Yãmb paamda sõngr “wa sẽn zemse,” tɩ y tẽebã ket n tar pãng bɩ?
RŨNDÃ-RŨNDÃ, vɩɩmã lebga toog n yɩɩd pĩndã hal zĩig sẽn zãre. (2 Tɩm. 3:1-5) D sẽn nong a Zeova la d rat n tũ a noyã ne d sũur fãa wã kɩtame tɩ d segd zu-loees beoog sẽn vẽeg fãa. A Zezi ra mii rẽ, n pʋlem a karen-biisã t’a na n sõng-b lame tɩ b tõog toog n tãag dũniyã saabo. (Mat. 24:3, 13; 28:20) A yeelame t’a ra na n yãka tʋm-tʋmd sẽn tũud sɩda, t’a sõng-b ‘wa sẽn zems’ tɩ b tẽebã kell n tall pãnga.—Mat. 24:45, 46.
Yɩɩ yʋʋmd 1919 wã la a yãk tʋm-tʋmd sẽn tũud sɩdã. Rẽ tɛka, tʋm-tʋmdã yiisda sɛb la bũmb a taab buud-goam toor-toor pʋsẽ, n sõngd Wẽnnaam nebã tɩ b tẽebã ket n tar pãnga. (Mat. 24:14; Wil. 22:17) La a sɛb kẽer bee buud-gomd ning pʋgẽ, n pa be buud-gomd a to pʋgẽ ye. Sẽn paase, pa nebã fãa n tõe n kẽ ẽntɛrnetã pʋgẽ n ges bũmb nins sẽn be jw.org pʋgẽ wã ye. Video-rãmb la sõss kẽer yaool n bee be bala. Woto rat n yeelame tɩ neb kẽer pa paamd sõngr tɩ sek b tẽebã na kell n tall pãng bɩ? Sẽn na yɩl n paam sok-kãngã leoore, d na n goma bũmb a naas yelle.
1. Bõe la a Zeova kõ tõnd sẽn na yɩl tɩ d tẽebã kell n tall pãnga?
A Sʋɩtãan sẽn wa n mak a Zezi n yeel t’a kɩt tɩ kugã lebg burã, a Zezi yeela woto: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Mat. 4:3, 4) A Zeova kɩtame tɩ b gʋls a goamã tɩ be Biiblã pʋgẽ. (2 Pɩɛ. 1:20, 21) Rẽnd yaa Biiblã la a Zeova kõ tõnd sẽn na yɩl tɩ d tẽebã kell n tall pãnga.—2 Tɩm. 3:16, 17.
A Zeova siglgã yiisa Biibl b sẽn boond tɩ Traduction du monde nouveau. A tõrã bɩ a pʋɩ-sʋk bee buud-goam 120 la zak pʋgẽ. Yʋʋmd fãa, b yiisd-a-la buud-goam a taab pʋsẽ n paasdẽ. Traduction du monde nouveau wã toor sẽn ka be, sigls a taab n yiis Biiblã tõr bɩ a pʋɩ-sʋk bãmb milyaar-dãmba. Biibl kãens bee buud-goam tusa pʋsẽ. Rẽ zemsa ne a Zeova raabã. Bala, a “datame tɩ nebã fãa paam fãagr la b bãng sẽn yaa sɩda.” (1 Tɩm. 2:3, 4) “Bõn-naandg ka be sẽn solg ne [a Zeova] ye.” Rẽnd d tõe n kɩsa sɩd t’a na n sõnga “tɩrlem kom la ko-yũud sẽn tar-b rãmbã” tɩ b wa a siglgã pʋgẽ, la a kell n sõng-b tɩ b tẽebã paam pãnga.—Heb. 4:13; Mat. 5:3, 6; Zã 6:44; 10:14.
2. Wãn to la tõnd sɛbã sõngd-d tɩ d tẽebã ket n tar pãnga?
Ned sã n karemd Biiblã bala, pa sek a na paam tẽeb sẽn tar pãng ye. A segd n wʋma bũmb ning a sẽn karemdã võore, la a modg n tũ. (Zak 1:22-25) Pipi kiris-nebã wakate, Etiopi ned a yembr n sak n deeg rẽ. A ra karemda Wẽnnaam Gomdã, tɩ koe-moond a Filip kolg n sok-a woto: “Yãmb wʋmda yãmb sẽn karemdã võor sɩda?” T’a leoke: “Mam na n yɩɩ wãn n bãng tɩ ned ka wilg maam?” (Tʋʋ. 8:26-31) A Filip sõnga Etiopi nedã t’a wʋm Wẽnnaam Gomdã võore. Rẽ yɩ-a-la noogo, hal t’a yãk yam n deeg lisgu. (Tʋʋ. 8:32-38) Woto me, tõnd sɛbã sõng-d lame tɩ d wʋm Biiblã sẽn yetã võor sõma. D sã n karemd-ba kẽeda d sũurã, tɩ d rat n tũ bũmb ning d sẽn zãmsdã.—Kol. 1:9, 10.
D sɛbã pʋsẽ, d paamda bũmb wʋsg sẽn tõe n sõng-d tɩ d tẽebã kell n tall pãnga. (Ezai 65:13) Wala makre, Gũusg Gasgã b sẽn yiisd buud-goam 210 la zak pʋgẽ wã bilgda Biiblã bãngr-goam võore, a sõngd-d lame tɩ d wʋmd Biiblã goam võor n paasdẽ, la a kɩtdẽ tɩ d rat n tũ Biiblã saglsã. Réveillez-vous ! wã b sẽn yiisd na maan buud-goam 100 pʋgẽ wã sõngda tõnd tɩ d bãngd bũmb kẽer a Zeova sẽn naane, la a wilgd d sẽn tõe n tũ Biiblã sagls to-to. (Yel. 3:21-23; Rom 1:20) Tʋm-tʋmd sẽn tũud sɩdã yiisda sɛb buud-goam 680 la zak pʋgẽ. Yãmb baooda sẽk n karemd Biiblã daar fãa bɩ? Yãmb karemda seb-paalã fãa b sẽn yiisd yãmb buud-gomdã pʋgẽ wã bɩ?
Sɛbã toor sẽn ka be, a Zeova siglgã segenda sõss sẽn tik Biiblã zugu, tɩ b wegsdẽ tɩ d kelgd tigissã la tigis-kãsemsã sasa. Sõssã, teyatr-dãmbã, mak-n-wilg la bool-n-sogsã y sẽn paamd tigis-kãens sasa wã pa noom-y sɩda? Vẽenega, a Zeova kõt-d-la bũmb wʋsg sẽn sõngd-d tɩ d tẽebã ket n tar pãnga, tɩ d sũur noome.—Ezai 25:6.
3. Tõnd sɛbã fãa sã n pa be yãmb buud-gomdã pʋgẽ, rat n yeelame tɩ y pa paamd sõngr tɩ sek y tẽebã na kell n tall pãng bɩ?
Ayo. Sẽn paase, d sẽn ne tɩ kiris-neb kẽer paamda sɛb b taabã sẽn pa tarã pa segd n ling-d ye. Bõe yĩnga? Tẽeg-y-yã a Zezi tʋm-tʋmdbã yelle. A Zezi wilga nin-kãensã bũmb kẽer a sẽn pa wilg a karen-biis a taabã ye. (Mark 4:10; 9:35-37) La bãmb me paama bũmb nins sẽn da yaa tɩlae sẽn na yɩl tɩ b tẽebã kell n tall pãnga.—Ef. 4:20-24; 1 Pɩɛ. 1:8.
D tẽeg me tɩ pa a Zezi goamã fãa, la bũmb nins a sẽn maanã fãa la b gʋls evãnzil-dãmbã pʋsẽ ye. Tʋm-tʋmd a Zã yeelame: “Bũmb wʋsg keta a Zezi sẽn da maane. B sã n gʋls bãmb fãa yembr-yembre, mam tẽedame tɩ dũniyã ka na n yã weer n deeg seb nins b sẽn na n gʋlsã ye.” (Zã 21:25) Pipi kiris-nebã ra mi bũmb wʋsg a Zezi zug n yɩɩd tõndo. La rẽ pa sãamd d sũur ye. A Zeova kɩtame tɩ d tõe n bãng a Zezi tɩ sek d na tõog n dɩk a togs-n-taare.—1 Pɩɛ. 2:21.
Tags-y lɛta nins tʋm-tʋmdbã sẽn gʋls n tool pipi kiris-nebã tigimsã me yelle. D miime tɩ lɛtr la a Poll gʋls tɩ pa be Biiblã pʋgẽ ye. Tõe tɩ pa yɩ lɛt-kãng bal ye. (Kol. 4:16) Tõnd sẽn pa mi bũmb ning sẽn be lɛt-kãng pʋgẽ wã kɩtame tɩ d tẽebã pa tõe n tall pãng bɩ? Ayo. A Zeova sẽn mi tõnd sẽn datã, a kõ-d-la bũmb nins sẽn yaa tɩlae sẽn na yɩl tɩ d tẽebã tall pãngã.—Mat. 6:8.
A Zeova sẽn mi tõnd sẽn datã, a kõ-d-la bũmb nins sẽn yaa tɩlae sẽn na yɩl tɩ d tẽebã tall pãngã
A Zeova sẽn mi tõnd sẽn datã, a kõ-d-la bũmb nins sẽn yaa tɩlae sẽn na yɩl tɩ d tẽebã tall pãngã
Rũndã-rũndã, a Zeova Kaset rãmb kẽer paamda sɛb b taabã sẽn pa tare. Tõe tɩ siglgã sɛb nins sẽn be yãmb buud-gomdã pʋgẽ wã sõor pa waoog ye. Sã n yaa woto bɩ y ra tags t’a Zeova pa get y yell sõma ye. Karemd-y sɛb nins y sẽn tarã, tɩ sã n tõe bɩ y kẽnd tigims nins pʋsẽ b sẽn gomd yãmb buud-gomdã. Y sã n maand woto, a Zeova na n sõng-y lame tɩ y tẽebã kell n tall pãnga.—Yɩɩl 1:2; Heb. 10:24, 25.
4. Yãmb sã n pa tõe n paam bũmb nins sẽn be jw.org pʋgẽ wã, y tẽebã pãng na n boogame bɩ?
Tõnd sit wɛɛbã pʋgẽ, b ningda Gũusg Gasgã la Réveillez-vous ! wã, n paas sɛb a taaba. D yãta sagls sẽn kẽ-b kãadmã yĩnga, sẽn tar-b kom-bõonegã, la kom-bɩɩsã yĩng me. Neb kẽer naagda taab n sõsd rẽ zug b zak pʋgẽ Biibl zãmsgã sasa. La bũmb a taab n be sitã pʋgẽ. Wala makre, Gileaad lekollã la siglgã yʋʋmd fãa tigsgã kibaya, n paas kibay sẽn wilgd sabab-wẽns sẽn paam d tẽed-n-taase. B mi n gomda neb sẽn tik laloa wã n namsd d tẽed-n-taas me yelle, wall bʋ-kaoodb sẽn kõ d tẽed-n-taas bʋʋm yelle. (1 Pɩɛ. 5:8, 9) Tõnd sit wɛɛbã sõngda koɛɛgã mooneg pʋgẽ me. A maasem yĩnga, koe-noogã tata tẽns b sẽn gɩdg a Zeova Kaset rãmbã tũudum menga.
La y tõe n paama bũmb nins sẽn be tõnd sit wɛɛbã pʋgẽ tɩ y pa tõe n paam me, y tẽebã tõe n kell n talla pãnga. Tʋm-tʋmdã yiisa sɛb wʋsg sẽn tõe n sõng-y-yã. Rẽnd y pa segd n tags tɩ yaa tɩlae tɩ y ra ordinatɛɛr sẽn na yɩl n paamd bũmb nins sẽn be jw.org pʋgẽ wã ye. Kẽer sã n yã bũmb tõnd sit wɛɛbã pʋgẽ n tagsdẽ tɩ tõe n nafa ned b sẽn mi t’a pa tar ordinatɛɛre, b ẽnprimdame n tɩ kõ a soabã. La pa tɩlae tɩ tigimsã maand woto ye.
A Zezi pʋlmame t’a na n sõng-d lame tɩ d tẽebã kell n tall pãnga. D sẽn ne t’a maanda woto wã pa noom-d sɩda? D tõe n kɩsa sɩd t’a Zeova na n kell n sõng-d-la ‘wa sẽn zems’ tɩ d tẽebã kell n tall pãnga, hal n tãag dũniyã saabo.
