1, 2. a) Bõe ne bõe la Wẽnnaam naan n kõ a Ãdma? b) Bõe yĩng tɩ Wẽnnaam naan pag n kõ a Ãdma? (Ges-y fotã sẽn be yĩngrã.)

A ZEOVA pa naan tẽngã zaalem yĩng ye. A “naan-a lame tɩ neb zĩnd a zugu.” (Ezai 45:18) A naana d yaab a Ãdem t’a ra zems zãnga, n ning-a Edɛn sẽn da yaa zĩ-neer sẽn tar tɩɩs wʋsgo, kʋɩls la rũms buud toor-toorã. La bũmb n da paoog a Ãdem. A Zeova wilga sẽn yaa bũmb ningã. A yeelame: “A ka neer tɩ ninsaal zĩnd a yembr ye. Mam na n maana sõngd sẽn zems ne yẽ n kõ-a.” Wẽnnaam kɩtame tɩ gõeem yõk a Ãdem t’a gũs sõma, t’a yãk a sĩif a ye, n naan paga. A Ãdem sẽn wa n nek n yã pagã, a sũur yɩɩ noog wʋsgo, t’a yeele: “Masã, ad-a yaa mam kõabã kõbre la mam yĩngã nemdo. B na n boola yẽ yʋʋr tɩ paga, tɩ bõe, b yãka yẽ rao yĩngẽ.”—Sɩng. 2:18-23.

² Pagã ra yaa toor ne bũmb nins fãa Wẽnnaam sẽn naan n kõ a Ãdmã, bala, a ra yaa sõngd sẽn zems ne-a. Sẽn paase, Wẽnnaam kõ-a-la tõog t’a tõe n dog kamba. Biiblã yeela woto: “Daoã pʋda a pagã yʋʋr t’a Ɛɛv, yẽ sẽn yaa nin-vɩɩs ma wã yĩnga.” (Sɩng. 3:20) A Ãdem ne a Ɛɛv ra na n naaga taab n dog kamb sẽn zems zãng n pid dũniyã. Bãmb  ne b kambã ra na n kɩtame tɩ tẽngã tõr lebg arzãna, la b soog bõn-vɩɩs a taabã.—Sɩng. 1:27, 28.

3. a) Bõe la a Ãdem ne a Ɛɛv ra segd n maan n kell n ta Wẽnnaam yam, la bõe la b maan-yã? b) Sogs-bʋs la d na n leoke?

³ La sẽn na yɩl n kell n ta Wẽnnaam yam, a Ãdem ne a Ɛɛv ra segd n sak-a lame, n wilg tɩ b ratame t’a yɩ b naaba. (Sɩng. 2:15-17) Yaa b sẽn da na n kell n sak Wẽnnaam bal la b na n tõog n pids a raabã. Zu-bʋko, b kelga a Sʋɩtãan ‘sẽn yaa wag-kʋdrã,’ n kɩɩs Wẽnnaam. (Wil. 12:9; Sɩng. 3:1-6) La wãn to la kɩɩsgã biis namsd pagbã? Bõe la pagb kẽer maan n wilg tɩ b yaa wẽn-zoɛtba? Bõe yĩng tɩ d tõe n yeel tɩ rũndã-rũndã, kiris-nin-pogsã “yaa kʋʋng-kʋʋngo”?—Yɩɩl 68:12.

4. D yaab a Ãdem ne a Ɛɛv beegrã poore, ãnda la Wẽnnaam ning taale?

⁴ A Zeova wa n soka a Ãdem a kɩɩsgã võore, t’a padem n yeel woto: “Yaa pag ning yãmb sẽn kõ maam t’a zĩnd ne maamã n yãk tɩɩgã biis n kõ maam tɩ m dɩ.” (Sɩng. 3:12) A Ãdem pa sak n deeg t’a tara taal yellã pʋgẽ ye. A rɩka yellã n dogl a Ɛɛv. A pʋd n ninga a Zeova sẽn naan pagã taale. La baa sẽn yaa a Ãdem ne a Ɛɛv n beeg Wẽnnaamã, Wẽnnaam rɩka yellã n dogl a Ãdem. Yaa rẽ la tʋm-tʋmd a Poll sẽn yeel tɩ yaa ‘rao a yembr n wa ne yel-wẽnã dũniyã tɩ kũum wa yel-wẽnã yĩngã.’—Rom 5:12.

5. Bõe yĩng tɩ Wẽnnaam bas ninsaalbã tɩ b soog b mens wakat a wãn pʋgẽ?

⁵ A Sʋɩtãan belga d yaab a Ãdem ne a Ɛɛv tɩ b tags tɩ pa tɩlae tɩ b sak t’a Zeova yɩ b naab ye. Woto waa ne kɩɩsg naamã rɩɩb wɛɛngẽ. Rẽ n so t’a Zeova bas ninsaalbã tɩ b soog b mens wakat a wãn pʋgẽ, sẽn na yɩl n wilg tɩ yẽ bal n tõe n soog-b tɩ zemse. A ra miime tɩ ninsaalbã sã n soog b mense pa na n yãk neng ye. Sɩd me, ninsaalbã naam waa ne zu-loees woo zu-loeese. Wala makre, yʋʋm koabgã sẽn loogã pʋgẽ, zabã kʋʋ na maan neb milyõ koabga. Rẽnd kaset wʋsg n wilgd tɩ ninsaal pa tõe n wilg a meng sor tɩ zems ye. (Yel. 20:24) Tõnd sẽn mi rẽ wã, d sakda a Zeova, tɩ wilgdẽ tɩ d ratame t’a yɩ d naaba.—Karm-y Yelbũn 3:5, 6.

6. Tẽns wʋsg pʋsẽ, nebã manesem yaa wãn ne pagbã la kom-pugli wã?

⁶ Dũni-kãngã sẽn be a Sʋɩtãan nugẽ wã pʋgẽ, pagbã ne rapã fãa namsdame. (Koɛ. 8:9; 1 Zã 5:19) La pagbã n namsd n yɩɩda. Dũniyã gill zugu, pagb a tãab sʋka, pʋg-yɛng la a sɩd wall rao a sẽn vɩ ne namsda. Tẽns kẽer pʋsẽ, b bakda kom-dibli wã n sõngdẽ, bala, b sã n wa bɩ, b tõe n gesa b roagdbã yelle, la b rog n yalg buudã. Zĩis sãnda, b getame tɩ bi-pugl pa tar yõodo, hal tɩ pagb kẽer sã n dɩk pʋg n wa mik tɩ yaa bi-pugla, b yiisda pʋgã.

7. A Ãdem ne a Ɛɛv sɩngrã yɩɩ wãna?

⁷ Yaa vẽeneg tɩ pagbã sẽn namsdã pa noom Wẽnnaam ye. A nanda pagbã, n pa wẽgd-b ye. Bũmb sẽn wilgd rẽ yaa t’a pa naan a Ɛɛv t’a yɩ a Ãdem yem-poak ye. A naan-a lame t’a zems zãnga, n da tar zʋg-sõma sẽn kɩt t’a yaa a sɩdã sõngd sẽn zems ne-a. Yaa rẽ la Biiblã sẽn yeel tɩ Wẽnnaam sẽn wa n naan bũmb fãa n sa wã, a yãame tɩ “yaa sõma wʋsgo.” (Sɩng. 1:31) Vẽenega, a Ãdem ne a Ɛɛv fãa sɩngrã yɩɩ sõma wʋsgo.

8. a) Nebã wʋsg manesem yaa wãna? b) Hal pĩnd wẽndẽ n tãag rũndã, nin-bʋs buud la Wẽnnaam sõngda?

⁸ Edɛn kɩɩsgã poore, ninsaalbã kell n kɩɩsa a Zeova. Yʋʋmã noorã, b manesmã maneg n lebga wẽng n paase. Biiblã ra reng n togsame tɩ dũniyã ‘yaoolem wakatã,’ nebã manesem na n yɩɩ wẽnga, la tɩ rẽ na n kɩtame tɩ vɩɩmã lebg toogo. (2 Tɩm. 3:1-5) La hal pĩnd wẽndẽ n tãag rũndã, pagb la rap n sakd Wẽnnaam noyã, n wilgdẽ tɩ b ratame t’a yɩ b naaba. B teega a Zeova, tɩ yẽ me sõngd-ba.—Karm-y Yɩɩl Sõamyã 71:5.

9. Neb a wãn n põs a Nowe wakatẽ sa-kãsenga, la bõe yĩnga?

⁹ A Zeova sẽn wa n kɩt tɩ sa-kãsengã ni n sãam nin-wẽnsã a Nowe wakatẽ wã, neb bilf bal n põse. A Nowe ba-bi-rapã la a ba-bi-pogsã sã n da ket n vɩɩ wakat kãnga, bãmb me paa koomẽ wã. (Sɩng. 5:30) La pagb nins sẽn põsã sõor yaa yembr ne rap nins sẽn põsã. Yɩ a Nowe, a paga, a kom-dibli a tã wã ne b pagbã. Yaa b sẽn da zoet Wẽnnaam n maand a raabã yĩnga. Neb milyaar-dãmbã sẽn vɩ rũndã-rũndã wã fãa yaa neb a nii wã a Zeova sẽn kogla yagense.—Sɩng. 7:7; 1 Pɩɛ. 3:20.

10. Bõe yĩng t’a Zeova sõng a Abrahaam ne a Izaak pagbã?

¹⁰ Kaoosg zugẽ, pagb a taab n sak Wẽnnaam, t’a sõng-ba. Pʋg-kãens ra pa yẽgemd ne b sɩdbã b yɛlã sẽn yaa to-to wã poorẽ ye. (Ziid 16) Wala makre, a Abrahaam pag a Saara. A sak n basa b zakã Uur sẽn da yaa tẽn-kãsengã, n pʋg a sɩdã n tɩ vɩɩmd fu-rot pʋsẽ. La a pa tol n yẽgem ne a sɩdã rẽ yĩng ye. A pʋd n ‘saka a Abrahaam, n da boond-a t’a zu-soaba.’ (1 Pɩɛ. 3:6) D tẽeg a Izaak pag a Rebeka me yelle. A yɩɩ pʋg-sõngo, t’a Zeova tũnug ne-a n sõng a sɩdã. Biiblã yeelame t’a Izaak ra nong-a lame, la tɩ rẽ “kɩtame t’a sũur ka sãam wʋsg a ma wã kũum yĩng ye.” (Sɩng. 24:67) Rũndã-rũndã, d sẽn paam tɩ pagb sẽn yaa wẽn-zoɛtb wa a Saara la a Rebeka be d sʋkã, noom-d-la wʋsgo.

11. Wãn to la Israyɛll pʋg-roagsdb a yiib tall raoodo?

¹¹ Israyɛll nebã sẽn wa n yaa yembs Eziptã, b sõorã fɩɩga wʋsgo, t’a Faraõ yiis noor n wilg tɩ Israyɛll pag sã n dog tɩ yaa bi-ribl bɩ b kʋ biigã. La Israyɛll pʋg-roagsdb a yiib n da be, tɩ wõnd yaa bãmb la pʋg-roagsdbã taoor-dãmba. Ra yaa a Sifra la a Pua. Pʋg-kãens kɩɩsa a Faraõ, n pa kʋ kom-dibli wã ye. B talla raoodo, bala b ra zoeta a Zeova n yɩɩd a Faraõ. Rẽ n so t’a Zeova ning-b barka, n kõ-b yagense.—Yik. 1:15-21.

12. Bõe la a Debora la a Zayɛll maan-yã?

¹² Sẽn wa n yaa bʋ-kaoodb n so Israyɛll nebã, Wẽnnaam yãka pag yʋʋr sẽn boond t’a Debora, t’a lebg no-rɛɛsa. A Debora kenga bʋ-kaood a Barak raoodo, tɩ sõng-a t’a zab n fãag Israyɛll nebã b bɛɛbã nugẽ. A reng n togsame tɩ pa na n yɩ a Barak n na n paam waoogr Israyɛll bɛɛbã tõogr yĩnga, la t’a Zeova na n kɩtame tɩ pag tõog a Sisera sẽn yaa Kanaã tãb-biisã naabã. Sɩd yɩɩ woto. Bala, yɩ a Zayɛll sẽn da pa Israyɛll pagã n kʋ-a.—Bʋk. 4:4-9, 17-22.

13. Bõe la Biiblã yeel a Abigayill zugu?

¹³ D gom wẽn-zoɛt a Abigayill me yelle. Biiblã yeelame t’a ra yaa pʋg-sõngo, la t’a sɩd a Naball yaa nin-wẽnga, nin-yoog la yalma. (1 Sãm. 25:2, 3, 25) A Davɩɩd ne a poorẽ dãmbã  kogla a Naball tʋm-tʋmdbã la a rũmsã. La a Davɩɩd wa n tʋma a nebã tɩ b tɩ bõos a Naball rɩɩbo, t’a yaal-ba, n pa kõ-b baa fʋɩ ye. Rẽ yika a Davɩɩd sũuri, t’a yãk yam n na n tɩ kʋ a Naball ne a zakã rap fãa. La a Abigayill sẽn wa n bãng a sɩdã sẽn maan bũmb ningã, a baoa rɩɩb la bũmb a taab n tɩ kõ a Davɩɩd ne a nebã. A sẽn maan woto wã, a Davɩɩd sũur sigame, t’a pa kʋ a Naball ye. (1 Sãm. 25:8-18) A Davɩɩd yeela a Abigayill woto: “Bɩ Israyɛll Zu-soab a Wẽnnaam sẽn tʋm foom tɩ f wa seg maam dũndã wã paam pẽgre.” (1 Sãm. 25:32) A Naball wa n kiime, t’a Davɩɩd rɩk a Abigayill n maan a paga.—1 Sãm. 25:37-42.

14. Bõe la a Salum kom-pugli wã sõng n maane, la bõe la kiris-nin-pogs maand rũndã-rũndã tɩ wõnd rẽ?

¹⁴ Babilon nebã sẽn wa n na n sãam Zerizalɛm ne a wẽnd-doogã yʋʋmd 607 sẽn deng a Zezi rogmã, rapa, pagb la kamb wʋsg n ki. La yʋʋmd 455 sẽn deng a Zezi rogmã, a Nehemi lʋɩɩ taoor tɩ b lebs n me Zerizalɛm lalgã. Kom-pugli n naag neb nins sẽn sõng n me lalgã, tɩ b ba wã yʋʋr la a Salum. A ra “yaa naab sẽn so Zerizalɛm sak a ye pʋɩ-sʋka.” (Neh. 3:12) Baa ne rẽ, a Salum kom-pugli wã sak n sõnga ne lalgã meebo. B sẽn maan bũmb ningã wõnda kiris-nin-pogs wʋsg sẽn sõngd n met Rĩung rot la siglgã rot a taab rũndã-rũndã wã.

15. Bõe la a Zeova kɩt t’a Maari maan tɩ yaa zu-zẽkr tɛkẽ?

¹⁵ Ket bilf t’a Zezi roge, la a rogmã poore, pagb n paam n maan bõn-kãsems a Zeova raabã pidsg yĩnga. Wala makre, a Maari. B ra rɩk-a lame n kõ a Zozɛfe, la nand tɩ b kẽ kãadem, a rɩka pʋg ne a Zeova vʋʋsem sõngã pãnga. Bõe yĩng tɩ Wẽnnaam yãk a Maari t’a lebg a Zezi ma? Sãmbg ka be tɩ yaa a sẽn da tar zug-sõma n tõe n wʋb a biigã sẽn zems zãngã yĩnga. Yaa vẽeneg tɩ paam n yɩ zãmaan fãa nin-kãsengã ma yaa zu-zẽkr tɛkẽ!—Mat. 1:18-25.

16. Togs-y kibar sẽn wilgd t’a Zezi ra nanda pagbã.

¹⁶ A Zezi ra nanda pagbã wʋsgo. Tẽeg-y pag ning sẽn da bẽed hal yʋʋm piig la a yiib t’a zɩɩm yitã kibarã. Daar a ye, neb n da gũbg a Zezi, t’a wẽdg nebã n wa sɩɩs a fuugã. La a Zezi pa zab-a ye. A yeel-a lame yaa: “M biiga, fo tẽeb n maag foom. Kẽng ne laafɩ n paam f meng ne bãag ning sẽn tar foomã.”—Mark 5:25-34.

17. Yel-solem-bʋg n zĩnd yʋʋmd 33 Pãntekotã daare?

¹⁷ A Zezi ne a tʋm-tʋmdbã sẽn wa n gilgd n moond koɛɛgã, pagb n da be ne-b n sõngd-ba. (Luk 8:1-3) Yʋʋmd 33 Pãntekotã daare, rap la pagb na maan 120 n paam Wẽnnaam vʋʋsem sõngã. (Karm-y Tʋʋm 2:1-4.) Yãoã yɩɩ bãngr-gomd a Zeova sẽn da togs pidsgu. A ra yeelame: “Mam na n pʋdga m sɩɩgã nebã buud fãa zutu. Yãmb kom-dibli ne y kom-pugli na n togsa bãngr-goama. . . . Baraare, mam na n pʋdga m sɩɩgã yem-daad ne yem-pogs zutu.” (Zoɛll 3:1, 2) Yel-solem-kãngã wilgame tɩ Wẽnnaam basa Israyɛll buudã sẽn yaa wẽn-kɩɩsdbã, n teend nin-kãensã sẽn yaa pagb la rap sẽn naag taab n yaa “Israyɛll sẽn yaa Wẽnnaam dẽndã.” (Gal. 3:28; 6:15, 16) Pagb n da naag n moond koe-noogã pipi kiris-nebã wakatẽ me. Wala makre, koe-moond a Filip kom-pugli a naasã.—Tʋʋ. 21:8, 9.

18, 19. a) Bõe la Wẽnnaam kɩt tɩ pagb la rap maandẽ tɩ yaa zu-zẽkr n kõ-ba? b) Bõe la yɩɩl-gʋlsdã yeel pagb nins sẽn moond koe-noogã zugu?

¹⁸ Yʋʋmd 1875 soabã sẽnese, neb a wãn n yik n dat n bãng Biiblã sẽn yetã. Nin-kãens sẽn da yaa pagb la rapã n sɩng koɛɛgã moonego, n pak sor t’a Zezi bãngr-gomd na n wa pidsi. A ra yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Mat. 24:14.

¹⁹ Biiblã Zãmsdb sẽn da yaa sul-bilã fɩɩgame, n lebg a Zeova Kaset rãmb 7900000 la zak rũndã-rũndã. Sẽn paase, neb a taab n wat a Zezi kũumã tẽegre, tɩ wilgdẽ tɩ bãmb me rat n bãnga Biiblã sẽn yetã. Yʋʋmd 2013 wã, nin-kãens yɩɩ 11300000, tɩ wʋsgã yaa pagba. Dũniyã gill zugu, so-pakdbã yaa milyõ a ye la zaka, tɩ sẽn yaa-b pagbã n yɩɩda. A Zeova sẽn kɩt tɩ pagb gomd a yʋʋr yĩngã yaa zu-zẽkr n kõ-ba. Woto, yɩɩl-gʋlsdã sẽn da yeel bũmb ningã pidsame. A ra yeelame: “Zu-soabã kõo noore, la [“pagb nins,” MN] sẽn moond koe-noog yaa kʋʋng-kʋʋngo.”—Yɩɩl 68:12.

20. Kiba-bʋs la d tõe n karem d zak pʋgẽ Biibl zãmsgã sasa, wall d meng Biibl zãmsgã sasa tɩ naf-do?

²⁰ Sõs-kãngã pʋgẽ, d pa tõe n sõdg pagb nins sẽn tũ Wẽnnaam tɩ b gom b yell Biiblã pʋgẽ wã n sa ye. La d tõe n karma b kibayã Biiblã pʋgẽ, la tõnd sɛbã pʋsẽ. Wala makre, d tõe n karma a Rut kibarã, n bʋgs a mak-sõngã zugu. (Rut 1:16, 17) D sã n karem a Ɛstɛɛr sebrã, la sõs nins sẽn be tõnd sɛbã pʋsẽ n gomd a yellã, na n naf-d lame. D tõe n karma kibay a woto buud d zak pʋgẽ Biibl zãmsgã sasa, wall d meng Biibl zãmsgã sasa.

21. Wãn to la pagb wilg tɩ b sakda a Zeova toog wakate?

²¹ Yaa vẽeneg t’a Zeova ningda kiris-nin-pogsã koe-moonegã barka, la a teend-b toog sasa. Wala makre, nazi-rãmbã la kominist-rãmbã naam sasa, a Zeova sõnga kiris-nin-pogs wʋsg tɩ b kell n sak-a. B namsa pʋg-kãense, la b kʋ kẽer meng b sẽn da sakd Wẽnnaamã yĩnga. (Tʋʋ. 5:29) Kiris-nin-kãense, n paas wẽn-sakdb nins sẽn vɩ rũndã-rũndã wã wilgdame tɩ b ratame tɩ Wẽnnaam yɩ b naaba. A Zeova yeta nin-kãensã bũmb ning a sẽn yeel Israyɛll nebã. A yeela woto: “Mam gãta yãmb dɩtg n yetẽ tɩ y ra zoe rabeem ye. Mam na n sõnga yãmba.”—Ezai 41:10-13.

22. Bõe la d na n maan ka la bilfu?

²² Ka la bilfu, rap la pagb sẽn yaa wẽn-sakdb n na n sõng neb milyõ-rãmb sẽn na n vʋʋg tɩ b bãng a Zeova la a raabã. Sẽn paase, b na n kɩtame tɩ tẽngã lebg arzãna. La nand tɩ wakat kãng ta, bɩ d fãa wilg tɩ d sẽn paam n naagd taab n tũud a Zeova ‘ne yam a yembrã’ noom-d lame.—Sof. 3:9.