1, 2. Bõe n kɩt t’a Poll ra tõe n kʋm a tẽed-n-taas nins sẽn koms raoodã?

D TÕE n yika daar ning n mik tɩ pãng kae ye. Tõe tɩ yaa bãag n kɩt tɩ yaa toog ne-d tɩ d tʋm d tʋʋmã. La mams-y wa sẽn na n kell n yɩ woto n kaoos wʋsgo. D pa na n dat tɩ neb a taabã zoe d nimbãaneg sɩda?

² Tʋm-tʋmd a Poll ra segda zu-loees tigingã pʋgẽ, tɩ kiris-nebã bɛɛb me ra namsd-a, t’a mi n koms raoodo. Wakat ninga, a mi n tagsdame tɩ zu-loeesã yɩɩda a pãnga. (2 Kor. 1:8; 7:5) Zu-loe-kãensã fãa kɩtame t’a Poll tẽed-n-taag sã n da koms raood bɩ a tõe n kʋm-a. A yeelame: “Ãnda pãng n paoog tɩ mam dẽnd ka paooge?” (2 Kor. 11:29) A Poll maka tigingã neb ne ninsaal yĩngã wila, n yeel tɩ “yĩngã wil nins sẽn wẽnd b pãngã ka ta b taabã, n tar yõod yĩngã pʋgẽ.” (1 Kor. 12:22, Kãab-paalgã Koe-noogo) A gomdã rat n yeelame tɩ bõe? Wãn to la a Zeova get neb nins sẽn wõnd b ka pãngã? Bõe n tõe n sõng tõnd tɩ d ges d tẽed-n-taasã wa a Zeova sẽn get-b to-to wã? D sã n get  d tẽed-n-taasã wa a Zeova sẽn get-b to-to wã, wãn to la nafd tõndo?

3. Bõe n tõe n wa kɩt tɩ d pa nand saam-biis kẽere?

³ Rũndã-rũndã, neb wʋsg wẽgda ka pãng rãmbã sẽn na yɩl n paam b sẽn date. B tagsdame tɩ yaa kom-bɩɩsã ne pãng rãmbã bal vɩɩm n tar barka. D sã n pa gũusi, d tõe n wa tagsda wa dũniyã nebã. D tõeeme n wa pa nand saam-biis nins sẽn wae n dat sõngrã ye. La bõe n tõe n sõng-d tɩ d ges tigingã ned kam fãa wa a Zeova sẽn get-a to-to wã?

4, 5. a) Makr ning a Poll sẽn dɩkã wilgda tõnd bõe a Zeova sẽn get tõnd ned kam fãa to-to wã wɛɛngẽ? b) D sã n sõngd d tẽed-n-taasã, wãn to la nafd tõndo?

⁴ A Zeova nifẽ, tigingã ned kam fãa tara yõodo. Pipi Korẽnt dãmb sak 12 pʋgẽ, a Poll yeelame tɩ baa yĩngã wil nins sẽn wõnd pãn-komsem dãmb n yɩɩdã tara yõodo. (Karm-y 1 Korẽnt dãmb 12:12, 18, 21-23.) Neb nins sẽn tẽed tɩ bũmba fãa wa n bee woto tɩ pa tũ ne naand sababã kẽer yetame tɩ yĩngã tara wil sẽn pa tar yõodo. Wala makre, b ra yetame tɩ na-bi-kɛmbgã pa tar yõod ye. La bãngdbã wa n bãngame tɩ yaa na-bi-kɛmbgã n kɩt tɩ ninsaal tõe n yals tɩrgã.

⁵ Makr ning a Poll sẽn dɩkã wilgdame tɩ tigingã neb fãa tara yõodo. A Sʋɩtãan datame tɩ ninsaalbã tẽ tɩ b pa tar yõodo, la tɩ b yell pa pak a Zeova ye. (Zoob 4:18, 19) La a Zeova nanda neb nins fãa sẽn maand a raabã, n getẽ tɩ baa b rãmb nins sẽn wõnd b pa tar pãngã tara yõodo. Rẽ kɩtame tɩ d sũur noome, bala wilgdame tɩ d tara yõod d tigingã pʋgẽ, la tɩ d nafda d tẽed-n-taasã sẽn be dũniyã gill zugã. Wala makre, tẽeg-y yãmb sẽn zoe n maan bũmb n sõng y tẽed-n-taag sẽn kʋʋle. Yɩ y tẽed-n-taagã noogo. La yaa vẽeneg tɩ nafa yãmb me. Bala, d sã n sõngd d taabã, d sũur noomame. D manegd n nonga d saam-biisã, n maand sũ-mar ne-ba, la d bɩɩsd zʋg-sõma a taaba. (Ef. 4:15, 16) A Zeova ratame tɩ d ges tɩ d tẽed-n-taasã fãa tara yõodo, baa sẽn wõnd-b pa tar pãngã. Rẽ, d pa na n dat tɩ b maan sẽn yɩɩd b pãng ye. Sẽn paase, tigingã neb na n maneg n nonga taaba.

6. Bõe yĩng t’a Poll yeel tɩ kiris-neb kẽer ‘ka pãnga,’ la tɩ sãnda ‘tara pãnga’?

⁶ A Poll goma tigingã neb kẽer yelle, n yeel tɩ b yaa “dũniyã bũmb nins sẽn ka pãngã.” Bõe yĩnga? Yaa tɩ neb nins sẽn da pa tẽedbã ra geta kiris-nebã woto. Yẽ mengã mi n yetame t’a ka pãng ye. (1 Kor. 1:26, 27; 2:3) A Poll yeelame me tɩ kiris-neb kẽer ‘tara pãnga,’ la pa sẽn na yɩl tɩ b tags tɩ b são b taabã ye. (Rom 15:1) A ra rat n wilgame bal tɩ kiris-neb nins tẽeb sẽn tar pãngã segd n maana sũ-mar ne b rãmb nins tẽeb sẽn nan pa tar pãngã.

7. Bõe yĩng tɩ d mi n pa yɩt tao-tao n sõng d tẽed-n-taag sẽn tar zu-loɛɛga?

⁷ D sã n sõngd “pãn-komsem dãmbã,” d rɩkda a Zeova togs-n-taare, t’a sũur noom ne-do. (Yɩɩl 41:2; Ef. 5:1) La wakat ninga, d pa yɩt tao-tao n sõng d tẽed-n-taag sẽn tar zu-loɛɛg ye. Bõe yĩnga? D tõe n getame t’a tog n tʋka a meng zɩɩbo. D tõeeme me n pa  rat n kẽng a nengẽ, d sẽn pa mi d sẽn na n yeel bũmb ning n keng a raoodã yĩnga. Wala makre, saam-bi-poak yʋʋr sẽn boond t’a Sẽntis * sɩd n da zoe n bas-a, t’a sũur sãam wʋsgo. A yeela woto: “Saam-biisã sã n gind-fu, wall b pa maan wa zo-rãmb hakɩka, sãamda sũuri. F sã n tar zu-loɛɛga, f sẽn dat yaa neb sẽn na n be ne-fo.” Rĩm a Davɩɩd me sẽn wa n tar zu-loɛɛg t’a zo-rãmbã gind-a, a sũur sãamame.—Yɩɩl 31:13.

8. Bõe n tõe n sõng-d tɩ d zoe d tẽed-n-taasã nimbãanega?

⁸ D sã n tẽeg tɩ yaa zu-loees n kɩt tɩ d tẽed-n-taas kẽer koms raoodo, tõe n sõng-d lame tɩ d yɩ wʋmdba. Tõe tɩ yaa yam-ka-m-meng bãaga, wall bãag a to n namsd-ba, wall b vɩɩ ne neb sẽn pa a Zeova Kaset rãmba. Tõnd sã n tar zu-loe-kãensã, d na n datame tɩ d taabã zoe d nimbãanega. Tẽeg-y Israyɛll nebã yelle. B namsa Ezipt wʋsgo. La nand tɩ b kẽ kãabg tẽngã pʋgẽ, a Zeova yeel-b lame tɩ b saam-biig sã n yaa naong soab bɩ b ‘ra keng b sũur’ ne-a ye. A ra ratame tɩ b sõng naong rãmbã la nimbãan-dãmbã.—Tõo. 15:7, 11; Maan. 25:35-38.

9. D tẽed-n-taag sã n wa tar zu-loɛɛga, bõe la d segd n maane? Rɩk-y makre.

⁹ D tẽed-n-taag sã n wa tar zu-loɛɛga, d pa segd n yɩ tao-tao n ning-a taale, wall d tags tɩ d são-a lame ye. D segd n sõng-a lame. (Zoob 33:6, 7; Mat. 7:1) D rɩk makre: Ned sã n zomb montɛɛr n tɩ fão n pogl tɩ b rɩk-a n kẽng logtor-yiri, logtoɛɛmbã na n sokdame n dat n bãng sã n yaa yẽ n pa kẽn sõma sɩda? Ayo. B na n yɩɩ tao-tao n tɩp-a. Woto me, d tẽed-n-taag sã n wa tar zu-loees tɩ koms a raoodo, d yɩ tao-tao n sõng-a.—Karm-y 1 Tesalonik rãmb 5:14.

10. Bõe yĩng tɩ d tõe n yeel tɩ d tẽed-n-taas kẽer wõnda neb sẽn ka pãnga, tɩ b tẽebã yaool n tar pãng wʋsgo?

¹⁰ D tẽed-n-taas kẽer tõe n wõnda neb sẽn ka pãnga. La d sã n tags n ges b yɛlã sẽn yaa to-to wã, d bãngdame tɩ b tara pãnga. Mams-y saam-bi-poak sɩd sẽn pa a Zeova Kaset soab sẽn segd n mao to-to n kell n tũ a Zeova. Yaa woto me ne saam-bi-poak sẽn yaa a ye n wubd a kamba. Mams-y-yã a sẽn segd n modg to-to n tõog n kẽnd tigissã n pa vaandẽ. Kom-bɩɩs nins sẽn kẽnd lekollã me modgdame n sakd a Zeova, baa b karen-bi-taasã sẽn pẽdgd-b n dat tɩ b maan wẽngã. Nin-kãensã fãa nonga a Zeova, n dat n kell n sak-a ne b sũur fãa. D sã n tags d tẽed-n-taasã sẽn modg to-to n tũud a Zeova wã, d bãngdame tɩ baa b sẽn wõnd ka pãng rãmbã, b tẽebã tara pãng wʋsgo.—Zak 2:5.

11, 12. a) D tẽed-n-taag sã n wa konge, bõe n tõe n sõng-d tɩ d kell n ges-a wa a Zeova sẽn get-a to-to wã? b) Bõe yĩng t’a Zeova kõ a Aarõ sugri, la rẽ zãmsda tõnd bõe?

¹¹ Biiblã tara kibay sẽn wilgd a Zeova manesem sẽn yɩ to-to ne neb sẽn konge. D tẽed-n-taag sã n wa konge, kiba-kãens tõe n sõng-d lame tɩ d bãng d manesem sẽn segd n yɩ to-to ne-a. (Karm-y Yɩɩl Sõamyã 130:3.) Wala makre, yãmb sã n da be ne a Moiiz wakat ning a Aarõ sẽn wa n maan sãnem nag-bilã, tɩ b sok-a t’a pademdẽ wã, y manesem yɩta wãna? (Yik. 32:21-24) La y manesem da na n  yɩɩ wãn ne a Aarõ, wakat ning a sẽn kelg a tão a Miryam, tɩ b naag taab n gom a Moiiz a sẽn kẽ kãadem ne bu-zẽng pagã yĩngã? (Sõd. 12:1, 2) Sẽn paase, a Aarõ ne a Moiiz pa waoog a Zeova wakat ning a sẽn kɩt tɩ koom yi kugr pʋgẽ wã ye. Y sã n da zĩnd be, y tagsg na n yɩɩ wãna?—Sõd. 20:10-13.

¹² Yel-kãensã fãa pʋgẽ, a Zeova ra tõe n sɩbga a Aarõ zĩig pʋgẽ. La a ra miime tɩ baa a Aarõ sẽn kongã, a pa nin-wẽng ye. Wõnda yɩɩ zu-loeese, wall neb a taab pẽdgr n kɩt t’a tudgi. La a tudgr fãa poore, a sak n deegame t’a kongame, la a tũ a Zeova saglsã. (Yik. 32:26; Sõd. 12:11; 20:23-27) A Zeova gesa a Aarõ tẽebã, la a sẽn tek yam n kos sugrã. Yʋʋm wʋsg poore, b ra ket n yetame t’a Aarõ ne a yagensã yaa neb sẽn zoet a Zeova.—Yɩɩl 115:10-12; 135:19, 20.

13. D tẽed-n-taag sã n wae n tudgdẽ, wãn to la d tõe n dɩk a Zeova togs-n-taare? Rɩk-y makre.

¹³ Y sãam-biig sã n wae n tudgd wa a Aarõ, y manesem yaa wãna? Y rɩkda a Zeova togs-n-taar bɩ? (1 Sãm. 16:7) Wala makre, y tõe n getame tɩ bi-bɩɩg ning manesem pa sõma, wall t’a pa maand gũusg pemsmã kokr wɛɛngẽ ye. Ra yɩ-y tao-tao n ning-a taal ye. Ges-y y sẽn tõe n sõng-a to-to t’a bãngd n yãkd yam tɩ zemsdẽ. D sã n maand woto, d na n maneg n nonga d tẽed-n-taasã, la d maand sũ-mar ne-ba.

14, 15. a) A Eli sẽn wa n koms raoodã, a Zeova manesem yɩɩ wãna? b) A Zeova sẽn keng a Eli raood to-to wã zãmsda tõnd bõe?

¹⁴ A Zeova manesem yaa wãn ne neb nins yam sẽn ka b mensã? D ges a sẽn sõng no-rɛɛs a Eli to-to. A Eli  talla raood n kɩɩs Baal no-rɛɛsdb 450. La rẽ poore, a wʋmame tɩ rĩm-poak a Zezabɛll rat n kʋ-a lame. Rabeem yõk-a lame t’a zoe n kẽng Bɛɛr-seba sẽn be kɩlometr 150 zĩigẽ wã. A sẽn ta be, a kẽname n kẽ weoogã n zãage. Kẽndã ne wĩntoogã zabdem kɩtame t’a ya wʋsgo. A tɩ zĩnda tɩɩg tẽngre, “n pʋʋs Wẽnnaam n yeel tɩ b bas t’a ki.”—1 Rĩm 18:19; 19:1-4.

¹⁵ A Zeova sẽn wa n yã t’a no-rɛɛsã sũur sãamame t’a tagsdẽ t’a sẽn kiid n são wã, a manesem yɩɩ wãna? A yeelame t’a pa le segd n yɩ a no-rɛɛs bɩ? Ayo. A Zeova tʋma malɛk t’a tɩ keng a raoodo. Malɛkã yeel-a-la naoor a yiib t’a yik n dɩ, tɩ bala a “na n kẽna kẽn-woko.” (Karm-y 1 Rĩm dãmb 19:5-8.) A Zeova maaga a yĩng n kelg a Eli, la a maan bũmb n keng a raoodo, n yaool n wilg-a a sẽn dat t’a maane.

16, 17. Wãn to la d tõe n dɩk a Zeova togs-n-taar n sõng d tẽed-n-taasã?

¹⁶ Wãn to la d tõe n dɩk a Zeova togs-n-taar n sõng d tẽed-n-taasã? D tẽed-n-taag sã n wa tar zu-loɛɛga, d pa segd n yɩ tao-tao n kõ-a saglg ye. (Yel. 18:13) Wala makre, a sã n komsa raood wall a tagsdẽ t’a pa tar yõodo, sẽn na n naf-a n yɩɩd yaa d sẽn na n maag d yĩng n kelg-a, la d wilg tɩ d kʋmd-a lame. (1 Kor. 12:23) Rẽ la d bãngd bũmb ning sẽn namsd-a wã, n tõog n sõng-a tɩ zemse.

¹⁷ Tẽeg-y-yã a Sẽntis yelle. A sɩdã sẽn wa n zoe n bas-a ne a kom-pugli a yiibã, b sũy sãama wʋsgo. La tigingã neb kẽer sõng-b lame. Ad a Sẽntis sẽn yeele: “Tõnd sẽn bool-b telefõnnẽ n togsã, pa yã n maan minit 45 la b wa tõnd zakẽ wã ne nintãm ye. B kell n paa ne tõnd n maan rasem a yiib bɩ a tã. La b sẽn wa n mik tɩ d pa tõe n dɩ sõma, tɩ wakat fãa yaa yãbrã, b wa n talla tõnd n kẽng b zakẽ wã tɩ d zĩnd be wakat bilfu.” Kiba-kãngã tẽegda tõnd bũmb ning a Zak sẽn yeelã. A yeela woto: “Ba-biig a ye sã n be n ka tar fut ne rɩɩbo, tɩ yãmb ned a yembr yeel-a: ‘Kẽng ne laafɩ n pil la f rɩ,’ n yaool n ka kõ-a bũmb nins a sẽn datã, yãoã nafr yaa bõe? Yaa woto me ne tẽebo. A sã n ka lagem ne tʋʋma, a yaa kũum.” (Zak 2:15-17) Saam-biisã sẽn sõng a Sẽntis ne a kambã woto wã naf-b-la wʋsgo. Bala kiis a yoob poore, b tãabã fãa paama raoodo, n yɩ sõngr so-pakdba.—2 Kor. 12:10.

18, 19. a) Wãn to la d tõe n sõng neb nins raood sẽn komsã? b) D sã n sõng-ba, ãnd dãmb n nafde?

¹⁸ Ned sã n lʋɩ bãag n kaoos t’a yĩnsã sãooge, kaoosda bilf t’a yaool n paam keelem wa pĩndã. Woto me, kiris-ned sã n paam zu-loees tɩ koms a raood wʋsgo, tõe n kaoosa bilf t’a tẽebã le paam pãng wa pĩndã. Yaa sɩd tɩ sẽn koms-a raoodã segd n zãmsda Biiblã, n pʋʋsd a Zeova la a kẽnd tigissã sẽn na yɩl n keng a tẽebã. La tõnd me segd n maana sũ-mar ne-a. D wilg-a tɩ d nong-a lame, la t’a tara yõod tigingã pʋgẽ.—2 Kor. 8:8.

¹⁹ D ra tol n yĩm tɩ d sã n sõngd d taabã d paamda sũ-noog ye. Kɩtdame me tɩ d maneg n yaa wʋmdba, la neb sẽn maand sũ-mare. La pa tõnd bal n nafd ye. Kɩtdame tɩ tigingã neb maneg n nong taaba. La sẽn yɩɩd fãa, d sã n sõngd “neb nins sẽn ka pãngã,” d rɩkda a Zeova togs-n-taare. Bala, d saasẽ Ba wã nifẽ, ned kam fãa tara yõodo.—Tʋʋ. 20:35.