1. Sigl-bʋg la a Zeova yãk t’a ledg Israyɛll buudã? (Ges-y fotã sẽn be yĩngrã.)

RŨNDÃ-RŨNDÃ, a Zeova nin-buiidã sẽn tũud-a to-to wã tata a yam. Pĩnd wẽndẽ, Israyɛll buudã n da yaa Wẽnnaam nin-buiidu. La b wa n lebga wẽn-kɩɩsdba. Rẽ n so t’a Zeova yãk Kiristã karen-biisã, n sigl-b tɩ b lebg bu-paalle, n gomd a yʋʋrã yĩnga. Baa Rom sodaasã sẽn sãam Zerizalɛm yʋʋmd 70 wã, sigl-kãng pa naag n sãam ye. (Luk 21:20, 21) Rũndã-rũndã sẽn yaa yaoolem wakatã, bu-paalgã ket n gomda a Zeova yʋʋr yĩnga. A Sʋɩtãan dũniyã sãoong sasa, sigl-kãng nebã na n põsame. (2 Tɩm. 3:1) Bõe n kɩt tɩ d tõe n kɩs sɩd ne rẽ?

2. Bõe la a Zezi yeel to-kãsengã wɛɛngẽ, la bõe n na n maan to-kãsengã sɩngrẽ?

² A Zezi goma dũniyã sɛɛb wakat yelle, n yeel woto: “To-kãseng na n zĩndame. Toog sẽn yaa woto nan ka zĩnd dũniyã zug ye, la a kõn leb n zĩnd yãoã zugẽ abada ye.” (Mat. 24:3, 21) To-kãsengã sɩngrẽ, a Zeova na n sãama Babilon-kãsengã sẽn yaa ziri tũudmã fãa wã.  A na n tũnuga ne dũniyã pãn-soaadbã n sãam-a. (Wil. 17:3-5, 16) La rẽ poore, bõe n na n maane?

3. Ziri tũudmã sãoong poore, bõe la a Zeova nin-buiidã bɛɛb na n maane?

³ Ziri tũudmã sãoong poore, a Sʋɩtãan ne a poorẽ dãmbã na n zaba ne a Zeova Kaset rãmbã. Wala makre, Biiblã goma ‘Magoog Googã’ yelle, n yeel woto: “Foom ne f kʋʋngã fãa la buud wʋsg nins sẽn be ne foomã na n kẽnga be wa sob-kãseng n tɩ pid tẽngã.” A Zeova Kaset rãmbã sẽn pa tar zab-teed la b yaa neb sẽn nong laafɩ wã yĩnga, na n yɩɩ wa b bɛɛbã na n tõog-b-la nana-nana. La pa na n yɩ woto ye!—Eze. 38:1, 2, 9-12.

4, 5. A Sʋɩtãan ne a poorẽ dãmbã sã n wa na n zab ne a Zeova nin-buiidã, bõe la a Zeova na n maane?

⁴ A Sʋɩtãan ne a poorẽ dãmbã sã n wa na n zab ne a Zeova nin-buiidã, bõe la a Zeova na n maane? A sẽn yaa yĩngr la tẽng naabã, a na n sõnga a nin-buiidã. B sã n zabd ne a Zeova nebã, a getame tɩ yaa ne yẽ mengã la b zabd ne. (Karm-y Zakari 2:12.) Rẽnd d saasẽ Ba wã na n yika tao-tao n fãag-do. A na n sãama a Sʋɩtãan ne a poorẽ dãmbã Armagedõ zabrã sasa. Rẽ la ‘Wẽnnaam sẽn tõe fãa da-kãsengã zabrã.’—Wil. 16:14, 16.

⁵ Biiblã goma Armagedõ yelle, n yeel woto: “ ‘Zu-soabã boonda buud fãa bʋʋd n na n bʋ ne-ba, n kɩt tɩ b kʋ nin-wẽnsã. Yaa Zu-soabã n yeele.’ Saasẽ-pãng-soabã yeelame tɩ toog n wat n na n paam buud fãa wa sob-kẽeng sẽn yi dũniyã zĩ-zãrsẽ n watẽ. Baraare, neb nins Zu-soabã sẽn kʋ wã na n dɩga tẽng dũniyã kɩreng a yembr tɩ ta kɩreng a to. B ka na n yãb b yĩng ye. La b ka na n dɩk b kũumã n mum ye. Bãmb na n weelame n lebg tẽngã birga.” (Zer. 25:31-33) Armagedõ poore, a Sʋɩtãan dũniyã pa na n le zĩnd ye. La a Zeova siglgã babg ning sẽn be tẽngã zugã na n ket n beeme.

6, 7. a) Kʋʋn-kãsengã neb yaa ãnd dãmba? b) Bõe n wilgd t’a Zeova siglgã neb sõor paasdame?

⁶ Rũndã-rũndã, Wẽnnaam siglgã babg ning sẽn be tẽng zugã pãng paasdame, bala yaa neb sẽn tat Wẽnnaam yam n be a pʋgẽ. Biiblã yeelame: “Zu-soabã geta nin-tɩrse, la b wʋmda bãmb pʋʋsgo.” (1 Pɩɛ. 3:12) Nin-tɩrsã sʋka, neb kʋʋng n na n põs “to-kãsengã” sasa. (Wil. 7:9, 14) B pa na n yɩ kʋʋng bal ye. B na n yɩɩ kʋʋn-kãsenga. Mams-y yãmb sũ-noogã sẽn na n yɩ to-to, y sã n wa mik tɩ y naaga sẽn põs-bã sʋka.

⁷ Kʋʋn-kãsengã neb yita buudã fãa pʋsẽ. Yaa ne koe-moonegã maasem la b tigimd-b a Zeova siglgã pʋgẽ. A Zezi ra yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Mat. 24:14) Yaa rẽ yĩng la Wẽnnaam siglgã sẽn lʋɩɩsd koe-moonegã taoorã. Woto kɩtame tɩ neb milyõ-rãmb waoogd a Zeova ne “b sɩɩse, la ne sɩda.” (Zã 4:23, 24) Wala makre, yʋʋmd 2003 wã n  tãag yʋʋmd 2012 wã, neb 2  707 000 la zak n dɩk b mens n kõ Wẽnnaam n deeg lisgu. Rũndã-rũndã, a Zeova Kaset rãmbã sõor yɩɩda 7 900 000, tɩ neb milyõ-rãmb wat b tigissã. Yaa a Zezi Kirist kũumã tẽegr b sẽn maand yʋʋmd fãa wã la nebã wat n yɩɩda. D neeme tɩ kʋʋn-kãsengã sõor tara paasgo, la d pa wukd d mens rẽ yĩng ye. Bala, d miime tɩ yaa ‘Wẽnnaam n kɩtd tɩ bɩ.’—1 Kor. 3:5-7.

8. Bõe n kɩt t’a Zeova siglgã neb sõor paasdẽ?

⁸ A Zeova Kaset rãmbã sõor tara paasgo, bala yẽ mengã teend-b lame, b sẽn yaa a siglgã nebã yĩnga. (Karm-y Ezai 43:10-12.) A Ezai ra goma yaoolem wakatã yelle, n yeel woto: “Ned ning sẽn yaa bilf n yɩɩd a taabã na n lebga tusri. La ned ning sẽn paoodã na n lebga bu-kãsenga. Mam yaa Zu-soaba. A wakatã sã n ta, mam na n maan-a-la tao-tao.” (Ezai 60:22) Wakat n zĩnd tɩ sẽn paam-b vʋʋsem sõng zaeebã b sẽn boond tɩ “Israyɛll sẽn yaa Wẽnnaam dẽndã” ra yaa bilfu. La neb a taab n wa n paam vʋʋsem sõngã zaeeb n lebg Wẽnnaam siglgã neba, tɩ b sõorã paase. (Gal. 6:16) A Zeova sẽn ket n ningd barka, b tigimda neb milyõ-rãmb a siglgã pʋgẽ, tɩ kʋʋn-kãsengã neb me tar paasgo.

9. D sã n dat n wa paam bark nins Wẽnnaam sẽn pʋlmã, bõe la d segd n maane?

⁹ A Zeova pʋlma kiris-neb nins sẽn paam vʋʋsem sõngã zaeeb ne kʋʋn-kãsengã neb vɩɩm sẽn tar barka. D sã n dat n wa paam bark-kãensã, d segd n sakda a noyã. (Ezai 48:17, 18) Wala makre, a Zeova ra ratame tɩ Israyɛll nebã tũ a Moiiz tõogã. B sã n da tũud tõogã, nafd-b lame, bala, tõogã ra wilgda b sẽn tõe n maan to-to n paam sũ-noog b zagsã pʋsẽ, zo-rãmb hakɩka, la b tall manesem-sõng ne taaba. Tõogã ra wilgda b sẽn tõe n maan pʋ-peelem b leebg pʋgẽ to-to me. (Yik. 20:14; Maan. 19:18, 35-37; Tõo. 6:6-9) Tõnd me sã n tũud Wẽnnaam noyã, nafd-d lame. Sẽn paase, a noyã tũub pa toog ye. (Karm-y 1 Zã 5:3.) Sɩd me, d sã n tũud-ba, d paamda sũ-noogo. La sẽn tar yõod n yɩɩda, d tẽebã pãng paasdame.—Tɩt 1:13.

10. Bõe yĩng tɩ d segd n baood sẽk n karemd Biiblã, la d maand zak pʋgẽ Biibl zãmsgã semen fãa?

¹⁰ Bũmb wʋsg n wilgd t’a Zeova ningda a siglgã babg ning sẽn be tẽng zugã barka. Wala makre, d sẽn wʋmd Biiblã goam võor to-to wã lebgda vẽeneg n paasdẽ. Woto pa lingr ye. Bala, Biiblã yeelame tɩ “nin-sõng sor yaa wa sõ-pukri, n paasd vẽenem hal tɩ ta sõ-bɩɩmde.” (Yel. 4:18) La yɩta sõma tɩ d ned kam fãa sok a meng woto: ‘Mam sẽn wʋmd Biiblã goam võor to-to wã zemsda ne tʋmd-tʋmdã sẽn wilgdã bɩ? Mam karemda Biiblã daar fãa bɩ? Tʋm-tʋmdã sã n yiis seb-paalle, m modgd n karm-a lame bɩ? Mam ne m zakã rãmb maanda zak pʋgẽ Biibl zãmsgã semen fãa bɩ?’ Bõn-kãensã fãa maaneg pa toog wʋsg ye. La d segd n baoa sẽka. To-kãsengã sẽn kolgdã, yaa tɩlae tɩ d zãmsd Biiblã, n tũud d sẽn zãmsd bũmb ningã, la d kell n sak Wẽnnaam siglgã sor-wilgri.

11. Hal pĩnd wẽndẽ n tãag rũndã, wãn to la a Zeova nin-buiidã tigissã la b tigis-kãsemsã nafd-ba?

 ¹¹ A Zeova siglgã sagenda tõnd tɩ d tũ a Poll sẽn yeel bũmb ningã. A yeela woto: “Bɩ tõnd tẽeg taab yelle, la d yik taab ratem tɩ maan nonglem la tʋʋm-sõmã. Bɩ d da bas taab tiging wa neb kẽer sẽn maandã ye. La bɩ d sagl taaba, la bɩ d sagl n yɩɩda, tõnd sẽn yã tɩ daarã kolgdame wã yĩnga.” (Heb. 10:24, 25) Pĩnd wẽndẽ wã, Israyɛll nebã ra minim n tigimda taab n waoogd a Zeova, la b zãmsd a tõogã. Wala makre, a Nehemi wakatẽ wã, nin-buiidã tigma taab zãn kibsã sasa n maan sũ-noogo. (Yik. 23:15, 16; Neh. 8:9-18) Rũndã-rũndã, tõnd me maanda tigiss la tigis-kãsemse. Bɩ d modgd n kẽnd tigis-kãens tɩ rẽ la d tẽebã na n tall pãnga, tɩ d tũud a Zeova ne sũ-noog me.—Tɩt 2:2.

12. Bõe yĩng tɩ koɛɛgã mooneg tar yõod wʋsg ne-do?

¹² D sẽn yaa Wẽnnaam siglgã nebã, d paam n moonda “Wẽnnaam Koe-noogã.” (Rom 15:16) D sã n wa moond koɛɛgã, d “yaa tʋmd-n-taas ne Wẽnnaam.” (1 Kor. 3:9) D waoogda a Zeova yʋʋrã me. Sẽn paase, koɛɛgã mooneg kõt-d-la sũ-noogo. Bala, yaa a Zeova sẽn yaa “Wẽnnaam sẽn yaa sũ-noog soabã” n bobl-d tʋʋm-kãngã.—1 Tɩm. 1:11, MN.

13. D sã n dat vɩɩm la zood ne a Zeova, bõe la d segd n maane?

¹³ A Zeova rata d neere. Yaa rẽ yĩng la a sẽn sagend-d tɩ d sak-a la d teel a siglgã. A Moiiz ra yeela Israyɛll nebã woto: “Mam boonda yĩngr ne tẽngã tɩ b wa yɩ kaset dãmb tõnd sʋka, tɩ mam wilga yãmb vɩɩm ne kũum, la bark ne kãab-wẽnse. Bɩ y yãk vɩɩm tɩ yãmb ne y yagensã tõe n vɩɩmde. La y nong Zu-soab a Wẽnnaam la y sak bãmb koɛɛgã n gãd bãmba. Yaa woto la yãmb na n vɩɩmd n paam yõ-woko.” (Tõo. 30:19, 20) D sã n dat vɩɩm, d segd n nonga a Zeova, n maand a raabã, la d sakd a siglgã sor-wilgri.

14. Bõe la saam-biig a yembr yeel Wẽnnaam siglgã wɛɛngẽ?

¹⁴ Saam-biig a Pryce Hughes bãnga sɩdã nand tɩ yʋʋmd 1914 ta. A kell n saka a Zeova la a siglgã sor-wilgr a vɩɩmã tõre. A sẽn wa n togsd a vɩɩmã kibarã, a yeelame tɩ bũmb la a bãng tɩ sõng-a wʋsgo. A bãngame t’a pa segd n teeg ninsaal bãngr ye. A segd n kell n saka a Zeova siglgã sor-wilgri. Rẽ sõng-a lame tɩ baa a sẽn seg zu-loeesã, a kell n talla tẽeb a vɩɩmã tõre. Saam-biig a Hughes paasame tɩ yaa d sẽn na n sakd a Zeova siglgã sor-wilgr bal la d tat a yam.

15. A Zeova siglgã sã n wa rems d sẽn wʋmd Biiblã gomd ning võor to-to, Biiblã kiba-bʋg n tõe n sõng-do?

¹⁵ Sẽn na yɩl n ta a Zeova yam, rẽndame tɩ tõnd ned kam fãa teel a siglgã, tɩ siglgã sã n wa rems d sẽn wʋmd Biiblã gomd ning võor to-to, bɩ d sake. Pipi kiris-nebã sʋka, wʋsg sẽn da yaa zʋɩf-rãmb ra ket n tũuda a Moiiz tõogã. (Tʋʋ. 21:17-20) La lɛtr ning a Poll sẽn tool hebre-rãmbã sõng-b lame tɩ b bãng tɩ pa  “maand b sẽn kõ wa sẽn zems tõogã” maasem yĩng la bãmb paam b yel-wẽnã sugr ye. Yaa ne a Zezi Kirist sẽn kõ yẽ meng yĩngã “vugr bal tɩ yɩ maoong wakat fãa yĩngã” maasem. (Heb. 10:5-10) Sãmbg sẽn kae, kiris-nin-kãens saka a Poll saglgã, n toeeme. D tõe n dɩka yam b kibarã pʋgẽ. D segd n maagda d yĩng n zãmsd Biiblã, t’a Zeova siglgã sã n wa rems d sẽn wʋmd Biiblã gomd ning võor to-to, wall a sã n kõ sagls koɛɛgã mooneg wɛɛngẽ, bɩ d sake.

16. a) Bõe n na n kɩt tɩ vɩɩmã tall yamleoog arzãnã pʋgẽ? b) Bõe n na n zĩnd dũni-paalgã pʋgẽ tɩ noom yãmb n yɩɩda?

¹⁶ Neb nins fãa sẽn na n kell n sak a Zeova la a siglgã sor-wilgrã na n paama barka. Sẽn paam-b vʋʋsem sõng zaeebã na n dɩɩ naam ne a Zezi Kirist saasẽ. (Rom 8:16, 17) Sẽn saagd-b n na n vɩɩmd tẽngã zugã na n vɩɩmda wakat sẽn kõn sa arzãnã pʋgẽ. D sẽn yaa a Zeova siglgã nebã, d paam n wilgda neb a taabã tɩ Wẽnnaam pʋlma dũni-paalga. (2 Pɩɛ. 3:13) Yɩɩl Sõamyã 37:11 yeelame tɩ “sũ-maasem dãmbã na n sooga dũniyã, n maan sũ-noog laafɩ wʋsg yĩnga.” Wakat kãnga, nebã “na n mee zags n zĩnd b pʋsẽ,” la b paam “b tʋʋmã nafre.” (Ezai 65:21, 22) Wẽgbo, naong la kom pa na n le zĩnd ye. (Yɩɩl 72:13-16) Babilon-kãsengã pa na n le belg nebã ye. A pʋd n pa na n le zĩnd ye. (Wil. 18:8, 21) Sẽn ki-bã na n vʋʋgame, n tõe n paam n vɩɩmd wakat sẽn kõn sa. (Ezai 25:8; Tʋʋ. 24:15) D sã n kell n tall zood sõma ne a Zeova la d tũud a siglgã sor-wilgri, d na n wa paama bark-kãensã.

17. Bõe yĩng tɩ d segd n kell n sak a Zeova la a siglgã sor-wilgri?

¹⁷ A Sʋɩtãan dũniyã na n saa ka la bilfu. Sẽn na yɩl n põse, d segd n talla tẽeb sẽn tar pãnga, la d sakd a Zeova la a siglgã sor-wilgri. Yɩɩl-gʋlsd a Davɩɩd yeela woto: “Mam kota Zu-soabã bũmb a yembre, yaa yãoã la mam baooda. A yaa tɩ mam tõe n zĩnd Zu-soabã yir hal tɩ ta m yõor tɛka, la m ges Zu-soabã neerlmã, la m bao bãmb bãngrã bãmb doogã pʋgẽ.” (Yɩɩl 27:4) Pa woto la tõnd me rat sɩda? Bɩ d ned kam fãa kell n sak a Zeova la a siglgã sor-wilgri.