Roagdba, sõng-y y kambã tɩ b bɩɩs b tẽebã
“Bãng f rũm-bõoneg sã n bee laafɩ bɩ b sã n ka keem, ges b yelle.”—YEL. 27:23, SEBR SÕNGO.
1, 2. a) Bõe la pe-kɩɩm segd n maan n ges a piis yelle? b) Bõe yĩng tɩ d tõe n yeel tɩ roagdbã yaa wa pe-kɩɩmba?
PĨND WẼNDẼ Israyɛllã pʋgẽ, pe-kɩɩmbã tʋʋmd ra yaa toogo. B ra mi n bee yɩng tʋʋlg la waood wakate. Sẽn paase, b ra segd n kogla b piisã tɩ we-rũms wall wagda ra yõg ye. Wakat fãa, b ra gũusda b piisã, t’a ye sã n lʋɩ bãag wall a sã n pogl bɩ b tɩp-a. Pe-bi wã yell la b ra get n yɩɩda. Bala, b pãngã pa ta pe-bɛdã ye.—Sɩng. 33:13.
2 Kiris-neb nins sẽn tar kambã wõnda pe-kɩɩmba, n segd n maan wa bãmba. B segd n wuba b kambã “ne Zu-soabã saglg la a zãmsgo.” (Ef. 6:4) Woto pa nana ye. Bala, kambã segda neb sẽn dat tɩ b maan bũmb kẽer sẽn pa zems ne a Zeova raabã. Rẽ toor sẽn ka be, kambã me sẽn pa zems zãngã, b mi n tara tʋls-wẽnse. (2 Tɩm. 2:22; 1 Zã 2:16) Y sã n tara kamba, wãn to la y tõe n sõng-ba? D na n goma bũmb a tãab yelle: 1) bao-y n bãng-y-ba, 2) zãms-y-ba, la 3) wilg-y-b sore.
BAO-Y N BÃNG-Y KAMBÃ SÕMA
3. Bõe la roagdbã tõe n maan n bãng b kambã sõma?
3 Pe-kɩɩm-sõng maagda a yĩng n get a piisã, sẽn na yɩl t’a ye sã n pa keeme, bɩ a bãnge. Biiblã yeelame: “Bãng f rũm-bõoneg sã n bee laafɩ bɩ b sã n ka keem, ges b yelle.” (Yel. 27:23, Sebr Sõngo) Y segd n maana woto ne y kambã. Rẽ baoodame tɩ y bãng b sẽn maand bũmb ninsã, b sẽn get yɛlã to-to, la bũmb nins sẽn namsd-bã. Wãn to la y tõe n maan dẽ? Y segd n sõsda ne y kambã wakat fãa.
4, 5. a) Wãn to la roagdbã tõe n maan tɩ b kambã sak n pelg b pʋs n sõs ne-ba? (Ges-y sõsgã sɩngrẽ fotã.) b) Bõe la y maan tɩ y kambã sõsd ne-y nana-nana?
4 Roagdb kẽer mikame tɩ b kambã sã n wa bɩtẽ, lebgda toog tɩ b sõs ne-ba. Kom-bɩɩs sãnda pa rat n togs b tagsgo, wall bũmb sẽn namsd-b ye. Sã n yaa woto ne yãmb kambã, bõe la y tõe n maane? Ra tags-y tɩ yaa tɩlae tɩ y zĩndg y biiga, tɩ y gom bũmb sẽn pak-y yell n kaoos ye. Y tõe n tũnuga ne segb buud toor-toor n sõs ne-a. (Tõo. 6:6, 7) Bao-y weer n naag taab n maan bũmb kẽere. Wala makre, y tõe n yi n gõo ne taaba, n naag taab n deem wall y bao tʋʋm-bil tɩ y naag taab n tʋme. Woto tõe n sõngame tɩ y biigã sak n togs yãmb sẽn be a sũurẽ wã n pa yɛɛs ye.
5 Y sã n maan woto fãa tɩ y biigã ket n pa rat n pelg a pʋg n sõs ne-yã, y maanda wãna? Ad bũmb y sẽn tõe n maane: Wall tɩ y sok y bi-pugl sogs n dat n bãng zu-loees nins a sẽn seg daarã tõre, pa rẽ bɩ a sẽn maan bũmb ninsã, togs-y-yã-a zu-loees nins yãmb sẽn segã, la bũmb nins y sẽn maane. Rẽ tõe n kɩtame t’a sak n togs yãmb sẽn yɩ to-to ne yẽ me. Y tõe n dat n bãnga a tagsg sẽn yaa a soab bũmb ning zug me. Wala makre, sɩgaar yũub wall wagdem. Y tõe n sok-a-la woto: ‘Fo mii neb sẽn yũud sɩgaar wall sẽn zuud bɩ? La fo zo-rãmbã tagsg yaa wãn ne rẽ?’ Sẽn na n baase, sok-y-yã-a woto: ‘B sã n yeel tɩ fo sagl f zo-rãmbã, bõe la f na n yeel-ba?’
6. Bõe la y tõe n maan tɩ y kambã neẽ tɩ y pẽnegr yaa nana?
6 Y sã n dat tɩ y kambã pelgd b pʋs n sõsd ne-yã, y segd n yɩɩ ned pẽnegr sẽn yaa nana. Kambã sã n neẽ tɩ wakat fãa y pa tar sẽk n sõsd ne-ba, tõe n kɩtame tɩ b pa rat n togs-y b zu-loees ye. La bõe la y tõe n maan tɩ b neẽ tɩ y pẽnegr yaa nana? Y sã n yeel y kambã tɩ b sẽn dat wakat ning fãa b tõe n wa sõsa ne yãmba, pa sek ye. Y segd n kɩtame tɩ b ne vẽeneg tɩ b sã n wa togs-y b zu-loɛɛga, y pa na n yik y sũur ye. Sẽn paase, b segd n bãngame tɩ b zu-loeesã paka yãmb me. Roagdb wʋsg kõta mak-sõng zĩ-kãng wɛɛngẽ. Yʋʋm 19 bi-pugl sẽn boond t’a Kayla yeela woto: “M tõe n sõsa ne m baaba, n togs-a bũmb ning fãa m sẽn date. A pa kʋʋgd m goama, wall a ning-m taal ye. A kelgd-m lame, n kõt-m sagls sẽn yaa sõma wakat fãa.”
7. a) Roagd sã n dat n sõs ne a biig n gom rolemd yelle, wall bũmb a to sẽn pa reem yelle, a segd n gũusa ne bõe? b) Bõe la roagdb tõe n maan n sãam b kambã sũy n pa bãnge?
7 Y tõe n wa rat n sõsa ne y biiga, n gom bũmb sẽn pa reem yelle. Wala makre, rolemd yelle. Sã n wa yaa woto bɩ y gũus n da gom rẽ sẽn wat ne zu-loees ninsã yell bal ye. Y biig sã n dat saglse, tɩ yãmb wilg-a bũmb nins a sẽn pa segd n maanã bala, a sũur pa na n yɩ noog ye. A pa na n le wa baood sagls yãmb nengẽ ye. (Karm-y Kolos rãmb 3:21.) Saam-bi-poak yʋʋr sẽn boond t’a Emili yeela woto: “Mam roagdbã sã n wa gomd rolemd yell ne maam, b pa gomd zu-loees nins rẽ sẽn tõe n wa ne wã yell bal ye. B wilgdame tɩ bao n bãng ned sẽn na yɩl n kẽ kãadem ne-a yaa sũ-noog bũmbu. Rẽ kɩtame tɩ m tõe n gom ne-b rolemdã yell n pa yɛɛs ye. M pʋd n yãka yam tɩ rao sã n wa ro-ma, m pa na n solg-b ye. M na n togs-b lame.”
8, 9. a) Y sã n maag y yĩng n kelg y biiga, wãn to la tõe n naf y yiibã fãa? b) Yãmb sẽn maagd y yĩng n kelgd y kambã, wãn to la naf yãmba?
8 Y sã n maagd y yĩng n kelgd y kambã, y wilgdame tɩ y ratame tɩ b sõsd ne-yã. (Karm-y Zak 1:19.) A Katia yaa pag sẽn yaa a ye n wubd a biiga. A yeelame: “Mam da pa mi n maagd m yĩng n kelgd m bi-puglã ye. A sã n sɩng goama, m kʋʋgd-a lame. M mi n yaa wʋsg n pa rat n kelg-a, wall yaa goamã bal la m pa rata.” Masã, a toeemame t’a bi-puglã me toeeme, tɩ b tõe n sõs ne taab tɩ noome.
Kelg-y kambã, n bãng-b sõma (Ges-y sull a 3-9)
9 Yɩɩ woto me ne rao sẽn boond t’a Ronald ne a bi-pugla. A yeelame: “Daar a ye, mam bi-puglã yeela maam tɩ yẽ yãa bi-ribl lekollẽ wã n nongẽ. A gomdã yika m sũurã wʋsgo. La m tagsa a Zeova sẽn maand sũ-mar ne neb nins sẽn tũud-a wã yelle, n bãng tɩ yɩta sõma tɩ m bas tɩ m bi-puglã togs bũmb ning sẽn be a sũurẽ wã, tɩ m yaool n sagl-a. M sẽn maan woto wã yɩ-m-la noogo. Rẽ n yɩ pipi mam sẽn bãng sẽn be a sũurẽ. A sẽn gom n sɛ wã, m bãnga m sẽn tõe n leok-a ne bʋgsem to-to. A saka m saglsã nana-nana, hal tɩ ling-ma. A yeelame t’a na n maana a sẽn tõe fãa n toeeme.” Y sã n minim n sõsd ne y kambã, y tõe n bãnga sẽn be b sũurẽ wã. Rẽ, y na n tõog n sõng-b lame tɩ b yãk yam sẽn yaa sõma. *
ZÃMS-Y Y KAMBÃ
10, 11. Bõe la y tõe n maan n sõng y kambã tɩ b ra bas sɩdã sore?
10 Pe-kɩɩm fãa miime tɩ pesg tõe n menemame. Pesg tõe n yãa yamd n lak n bas a taabã n tɩ wãbe, n kell n tũ rẽ n zãag bilf-bilf n wa meneme. Woto me, biig sã n tar tũud-n-ta-wẽns wall a reemd reem-yoodo, a basda sɩdã sor bilf-bilfu. (Yel. 13:20) Bõe la y tõe n maan n sõng y kambã zĩ-kãng wɛɛngẽ?
11 Y sã n wa yã bũmb y kambã sẽn segd n maneg bɩ y ra bas tɩ kaoos tɩ y yaool n sõng-b ye. Sõng-b tɩ b bɩɩs zʋg-sõma nins b sẽn tarã me. (2 Pɩɛ. 1:5-8) Zak pʋgẽ Biibl zãmsgã tõe n sõng-y lame tɩ y maan rẽ sõma. Yʋʋmd 2008 zĩ-likr kiuugã Rĩungã Tʋʋmd sebr yeela woto: “A Zeova gũudame tɩ zak soab fãa modg n zãmsd Biiblã sõma ne a zakã rãmb la a pʋʋsd ne-b wakat fãa n da vaandẽ ye.” Yãmb tũnugda ne zak pʋgẽ Biibl zãmsgã n zãmsd y kambã sõma bɩ? Kɩs-y sɩd tɩ y kambã nanda modgr ning y sẽn maand n sõngd-b tɩ b tẽebã bɩtẽ wã.—Mat. 4:4; Fil. 1:10.
Zãms-y kambã sõma (Ges-y sull 10-12)
12. a) Bõe la kom-bɩɩs yeel n wilg tɩ zak pʋgẽ Biibl zãmsgã nafd-b lame? (Y tõe n gesa zĩ-gũbr ning gom-zug sẽn yaa: “B sũur noomame” wã me.) b) Wãn to la zak pʋgẽ Biibl zãmsgã naf yãmba?
12 Pʋg-sad yʋʋr sẽn boond t’a Larisa wilga zak pʋgẽ Biibl zãmsgã sẽn naf bãmb zakã rãmb to-to, n yeele: “D fãa sẽn mi n naag taab n zĩ n sõsdã nooma maam wʋsgo. D maanda bũmb wʋsg d sẽn pa na n tol n yĩm ye. Sẽn paase, d neeme tɩ d zems-n-taarã paasdame. M baaba maanda zak pʋgẽ Biibl zãmsgã n pa vaandẽ ye. Mam sẽn ne t’a pa reemd ne Biiblã zãmsgã kengda m daoodo, la kɩt tɩ ma-me pa reemd ne rẽ ye.” A paasame t’a ba wã sẽn lʋɩt taoor n sõngd bãmb tɩ b tẽebã pãng paasdẽ wã kɩtame t’a waoogd-a. Pʋg-sad a to yʋʋr sẽn boond t’a Brittney yeela woto: “Zak pʋgẽ Biibl zãmsgã kɩtame tɩ m maneg n nong m roagdbã. Sõnga maam tɩ m bãng tɩ b ratame tɩ m togs-b m zu-loeese, la tɩ mam zu-loeesã pak-b lame. Kɩtame tɩ tõnd zakã rãmb zemsd taab sõma.” Roagdbã sẽn dat yaa b sõng b kambã tɩ b nong a Zeova. Zak pʋgẽ Biibl zãmsgã tõe n sõng-b-la wʋsg zĩ-kãng wɛɛngẽ. *
WILG-Y Y KAMBÃ SORE
13. Bõe n na n kɩt tɩ biig yãk yam n tũ a Zeova?
13 Pe-kɩɩm tara rasaar n lekd a piisã, la a kogend-ba. A sẽn dat yaa a tall-b n kẽng zĩis ‘sẽn tar yam-maasa.’ (Eze. 34:13, 14) Roagdbã sẽn dat bũmb ningã wõnda woto. B rat n sõnga b kambã tɩ b tũ a Zeova. B ratame tɩ b kambã rɩk yɩɩl-gʋlsdã togs-n-taare. A yeelame: “Mam Wẽnnaam, mam dat n maana yãmb daabo. La yãmb tõog bee mam sũur pʋgẽ.” (Yɩɩl 40:9) Biig sã n wa tõe n tags woto, a na n dɩka a meng n kõ a Zeova n deeg lisgu. La yaa a sẽn wat n wʋm yɛlã võor sõma n dat n tũ a Zeova ne a sũur fãa la a na n yãk yam n maand dẽ.
14, 15. a) Bõe la roagdb nins sẽn yaa kiris-nebã rata? b) Bõe n tõe n kɩt tɩ biig maan sãmb-sãmb ne Biiblã sẽn yetã?
14 La y sã n getẽ tɩ y kambã tẽebã pa bɩte, wall b maanda sãmb-sãmb ne a Zeova Kaset rãmbã sẽn tẽed bũmb ninsã, y maanda wãna? Sõng-y-b tɩ b tags bũmb nins a Zeova sẽn maan tõnd yĩngã zugu. Rẽ la b na n nan bõn-kãense, la b nong a Zeova ne b sũur fãa. (Wil. 4:11) Woto, b na n wa tõog n yãka yam n tũ a Zeova.
15 La nananda, y kambã sã n maand sãmb-sãmb ne Biiblã sẽn yetã, bõe la y tõe n maane? Wãn to la y tõe n sõng-b tɩ b bãng t’a Zeova tũubã n wat ne bark masã, la wakat sẽn kõn sa yĩnga? Bao-y n bãng-y bũmb ning sẽn kɩt tɩ b maand sãmb-sãmbã. Wala makre, yaa Biiblã sẽn yet bũmb ningã la y biigã pa kɩs sɩd ne bɩ, bɩ a yɛɛsdame n pa rat n gom a tẽebã yell ne kamb a taaba? A maanda sãmb-sãmb ne Wẽnnaam noyã tũub sã n sɩd nafdame bɩ, bɩ yaa rẽ sẽn kɩt t’a taabã pa nong a zĩigẽ, wall b kis-a yĩnga?
Wilg-y y kambã sore (Ges-y sull 13-18)
16, 17. Bõe la roagdbã tõe n maan n sõng b kambã tɩ b yãk yam n tũ a Zeova?
16 La baa sẽn yaa a soaba, y tõe n sõnga y kambã tɩ b bas sãmb-sãmbã. Roagdb wʋsg sogsa b kambã sogsg sẽn kɩt tɩ b tagse, tɩ sõng-ba. Wala makre, y tõe n soka y biigã woto: “Fo tagsdame tɩ yɩ kiris-ned yaa nana bɩ, bɩ yaa toogo? Bark bʋs la kiris-nebã paamd-a? Bõe n kɩt tɩ yɩ kiris-ned pa nana? F sã n mak rẽ ne bark nins d sẽn paam rũndã-rũndã, la d sẽn na n paam beoogã, fo tagsg yaa wãna?” Y sã n na n sok y biigã sogs-kãensã buudu, bɩ y maan ne bʋgsem la y gũus tɩ ra wa yaa wa y ningd-a-la taal ye. Y tõe n tika Mark 10:29, 30 goamã zug me n sõse. Kom-bɩɩs kẽer mi n baoo sebr n gʋls b sẽn tagsde. Neng a ye, b gʋlsda bark nins b sẽn paamd b sẽn yaa kiris-neba, tɩ neng a to bɩ b gʋlsd bũmb nins sẽn kɩt tɩ yɩ kiris-ned yaa toogã. Y sã n kɩt tɩ y kambã maan woto, y tõe n bãnga b zu-loeesã, tɩ y naag taab n bao b tɩɩm. D sã n segd n zãmsa Biiblã yetame sebrã, la “Wẽnnaam nonglmã” sebr ne d Biibl karen-biisã, pa zems tɩ d maan woto ne d kambã me sɩda? Y zãmsda y kambã seb-kãens bɩ?
17 Y kambã sã n wa bɩ, yaa bãmb n segd n yãk b sã n na n tũ a Zeova bɩ b pa na n tũ-a. B pa na n yãk yam n tũ a Zeova yãmb sẽn tũud-a wã yĩng ye. Yaa bãmb n segd n bao a Zeova zoodo. (Yel. 3:1, 2) La y biigã sã n pa baood a Zeova zoodo, y na n maana wãna? Yeel-y-yã-a t’a sok a meng sogs-kãensã: “Bõe n kɩt tɩ mam miẽ tɩ Wẽnnaam sɩd beeme? Bõe n wilgd tɩ mam yell paka a Zeova? M kɩsa sɩd tɩ mam sã n tũ a Zeova noyã, na n nafa maam bɩ?” Sõng-y y kambã, la y wilg-b sor ne sũ-mare. Sõng-y-b tɩ b bãng tɩ yaa b sã n tũ a Zeova bal la b vɩɩmã na n tall barka.—Rom 12:2.
18. Wãn to la roagdbã tõe n dɩk a Zeova sẽn yaa d pe-kɩɩm-kãsengã togs-n-taare?
18 Kiris-nebã fãa rat n dɩka a Zeova sẽn yaa pe-kɩɩm-kãsengã togs-n-taare. (Ef. 5:1; 1 Pɩɛ. 2:25) Sẽn yɩɩd fãa, roagdbã segd n bãnga b kambã sõma. B segd n wilg-b-la sore, sẽn na yɩl tɩ b wa paam bark nins Wẽnnaam sẽn pʋlmã. Woto wã, bɩ y maan y sẽn tõe tɛk n sõng y kambã tɩ b bɩɩs b tẽebã.
