa nonglem soaba, pa tog n yɩ woto wã. Wala makre, b sokda b mens yaa: ‘Bõe yĩng tɩ nin-tɩrsã namsdẽ?’ ‘Bõe yĩng tɩ kamb kẽer dogd ne komslem?’ ‘Bõe yĩng meng tɩ vɩɩmã yaa woto?’ Yel-kãensã sɩd namsda neb wʋsgo. B sã n tõog n paam sogs-kãensã loeerã, na n sõng-b-la wʋsgo. Ra yɩ-y tao-tao n ning Wẽnnaam taal zu-loeesã yĩng ye. D bas tɩ Biiblã sẽn yaa a Gomdã wilg-d sɩdã. Bɩ d ges Biiblã sẽn yet bũmb ninga.

Sɩngr sebrã sak a tãabã gomda a Sʋɩtãan sẽn tũnug ne waaf n belg a Ãdem ne a Hawa tɩ b kɩɩs Wẽnnaam noore, n dɩ sõma ne wẽng bãngr tɩɩgã bil Wẽnnaam sẽn da yeel tɩ b ra rɩ wã. A Sʋɩtãan yeela a Hawa woto: “Yãmb ka na n ki ye. Tɩ bõe, Wẽnnaam miimi tɩ daar ninga yãmb sẽn na n yãk a biisã n dɩ, yãmb ninã na n pukame tɩ yãmb lebg wa Wẽnnaam n mi sõma ne wẽng n bake.”—Sɩngre 2:16, 17; 3:4, 5.

A Sʋɩtãan gomdã rat n yeelame tɩ Wẽnnaam yaa ziri yagda. La pa rẽ bal ye. Rat n yeelame me tɩ Wẽnnaam sẽn zãad a bõn-naandsã to-to wã pa zems ye. A sẽn yeelã leb n wilgdame tɩ yaa ninsaalbã sã n kelg yẽ a Sʋɩtãan la b vɩɩmã na n tall bark n yɩɩda. Wãn to la a Zeova na n welg yel-kãngã? A yãka yam n na n bas tɩ kaoose, sẽn na yɩl tɩ malɛgsã la ninsaalbã fãa wa bãng a Sʋɩtãan sẽn yeelã sã n yaa sɩd bɩ ziri. Wẽnnaam  sẽn maan woto wã, a kõo a Sʋɩtãan ne neb nins fãa sẽn tagsd wa yẽ wã weer tɩ b wilg ninsaalbã sã n tõe n ninga Wẽnnaam kɛɛnga, tɩ b vɩɩmã yɩ noogo.

Yãmb tagsdame t’a Sʋɩtãan sẽn yeelã yaa sɩd bɩ? Rẽ yĩnga ninsaalbã tõe n sooga b mense, n tõog tɩ b vɩɩmã yɩ sõma tɩ pa tũ ne Wẽnnaam sõngr bɩ? Hal yʋʋm wʋsg masã, vɩɩmã sẽn pid ne namsgo, wẽgbo, bãase, kũum, nen-kɛglem, zaba, nin-kʋʋr la tʋʋm-wẽns a taabã wilgda vẽeneg tɩ ninsaalbã sẽn ning Wẽnnaam kɛɛngã, b vɩɩmã yaa nimbãaneg la far bala. Biiblã pa yet tɩ yaa Wẽnnaam n kɩt tɩ d namsdẽ ye. A pʋd n wilgda yellã sẽn sɩd yitẽ. Biiblã yetame tɩ “ninsaal tõee a to n maand-a wẽnga.”—Koɛɛg Soaba 8:9.

Woto fãa pa wilgd tɩ sẽn na yɩl n paam d sogsg wʋsg leoore, la d paam d zu-loeesã tɩɩm, yaa tɩlae tɩ d bao Wẽnnaam sõngr sɩda? Bõe la Wẽnnaam na n maane?

Hal sẽn kaoose, nebã rata ne b sũy fãa n paam b mens ne bãasã, kʋʋlmã la kũumã. B maana b sẽn tõe fãa, n kẽes b sẽka, b pãng la b tarem, la pa tall yõod wʋsgo, bɩ pʋd n pa yãk neng meng ye. Neb kẽer tẽeme tɩ tɩ-koom bɩ koom buud n be tɩ b tõe n yũuda, wall zĩig n be tɩ b tõe n tɩ vɩɩmde, pa rẽ bɩ bũmb a taab n be b sẽn tõe n maan n da kʋʋl ye. B maka rẽ fãa la pa yãk neng ye.

Wẽnnaam datame tɩ ninsaalbã vɩɩm yɩ sõma, la b paam sũ-noogo. Yaa woto la a ra rat hal sɩngrẽ wã. La a raabã pa toeem ye. (Sɩngre 1:27, 28; Ezai 45:18) Wẽnnaam a Zeova wilgame t’a sã n pʋlem bũmbu, pa vaand ye. (Ezai 55:10, 11) Biiblã yetame t’a Zeova na n wa kɩtame tɩ ninsaalbã le paam vɩ-noog ning d yaab a Ãdem ne a Hawa sẽn kongã. Biiblã yaoolem sebrã pʋgẽ, b yeelame tɩ Wẽnnaam a Zeova “na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye, tɩ bõe, dẽenem bũmb fãa loogame.” (Wilgri 21:4) Wẽnnaam na n maana wãn tɩ vɩɩmã wa lebg woto? La bõe la d tog n maan n tõog n paam vɩ-kãnga.

A Zezi Kirist sẽn yaa Wẽnnaam biigã yeela a karen-biisã tɩ b pʋʋs tɩ Wẽnnaam daabã maane. Neb wʋsg mii pʋʋs-kãng sõma, tɩ kẽer meng pʋʋsg sasa bɩ yaa rẽ la b yet n yɩlemdẽ. Kẽer boond-a lame tɩ tõnd Ba sẽn be arzãna. Pʋʋsgã sɩngda woto: “Tõnd Ba sẽn be arzãna, tɩ yãmb yʋʋr yɩ ne waoogre, tɩ yãmb soolem wa, tɩ yãmb daab maan dũniyã zug wa sẽn maand arzãnã.” (Matɩe 6:9, 10) Wẽnnaam na n tũnuga ne a Soolmã bɩ a Rĩungã n wa kɩt tɩ zu-loees nins fãa ninsaalbã naam sẽn wa ne wã sa, la a wa ne dũni-paalg tɩrlem sẽn na n zĩnd a pʋgẽ, wa a sẽn da kãabã. * (Daniɛll 2:44; 2 Pɩɛɛr 3:13) Bõe la d  segd n maan n wa paam n vɩɩmd dũni-paalgã pʋgẽ?

A Zezi Kirist wilga d sẽn tog n maanega. A yeelame: “Vɩɩm sẽn ka sɛtã yaa woto, tɩ bãmb na bãng yãmb sẽn yaa sɩd Wẽnnaam sẽn ka to, la a Zezi Kirist yãmb sẽn tʋm a soabã.” (Zã 17:3) Ne Wẽnnaam sõngre, d sɩd tõe n wa paam n vɩɩmda dũni-paalgã pʋgẽ wakat sẽn kõn sa. Y sẽn bãng woto masã wã, rẽ yĩnga y pa kɩs sɩd tɩ Wẽnnaam sõngr yaa tɩlae ne-d sɩda?

Na maan yʋʋm tus a yiib la woto, tʋm-tʋmd a Poll sẽn wa n be Atɛn aeropaazẽ wã, a goma ne Atɛn nebã, n yeel-b yaa: “Bãmb [rat n yeel tɩ Wẽnnaam] sẽn kõt fãa vɩɩm la vʋʋsem la bũmb fãa wã . . . yaa bãmb pʋgẽ la tõnd tar vɩɩm la kẽnde la belem, a wa yãmb gʋlsdbã kẽer me sẽn yetã: ‘Tõnd me yaa bãmb yagense.’”—Tʋʋma 17:25, 28.

A Poll sẽn yeel Atɛn nebã bũmb ningã ket n yaa sɩda. D Naandã n kõt-d pemsmã d sẽn vʋʋsdã, rɩɩbã d sẽn dɩtã la koomã d sẽn yũudã. A Zeova sã n da pa kõt tõnd bõn-kãensã, d ra pa na n tõog n vɩɩmd ye. La bõe yĩng tɩ Wẽnnaam ket n kõt nebã fãa bõn-kãensã, baa neb nins sẽn ka tagsd yẽ yellã? A Poll yeelame tɩ yaa sẽn na yɩl “tɩ bãmb tõe n bao Wẽnnaam, n babl ne b pãng tɛk n yã bãmba, tɩ bõe, bãmb ka zãr ne tõnd fãa ye.”—Tʋʋma 17:27.

Yãmb dat n bãnga Wẽnnaam raabã, la a sẽn dat tɩ d maan n tõog n paam vɩɩm sẽn tar bark masã menga, la wakat sẽn kõn sa bɩ? Sã n yaa rẽ bɩ y yã ned ning sẽn kõ-a yãmb seb-kãngã wã, pa rẽ bɩ y gʋls sebrã yiisdbã. B na n sak n sõng-y lame.