1, 2. Bõe yĩng tɩ d segd n bao n wʋm Yɩɩl Sõamyã 45 soabã võore?

YƖƖL SÕAMYÃ 45 soabã gomda Rĩm-kãseng yelle. A zomba a weef n na n zab sɩd la tɩrlem yĩnga. Rĩmã tõoga a bɛɛbã fãa. Tõogrã poore, a lebg n wa kẽe kãadem ne pʋg-neere. Nebã na n tẽegda Rĩmã yelle, n pẽgd-a wakat fãa.

² La Yɩɩl Sõamyã 45 soabã pa gomd rĩm sẽn tʋm tʋʋm-kãsems yell bal ye. Bũmb nins yell a sẽn gomdã tara yõod ne tõndo, bala b tõe n nafa tõnd rũndã, la beoog-daare. Bɩ d gom bõn-kãens yelle, n bao n wʋm b võore.

3, 4. a) “Yel-sõmd” bɩ bõn-sõng ning yell yɩɩl-gʋlsdã sẽn gomã yaa bõe, la rẽ kɩtame tɩ d maand bõe? b) Wãn to la d yɩɩlã yaa ‘rĩm yĩnga,’ la wãn to la d zɩlemd lebgd wa “gʋls-mit gʋlsdga”?

³ Karm-y Yɩɩl Sõamyã 45:2. “Yel-sõmd” bɩ bõn-sõng ning sẽn kɩt tɩ yɩɩl-gʋlsdã sũur noomẽ wã yaa kibar sẽn wilgd bũmb rĩm sẽn maane. Rẽ “bunda” a sũur pʋgẽ, n kɩt t’a tar yẽesem t’a zɩlemd lebg wa “gʋls-mit gʋlsdga.”

 ⁴ La tõnd yẽ? Wẽnnaam Rĩungã koe-noogã yaa bũmb sẽn noom tõnd wʋsgo. Yʋʋmd 1914 tɛka, Rĩungã koɛɛg maneg n lebga noogo. Bõe yĩnga? Bala yʋʋm-kãng tɛka, b moondame tɩ Rĩungã sɩnga naam dɩɩb saasẽ. Yaa ‘Wẽnnaam soolem koe-no-kãng’ la d sẽn ‘moond dũniyã tɛk fãa tɩ yaa kaset buud fãa yĩngã.’ (Mat. 24:14) Wẽnnaam Rĩungã koɛɛg nooma yãmb wʋsg bɩ? Y moonda Wẽnnaam Rĩungã koe-noogã ne yẽesem bɩ? Wa yɩɩl-gʋlsdã, d yɩɩlã yaa ‘rĩm yĩnga,’ rat n yeel tɩ d moondame t’a Zezi sẽn yaa Mesi wã rɩta naam saasẽ masã. D sagenda nebã fãa, baa dũniyã nanambsã tɩ b sak a Zezi naamã. (Yɩɩl 2:1, 2, 4-12) Sẽn paase, koe-moonegã sasa, d sã n wa karemd Biiblã n wilgd a võore, d zɩlemd lebgda wa “gʋls-mit gʋlsdga.”

5. a) Bõe n kɩt t’a Zezi ra yaa ‘rasãn-beelle’? b) Wãn to la a Zezi moon koɛɛgã, la wãn to la d tõe n dɩk a togs-n-taare?

⁵ Karm-y Yɩɩl Sõamyã 45:3. Biiblã pa gomd a Zezi sẽn da yaa neer to-to wã yell ye. A sẽn da yaa ned sẽn zems zãngã, yaa vẽeneg t’a ra yaa ‘rasãn-beelle.’ La bũmb ning sẽn kɩt t’a ra maneg n yaa neerã yaa a burkĩndã n paas a sẽn da sakd a Zeova wakat fãa wã. A Zezi sẽn da moond Rĩungã koɛɛg to-to wã me bee yamleoogo. (Luk 4:22; Zã 7:46) Y sã n wa moond koɛɛgã, y maanda y sẽn tõe tɛk n dɩkd a Zezi togs-n-taar bɩ?—Kol. 4:6.

6. Wãn to la Wẽnnaam ning a Zezi “bark wakat fãa yĩnga”?

⁶ A Zezi sẽn da sakd a Zeova ne a sũur fãa wã kɩtame t’a ning-a bark a sẽn wa n moond koɛɛgã. A kũumã poor me, a Zeova keo-a lame. Tʋm-tʋmd a Poll goma rẽ yell n yeel woto: “[A Zezi] sẽn lebg wa ninsaalã, b sika b meng n sak n ki, hal n ki kũum [“da-lukã,” MN] zugu. Yaa woto yĩng me n kɩt tɩ Wẽnnaam waoog bãmb ne waoogr sẽn yaa kãsenga, n kõ bãmb yʋʋr sẽn yɩɩd yʋyã fãa, hal tɩ ne a Zezi yʋʋre, dũmã fãa sẽn be yĩngrã ne sẽn be tẽngã zugu, la sẽn be tẽngã pʋgẽ wã na n yĩgimdame, la tɩ zɛlmã fãa na n kɩsa kaset t’a Zezi Kirist yaa Zu-soaba, tɩ yɩ tõnd Ba a Wẽnnaam waoogre.” (Fil. 2:8-11) A Zeova ning a Zezi bark “wakat fãa yĩnga,” n vʋʋg-a t’a vɩ n pa le tõe n ki ye.—Rom 6:9.

7. Bõe yĩng tɩ d tõe n yeel tɩ Wẽnnaam zaeya a Zezi n yɩɩg a “tũud-n-taasã”?

⁷ Karm-y Yɩɩl Sõamyã 45:7, 8. A Zezi sẽn nong tɩrlem ne a sũur fãa la a kis bũmb ning fãa sẽn tõe n sãam a Ba a Zeova yʋʋrã yĩnga, a Zeova yãk-a lame t’a lebg a Rĩungã Rĩma. A Zeova zaeya a Zezi ne “sũ-noog kaam” n yɩɩd a “tũud-n-taasã” sẽn yaa Zida rĩm-dãmbã sẽn yaa a Davɩɩd yagensã. Bõe yĩng tɩ d yet woto? Pipi, yaa a Zeova meng a toor n zae a Zezi. Yiib-n-soaba, a Zeova zae-a lame t’a na n yɩ Rĩm la maan-kʋʋdb kãsma.  (Yɩɩl 2:2; Heb. 5:5, 6) Tãab-n-soaba, a Zeova zaeya a Zezi ne a vʋʋsem sõngã. Sẽn na n baase, pa tẽngã zug la a na n zĩnd n dɩ naam ye. Yaa saasẽ.

8. Bõe yĩng tɩ d tõe n yeel t’a Zezi tara sor n na n dɩ naam, la bõe yĩng tɩ d tõe n kɩs sɩd t’a rɩta a naamã ne tɩrlem?

⁸ Yʋʋmd 1914, a Zeova kɩtame t’a Zezi lebg a Rĩungã Rĩm. A ‘naam dasaarã yaa tɩrlem dasaare.’ Rẽnd d tõe n kɩsa sɩd t’a Zezi na n dɩ a naamã ne tɩrlem wakat fãa. A tara sor n na n dɩ naam, bala yaa a Zeova n kõ-a naamã. Sẽn paase, a naamã geer na n zĩnda “wakat fãa.” D sẽn paam n tũud a Zeova tɩ Rĩm ning a sẽn yãkã wilgd-d sorã pa noom-d sɩda?

9, 10. a) Yʋʋm-bʋg la Kiristã bob a sʋʋgã, la bõe la a maan-yã? b) Bõe la a na n maan ne a sʋʋgã beoog-daare?

⁹ Karm-y Yɩɩl Sõamyã 45:4. A Zeova yeela Rĩmã t’a bob a sʋʋgã. A sẽn yeel woto wã, a kõ a Zezi sor t’a tɩ zab ne sẽn kɩɩsd-b yẽ naamã, n sãam-ba. (Yɩɩl 110:2) Kiristã sẽn yaa Rĩm b sẽn pa tõe n zab ne n tõogã yĩnga, b boond-a lame tɩ “gãndaoogo.” Yʋʋmd 1914, a boba a sʋʋgã, n zab ne a Sʋɩtãan la a zĩn-dãmbã, n dig-b saasẽ tɩ b kẽng tẽngã zugu.—Wil. 12:7-9.

¹⁰ La pa woto bal ye. Rĩmã na n kell n zaba ne a bɛɛbã n tõog b fãa. (Wil. 6:2) A na n sãama a Sʋɩtãan dũniyã babs toor-toorã, la a kɩt t’a Sʋɩtãan ne a zĩn-dãmbã pa le tõog n belg nebã ye. Pipi, Babilon-kãsengã sẽn yaa ziri tũudmã na n paama sãoongo. A Zeova na n tũnuga ne dũniyã nanambsã n sãam pʋg-yood-kãngã. (Wil. 17:16, 17) Rẽ poore, Kiristã na n sãama a Sʋɩtãan dũniyã goosneema-rãmbã fãa. Sẽn na n baase, a Zezi b sẽn boond tɩ ‘bog-zulung malɛkã’ na n loba a Sʋɩtãan ne a zĩn-dãmbã bog-zulungã pʋgẽ. (Wil. 9:1, 11; 20:1-3) Bɩ d ges Yɩɩl Sõamyã 45 soabã sẽn deng n togs yel-kãensã to-to.

11. Wãn to la Kiristã na n zab “sɩd tõogr yĩnga”?

¹¹ Karm-y Yɩɩl Sõamyã 45:5. Rĩmã pa zabd n na n deeg tẽns wall n yõg neb n maan yembs ye. Bũmb ning sẽn kɩt t’a zabdẽ wã tara yõod wʋsgo, bala a zabda “sɩd tõogr yĩnga, [“sik-m-meng,” MN] la tɩrlem sakr yĩnga.” A Zeova a ye bal n tar sor n na n yɩ yĩngr la tẽng naaba. Gom-kãngã yaa sɩda, tɩ segd n yɩ vẽeneg ninsaalbã ne malɛgsã nifẽ. La a Sʋɩtãan sẽn wa n na n kɩɩs a Zeova wã, a wilgame t’a pa tar sor n na n yɩ yĩngr la tẽng naab ye. Rẽ tɛka, malɛgs la ninsaalb n zãgs a Zeova naamã. Masã, wakat taame, tɩ Rĩm ning a Zeova sẽn yãkã na n tɩ zab n wilg t’a Zeova a ye bal n segd n yɩ yĩngr la tẽng naaba.

12. Wãn to la Rĩmã zabd “sik-m-meng” yĩnga?

¹² Rĩmã zabda “sik-m-meng” yĩng me. A Zezi sɩng n kõta mak-sõng sik-m-mengã la a Ba wã sakr wɛɛngẽ. (Ezai 50:4, 5; Zã 5:19) A poorẽ dãmbã fãa segd n dɩka a togs-n-taare, n sikd b mens n sakd a Zeova bũmb fãa pʋgẽ. Yaa sẽn maand-b woto wã bal n na n paam n vɩɩmd Wẽnnaam dũni-paalgã pʋgẽ.—Zak. 14:16, 17.

13. Wãn to la Kiristã zabd “tɩrlem sakr yĩnga”?

 ¹³ Kiristã leb n zabda “tɩrlem sakr yĩnga.” Tɩrlem kãng yaa ‘Wẽnnaam tɩrlmã,’ rat n yeel tɩ noy nins a Zeova sẽn kõ sõma ne wẽngã wɛɛngẽ wã. (Rom 3:21; Tõo. 32:4) No-rɛɛs a Ezai goma a Zezi Kirist yelle, n yeel woto: “Dĩmã na n dɩɩ naam ne tɩrlem.” (Ezai 32:1) A Zezi naamã na n waa ne “yĩngr-paalg la tẽn-paalga, tɩrlem sẽn na n zĩnd b pʋsẽ.” (2 Pɩɛ. 3:13) Neb nins fãa sẽn na n vɩɩmd tẽn-paalgã pʋgẽ wã segd n tũ a Zeova noyã.—Ezai 11:1-5.

14. Wãn to la Kiristã nug-rɩtg na n tʋm tʋʋm-kãsemse? (Ges-y sõsgã sɩngrẽ fotã.)

¹⁴ Yɩɩl-gʋlsdã wilgame tɩ Rĩmã zomba a weefã, la a bob sʋʋga. (Yɩɩl 45:4) La wakat taame t’a na n foog sʋʋgã ne a nug-rɩtgo, n tall n zabe. Yɩɩl-gʋlsdã reng n wilgame tɩ Rĩmã nug-rɩtg na n tʋma tʋʋm-kãsemse. (Yɩɩl 45:5) Sɩd me, a Zezi sã n wa na n sãam a Sʋɩtãan dũniyã Armagedõ, a na n tʋma tʋʋm-kãsemse. D pa mi a sẽn na n sãam a Sʋɩtãan dũniyã to-to wã takɩ ye. D sẽn mi bal yaa t’a sẽn na n maan bũmb ninsã na n yɛɛsa sẽn pa tũud-b Wẽnnaam noyã la sẽn pa sakd Rĩmã naamã. (Karm-y Yɩɩl Sõamyã 2:11, 12.) A Zezi sẽn wa n gomd yaoolem wakatã yellã, a yeelame tɩ “nebã sũy na n lebga yog-yog rabeem yĩnga, b sẽn gũud bũmb nins sẽn na n wa dũniyã zugã yĩnga. Tɩ bõe, saasẽ pãens rãmbã na n digimdame.” A paasa woto: “Dẽ, b na n yãa Ninsaal Biigã sẽn be sawadg zug n wat ne pãng la naam-kãsenga.”—Luk 21:26, 27.

15, 16. “Kʋʋng” ning sẽn na n tũ Kiristã n tɩ zabã yaa ãnd dãmba?

¹⁵ Wilgr sebrã goma Rĩmã sẽn na n wa ‘ne pãng la naam-kãseng’ n zab ne Wẽnnaam bɛɛbã yelle, n yeel woto: “Dẽ, mam yãa [“saasa,” MN] sẽn pake, la haya! Wed-pɛɛlg n be be, la sẽn zao-a yẽ wã boondame tɩ Tɩrlem la Sɩda, la yaa ne tɩrlem la bãmb kaood bʋʋd la b maand zabre. La kʋʋng toɛy-toɛya sẽn be [“saasẽ,” MN] zomba wed-peels n tũ bãmba. La bãmb yeelga fu-peels sẽn yaa sõma n ka tar rẽgd ye. La sʋʋg sẽn dɩt sẽn yit bãmb noorẽ wã wẽeda dũniyã soolem toɛy-toɛyã, la b na n sooga bãmb ne kut dasaare. La bãmb na n taba Wẽnnaam sẽn tõe fãa wã sũ-puugr-kãsengã divẽ sẽn be divẽ wẽkr koglgã pʋgẽ wã.”—Wil. 19:11, 14, 15.

¹⁶ “Kʋʋng” ning sẽn na n tũ a Zezi n tɩ zabã yaa ãnd dãmba? A sẽn wa n bob a sʋʋgã pipi n zab ne a Sʋɩtãan la a zĩn-dãmbã n dig-b n yiis saasẽ wã, malɛgsã sõng-a lame. (Wil. 12:7-9) Rẽnd d tõe n yeelame tɩ Armagedõ zabrã sasa, malɛgsã na n le sõng-a lame. La rẽ yĩnga yaa bãmb bal n na n yɩ kʋʋng ning sẽn na n tũ Kiristã bɩ? A Zezi pʋlma a saam-biis nins sẽn paam vʋʋsem sõng zaeebã woto: “Ned ning sẽn na tõog la a sak mam tʋʋmã hal tɩ wakat ta, mam na kõ yẽ noor ne soolem toɛy-toɛya. Yẽ na n sooga bãmb ne kut dasaare, la bãmb na n sãama wa rʋgd sẽn wãada, a wa sẽn zems pãng ning mam sẽn deeg m Ba nengẽ wã.” (Wil. 2:26, 27) Rẽnd  kiris-neb nins sẽn paam vʋʋsem sõng zaeebã na n zĩnda kʋʋngã sʋka. A Zezi sã n wa tʋmd tʋʋm-kãsems n sãamd soolem toɛy-toɛyã, nin-kãensã na n zĩnda saasẽ n sõng-a.

17. a) Wed-mo-pɛɛlgã Kiristã sẽn zaoã makda bõe? b) Sʋʋgã ne tãpã makda bõe?

¹⁷ Karm-y Yɩɩl Sõamyã 45:6. Rĩmã zaoa wed-pɛɛlga. Wilgr 6:2 yetame: “Mam gesame, la haya! Mam yãa wed-pɛɛlga. La sẽn zao-a weefã tara tãpo, la b kõo yẽ maanfo, la a kẽngame, la a tara tõogre.” Wed-mo-pɛɛlgã Rĩmã sẽn zaoã makda zabr sẽn yaa tɩrga, la sẽn tat Wẽnnaam yam. (Wil. 19:11) Rĩmã sẽn bob sʋʋgã toor sẽn ka be, a zãada tãpo. Sʋʋgã ne tãpã fãa makda Kiristã sẽn na n maan to-to n sãam a bɛɛbã.

18. Bõe la Kiristã na n maan ne a ‘pɛɛmã’?

¹⁸ Yɩɩl-gʋlsdã reng n togsame tɩ Rĩmã “pɛɛm yaa sɩlemse,” t’a ‘bɛɛbã sũy na n fãsame,’ la t’a “na n luba neb wʋsgo.” A na n kʋʋ neb dũniyã gill zugu. No-rɛɛs a Zeremi yeela woto: “Baraare, neb nins Zu-soabã sẽn kʋ wã na n dɩga tẽng dũniyã kɩreng a yembr tɩ ta kɩreng a to.” (Zer. 25:33) Bãngr-gomd a to sẽn gomd rẽ yell yeela woto: “Mam yãa malɛk sẽn yas wĩntoogã pʋgẽ n zẽk a koɛɛg n kelem n yeel bõn-yɩgdsã fãa sẽn yɩgd yĩngrã yaa: ‘Wayã, tigm-y taab n wa Wẽnnaam kibs-kãsengã n dɩ rĩm-dãmb ne sodaas nanambs la nin-kãsems ne wiid la wed-rʋʋdb ne ninsaal buud fãa nemdo, burkĩmb ne yembse, nin-tals ne nin-kãsemse.’”—Wil. 19:17, 18.

19. Wãn to la Kiristã na n tõog a bɛɛbã fãa?

¹⁹ Rĩm-kãseng a Zezi Kirist sã n sãam a Sʋɩtãan dũniyã poore, a na n kell n ‘kẽnga tõogr yĩnga.’ (Yɩɩl 45:5) A na n loba a Sʋɩtãan ne a zĩn-dãmbã bog-zulung pʋgẽ. B na n paa be a naamã sẽn na n kaoos yʋʋm tusrã sasa. (Wil. 20:2, 3) A Sʋɩtãan ne a zĩn-dãmbã sã n wa be bog-zulungã pʋgẽ, b pa na n le tõog n belg ninsaalbã ye. Woto, neb nins sẽn be tẽngã zugã na n tõog n saka b Rĩmã ne b sũy fãa. La nand tɩ tẽngã tõr lebg arzãna, bũmb n na n maan tɩ tẽngã zug rãmbã naag Rĩmã ne a na-rɩt-n-taasã sẽn be saasẽ wã n kɩdem sũ-noogo. D na n goma rẽ yell sõsg ning sẽn pʋgdã pʋgẽ.