1, 2. Wãn to la a Zeova sẽn get tõndã yaa toor ne b sẽn maand to-to ne kamera-rãmbã?

TẼNS wʋsg pʋsẽ, b ningda kamera-rãmb butik-bɛdẽ wã, n get butikã teed la neb nins sẽn kẽed be wã. Kamera-rãmbã rɩkda bũmb ning fãa sẽn maand butikã pʋgẽ. Woto, wagdr sã n dɩk bũmbu, b tõe n gesa be n yõk-a. Kamera kãens maasem yĩnga, yaa toog ne wagda wã tɩ b rɩk bũmb n loog tɩ b pa yõk-b ye.

² La woto tẽegda tõnd Biiblã sẽn yeel bũmb ning d Ba a Zeova zugã. A yeelame t’a Zeova “nee zĩigã fãa.” (Yel. 15:3) La woto rat n yeelame t’a gũusd n geta bũmb nins fãa d sẽn maandã, n dat n tɩ d sã n kɩɩs a noyã bɩ a bãng bɩ? A gũusdame tɩ d sã n kɩɩs-a bɩ a sɩbg-d bɩ? (Zer. 16:17; Heb. 4:13) Ayo! A Zeova sẽn get tõndã yaa a sẽn nong tõnd ned kam fãa n dat d neerã yĩnga.—1 Pɩɛ. 3:12.

3. Bõe yell la d na n gome?

³ Bõe n tõe n sõng tõnd tɩ d kɩs sɩd tɩ Wẽnnaam sẽn get tõndã yaa a sẽn nong-d yĩnga? D na n goma  bũmb a nu yelle. 1) A Zeova sã n yã tɩ d rat n maana wẽnga, a keoogd-d lame. 2) D sã n maan wẽnga, a kibind-d lame. 3) A tũnugda ne Biiblã sagls n wilgd-d sore. 4) A sõngd-d-la zu-loees sasa. 5) D sã n maan tɩrga, a ning-d-la barka.

4. Bõe yĩng t’a Zeova keoog a Kayẽ?

⁴ Bɩ d reng n bao n bãng a Zeova sẽn keoogd-d to-to a sã n wa yã tɩ d rat n maana wẽnga. (1 Kib. 28:9) Ad makre. A Kayẽ sẽn wa n kõ a Zeova kũun t’a pa reegã, a Kayẽ “sũur puugame.” (Karm-y Sɩngr 4:3-7.) A Zeova sagl-a lame t’a bas a sũ-yikrã, la a “maan neere.” A keoog-a lame t’a sã n ka maan neere, ‘kongr wũga a rignoorẽ n dat n paam-a,’ la t’a ra bas tɩ kongrã paam-a ye. A Zeova ra ratame t’a Kayẽ sak a saglgã t’a ning-a barka. Rẽ na n kɩtame tɩ b zoodã ra sãam ye.

5. Wãn to la a Zeova keoogd tõndo?

⁵ A Zeova maanda woto ne tõnd me. A tõe n yãa bũmb ning sẽn be d sũurẽ wã. A mii d tagsa wã la d ratem buud fãa, tɩ d pa tõe n solg-a baa fʋɩ ye. A nonga tõndo, n dat tɩ d maan sẽn yaa tɩrga. La a pa modgd-d ye. Rẽ n so t’a sã n wa yã tɩ d rat n maana wẽnga, a keoogd-d lame. A tũnugda ne Biiblã n maand rẽ. D sẽn karemd Biiblã daar fãa wã, d mi n wa karma goam kẽere, tɩ sõng-d tɩ d bas tʋls-wẽnse. D tõe n wa karma sɛb nins siglgã sẽn yiisdã, n yã b sẽn gomd minim-wẽng d sẽn tar yelle, la b wilgd d sẽn tõe n maan to-to n bas-a. Sẽn paase, tigissã sasa, d fãa paamda sagls sẽn zems b wakate.

6, 7. a) Bõe n wilgd t’a Zeova geta d ned kam fãa yelle? b) Bõe la d tõe n maan n dɩ a Zeova saglsã nafa?

⁶ D sẽn paamd sagl-kãensã fãa wã wilgdame t’a Zeova nonga tõnd ned kam fãa. Yaa sɩd tɩ b sẽn gʋls Biiblã yaa yʋʋm kobs masã, tɩ seb nins siglgã sẽn yiisdã me yaa neb milyõ-rãmb yĩnga. Sẽn paase, sagls nins d sẽn paamd tigissã sasa wã yaa tigingã neb fãa yĩnga. Baasgo, ne bõn-kãensã maasem, a Zeova sagenda tõnd ned kam fãa sẽn na yɩl n sõng-d tɩ d maan tɩrga. Rẽnd d sɩd tõe n yeelame t’a Zeova geta d ned kam fãa yelle.

⁷ Sẽn na yɩl n dɩ Wẽnnaam saglsã nafa, d segd n kɩsa sɩd t’a rata d neere, la d sak Biiblã sẽn yetã, n yiis tagsg ning fãa sẽn pa tat a yam d sũurẽ wã. (Karm-y Ezai 55:6, 7.) D sã n tũ sagls nins a sẽn kõt-dã, d na n gila zu-loees wʋsgo. La d sã n wa kɩɩs n maan sẽn pa zems yẽ? D Ba a Zeova na n kell n sõng-d lame bɩ?

8, 9. Ned sã n tik Biiblã zug n kõ-d saglse, wãn to la wilgd t’a Zeova geta d yelle? Rɩk-y makre.

⁸ A Zeova sã n wa kibind tõndo, wilgdame t’a nong-d lame. (Karm-y Hebre dãmb 12:5, 6.) Yaa sɩd tɩ d sã n maan bũmb tɩ b sagend-d wall b kibind-du, d sũur pa noom ye. (Heb. 12:11) La ned sã n wa sagend tõndo, yɩta sõma tɩ d bãng bũmb ning sẽn kɩt t’a sagend-dã. A pa maand woto sẽn na yɩl n yik d sũurã ye. A yãame tɩ bũmb la d maand tɩ tõe n sãam  tõnd ne a Zeova zoodã. A modgame n bao sagls Biiblã pʋgẽ, la a bao sẽk n na n wilg tõnd d sẽn tõe n dems yɛlã to-to. D na n saka a saglsã, bala, b yita a Zeova nengẽ.

⁹ Ad makr sẽn wilgd t’a Zeova tõe n tũnuga ne ninsaal n sagl tõndo. Saam-biig a ye n da minim n get yoobã yɛl nand t’a bãng sɩdã. A sẽn wa n bãng sɩdã, a basa minim-wẽngã, la yoobã yɛl gesg yamleoog ra ket n tar-a lame. A sẽn wa n da portaabl-paalle, a le lʋɩ a minim-wẽngã pʋgẽ. (Zak 1:14, 15) A ra tara a portaablã n get yoobã yɛl ẽntɛrnetã pʋgẽ. Daar a ye, a kõ a portaablã kãsem-soab t’a na n bao nimero. La kãsem-soabã sẽn wa n tõgd portaablã, sit-rãmb sẽn wilgd yoob yɛl n puki. Kãsem-soabã kõo saam-biigã saglse, t’a kelge. A wa n tõog n basa a minim-wẽngã. D sã n soosd n maand yel-wẽna, a Zeova neeme. La a sẽn pa rat tɩ d sãam tõnd ne yẽ zoodã, a kibind-d lame. A sẽn maand woto tɩ wilgdẽ tɩ d yell pak-a lame wã pa noom-d sɩda?

10, 11. a) D sã n wa rat a Zeova sor-wilgri, bõe la d tõe n maane? b) Wãn to la zak a ye rãmb tũ a Zeova saglsã tɩ naf-ba?

¹⁰ Yɩɩl-gʋlsdã yeelame t’a Zeova na n sagla yẽ. (Yɩɩl 73:24) D sã n wa rat sor-wilgr bɩ d tẽeg a Zeova yelle, n bao n bãng Biiblã sẽn yete. Woto, d na n bãnga a Zeova sẽn get yɛlã to-to wã, n tõog n tũ a saglsã, n kell n tall zood sõma ne-a. La a Zeova saglsã tũub tõe n sõng-d lame me tɩ d ges d zakã rãmb yelle.—Yel. 3:6.

¹¹ Wala makre, Filipin saam-biig n da luaas pʋʋg n koaada, tɩ yẽ ne a zakã rãmb vɩ be. Yẽ ne a pagã ra tara kamb wʋsgo, la b yiibã fãa ra yaa wakat fãa so-pakdba. Daar a ye, pʋʋgã soab kõ-b-la sebr sẽn wilgd t’a na n deega a pʋʋgã. Bõe yĩnga? Neb n tɩ kãneg-b ne pʋʋgã soabã, n yeel tɩ b yaa pʋ-lik rãmba. Saam-biigã ra pa mi yẽ ne a zakã rãmb sẽn na n kẽng zĩig ning ye. Baasgo, a teega a Zeova, n yeel woto: “A Zeova na n gesa d yelle. Wakat  fãa, a kõt-d-la bũmb nins sẽn yaa tɩlae ne-dã.” Saam-biigã ne a zakã rãmb tũu Biiblã saglsã, n da ket n waoogd pʋʋgã soaba. Baa b sẽn da mi tɩ b kãneg-b lame wã, b pa zab ne-a ye. Rasem a wãn poore, pʋʋgã soab yeel-b lame tɩ b tõe n kell n paame. Saam-biigã ne a zakã rãmb manesem sẽn yɩ to-to yel-kãngã pʋgẽ wã yɩɩ pʋʋgã soab noogo, hal t’a kõ-b zĩig n paase. (Karm-y 1 Pɩɛɛr 2:12.) Vẽenega, a Zeova tũnugda ne Biiblã n kõt-d saglse, tɩ sõngd-d zu-loees sasa.

12, 13. Bõe n tõe n wa kɩt tɩ d tags tɩ Wẽnnaam pa ne d namsgã?

¹² D fãa segda zu-loeese, tɩ zu-loɛɛg ning mi n yaa wa pa na n tol n sa ye. Tõe n yɩɩ bãaga, namsg d tẽebã yĩnga, wall d zakã rãmb sẽn na n kɩɩsd tõnd d tũudmã yĩnga. Zu-loɛɛg sẽn tõe n nams-d wʋsg me yaa tõnd ne tigingã ned a to sẽn na n pa wʋmd taaba.

¹³ Wala makre, saam-biig tõe n yeela gomd tɩ sãam y sũur wʋsgo. Tõe tɩ y yeele: ‘Ned pa segd n gom a to woto Wẽnnaam siglgã pʋgẽ ye.’ Baasgo, b kõta saam-bi-kãng tʋʋm tigingã pʋgẽ, tɩ tigingã neb a taabã pẽgd-a. Y tõe n sokda y meng yaa: ‘Bõe yĩng tɩ yaa woto? A Zeova neeme bɩ? A na n sĩnd n getame bɩ?’—Yɩɩl 13:2, 3; Hab. 1:2, 3.

14. Saam-biig sã n yeel bũmb tɩ sãam d sũur t’a Zeova sĩnd n getẽ, tõe tɩ yaa bõe yĩnga?

¹⁴ Tõe tɩ pa zaalem la a Zeova sẽn sĩnd n getẽ wã ye. Yãmb tõe n tagsdame tɩ yaa ned a to wã n tar taale, t’a Zeova sẽn ne bũmb fãa wã miẽ tɩ yãmb me tara taale. Tõe tɩ gomd ning sẽn sãam y sũurã yɩɩ saglg sẽn zemse, tɩ y ra segd n tags a zug neere. Wala makre, saam-biig a Karl Klein yeelame tɩ daar a yembre, yẽ maana bũmb tɩ saam-biig a Rutherford sagl-a. La rẽ poor bilfu, saam-biig a Rutherford sega yẽ, n pʋʋs-a sõma, tɩ yẽ pa reeg sõma ye. Saam-biig a Rutherford bãngame tɩ saglgã zab-a lame. Rẽ n so t’a yeel-a woto: “Gũusi! A Sʋɩtãan dat n paama foo.” A Karl Klein sẽn wa n lebg a Zeova Kaset rãmbã Siglgã taoor lʋɩtb Sull ned a ye, a yeelame tɩ yẽ bãngame tɩ saam-biisã tara sor n na n kõ-d saglse, la tɩ d sã n kisg-b rẽ yĩnga, a Sʋɩtãan na n paam-d lame. *

15. D sã n wa tar zu-loeese, bõe la d pa segd n yĩmi?

¹⁵ D sã n tar zu-loɛɛga, d ratame t’a sa tao-tao. La d segd n talla sũ-mare. D rɩk makre. Yãmb talla y kamaan n tɩ tong masĩnẽ n na n were. Nebã sẽn yaa wʋsgã, y pa mi y sẽn na n paam y werbã wakat ning ye. Y sã n pa maag y yĩnga, n dɩk y kamaanã n bao masĩn a to, y tõe n ta n mikame tɩ nebã sõor yɩɩda pipi soabã. La y sã n tall sũ-mar n pa pipi masĩnẽ wã, y tõe n paama y werbã tao-tao n yɩɩg y sẽn na n bao masĩn a to. Woto me, y sã n wa tar zu-loees bɩ y tall sũ-mar n kell n sak Biiblã saglsã, t’a Zeova na n sõng-y lame tɩ y tõog toogo.

16. Bõe me n tõe n kɩt t’a Zeova bas tɩ zu-loɛɛg namsd tõndo?

 ¹⁶ A Zeova tõe n basa zu-loɛɛg t’a namsd tõndo, a sẽn dat tɩ d rɩk yam yĩnga. (Karm-y 1 Pɩɛɛr 5:6-10.) Pa Wẽnnaam n wat ne zu-loeesã ye. (Zak 1:13) Zu-loeesã wʋsg yaa “yãmb bɛyã sẽn yaa Sʋɩtãanã” n wat ne. La Wẽnnaam tõe n tũnuga ne zu-loɛɛg n sõng tõnd tɩ d tẽebã pãng paase. A nee d namsgã. A sẽn nong-dã yĩnga, a pa na n bas tɩ d nams wakat fãa ye. D na n ‘namsa wakat bilf’ bala. Y sã n wa tar zu-loeese, y sẽn mi t’a Zeova geta y yellã, la t’a na n sõng-y lame tɩ tõog toogã, pa noom-y sɩda?—2 Kor. 4:7-9.

17. Bõe yĩng t’a Zeova feesd nebã fãa sũyã?

¹⁷ A Zeova feesda nebã fãa sũyã, n dat n bãng sẽn sɩd nong-b yẽ wã. No-rɛɛs a Hanani yeela rĩm a Aza woto: “Zu-soabã nif geta dũniyã zĩigã fãa n dat n sõng neb nins sẽn dat Wẽnnaam ne b sũyã fãa wã.” (2 Kib. 16:9) Y sã n kell n maan sẽn yaa tɩrga, a Zeova na n sõng-y lame.

18. D sã n maand neere, bõe yĩng tɩ d tõe n kɩs sɩd t’a Zeova na n keo-d lame? (Ges-y sõsgã sɩngrẽ fotã.)

¹⁸ A Zeova rat n ninga tõnd barka. La d sã n dat a barka, d segd n ‘basa wẽnga, n maan neere.’ (Amos 5:14, 15; 1 Pɩɛ. 3:11, 12) Ned sã n maan tɩrga, baa neb a taabã pa ne, a Zeova ningda a soabã barka. (Yɩɩl 34:16) Tẽeg-y Israyɛll pʋg-roagsdb a Sifra la a Pua kibarã. Israyɛll nebã sẽn wa n yaa yembs Eziptã, a Faraõ yeela pʋg-kãens tɩ Israyɛll pag sã n doge, tɩ biigã yaa bi-ribl bɩ b kʋ-a. La b zoee Wẽnnaam n pa maan woto ye. B fãaga kom-peelsã. A Zeova yã a Sifra la a Pua tʋʋm-sõma wã, n kõ-b yagense. (Yik. 1:15-17, 20, 21) Woto me, wakat ninga, d tõe n maanda neer tɩ yaa wa ned baa a ye pa ne ye. La a Zeova neeme, la a na n keo-d lame.—Mat. 6:4, 6; 1 Tɩm. 5:25; Heb. 6:10.

19. Bõe n kɩt tɩ saam-bi-poak maneg n kɩs sɩd t’a Zeova nee d tʋʋm-sõma wã?

¹⁹ Otris saam-bi-poak a ye kibar n wilgd tɩ Wẽnnaam nee modgr ning d sẽn maand koɛɛgã mooneg pʋgẽ wã. A yaa Hõngri ned sẽn wa n vɩ be. Rẽ n so tɩ b kõ-a ned sẽn gomd Hõngri buud-gomdã adɛrɛse. Saam-bi-poakã yɩɩ tao-tao n kẽng nin-kãng zakẽ wã, la a pa yã ned ye. A kẽngame n yɩlme. Wakat ninga, a neeme tɩ yaa wa ned n be roogẽ wã, la a soabã pa yit ye. A basa sɛba, lɛta, la a mengã telefõn nimero. A kell n maana woto yʋʋmd la pʋɩ-sʋka, tɩ ned yaool n na n pak kʋɩlengã. Yɩɩ pag n pake, n pʋʋs-a noog-noogo, la a paas woto: “Kẽ-y-yã. Mam karmã sɛb nins fãa yãmb sẽn basã, n da gũud yãmba.” Pagã wilgame t’a ra lʋɩɩ bãaga, tɩ tɩt nins b sẽn kõt-a wã kɩt t’a pa rat n sõs ne ned ye. A saka Biibl zãmsgo. Yaa vẽeneg tɩ Wẽnnaam ninga saam-bi-poakã modgrã barka.

20. Y sẽn mi t’a Zeova nee bũmb nins fãa d sẽn maandã, y tagsg yaa wãna?

²⁰ A Zeova nee bũmb nins fãa d sẽn maandã, la a na n keo-d lame. La d miime t’a pa gũusd n dat tɩ d sã n kɩɩs a noyã bɩ a sɩbg-d ye. Woto kɩtame tɩ d maneg n nong-a, bala, d miime t’a geta d yelle, la t’a sɩd rat n sõng-d lame.