Y sakd n mongda y meng bũmb kẽer rĩungã yĩng bɩ?

“Wẽnnaam nonga ned ning sẽn kõt ne sũ-noogo.”—2 KOR. 9:7.

TAGS-Y VƐRSE KÃENSÃ ZUG NEERE

Wãn to la vɛrse kãensã tõe n sõng yãmb tɩ y bãng y sã n sɩd maanda y sẽn tõe fãa n teend Rĩungã?

1 Kibay 29:⁠9

1 Korẽnt dãmb 16:1, 2

2 Korẽnt dãmb 8:12

1. Bõe la neb wʋsg sak n mong b mense, la bõe yĩnga?

NEBÃ sakd n mongda b mens bũmb kẽer sẽn na yɩl n paam bũmb sẽn tar yõod wʋsg ne-ba. Wala makre, roagdbã modgda wʋsg sẽn na yɩl n paam sẽk n ges b kambã yelle. B yiisda ligd la b maand bũmb a taab b kambã neer yĩnga. Kom-bɩɩs nins sẽn dat n wa tão ball b tẽngã yʋʋr yĩngã modgda wʋsg n zãmsd tãoobo, baa b taabã sẽn maand b sẽn dat tɩ yaa yõ-noogrã bal n pak-bã. A Zezi me monga a meng bũmb kẽere, n bao bũmb sẽn tar yõod wʋsg ne-a. A ra tõe n baoa laogo, n vɩɩmd naar vɩɩm bɩ n kẽ kãadem n dog kamba. La a pa maan woto ye. Bala a ra rat n teela Wẽnnaam Rĩungã ne a sũur fãa. (Mat. 4:17; Luk 9:58) A karen-biisã me monga b mens bũmb wʋsg Wẽnnaam Rĩungã yĩnga. Bala Rĩungã ra tara yõod ne-b n yɩɩda. (Mat. 4:18-22; 19:27) Bɩ d ned kam fãa sok a meng woto: ‘Bõe n tar yõod ne maam n yɩɩda?’

2. a) Bõe la kiris-neb hakɩkã segd n maan tɩlae? b) Bõe me la kẽer maanda?

² Kiris-ned sã n dat n tall zood sõma ne a Zeova, a segd n pʋʋsdame, n karemd Biiblã, n maand zak pʋgẽ Biibl zãmsgã, n kẽnd tigissã la a moond koɛɛgã. Woto fãa baooda modgr la sẽka, t’a segd n mong a meng bũmb kẽer rẽ yĩnga. * (Zoz. 1:8; Mat. 28:19, 20; Heb. 10:24, 25) Tõnd modgrã n paas a Zeova barkã kɩtame tɩ koe-moonegã paamd pãnga, tɩ neb wʋsg wat n naagd tõnd n waoogd a Zeova. (Ezai 2:2) Sẽn na yɩl n sõng ne Rĩungã tʋʋma, wʋsg sak n basa bũmb kẽer n tɩ tʋmd  Betɛll-dãmbẽ, tɩ sãnda sõngd n met Rĩung rot la tigis-kãsems roto. Kẽer me segenda tigis-kãsemse, tɩ sãnda me sõngd neb sabab-wẽns sẽn paame. Yaa sɩd tɩ woto fãa pa tɩlae sẽn na yɩl n wa paam vɩɩm sẽn kõn sa wã ye. La sõngdame tɩ Rĩungã tʋʋm kẽngd taoore.

3. a) D sã n mongd d mens bũmb kẽer Rĩungã yĩnga, wãn to la nafd tõndo? b) Sogs-bʋs la d segd n sok d mense?

³ Yaa rũndã la d segd n modg n teel Rĩungã n yɩɩda. D sẽn ne neb wʋsg sẽn sakd n mongd b mens bũmb kẽer a Zeova raabã yĩngã noom-d lame. (Karm-y Yɩɩl Sõamyã 54:8.) Tõnd me sã n maan woto, d na n paama sũ-noog wʋsgo, n gũud Wẽnnaam Rĩungã waoongo. (Tõo. 16:15; Tʋʋ. 20:35) Yɩta sõma tɩ d ned kam fãa sok a meng woto: Bõe la m tõe n maan n tʋm Rĩungã tʋʋm n paase? M baooda sẽk n teend Rĩungã, n teend-a ne m ligdi, m pãng la m minim me bɩ? La d sã n teend Rĩungã ne d sũur fãa, bõe la d pa segd n yĩmi? Bɩ d gom neb sẽn da kõt maand ne yamleoog yelle, tɩ na n sõng-d lame tɩ d bãng d sẽn tõe n teel Rĩungã to-to n paam sũ-noogo.

MAAND NINS ISRAYƐLL NEBÃ SẼN DA MAANDÃ

4. Bõe yĩng tɩ Israyɛll nebã ra maand maando?

⁴ Sẽn na yɩl tɩ Wẽnnaam kõ Israyɛll ned yel-wẽn sugri, a soabã ra segd n maana maoongo. A ra tõe n maana maoong me n paam Wẽnnaam lohorem. Maand kẽer ra yaa tɩlae, tɩ sãnda yaa ne yamleoogo. (Maan. 23:37, 38) Maand nins sẽn yõogd bugmã ra yaa kũun Israyɛll ned sẽn da tõe n kõ a Zeova ne yamleoogo. Kibar a ye sẽn wilg neb sẽn kõ a Zeova maand ne yamleoog yɩ a Salomo wẽnd-doogã pakr sasa.—2 Kib. 7:4-6.

5. Bõe la a Zeova maan tɩ naong rãmbã ra tõe n kõ maoongo?

⁵ A Zeova ra miime tɩ nebã fãa pa tõe n kõ tɩ zeng taab ye. Rẽ n so t’a yeel Israyɛll nebã tɩ ned kam fãa tõe n kõo sẽn zems a tarem. Tõogã ra wilgame tɩ b segd n kʋʋ rũms n kõ maoongo, la tɩ b segd n daaga b zɩɩmã. Woto ra makda ‘bõn-neeb’ nins a Zeova sẽn da na n wa tũnug ne a Zezi n maanã. (Heb. 10:1-4) La a Zeova pa gãd tõogã dem-dem ye. Ned sã n da pa tar pe-raoog wall boɛɛga, a ra sakdame t’a  soabã wa ne manewala. Dẽnd naong rãmbã me ra tõe n kõo maoong n paam sũ-noogo. (Maan. 1:3, 10, 14; 5:7) Baa a Zeova sẽn da sak tɩ b tõe n wa ne bũmb toor-toorã, ned sã n da rat n kõ maand ne yamleoogo, bũmb a yiib n da yaa tɩlae.

6. Ned sã n da rat n kõ maando, bũmb a yiib n da yaa tɩlae. Bõn-kãens la bʋse, la bõe yĩng tɩ rẽ tar yõod wʋsgo?

⁶ Pipi, sẽn dat n kõ-a maoongã segd n kõo sẽn yaa sõma zãnga. A Zeova wilga Israyɛll nebã tɩ b sã n dat t’a reeg b maando, b pa segd n kõ rũng sẽn yaa bãad wall sẽn tar zang ye. (Maan. 22:18-20) Yiibu, sẽn kõt-a maoongã segd n yɩɩ yɩlemd wa tõogã sẽn wilgã. Sã n pa woto, a segd n deng n maana kongr maoong wall maoong a beegrã yĩnga, n lebs n paam a Zeova lohorem. Rẽ poor bal la a tõe n kõ a kũunã. (Maan. 5:5, 6, 15) Woto pa reem yell ye. Bala a Zeova wilgame tɩ ned sẽn pa yɩlemd sã n naag n dɩ laafɩ maoongo, b segd n yiisa a soabã buudã sʋka, rat n yeel tɩ b segd n kʋ-a lame. Maoong b sẽn kõ ne yamleoog me yaa laafɩ maoongo. (Maan. 7:20, 21) La maoongã soab sã n yaa yɩlemde, t’a kũunã me yaa sõma zãnga, a na n tõog n kõ a kũunã ne sũ-noogo.—Karm-y 1 Kibay 29:9.

MAAND NINS TÕND SẼN MAAND RŨNDÃ-RŨNDÃ

7, 8. a) Bõe la sẽn modgd-b wʋsg a Zeova tʋʋmdã pʋgẽ wã paamda? b) Bõe la d tar n tõe n tũnug ne n waoog a Zeova?

⁷ Rũndã-rũndã, neb wʋsg sak n modgda wʋsg a Zeova tʋʋmdã pʋgẽ. B sẽn maand woto wã nooma a Zeova. D sã n tʋmd n sõngd d saam-biisã me, kõt-d-la sũ-noogo. Saam-biig a ye sẽn sõngd n met Rĩung rot la sẽn sõngd neb nins sabab-wẽns sẽn paamã yeelame t’a pa tõe n bilg sũ-noog ning tʋʋmdã sẽn kõt-a wã ye. A yeelame tɩ bãmb sã n mi n me Rĩung roog n sa, wall b sã n tɩ sõng sabab-wẽnsã sẽn paam-b rãmbã n ne saam-biisã sũy sẽn noom to-to wã, n paas b sẽn wilgd b mi-beoogã, kɩtame tɩ yẽ neẽ tɩ bãmb tʋʋmdã la b modgrã tara yõod wʋsgo.

⁸ A Zeova siglgã babg ning sẽn be tẽng zugã sɩng n maanda a sẽn tõe tɛk n teend a Zeova tʋʋmdã. Yʋʋmd 1904, saam-biig a Charles Russell yeelame tɩ tõnd ned kam fãa tara a sẽka, a pãnga,  a ligd la bũmb a taaba, la tɩ d segd n modgame n tũnug ne rẽ n waoog a Zeova. Yaa sɩd tɩ yɩl n tʋm a Zeova tʋʋmdã ne d sũur fãa baooda modgre, la wata ne bark wʋsgo. (2 Sãm. 24:21-24) Woto wã, wãn to la d tõe n tũnug ne bũmb nins d sẽn tarã n waoog a Zeova?

9. Wãn to la a Zezi saglg ning sẽn be Luk 10:2-4 tõe n sõng-d tɩ d ra sãam d sẽkã?

⁹ D sẽkã: Tõnd sɛbã lebgr la b yiisgu, Rĩungã rot la tigis-kãsemsã rot meebo, tigis-kãsemsã seglgo, sabab-wẽns sẽn paam-b rãmbã sõngr la tʋʋm a taab baooda sẽk la modgre. Beoog sẽn vẽeg fãa, d pa tar sẽk wʋsg ye. La a Zezi kõo saglg sẽn tõe n sõng tõnd tɩ d ra sãam d sẽkã ye. A sẽn wa n na n tʋm a karen-biisã tɩ b tɩ moonã, a yeel-b lame tɩ b ‘ra pʋʋs ned sorã zug ye.’ (Luk 10:2-4) Bõe yĩng t’a yeel woto? Wakat kãng nebã sã n da seg taaba, b pa pʋʋsd taab yĩngr-yĩngr wall yõk taab nus bal ye. B ra mobgda taab naoor wʋsgo, hal n mi n wõgemd tẽnga. Woto fãa ra rɩkda sẽk wʋsgo. A Zezi gomdã pa rat n yeel t’a karen-biisã pa segd n waoog nebã ye. A ra ratame tɩ b bãng tɩ b sẽkã sẽn pa waoogã, yaa tɩlae tɩ b maan b sẽn tõe fãa n maan bũmb ning sẽn tar yõod n yɩɩdã. (Ef. 5:16) Tõnd me segd n maana d sẽn tõe tɛka, n paam sẽk n tʋm Rĩungã tʋʋm ne d sũur fãa.

10, 11. a) Bõe la b maand ne tõnd yamleoog kũunã? b) Sagl-bʋg n be 1 Korẽnt dãmb 16:1, 2 n tõe n sõng tõndo?

¹⁰ D ligdã: Sẽn na yɩl tɩ koɛɛgã moon dũniyã gill zugu, yaa tɩlae tɩ siglgã yiis ligd wʋsgo. Yʋʋmd fãa, a yiisda milyaar-dãmb n sõngd tigims sul la distrik yel-gɛtbã, zall so-pakdbã ne misioneer-dãmbã tɩ b tʋmd b tʋʋmã. Yʋʋmd 1999 wã tɛka, yaa Rĩung rot tus pisi la a naas la kobs-nu la zak la b me tẽns nins sẽn ka tar laog wʋsgã pʋgẽ. Baasgo, na maan Rĩung rot tus a yoob la kobs-naas la b ket n data. Kiuug fãa, b yiisda Gũusg Gasgã la Réveillez-vous ! wã na maan bãmb milyõ koabga. Yaa yãmb yamleoog kũunã n sõngd tɩ b maand woto fãa.

¹¹ Tʋm-tʋmd a Poll kõo saglg d sẽn tõe n tũ n kõ yamleoog kũuni. (Karm-y 1 Korẽnt dãmb 16:1, 2.) Wẽnnaam vẽneg-a lame t’a sagl Korẽnt kiris-nebã tɩ wall tɩ b bas semennã saab n yaool n kõ kũunã, semen sɩngr fãa, b ned kam fãa tõe n yãka ligd sẽn zems a paoong n bĩngi. B wakatẽ wã tɩ semen ra sɩngda dimaas. Rũndã-rũndã me, saam-biis la saam-bi-pogs n mi n zĩnd n mag n ges b sẽn tõe n kõ tɛka. (Luk 21:1-4; Tʋʋ. 4:32-35) B sẽn yaa kõatbã kɩtame t’a Zeova sũur noom ne-ba.

12, 13. Bõe n kɩt tɩ kẽer tagsdẽ tɩ b pa tõe n tʋm Rĩungã tʋʋma, la wãn to la a Zeova na n sõng-ba?

¹² D pãngã ne d minimã. D sã n teend Rĩungã ne d pãngã la d minimã, a Zeova sõngd-d lame. A pʋlmame tɩ d sã n wa yɛ, a na n kõ-d-la pãnga. (Ezai 40:29-31) Yãmb tagsdame tɩ y bãngrã pa sek y na sõng n tʋm Rĩungã tʋʋm bɩ? Y tagsdame tɩ sã n yaa neb a taabã n na n tʋme, na n yɩɩ sõma n yɩɩd bɩ? Sã n yaa woto, bɩ y tẽeg t’a Zeova tõe n paasa tõnd ned kam fãa bãngr wa a sẽn maan to-to ne a Betsalɛll la a Oholiaabã.—Yik. 31:1-6; ges-y sõsgã sɩngrẽ fotã.

¹³ A Zeova sagend-d lame tɩ d ra bas tɩ bũmb tiis-d tɩ d pa maan a raabã ne d pãngã fãa ye. (Yel. 3:27) Zʋɩf-rãmbã sẽn wa n lebs n met wẽnd-doogã, a Zeova yeel-b lame tɩ b tags n ges b sã n sɩd teenda tʋʋmdã wa sẽn segdã. (Aze 1:2-5) B ra basame n pʋgd yɛl a taaba, n pa lʋɩɩsd a Zeova tʋʋmdã taoor ye. D ned kam fãa segd  n soka a meng woto: Yaa a Zeova raabã maaneg n tar yõod ne maam n yɩɩd bɩ? Mam ‘tagsa neer n ges m sẽn na n maan to-to’ n maneg n teel Rĩungã tʋʋmd rũndã-rũndã sẽn yaa yaoolem wakatã bɩ?

D KÕ WẼNNAAM TƖ ZEMS D SẼN TARE

14, 15. a) Mak-sõng bʋg la saam-biis nins nus sẽn pa zãadã kõt tõndo? b) Bõe la d fãa rat n maane?

¹⁴ Neb wʋsg n vɩ tẽns vɩɩmã sẽn yaa toog pʋgẽ, tɩ yaa naongo. A Zeova siglgã modgdame n sõngd saam-biis nins sẽn vɩ tẽns a woto pʋsẽ wã. (2 Kor. 8:14) La baa saam-biis nins nus sẽn pa zãadã kõta b sẽn tar ne sũ-noogo. A Zeova sẽn ne nin-kãensã sẽn kõt ne yamleoogã, noom-a lame.—2 Kor. 9:7.

¹⁵ Tẽng a ye n be Afirik t’a nebã yaa naong rãmba. La saam-biis nins sẽn be be wã kẽer yãka b pʋtã babgo, tɩ b sã n kẽeb bũmb nins b sẽn bʋt be wã bɩ b koos n kõ ligdã Rĩungã teelg yĩnga. Tẽn-kãng pʋgẽ, b wa n dat n mee Rĩung roogo, tɩ saam-biisã la saam-bi-pogsã rat n sõnge. Yaool n da yaa bʋdb wakate. La b sẽn da rat n sõng ne b sũur fãa wã, b tʋgd n sõnga yibeoog n me, tɩ zaabr bɩ b kẽng b pʋtẽ wã. Ad woto sɩd seka pẽgre! B manesmã tẽegda tõnd pĩnd wẽndẽ Masedoan kiris-nebã manesem. Masedoan kiris-nebã ra yaa naong rãmba. Baasgo, b kosa a Poll ne b sũy fãa t’a reeg b kũunã n tɩ sõng b tẽed-n-taasã. (2 Kor. 8:1-4) Bɩ tõnd ned kam fãa kõ ‘wa sẽn zems bark ning Zu-soab a Wẽnnaam sẽn kõ yẽ wã.’—Karm-y Tõod 16:17.

16. Sẽn na yɩl tɩ bũmb nins d sẽn maand Rĩungã yĩngã ta Wẽnnaam yam, d segd n gũusa ne bõe?

¹⁶ La d segd n maana gũusgu. Israyɛll nebã sã n da na n kõ kũuni, kũunã segd n ta a Zeova yam. Tõnd me segd n gũusame tɩ d sẽn maand bũmb nins Rĩungã yĩngã ta a Zeova yam. Rẽ baooda bõe maanego? D segd n gũusame tɩ d sẽn maandã ra kɩt tɩ d bas bũmb sẽn tar yõod wʋsg ye. Wala makre, rẽ pa segd n kɩt tɩ d pa get d zakã rãmb yell sõma, wall d pa le tũud a Zeova sõma ye. D tõe n sõngd n meta Rĩung roto, n sõngd neb sabab-wẽns sẽn paame, la d tʋmd tʋʋm a taaba. La rẽ sã n kɩt tɩ d pa get d zakã rãmb yell wall d pa sõngd-b sẽn na yɩl tɩ b tẽebã tall pãnga, yaa wa d sẽn kõt bũmb d sẽn ka tare. Rẽ na n kɩtame tɩ d sẽn maandã pa ‘ta Wẽnnaam yam’ ye. (Karm-y 2 Korẽnt dãmb 8:12.) Sẽn paase, d segd n modgame tɩ tõnd ne a Zeova zoodã kell n tall pãnga, tɩ d sẽn maandã ra wa yɩ zaalem ye. (1 Kor. 9:26, 27) D tõe n kɩsa sɩd tɩ d sã n tũud Biiblã noyã, bũmb nins d sẽn maand Rĩungã yĩngã na n kõ-d-la sũ-noogo, la ‘ta Wẽnnaam yam.’

D SẼN MAAND BŨMB NINSÃ TARA YÕOD WƲSGO

17, 18. a) D tagsg yaa wãn ne sẽn modgd-b wʋsg n teend Rĩungã? b) Bõe la tõnd ned kam fãa segd n maane?

¹⁷ D saam-biis la d saam-bi-pogs wʋsg modgdame n baood sẽk la ligd n teend Rĩungã, la b tʋmd Rĩungã tʋʋm ne b pãng fãa. (1 Tes. 2:8) D sũur nooma ne nin-kãensã sẽn maand woto wã. Saam-biis nins sẽn lʋɩt Rĩungã tʋʋm taoorã pagbã la b kambã me zemsa ne pẽgre, bala, b teend-b lame.

¹⁸ Sẽn na yɩl tɩ Rĩungã tʋʋm ket n kẽngd taoore, yaa tɩlae tɩ d tʋm wʋsgo. Bɩ d ned kam fãa tags neer n ges a sẽn tõe n maneg n teel Rĩungã to-to, la a pʋʋs a Zeova n kos sõngre. D sã n maan woto, d na n paama bark wʋsg masã, la sẽn yɩɩd fãa, dũni ning sẽn watã pʋgẽ.—Mark 10:28-30.

[Tẽngr note]

[Zãmsgã sogsgã]

[Foto seb-neng 13]

[Foto seb-neng 14]

Maand nins b sẽn da kõtã wʋsg yaa ne yamleoogo, wa tõnd me sẽn kõt yamleoog kũunã (Ges-y sull a 7-13)

[Foto seb-neng 14]

Saam-biis sẽn be Rĩung roogẽ Kenya

[Foto seb-neng 15]

Sẽn sõngd-b ne meebã nin-yend sẽn be Etazĩni

[Foto seb-neng 15]

Ostrali Betɛllã tʋm-tʋmdba