Sogsg Biiblã sẽn leokde
Bõe yĩng tɩ d segd n pʋʋsdẽ?
Wẽnnaam a Zeova ratame tɩ d pʋʋsd-a n wilgd-a d zu-loeese. (Luk 18:1-7) A kelgda tõndo, bala d yell pak-a lame. D Ba sẽn be saasẽ wã sẽn yeel tɩ d pʋʋs-a wã, d pa segd n pʋʋsd-a sɩda?—Karm-y Filip rãmb 4:6.
La d pa pʋʋsd Wẽnnaam d sẽn tõe n kos bũmbã yĩng bal ye. D sã n pʋʋsdẽ, sõngdame tɩ d neẽ t’a tẽra d yelle. (Yɩɩl Sõamyã 8:4, 5) D sã n wae n pelgd d pʋg n pʋʋsd Wẽnnaam, d lebgda a zoa.—Karm-y Zak 4:8.
Wãn to la d segd n pʋʋse?
Wẽnnaam pa rat tɩ d sã n na n pʋʋs bɩ yaa wa d wilgdame tɩ d mii goam ye. A leb n pa rat tɩ d togsd goam d sẽn dɩk ne zug ye. A pa yeel tɩ yaa tɩlae tɩ d wõgemde, n yĩgimdi, wall d yals yĩngr n pʋʋs ye. A sẽn datã bal yaa d pʋʋs ne d sũur fãa. (Matɩe 6:7) Wala makre, a Ann sẽn da yaa Israyɛll pagã pʋʋsa Wẽnnaam n wilg-a zu-loɛɛg a sẽn da tare. La a yellã sẽn wa n manegã, a pʋʋsa Wẽnnaam bark ne a sũur fãa.—Karm-y 1 Sãmwɛll 1:10, 12, 13, 26, 27; 2:1.
D sẽn paam n tõe n pʋʋs Naandã n wilg-a d zu-loeesã, pa noom-d sɩda? D tõe n pʋʋs-a-la bark la d pẽg-a me. Y pa ne tɩ d segd n wɩngda ne pʋʋsg sɩda?—Karm-y Yɩɩl Sõamyã 145:14-16.
