Biiblã wilgame tɩ b sẽn wa n ka a Zezi ne bi-bees a yiibã kũum ra-lugs zutã, “zʋɩf-rãmbã kosa a Pɩlat t’a kɩt tɩ b kao b sẽn ka b rãmb kũum [“da-lugs,” MN] zugã karse.”—Zã 19:31.

Zʋɩf-rãmbã tõog ra wilgame tɩ ned sã n maan wẽng tɩ b luul-a, b pa segd n “bas kũumã tɩɩgã zug yʋng ye.” (Tõodo 21:22, 23) Wõnda zʋɩf-rãmbã ra tũuda no-kãng Rom naamã wakate. B sã n da ka ned ra-luk zugu, b pa basd-a be yʋng ye. B sẽn wa n ka a Zezi ne bi-bees a yiibã, b ra rat n kaoa b karsã sẽn na yɩl tɩ b ki tao-tao, tɩ b paam n mum-b nand tɩ wĩndgã kẽ, tɩ vʋʋsg daarã sɩnge.

B sã n da na n kʋ ned ra-luk zugu, naoor wʋsgo b kaada a nusã ne a naoã ne põentse. Rẽ poore, b roogda ra-lukã t’a soabã yagẽ, t’a yĩngã zɩslem kɩt tɩ toogã paasdẽ. Sẽn na yɩl n vʋʋse, a segd n teega põentã wall põentsã b sẽn ka a naoẽ wã, n dooge. La b sã n da kao a karsã, a pa le tõe n maan dẽ ye. Toogã sã n pa kʋ-a, a sẽn pa tõe n vʋʋsã na n kɩtame t’a ki tao-tao.

Yɩɩ loaabg la a Davɩɩd tall n kʋ nin-wobg a Goliate. Wõnda yɩ a sẽn da wa n yaa bilf n gũud piisã sasa wã la a zãms loaabg lobre.—1 Sãmwɛll 17:40-50.

Pĩnd wẽndẽ wã, Ezipt la Asiiri nebã ra nong n maanda loobs desẽ-rãmb b teedã zutu. Loaabg yaa gãong wall fuug la b wãagda, n sẽb a noyã ne wĩ a yiibu. Tãb-biig fãa ra sagenda kug-saall loaabgã pʋgẽ. Kugrã bedrem zemsda orãnz-kɩdga, t’a zɩslmã zems garam 250. A yuumda loaabgã a zugẽ wã, la a bas wĩ-yɛnga, n lobg kugrã ne pãnga, tɩ yõg bɛ wã.

Aazi soolmẽ wã, tẽn-vaeesdbã bugsa loobs kug wʋsg pĩnd wẽndẽ tãb-biis sẽn tall n zabe. Tãb-biis nins sẽn mi loaabg lobr sõma wã tõe n lobame tɩ kẽng ne tʋʋlem, hal tɩ bɛ wã pa tõe n yã kugrã n kuug ye. Bãngdb kẽer yetame tɩ loaabg kugr tõe n ta zĩig ning tãp peemd sẽn tõe n ta, tɩ b taab yetẽ tɩ pa tõe ye. La yaa vẽeneg tɩ loaabg tõe n kʋʋ ned wa tãp sẽn tõe n kʋ wã.—Bʋkaoodba 20:16.