Y SÃ N tara kamba, yel-kãensã buud zoe n paam-y lame bɩ? Y biig sã n wa maan woto, y sokda y meng y sẽn tõe n kibl-a to-to, wall y sã n segd n kibl-a lame bɩ? Zemsame tɩ y sɩbg y biig bɩ?

Biiblã pʋgẽ, b sã n gomd kiblg yelle, pa sɩbgr yell bal la b gomd ye. B gomda zãmsgo, saglg la remsg yell me. Rẽnd kibl f biig pa rat n yeel tɩ f nams-a ye.—Yelbũna 4:1, 2.

Biig wubr yaa wa zẽed koobo. Zẽedã soab na n koo zẽedã zĩiga, n zãgs koom la a ning birga. A na n puusa tɩɩm sẽn na yɩl tɩ zũnzũy ra wãbe, la a võ moodã. Sã n yaa tɩɩs kẽer la a sel-yã, b sã n wa bɩtẽ, tõe n yɩɩ tɩlae t’a yolem sẽn na yɩl tɩ tees tɩrg wa a sẽn datã. Zẽedã soab miime tɩ yaa a sẽn na n maan woto fãa la zẽedã wall tɩɩgã na n yɩ sõma. Roagdbã me maanda bũmb toor-toor n get b kambã yelle. La wakat ninga, biig sã n tar manesem sẽn pa sõma, yaa tɩlae t’a roagdbã kibl-a n dems-a pĩnda, wa b sẽn yolemd tɩɩg sẽn na yɩl t’a tees tɩrgã. La ned sã n na n yolem tɩɩga, a na n gũusame n da wa maan tɩ loog ye. Woto me, roagdbã segd n kibinda b kambã ne bʋgsem.

Wẽnnaam a Zeova kõo roagdbã mak-sõng kiblgã wɛɛngẽ. A kibinda neb nins sẽn tũud-a wã sõma tɩ nafd-ba, hal tɩ Biiblã yeel tɩ b ‘nonga saglg’ bɩ kiblgu. (Yelbũna 12:1) La tɩ b sakda zãmsg bɩ kiblgu, n pa basd-a ye. (Yelbũna 4:13) Y sã n dɩk Wẽnnaam togs-n-taar kiblgã wɛɛngẽ, tõe n sõnga y biigã t’a sake. A sẽn kibind a nebã to-to wã wɛɛngẽ, bũmb a tãab yell la d na n gome: 1) a maanda rẽ ne bʋgsem, 2) a yaa wʋmda, la 3) a pa toeemd a gomd ye.

Yaa Wẽnnaam sẽn nong a nin-buiidã yĩng la a sẽn kibind-bã. Biiblã yetame: ‘Zu-soabã sɩbgda b sẽn nong a soab wa ned sẽn sɩbgd a bi-nongre.’ (Yelbũna 3:12) Sẽn paase, a “yaa nimbãan-zoeta,” t’a “sũur ka yikd tao-tao ye.” (Yikri 34:6) Rẽ n so t’a pa na n sɩbg ned ne toolem, a pa na n tʋ neda, n gom-a wall a yaal-a ye. Bala, goam a woto “zabda wa sʋʋg sẽn wãag neda.”—Yelbũna 12:18.

La roagd ka be n tõe n dɩk Wẽnnaam togs-n-taar kɛpɩ yõk-m-mengã wɛɛngẽ ye. Wakat ninga, y biig tõe n maana bũmb tɩ yaa toog tɩ y yõk y menga. La tẽeg-y tɩ y sã n sɩbg-a ne sũ-yikri, pa na n naf-a ye. Na n nams-a lame bala. Sẽn paase, sɩbg f biig ne sũ-yikr wall sũ-toog pa kiblg ye. F wilgame bal tɩ f pa tõog f meng ye.

La y sã n yõk y meng n kibl y biigã ne bʋgsem, na n naf-a lame. Bɩ d ges a Zorz ne a Nikoll sẽn maan rẽ to-to. D goma b yell sõsgã sɩngrẽ.

A Zorz yeelame: “A Zordan sẽn wa n wa wã, maam ne m pagã fãa sũur da puudame, la d yõka d mens n kelg-a. Zĩigã sẽn da zʋʋgã kɩtame tɩ d yãk yam n na n bas tɩ beoogã vẽeg tɩ d yaool n gom rẽ yelle. D naaga taab n pʋʋse, la d kẽ n gãande. Vẽkembeoogã, d sũurã sigame, tɩ d tõog n maag d yĩns n sõs ne d biigã tɩ kẽ-a. A sak n deegame t’a kongame, la a wilg t’a na n wata pĩnd masã. D bãngame tɩ d sã n yɩ tao-tao n gom ne sũ-yikri, pa manegd yellã ye. La d sã n deng n maag d yĩng n kelg d biiga, sõngdame.”

A Nikoll yeelame: “Mam bi-riblã sẽn maan a tãoã bũmb ningã yika m sũur wʋsgo. La zĩig pʋgẽ, m yeel-a lame t’a kẽ roogẽ, bala sũ-yikrã ra kɩtame tɩ m pa mi m sẽn maandg ye. M sũur sẽn wa n sigi, m wilg-a-la vẽeneg tɩ nen-kɛglmã ka sõma, la t’a pogl a tãoã. M sẽn maan woto wã sõng-a lame. A kosa a tãoã sugr la a mobg-a.”

Rẽnd y sã n dat n kibl biig tɩ zemse, baa sã n wa yaa tɩlae tɩ y sɩbg-a, segd n yɩɩ ne nonglem.

Wakat fãa, a Zeova kibinda a nebã “ne tɩrlem.” (Zeremi 30:11; 46:28) A rengd n gesa  yɛlã sẽn sɩd yaa to-to wã, baa bũmb nins sẽn pa vẽeneg nif gesg pʋgẽ wã. Wãn to la roagdbã tõe n dɩk a togs-n-taare? A Etɩɛn yeela woto: “A Natali sẽn da kɩɩsd t’a pa zuk nug-bĩngã sãama d sũur wʋsgo. La d tagsa a yʋʋmã sẽn paoodã yelle, n tẽeg t’a pa wʋmd yɛlã võor sõma ye.”

A Nikoll sɩd a Robɛɛr me modgd n geta yɛlã sẽn yaa to-to wã. A biig sã n maan bũmb sẽn pa segde, a sokda a meng woto: ‘Yaa bũmb a sẽn maan vugr bɩ, bɩ yaa minungu? A yaame bɩ, bɩ yaa a bũmb n zabde? Yaa zu-loɛɛg la a tar bɩ?’

Roagd sẽn yaa wʋmd miime tɩ kambã sẽn tagsd to-to wã yaa toor ne kãsembã. Tʋm-tʋmd a Poll goma rẽ yelle, n yeele: “Mam sẽn da yaa biigã, mam goamã ne m tagsgã la m yamã ra yaa biig rẽnda.” (1 Korẽnt dãmba 13:11) A Robɛɛr yeelame: “M mi n tẽegda m sẽn da maand to-to m yãadmẽ wã, tɩ sõngd-m tɩ m tagsd neere, n pa maandẽ tɩ loog nug ye.”

Y segd n yɩɩ wʋmda, la pa rat n yeel tɩ y bas y biigã t’a maand bũmb sẽn pa segd ye. Y sã n tagsd y biigã sẽn wʋmd yɛlã võor to-to wã yelle, a pãn-komsmã, la yɛl a taab yelle, y na n wilgame tɩ y yaa wʋmda, n kibl-a tɩ zemse.

A Zeova yeela Malaki 3:6 pʋgẽ tɩ ‘yẽ ka tekd ye.’ Wẽnnaam nin-buiidã kɩsa sɩd ne gom-kãensã, tɩ b yam gãe bãane. Kiblgã wɛɛngẽ, roagdbã me sã n pa toeemd b gomde, nafda b kambã. La y sã n mi n toeemd y noore, tõe n kɩtame tɩ kambã pa mi b sẽn maandga, wall yik b sũuri.

Tẽeg-y t’a Zezi yeela woto: “Bɩ yãmb goamã yɩ n-yẽe, n-yẽe, wall ayo, ayo.” Roagdbã segd n tũu sagl-kãngã kambã kiblgã wɛɛngẽ. (Matɩe 5:37) Ra gom-y sẽn na yɩl n yɛɛs biigã bal ye. Y sã n wilg bũmb a sẽn pa segd n maane, n yeel t’a sã n maane y na n sɩbg-a lame, a sã n kɩɩs bɩ y sɩbg-a.

Ba wã ne ma wã sã n dat n kibl b kambã sõma, b segd n yẽsda ne taaba. A Robɛɛr yeelame: “Tõnd kambã sã n yã b ma n kos bũmb t’a zãgse, b tõe n wa maana sɩlem ne maan tɩ m sake. La m sã n wa bãng tɩ b ma ra zãgsame, ma-me zãgsdame sẽn na yɩl n teel m pagã.” Roagdbã sã n pa wʋm taab yell ning poorẽ, yita sõma tɩ b bao n wʋm taaba, la b pa segd n maan dẽ kambã taoor ye.

Y sã n dɩk a Zeova togs-n-taar n kibind y kambã ne bʋgsem, n yaa wʋmd la y pa toeemd y gomde, y tõe n kɩsa sɩd tɩ na n naf-b lame. Rẽ tõe n sõng-b lame tɩ b wa yɩ kãsemb sẽn tar yam la sẽn tõe n zã b mense. Sɩd me, Biiblã yeela woto: “Zãms biig a manesem sẽn tog n yɩ to-to. La a sã n lebg nin-kẽema, a ka na n bas-b ye.”—Yelbũna 22:6.