1, 2. a) Ãnda la a Zeova kaset soab ning sẽn yɩɩd a taabã fãa wã? b) A Zezi yʋʋrã võor yaa bõe, la wãn to la a tʋm tɩ zems ne a yʋʋrã?

B SẼN wa n kaood a Zezi bʋʋdã, a talla raood n yeel Zide guvɛrneer a Põos Pɩlat woto: “Yaa bõn-kãng yĩng la mam dog-yã, la yaa bõn-kãng yĩng la mam wa dũniyã n na n kɩs sɩd kaseto.” (Karm-y Zã 18:33-37.) Yʋʋm a wãn poore, tʋm-tʋmd a Poll goma a Zezi yelle, n yeel t’a ‘kɩsa kaset neer a Põos Pɩlat taoore.’ (1 Tɩm. 6:13) Dũni-kãngã sẽn be a Sʋɩtãan nugẽ tɩ nebã wʋsg kis taabã, d sã n dat n dɩk a Zezi sẽn yaa ‘kaset soab sẽn yaa tɩrg la sɩdã’ togs-n-taare, d segd n talla raoodo.—Wil. 3:14.

² A Zezi sẽn da yaa zʋɩfã, a rogame n yaa a Zeova kaset soaba. (Ezai 43:10) A pʋd n yɩɩ Wẽnnaam kaset soab ning sẽn yɩɩg a taabã fãa wã. A tʋmame tɩ zems ne yʋʋr ning Wẽnnaam sẽn kõ-a wã. Malɛkã sẽn wa n na n togs a Zezi ba-wubdg a Zozɛf t’a Maari sẽn tʋtã yaa ne vʋʋsem sõng pãngã, a yeelame: “Yẽ na n doga bi-ribla tɩ f pʋd a yʋʋr t’a Zezi. Yaa yẽ n na n fãag a nebã ne b yel-wẽnã.” (Mat. 1:20, 21) Biibl-mitbã wilgame  t’a Zezi yʋʋrã võor yaa: “A Zeova yaa Fãagda.” Sɩd me, a Zezi ra yeta “Israyɛll nebã sẽn wẽnd wa piis sẽn menemã” tɩ b tek yam n kos sugri, n paam a Zeova lohorem. (Mat. 10:6; 15:24; Luk 19:10) Yaa rẽ n so t’a ra moond Wẽnnaam Rĩungã koɛɛg ne yẽesem. Evãnzill gʋlsd a Mark yeela woto: “A Zezi kẽnga Galile n moond Wẽnnaam koe-noog n yetẽ: ‘Wakat taame, la Wẽnnaam soolem kolgame. Bɩ y tek yam n bas y yel-wẽnã n tẽ koe-noogo.’ ” (Mark 1:14, 15) Sẽn paase, a Zezi talla raoodo, n puk zʋɩf-rãmbã tũudmã taoor dãmb bãongo. Yãoã naaga bʋʋm nins sẽn kɩt tɩ b kʋ-a wã sʋka.—Mark 11:17, 18; 15:1-15.

3. A Zezi kũumã rasem a tãab poore, bõe n maane?

³ A Zezi kũumã rasem a tãab poore, yel-solemd n maane. A Zeova vʋʋg-a lame. Pa sẽn na yɩl t’a le lebg ninsaal ye. A kɩtame t’a lebg malɛka. (1 Pɩɛ. 3:18) A Zezi vẽnega a meng t’a karen-biis yã-a, n bãng t’a vʋʋgame. A vʋʋgrã raar bala, a vẽnega a meng na maan naoor a nu.—Mat. 28:8-10; Luk 24:13-16, 30-36; Zã 20:11-18.

4. A Zezi vʋʋgrã raare, a sõnga a karen-biisã tɩ b bãng bõe, la a wilgame tɩ b segd n maana bõe?

⁴ A Zezi sẽn wa n na n vẽneg a meng naoor a nu soabã t’a tʋm-tʋmdbã ne neb a taab n da tigim taaba. A sõsa ne-ba, n sõng-b tɩ b bãng tɩ Gʋlsg Sõamyã ra reng n wilgame tɩ yẽ na n kiime n lebs n vʋʋge. Rẽ poore, a wilg-b-la b sẽn segd n maane. A yeela woto: “Neb na n sɩnga Zerizalɛm n moon yam tekr ne sugr kosg la yel-wẽnã sugr koɛɛgã ne [mam] yʋʋr buudã fãa sʋka.” A paasame: “Yãmb yaa bõn-kãens kaset dãmba.”—Luk 24:44-48.

5, 6. a) Bõe yĩng t’a Zezi yeel t’a karen-biisã na n yɩɩ yẽ kaset rãmba? b) B segd n mooname n wilg nebã bõe?

⁵ Rasem 40 a Zezi vʋʋgrã poore, a vẽnega a meng t’a tʋm-tʋmdbã yã-a b yaoolem soaba. Yaa vẽeneg tɩ so-kãngã, a tʋm-tʋmdbã wʋma a sẽn da yeel tɩ b segd n mooname wã võore. Bala, a yeel-b-la woto: ‘Yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.’ (Tʋʋ. 1:8) A Zezi karen-biisã sẽn da yaa Israyɛll nebã, b ra zoe n yaa a Zeova kaset rãmba. La a gomdã wilgdame tɩ b segd n yɩɩ yẽ kaset rãmb me. Bõe yĩng t’a yeel woto?

⁶ B ra segd n mooname n wilg tɩ yaa a Zezi maasem yĩng la a Zeova fãagd ãdem-biisã. Fãag-kãng yõod yɩɩda a sẽn da fãag Israyɛll nebã pĩnd wẽndẽ wã. A Zezi Kirist kũumã la a vʋʋgrã paka sor tɩ ninsaalbã tõe n paam b mens ne yel-wẽndã la kũumã. Yʋʋmd 33 Pãntekotã daare, a Zezi karen-biisã paama vʋʋsem sõngã zaeebo, n moon n wilg “Wẽnnaam tʋʋm-kãsemsã.” Neb nins sẽn kelgã wʋsg teka yam n tẽ a Zezi maoongã. Rẽ tɛka, a Zezi zĩ a Ba wã rɩtgo, t’a Zeova fãagd neb tusa tẽngã zug a yʋʋrã maasem yĩnga.—Tʋʋ. 2:5, 11, 37-41.

7. Bũmb nins sẽn maan yʋʋmd 33 Pãntekotã daarã wilgda bõe?

⁷ Bũmb nins sẽn maan yʋʋmd 33 Pãntekotã daarã wilgdame t’a Zeova saka a Zezi maoongã sẽn zems zãngã, tɩ tõe n lud yel-wẽnã. (Heb. 9:11, 12, 24) A Zezi meng ra yeelame tɩ ‘yẽ ka wa tɩ neb sõng-a ye, a waame n na n sõng nebã, la a kõ a vɩɩm tɩ yao neb wʋsg yĩnga.’ (Mat. 20:28) Yaa zʋɩf-rãmbã bal la a Zezi maoongã nafd bɩ? Ayo. A Zezi maoongã ‘yiisda dũniyã yel-wẽnã.’ Wẽnnaam ‘datame tɩ nebã fãa paam fãagre.’—Zã 1:29; 1 Tɩm. 2:4-6.

8. Bõe n sõng a Zezi pipi karen-biisã tɩ b kell n moon koɛɛgã, la bõe la b tõog n maane?

⁸ A Zezi pipi karen-biisã kell n moona koɛɛgã ne raoodo. Bõe n sõng-ba? B ra pa teeg b mens ye. B pʋʋsa a Zeova n kos a vʋʋsem sõngã, n paam raood n kell n moone. (Karm-y Tʋʋm 5:30-32.) Yʋʋm 27 a Zezi karen-biisã sẽn sɩng moonegã poore, b tõog n moona “Koe-noog sẽn yaa sɩd koɛɛgã” zʋɩf-rãmbã la bu-zẽmsã neb “dũniyã fãa.”—Kol. 1:5, 23.

9. Bõe n wa n maan kiris-nebã sʋka?

⁹ Zu-bʋko, kiris-neb n wa n zãmsd b taabã sẽn pa sɩda. (Tʋʋ. 20:29, 30; 2 Pɩɛ. 2:2, 3; Ziid 3, 4) Bilf-bilfu, sɩdã kɩɩsg paama pãng tigimsã fãa pʋsẽ. A Zezi reng n wilgame tɩ sɩdã kɩɩsg na n talla pãnga, hal n tãag “dũniyã sɛɛb wakate.” (Mat. 13:37-43) Yʋʋmd 1914 zĩ-likr kiuugã, a Zeova kɩtame t’a Zezi lebg a Rĩungã Rĩma. Wakat kãng la a Sʋɩtãan dũniyã ‘yaoolem wakat’ sɩng-yã.—2 Tɩm. 3:1.

10. a) Sẽn paam-b vʋʋsem sõng zaeebã ra moondame n yetẽ tɩ bõn-kãseng n na n maan yʋʋm-bʋgo? b) Bõe n maan yʋʋmd 1914 zĩ-likr kiuugã, la bõe n wilgd rẽ?

¹⁰ Yʋʋm 30 la zak nand tɩ yʋʋmd 1914 ta, kiris-neb nins sẽn paam vʋʋsem sõng zaeebã bãngame tɩ yʋʋm-kãng zĩ-likr kiuugã, bõn-kãseng n na n maane, n da moond  n wilgd nebã. Yaa a Daniɛll bãngr-gomd la b tik n bãng rẽ. Bãngr-gomdã goma tɩ-wok b sẽn keeg n lub yelle, tɩ “wakat a yopoe” sã n loog bɩ a na n le tobe. (Dan. 4:13) A Zezi sẽn wa n gomd yẽ waoongã la ‘dũniyã sɛɛb wakat’ yellã, a boola “wakat a yopoe” wã tɩ ‘bu-zẽmsã wakate.’ Yʋʋmd 1914 tɛka, yɛlã sẽn yaa to-to dũniyã zugã wilgdame t’a Zeova kɩtame t’a Zezi lebg Rĩma. (Mat. 24:3, 7, 14; Luk 21:24) Yʋʋm-kãng tɛka, koe-kãng naaga “Wẽnnaam tʋʋm-kãsemsã” d sẽn moondã sʋka.

11, 12. a) Bõe n maan yʋʋmd 1919 wã? b) Bõe n lebg vẽeneg yʋʋmd 1935 wã? (Ges-y sõsgã sɩngrẽ fotã.)

¹¹ A Zezi Kirist sẽn lebg Rĩmã poore, a maana bũmb toor-toor n fãag a karen-biis nins sẽn paam vʋʋsem sõng zaeebã “Babilon-kãsengã” yembd pʋgẽ. (Wil. 18:2, 4) Yʋʋmd 1919 wã, dũni gill pipi zabrã loogr poor bilfu, sẽn paam-b vʋʋsem sõng zaeebã paama lohorem n na n moon dũniyã gill zugu. B mooname n wilg bũmb nins Wẽnnaam sẽn maan n na n fãag ãdem-biisã. Sẽn paase, b wilgame t’a Rĩungã sɩnga naam rɩɩbo. Woto kɩtame tɩ neb tusa bãng Wẽnnaam la a raabã, n paam vʋʋsem sõngã zaeeb n na n tɩ rɩ naam ne Kiristã saasẽ.

¹² Yʋʋmd 1935 wã, lebga vẽeneg tɩ Kiristã sɩnga a “piis a taabã” tigingu. Rũndã-rũndã, a Zezi piis a taabã yaa neb milyõ-rãmb n be dũniyã gill zugu. Bãmb ne sẽn paam-b vʋʋsem sõng zaeebã rɩkda a Zezi togs-n-taare, n moond koɛɛgã ne raoodo. Piis a taabã me tẽedame tɩ yaa a Zezi maoongã maasem yĩng bal la Wẽnnaam fãagd-ba. B miime tɩ b sã n kell n moon koɛɛgã la b kell n ta Wẽnnaam yam, b na n wa põsa “to-kãsengã” sasa, n vɩɩmd dũni-paalgã pʋgẽ.—Zã 10:16; Wil. 7:9, 10, 14.

13. D sẽn yaa a Zeova Kaset rãmbã, bõe la d rat n kell n maane, la wãn to la d tõe n dɩk pipi kiris-nebã togs-n-taare?

¹³ D sẽn paam n moond n wilgd nebã “Wẽnnaam tʋʋm-kãsemsã” la bũmb nins a sẽn pʋlem tɩ watẽ wã yaa zu-zẽkre. La pa wakat fãa la yaa nana ye. Neb kẽer pa rat n kelge, tɩ sãnda yaand tõnd wall b namsd tõndo. Sã n wa yaa woto, bɩ d tẽeg tʋm-tʋmd a Poll ne a tũud-n-taasã  yelle. A yeela woto: “Baa neb wʋsg sẽn kɩɩsã, tõnd Wẽnnaam kõo tõnd daood tɩ d togs yãmb bãmb Koe-noogã.” (1 Tes. 2:2) Bɩ d ra koms raood ye. D sẽn dat yaa d kell n yɩ a Zeova Kaset rãmba, n moond koe-noogã, t’a Sʋɩtãan dũniyã me rabd a sãoong zĩigẽ. (Ezai 6:11) D pa segd n teeg d mens ye. D rɩk pipi kiris-nebã togs-n-taare, n pʋʋs a Zeova n kos a vʋʋsem sõngã, n paam pãng ning a sẽn kõtã.—Karm-y 2 Korẽnt dãmb 4:1, 7; Luk 11:13.

14, 15. a) Nebã manesem da yaa wãn ne pipi kiris-nebã, la bõe la tʋm-tʋmd a Pɩɛɛr yeel-ba? b) B sã n wa namsd tõnd d sẽn yaa a Zeova Kaset rãmbã yĩnga, bõe la d segd n tẽege?

¹⁴ Rũndã-rũndã neb milyõ-rãmb n yet tɩ b yaa kiris-neba, la “ne bãmb tʋʋma, bãmb kɩɩsda Wẽnnaam. Bãmb yaa wẽns tɩ looge, la nin-kɩɩsdba, la neb sẽn ka mi tʋʋm-sõma maaneg ye.” (Tɩt 1:16) D tẽeg tɩ pipi kiris-nebã wakate, neb wʋsg ra kis-b lame. Rẽ n so tɩ tʋm-tʋmd a Pɩɛɛr yeel-b woto: “Bark bee yãmb zutu, neb sã n gomd yãmb wẽng Kirist yʋʋrã yĩnga, tɩ bõe, Wẽnnaam . . . Sɩɩgã bee yãmb zutu.”—1 Pɩɛ. 4:14.

¹⁵ Nebã gomda a Zeova Kaset rãmbã me ‘wẽng Kirist yʋʋrã yĩng’ bɩ? N-ye. Bala d pa gomd a Zeova yell bal ye. D gomda a Zezi yell me, n wilgd nebã t’a yaa Wẽnnaam Rĩungã Rĩma. A Zezi meng sẽn da gomd a Zeova yellã kɩtame tɩ b nams-a. A yeela a kɩɩsdbã woto: “Mam waa ne m Ba yʋʋre, la yãmb ka reeg maam ye.” (Zã 5:43) Rẽnd b sã n wa namsd yãmb koe-moonegã yĩnga, y pa tog n koms raood ye. Bala, wilgdame tɩ y tata Wẽnnaam yam, la t’a vʋʋsem sõngã be ne-yã.

16, 17. a) Tẽns wʋsg pʋsẽ, bi-bʋs la a Zeova Kaset rãmbã koe-moonegã womda? b) Bõe la y rat n kell n maane?

¹⁶ Tẽeg-y me tɩ tẽns wʋsg pʋsẽ, a Zeova Kaset rãmbã sõor paasdame. Baa tẽns nins pʋsẽ d sẽn moond wʋsgã, d ket n segda neb sẽn dat n kelg koe-noogã. D sã n seg ned sẽn sak n kelg bɩ d lebg n tɩ ges-a, t’a sã n dat bɩ d zãms-a Biiblã. Woto la d na n tõog n sõng-a t’a wa rɩk a meng n kõ Wẽnnaam n deeg lisgu. D sã n maand woto, d paamda sũ-noogo. Wala makre, a Sari vɩɩ Afirikdisiide, n yaa a Zeova Kaset soabã na maan yʋʋm 60 la zaka. Ad a sẽn yeele: “Ne a Zezi maoongã maasem, m yaa a Zeova sẽn yaa yĩngr la tẽng naabã zoa. Woto noom-m-la wʋsgo. Mam sẽn tõe n sõng nebã tɩ b bãng a yʋ-kãsengã noom-m lame me.” Yẽ ne a sɩd a Martinɛs sõnga b kamb a tãabã ne neb a taab tɩ b lebg a Zeova Kaset rãmba. A paasame tɩ tʋʋmd a to ka be n wat ne sũ-noog n ta koe-moonegã, la t’a Zeova kõta tõnd a vʋʋsem sõngã tɩ d tar raoodo, n ket n moond fãagr koɛɛgã.

¹⁷ Y reega lisg n yaa a Zeova Kaset soab tɩ y modgdame n na n wa reeg lisg me, y sũur segd n yɩɩ noog y sẽn paam n tigimd ne a Zeova Kaset rãmbã. Bɩ y kell n moon koɛɛgã ne yẽesem, la y kell n yɩ yɩlem bũmbã fãa pʋgẽ, t’a Sʋɩtãan dũniyã ra rẽgm-y ye. D sã n maan woto, waoogda d saasẽ Ba a Zeova, bala d gomda a yʋʋrã yĩnga.