1, 2. a) Bõe n tõe n kɩt tɩ bũmb be d taoor tɩ d bas n gẽesdẽ? b) Bõe la d mi Wẽnnaam Rĩungã wɛɛngẽ?

TÕE tɩ y gũus n gesame tɩ naoor wʋsgo, bũmb sã n maane, neb nins sẽn zĩnd be wã sẽn tẽr yɛl ninsã yaa toor-toore. Logtor me tõe n wilga nina a bãaga, tɩ rẽ poor bɩ a pa le tẽr logtorã goam sõma ye. Wall nina kʋɩlen-biis pa rẽ bɩ a linet-rãmb tõe n diga a taoore, t’a bas n gẽesdẽ. Bõe yĩng tɩ mi n yaa woto? Bãngdbã wilgame t’a buud wae n paamda ned sẽn maand bũmb wʋsg wakat yɛng pʋgẽ. Ninsaal yamã pa tõe n be bũmb wʋsg zug wakat yɛng ye.

² Rũndã-rũndã, neb wʋsg nee bũmb nins sẽn maand dũniyã zugã, n yaool n pa wʋmd rẽ võor ye. Tõe tɩ b sak n deegame tɩ dũniyã yɛl toeema wʋsg yʋʋmd 1914 tɛka, la b pa mi rẽ sẽn dat n yɛɛlg ye. La tõnd sẽn zãmsd Biiblã, d miime tɩ Wẽnnaam Rĩungã waa yʋʋmd 1914, wakat ning a Zezi sẽn sɩng naam dɩɩb saasẽ wã. La d miime me tɩ d sẽn pʋʋsd tɩ Wẽnnaam Rĩungã wa, t’a raab maan tẽngã zug wa sẽn maand saasẽ wã nan pa pids zãng ye. (Mat. 6:10) Pʋʋs-kãng na n pidsa dũni-kãngã sãoong wakate. Yaa rẽ poor  bal la Wẽnnaam daabã na n maan tẽngã zug wa sẽn maand saasẽ wã.

3. Tõnd sẽn zãmsd Biiblã kɩtame tɩ d mi bõe?

³ D sẽn zãmsd Biiblã wakat fãa wã, d neeme tɩ bãngr-goam n pidsd rũndã-rũndã. Woto kɩtame tɩ d yaa toor fasɩ ne dũniyã nebã. Yaa bãmb mensã vɩɩmã yell bal n pak-ba, hal tɩ b pa ne bũmb nins sẽn wilgd vẽeneg tɩ Kiristã sɩnga naam dɩɩb yʋʋmd 1914, la tɩ ka la bilfu, a na n sãama dũni-kãnga wã ye. Y sã n sɩng n tũuda Wẽnnaam hal sẽn kaoose, bɩ y sok-y y meng woto: ‘Mam kɩsa sɩd tɩ dũni-kãngã saabã ta n saame, la tɩ yɛlã sẽn yaa to-to tẽngã zugã wilgda rẽ bɩ?’ La y sẽn sɩng a Zeova tũubã sã n nan pa kaoose, bõe n pak yãmb n yɩɩda? Bɩ d gom bũmb a tãab yelle. Bõn-kãens kɩtame tɩ d miẽ tɩ ka la bilfu, Wẽnnaam daabã na n maana tẽngã zugu.

4, 5. a) Bõe la a Zezi maand yʋʋmd 1914 tɛka? (Ges-y sõsgã sɩngrẽ fotã.) b) Wed-rʋʋdb a tãabã makda bõe, la wãn to la rẽ pidsda?

⁴ Yʋʋmd 1914, a Zezi reega naam saasẽ, n lebg Wẽnnaam Rĩungã Rĩm. Wilgr sak a 6 bilga a Zezi wa wed-rʋʋd sẽn zao wed-mo-pɛɛlga. A naamã reegr poor bala, a kẽngame n na n tɩ zab ne a Sʋɩtãan dũniyã. (Karm-y Wilgr 6:1, 2.) Bãngr-gomdã wilgame tɩ Wẽnnaam Rĩungã naam sɩngr poore, vɩɩmã na n lebga toog wʋsg tẽngã zugu. A goma zaba, kom, bãas la sabab-wẽns a taab yelle. Bãngr-gomdã maka bõn-kãens ne wed-rʋʋdb a tã sẽn zoet n pʋgd a Zezi Kirist.—Wil. 6:3-8.

⁵ Baa tẽns wʋsg sẽn da pʋlem tɩ b na n naaga taab n bao laafɩ wã, bãngr-gomdã sẽn yeel bũmb ningã pidsame. Dũni gill pipi zabrã wa n ‘yiisa dũniyã laafɩ.’ Zab-kãng toor sẽn ka be, zab-kãsems a taab n kɩt tɩ hal sẽn tãag rũndã, laafɩ kae tẽngã zug ye. Yʋʋmd 1914 tɛka, tẽns wʋsg n yidg laogã wɛɛngẽ tɩ b bãngrã me paase. Baasgo, rɩɩbã kaalem ket n yaa zu-loɛɛga, n mi n wat ne zab dũniyã zugu. Sẽn paase, bãasã, sabab-wẽnsã la yɛl a taab kʋʋda neb milyõ-rãmb yʋʋmd fãa. Rũndã-rũndã, yel-kãensã wẽnemã la b sõorã paasame, tɩ b sẽn kʋʋd neb ninsã me sõor yaa wʋsg n yɩɩd pĩndã. Yãmb wʋmda bõn-kãensã võor bɩ?

6. Ãnd dãmb n bãng Biiblã bãngr-gomdã pidsg sẽn yɩ to-to wã, la rẽ kɩtame tɩ b maan bõe?

⁶ Dũni gill pipi zabrã ne girip ɛspayõllã kɩtame tɩ neb wʋsg yam yuusi. La kiris-neb nins sẽn paam vʋʋsem sõng zaeebã ra sɩng n gũuda yʋʋmd 1914, n miẽ tɩ yaa yʋʋm-kãng la “bu-zẽmsã wakat” sata. (Luk 21:24) B ra pa mi bũmb nins sẽn na n maan yʋʋm-kãngã sõma ye. La b ra miime tɩ yʋʋmd 1914, bõn-kãseng n na n maan Wẽnnaam naamã rɩɩb wɛɛngẽ. B sẽn bãng Biiblã bãngr-gomdã sẽn pids to-to wã bala, b moona ne yẽesem n wilg tɩ Wẽnnaam Rĩungã naam sɩngame. B sẽn moon Rĩungã koe-noogã kɩtame tɩ b bɛɛbã nams-b wʋsgo. Rẽ me yaa Biiblã bãngr-gomd pidsgu. Yʋʋm wʋsg pʋgẽ, Wẽnnaam Rĩungã bɛɛb yiisa noy n gɩdg koe-moonegã. B pãba koe-moondb kẽere, la b yõg sãnda n page. B tol n luula kẽer la b wẽ sãnda ne bʋg-raad n kʋ, la b fiuus kẽer zutu.—Yɩɩl 94:20; Wil. 12:15.

7. Bõe yĩng tɩ nebã fãa la bal pa wʋmd bũmb nins sẽn maand rũndã-rũndã wã võore?

⁷ Sẽn mik tɩ bũmb wʋsg n wilgd  vẽeneg tɩ Wẽnnaam Rĩungã zoe n dɩta naam saasẽ wã, bõe yĩng masã tɩ nebã fãa la bal pa rat n sak n deeg rẽ? Bõe yĩng tɩ b pa mi tɩ yɛlã sẽn yaa to-to dũniyã zugã pidsda Biiblã bãngr-goama, wa Wẽnnaam nin-buiidã sẽn sɩng n moon hal daar zãra? Yaa tɩ b pa baood n bãng bũmb nins b sẽn ne wã võor ye. (2 Kor. 5:7) Yaa bãmb mensã vɩɩm bal n pak-ba, tɩ b pa ne bũmb nins Wẽnnaam sẽn maandã ye. (Mat. 24:37-39) Kẽer basame t’a Sʋɩtãan sɩlmã lud b yamã. (2 Kor. 4:4) Sẽn na yɩl n bãng Wẽnnaam Rĩungã sẽn maand bũmb ninsã, d segd n talla tẽebo, la d ra get bũmb nins d sẽn ne wã bal ye. D sẽn paam n wʋmd bũmb nins sẽn maand rũndã-rũndã wã võorã pa noom-d sɩda?

8-10. a) Wãn to la 2 Tɩmote 3:1-5 bãngr-gomdã pidsda? b) Bõe yĩng tɩ d tõe n yeel tɩ wẽnemã tara paasg n dabda?

⁸ Bũmb a to n kɩt tɩ d miẽ tɩ ka la bilfu, Wẽnnaam Rĩungã na n dɩɩ naam tẽngã zugu. Yaa wẽnemã sẽn tar paasg n dabdã. Na maan yʋʋm koabg rũndã, 2 Tɩmote 3:1-5 bãngr-gomdã pidsdame. Dũniyã gill zugu, d nee manesem nins b sẽn bilg vɛrse kãensã pʋsẽ wã. Yãmb pa ne tɩ nebã manesem lebgda wẽng n paasdẽ sɩda? Ad makr a wãn sẽn wilgd rẽ.—Karm-y 2 Tɩmote 3:1, 13.

⁹ Yʋʋmd 1940 wall yʋʋmd 1950 sẽnese, bũmb wʋsg la nebã ra get tɩ pa sakd ye. La rũndã-rũndã, bõn-kãens wae tʋʋmã zĩisẽ, filim-dãmbã pʋsẽ, ɛspoorã la futã yeelgr wɛɛngẽ. Nen-kɛglmã la tʋʋm-dẽgdã bee zĩig fãa. Neb wʋsg tʋmda nen-kɛglem tʋʋma, n yood la b tʋmd tʋʋm-wẽns a taab n baood yʋʋre. Yʋʋmd 1950 sẽnese, televiziõ wã filim-dãmb kẽer la wʋsg ra yet tɩ pa sõma ye. La rũndã-rũndã, sãnda nong n geta rẽ ne b pagb la b kamba. Sẽn paase, filim-dãmb wʋsg wilgda rap sẽn kẽed ne rapa, la pagb sẽn kẽed ne pagba. Nin-kãensã tara fu-yerdɩ la yɛl a taab sẽn na yɩl tɩ nebã  bãng-b n welge, la b tẽ tɩ b sẽn vɩ to-to wã pa wẽng ye. D sẽn paam n mi Wẽnnaam noyã pa noom-d sɩda?—Karm-y Ziid 14, 15.

¹⁰ Kambã manesem me lebga wẽng wʋsgo. Yʋʋmd 1950 sẽnese, roagdbã sã n da ne b kambã sẽn yũud sɩgaar wall b yũud rãam pa rẽ bɩ b saood sao-yoodo, b sũy sãamdame. La rũndã-rũndã, d mi n wʋmda kibay wẽnem sẽn yɩɩd rẽ. Wala makre, yʋʋm 15 biig n kẽ lekoll pʋgẽ n wẽ a karen-bi-taas a 2 ne bug-raoog n kʋ la a pogl bãmb 13. Kom-bɩɩs sẽn yũ rãam n kʋ yʋʋm a 9 bi-pugla, la b pãb a ba wã ne bi-ribl sẽn be b zakẽ wã. Aazi tẽng a ye pʋgẽ, b sõdame n mik tɩ yʋʋm piig pʋgẽ, bi-be-tʋʋmã pʋɩ-sʋk yaa kom-bɩɩs n tʋme. Rẽ yĩnga ned tõe n kɩɩsame tɩ wẽnemã pa tar paasg n dabd sɩda?

11. Bõe yĩng tɩ neb kẽer pa mi tɩ wẽnemã tara paasg n dabda?

¹¹ Tʋm-tʋmd a Pɩɛɛr yeela woto: “Bɩ y bãng tɩ yaoolem wakate, neb sẽn laad nebã, la neb sẽn sakd bãmb mens wẽng ratmã na n zĩndame. La bãmb na n yeelame: ‘Bãmb waoong kãabgã bee yɛ? Tɩ bõe, hal tõnd yaab-rãmbã sẽn ki tɩ ta masã, bũmb fãa ket n yaa wa dũniyã naaneg wakate.’” (2 Pɩɛ. 3:3, 4) Bõe yĩng tɩ neb kẽer manesem yaa woto? Yaa tɩ nebã sã n wae n yãt bũmbu, b wat n minim-a lame. D zoa manesem sã n tiig n toeem n lebg wẽnga, tõe n sãama d sũur wʋsgo. La neb wʋsg manesem sã n toeem bilf-bilfu, d tõeeme n pa bãng meng ye. Yaa sɩd tɩ toeeng a woto tõeeme n pa sãam d sũuri, la a wata ne yɛl sẽn yaa wẽns wʋsgo.

12, 13. a) Bõe yĩng tɩ yɛlã sẽn yaa to-to dũniyã zugã pa segd n koms d raoodo? b) Wãn to la a Poll goamã tõe n sõng-d tɩ d tõog toogo?

¹² Tʋm-tʋmd a Poll me wilgame tɩ ‘yaoolem wakatã,’ vɩɩmã na n yɩɩ toog wʋsgo. (2 Tɩm. 3:1) La pa rat n yeel tɩ yɛlã na n looga d nug ye. Ne a Zeova sõngre, a vʋʋsem sõngã la tigingã maasem, d na n tõog n maoa ne zu-loɛɛg buud fãa, n kell n tall tẽebo. A Zeova na n kõ-d-la pãn-kãsenga, tɩ d ra koms raood ye.—2 Kor. 4:7-10.

¹³ A Poll bãngr-gomdã sɩngrẽ, a yeelame tɩ ‘bɩ f bãnge.’ Gom-kãensã wilgdame tɩ bãngr-gomdã sɩd na n pidsame. Woto wilgda vẽeneg tɩ dũniyã na n lebgda wẽng n paasdẽ, hal t’a Zeova wa sãam-a. Kʋdemdã yɛl-mitb wilgame tɩ wakat fãa, tʋʋm-wẽnsã sã n wa lebg wʋsg tẽng pʋgẽ, tẽn-kãng pãngã boogdame, t’a wa baas n lʋɩ. La hal pĩnd n tãag masã, dũniyã gill zugu, wẽnemã ra na zɩ n ta woto ye. Baa neb wʋsg sẽn pa sak n deeg tɩ d vɩɩ yaoolem wakatã, bũmb nins sẽn maand yʋʋmd 1914 tɛkã wilgda tõnd vẽeneg tɩ ka la bilfu, Wẽnnaam Rĩungã na n sãama dũni-kãnga.

14-16. Bõe me n kɩt tɩ d kɩs sɩd tɩ Wẽnnaam Rĩungã na n waa ka la bilfu?

¹⁴ Bũmb sẽn maand a Zeova nin-buiidã sʋk me n kɩt tɩ d kɩs sɩd tɩ saabã ta n saame. Nand tɩ Wẽnnaam Rĩungã sɩng naam dɩɩb saasẽ, neb sẽn paam vʋʋsem sõngã zaeeb n da tũud Wẽnnaam tẽngã zugu. Yʋʋmd 1914, bãngr-gomdã sẽn pids to-to wã pa yɩ wa nin-kãens sẽn da tẽedã ye. La bõe la b maan-yã? Baa b bɛɛbã sẽn nams-b wʋsgã, b fãa la bal kell  n saka a Zeova. Nin-kãens sẽn paam vʋʋsem sõng zaeebã wʋsg sak-a lame n tãag b kũum.

¹⁵ A Zezi sẽn wa n togsd yaoolem wakatã sẽn na n yɩ to-to wã, a yeela woto: “Zãmaan-kãngã kõn loog ye, hal tɩ bõn-kãens fãa paam pidsgu.” (Karm-y Matɩe 24:33-35.) D miime t’a Zezi sẽn gom “zãmaan-kãngã” yellã, yaa kiris-neb sẽn paam vʋʋsem sõng zaeebã sul a yiib yell la a sẽn da gomdã. Pipi sullã ra vɩɩ yʋʋmd 1914, n bãng tɩ Kiristã sɩngã a naamã rɩɩb yʋʋm-kãnga. La pa rẽ bal ye. B paama vʋʋsem sõngã zaeeb yʋʋm-kãnga, wall sẽn deng rẽ.—Rom 8:14-17.

¹⁶ “Zãmaan-kãngã” sull a yiib-n-soabã neb vɩɩmda wakat yɛng ne pipi sullã neba. La b paama vʋʋsem sõngã zaeeb tɩ nin-kãens kẽer ket n vɩ tẽngã zugu. Rẽnd pa kiris-neb nins fãa sẽn paam vʋʋsem sõng zaeeb n be tẽngã zugã n naag zãmaan ning yell a Zezi sẽn da gomdã ye. Rũndã-rũndã, sull a yiib-n-soabã neb yʋʋm vẽsgame. La a Zezi sẽn yeel bũmb ning Matɩe 24:34 kɩtame tɩ d miẽ tɩ “zãmaan-kãngã” nebã kõn loog zãng tɩ to-kãsengã yaool n sɩng ye. Woto kɩtame tɩ d maneg n kɩs sɩd tɩ ka la bilfu, Wẽnnaam Rĩungã na n sãama nin-wẽnsã, la a kẽes tõnd dũni-paalg pʋgẽ.—2 Pɩɛ. 3:13.

17. Biiblã bãngr-goam nins yell d sẽn gomã kɩtame tɩ d kɩs sɩd ne bõe?

¹⁷ Biiblã bãngr-goam nins yell d sẽn gomã sẽn pids to-to rũndã-rũndã wã wilgda tõnd bõe? A Zezi yeelame tɩ tõnd pa mi daar ning la wakat ning dũniyã sẽn na n sa wã, la tɩ d pa na n tol n bãng ye. (Mat. 24:36; 25:13) La tʋm-tʋmd a Poll yeelame tɩ “tõnd fãagr kolgame.” (Karm-y Rom dãmb 13:11.) Sɩd me, d vɩɩ yaoolem wakatã. D sã n bao n bãng Biiblã bãngr-goam sẽn pidsd to-to wã, la bũmb nins a Zeova la a Zezi Kirist sẽn maandã, d na n maneg n kɩsa sɩd tɩ dũni-kãngã sãoongã ta n saame.

18. Bõe n na n paam neb nins sẽn pa rat n sak a Zezi Kirist naamã?

¹⁸ Ka la bilfu, neb nins sẽn pa rat n sak a Zezi sẽn yaa wed-rʋʋd ning sẽn zao wed-mo-pɛɛlgã naamã na n bãngame tɩ b tudgame. B pa na n tõog n põs sɩbgr ning sẽn watã ye. Wakat kãnga, rabeem na n yõka neb wʋsgo, tɩ b sok woto: “Ãnda n tõe n põse?” (Wil. 6:15-17) Wilgr sak a 7 soabã leokda sok-kãngã. Kiris-neb nins sẽn paam vʋʋsem sõng zaeebã, n paas kʋʋn-kãseng n na n põse, b sẽn tat Wẽnnaam yamã yĩnga. Rẽnd kʋʋn-kãsengã na n põsa to-kãsengã sasa, n kẽ Wẽnnaam dũni-paalgã pʋgẽ.—Wil. 7:9, 13-15.

19. Y sẽn kɩs sɩd tɩ saabã ta n saame wã, bõe la y gũuda?

¹⁹ D sã n ket n baood n bãngd Biiblã bãngr-goam sẽn pidsd to-to wã, a Sʋɩtãan dũniyã pa na n tõog n lud d yamã ye. D na n wʋma yɛl nins sẽn maand rũndã-rũndã wã võore. Ka la bilfu, Kiristã na n tõoga a bɛɛbã fãa, n sãam dũni-kãngã Armagedõ zabrã sasa. (Wil. 19:11, 19-21) Ad rẽ poore, sɩd na n yɩɩ sũ-noog tɛkẽ!—Wil. 20:1-3, 6; 21:3, 4.