Nin-kãngã sẽn gʋls Biiblã sɛb kẽerã ra rat n wilgame tɩ tẽngã bee wakat fãa, tɩ ninsaal yõor yaool n yaa koɛɛga. Sɩd me, na maan yʋʋm tusa, zãmaan loogdame tɩ zãmaan a to wa, la tẽngã keta a zĩigẽ. Hal ne rũndã, ninsaalb la bõn-vɩɩs a taab ket n tõe n vɩɩmda a zugu.

Neb kẽer yetame tɩ dũni gill zabr a yiib-n-soabã tɛka, bũmb wʋsg n toeem zĩig fãa, la tɩ yɩɩ tʋʋl-tʋʋlle. Sẽn zems yʋʋm 70 pʋgẽ, tɛknolozi wã paama pãng wʋsgo. Sɩd me, nebã bãngrã paasa montɛyã ne sɩlsã la mobila wã maaneg wɛɛngẽ, n paas telefõnnã, ẽntɛrnetã la kibayã yelgr teed a taab maaneg wɛɛngẽ. Woto fãa kɩtame tɩ tẽns wʋsg yidg laogã wɛɛngẽ. Wʋsg vɩɩ naar pʋgẽ, tɩ nebã ra pa tagsd meng tɩ ninsaal tõe n paama vɩ-kãng buud ye. Sẽn paase, dũniyã gill zug nebã sõor fɩɩgame, n kolg dũni gill zabr a yiib-n-soabã sasa wã naoor a tãabo.

La toeengã waa ne yɛla. Ninsaalbã tʋʋm sãamda tẽngã wʋsgo, hal tɩ vɩɩmã tõe n wa lebg toog ne bõn-vɩɩsã. Bãngdb kẽer meng yeelame tɩ tẽngã sẽn sãam to-to masã wã pa tõe n bãng n bilg ye. B paasame tɩ tõnd vɩɩ wakat ning tẽngã sãoong sẽn paam pãng hal t’a buud zɩ n zĩnd ye.

Biiblã ra pĩnd n togsame tɩ wakat n wat tɩ ninsaalbã na n sãam tẽngã. (Wilgri 11:18) Neb kẽer sokda b mens d sã n pa vɩ wakat kãnga. La tẽngã sãoong na n taa zĩ-bʋgo? Wakat n na n wa zĩnd tɩ  tɩɩm le kae bɩ? Rẽ yĩnga ninsaalbã na n sãama tẽngã fasɩ bɩ?

Rẽ yĩnga ninsaalbã na n sãama tẽngã hal tɩ sẽn maand le kae bɩ? Bãngdb kẽer tagsdame tɩ yɩl n bãng tẽngã sãoong sẽn na n wa ne yɛl ninsã yaa toogo. Kɩtame tɩ b sokd b mens rẽ sã n pa na n kɩt tɩ sabab-wẽns wa tiig n maane, tɩ sãoongã yɩ kãsenga.

D rɩk makr ne tẽngã zĩis nins sẽn yaa galaasã. Neb kẽer tẽedame tɩ zĩigã sã n kell n tall wɩngre, galaasã na n boogame, hal tɩ sẽn maand wa ka le beẽ ye. Bala yaa galaasã n kokd wĩntoogã walmã, tɩ tẽngã pa wɩngd wʋsg ye. La galaasã sẽn boogdã, a pa le tõe n kok wĩntoogã walem sõma ye. Galaasã sẽn boogdã me kɩtame tɩ mogrã koom paasdẽ. Rẽ me yaa yell a to, bala koomã tõe n wa yamba zĩis wʋsgo, tɩ wa ne yell n kõ neb milyõ rãmba.

Bãngdbã baoo yam toɛy-toɛy sẽn na yɩl n ges pemsmã rẽgengã ne weoogã la tẽn-gãongã sãoongã yelle. Wala makre, hal sẽn kaoose, b yãka yam n na n sõng nebã tɩ b sẽn yãkd bũmb nins tẽn-gãongã la weoogã pʋgẽ b vɩɩmã na yɩ neer yĩnga ra loog nug ye. Yam-kãng yãka neng bɩ?

Bʋko, ninsaalbã sẽn yãkd bũmb nins tẽn-gãongã la weoogã pʋgẽ wã ket n looga nugu. Tẽngã tõe n lebs n palmame, tɩ bũmb fãa leb a zĩigẽ. La b sẽn yãkdã sẽn loog nugã yĩnga, tẽngã pa paamd n palem ye. Sẽn maand beeme bɩ? Bãngd a ye yeela woto vẽenega: “Sɩd-sɩdã, d pa mi d sẽn na n maan to-to n paam yel-kãngã tɩɩm ye.” A gomdã zemsa kɛpɩ ne bũmb Biiblã sẽn togse. B yeela woto: “Ninsaal na n yɩɩ wãn n bãng a sore?”—Yelbũna 20:24.

La Biiblã sõngda tõnd tɩ d bãng tɩ Wẽnnaam sẽn yaa Naandã pa na n bas tɩ ninsaalbã sãam tẽn-gãongã, weoogã la pemsmã fasɩ ye. Yɩɩl Sõamyã 115:16 yeta woto: “Saasẽ yaa Zu-soabã n so, la b kõo ninsaalbã dũniyã.” Dũniyã bɩ tẽngã yaa ‘kũun-sõng’ d Ba sẽn be saasẽ wã sẽn kõ tõndo. (Zak 1:17) Rẽ yĩnga, Wẽnnaam na kõ tõnd kũun sẽn yaa sõma, n yaool n tar daar n sãamdẽ sɩda? Ayo! Sɩd me, d sã n ges Wẽnnaam sẽn naan tẽngã to-to wã, pa sẽn na n wa sãam ye.

Sɩngr sebrã sẽn be Biiblã pʋgẽ wã sõngda tõnd tɩ d bãng Wẽnnaam sẽn maag a yĩng n naan tẽngã to-to wã. B yeelame: “Tẽngã ra yaa zaalem la vɩʋʋgo, la lik ra luda ko-zulumse.” B goma ko-zulums yelle. Sɩd me koom sã n kae, vɩɩm kae ye. (Sɩngre 1:2) Wẽnnaam wa n yeelame tɩ “vẽenem zĩndi.” (Sɩngre 1:3) Yɩɩ wakat kãng la wĩntoogã vẽenem tors tẽngã, tɩ rẽ tɛk bɩ vẽenem be tẽngã zugu. Rẽ poore, b yeelame tɩ Wẽnnaam kɩtame tɩ koomã tɩ naag taaba, tɩ tẽn-koɛɛng zĩndi, tɩ ko-kãsems me zĩndi. (Sɩngre 1:9, 10) Wẽnnaam leb n kɩtame tɩ “mood . . . la tɩɩs sẽn ningd biis” bul n yi. (Sɩngre 1:12) Dẽnd woto fãa yaa bũmb nins sẽn yaa tɩlae sẽn na yɩl tɩ bõn-vɩɩs buud toor-toor tõog n vɩɩmd tẽngã zugã. Bõe yĩng tɩ Wẽnnaam maag a yĩng n segl woto fãa?

No-rɛɛs a Ezai goma Wẽnnaam yelle, n yeel woto: “Yaa bãmb n naan dũniyã. Bãmb yẽbg-a lame. Bãmb ka naan-a t’a lebg zaalem ye. Bãmb naan-a lame tɩ neb zĩnd a zugu.” (Ezai 45:18) Dẽnd yaa vẽeneg tɩ Wẽnnaam naana tẽngã sẽn na yɩl tɩ ninsaalb zĩnd a zug wakat fãa yĩnga.

Bʋko, ninsaalbã pa zãad tẽngã sẽn yaa Wẽnnaam kũun sẽn be yamleoogã sõma ye. Sã n pa b sẽn sãamd-a bala. La Wẽnnaam ket n datame tɩ ninsaalb vɩɩmd tẽngã zug wakat sẽn kõn sa. Ned a ye sẽn zĩnd pĩnd wẽndẽ wã yeelame: “Wẽnnaam ka ninsaal n yagd ziri ye. Bãmb ka ninsaal n tekd b noor ye. Bãmb sã n yeel tɩ b na n maana bũmbu, b maandame.” (Sõdbo 23:19) Wẽnnaam pa na n bas tɩ ninsaalbã sãam tẽngã fasɩ ye. Ka la bilfu, a na n pʋd n “sãama neb nins sẽn sãamd dũniyã.”—Wilgri 11:18.

A Zezi Kirist sẽn wa n sõsd ne nebã tãngã zugã, a yeelame: “Bark bee sũ-maasem dãmbã zutu, tɩ bõe, bãmb na soog dũniyã.” (Matɩe 5:5) Sõs-kãng pʋgẽ bala, a wilga sẽn na n tũ ne bũmb ning tɩ tẽngã sãoongã sa. A yeela a karen-biisã tɩ b pʋʋs tɩ Wẽnnaam soolem wa, t’a raab maan dũniyã zug wa sẽn maand saasẽ wã. Sɩd me, yaa Wẽnnaam soolmã sẽn yaa goosneema sẽn be saasẽ wã n na n wa kɩt  tɩ Wẽnnaam sẽn naan tẽngã bũmb ning yĩngã yɩ.—Matɩe 6:10.

Wẽnnaam togsda bũmb nins sẽn na n toeeme, a soolmã sã n wa wa. A yeelame: “Gese, mam maanda bũmb fãa paalse.” (Wilgri 21:5) Woto rat n yeelame tɩ Wẽnnaam na n sãama tẽngã n lebs n naan a to bɩ? Ayo. Bala Wẽnnaam sẽn naan tẽngã to-to wã yaa sõma. A pa tar zang ye. Yaa neb nins sẽn kɩt tɩ tẽngã zug vɩɩmdg yaa toogã, rat n yeel tɩ ninsaalbã sigls la b goosneemã rãmbã sẽn ‘sãamd tẽngã’ la Wẽnnaam na n sãame. Wẽnnaam na n ledg-b-la ne “yĩngr-paalg la dũni-paalga.” Woto rat n yeelame t’a na n kɩtame tɩ tẽngã pid ne neb sẽn yaa sakdba, tɩ goosneem ning yẽ sẽn lugl saasẽ wã soog-ba.—Wilgri 21:1.

Sẽn na yɩl tɩ bũmb nins fãa ninsaalbã sẽn maand tɩ sãamd tẽngã sa, Wẽnnaam na n kɩtame tɩ tẽngã lebs n palme, tɩ bũmb fãa leb a zĩigẽ. Wẽnnaam vẽnega yɩɩl-gʋlsdã t’a bilg yẽ sẽn na n maan to-to wã. A yeelame: “Yãmb wata dũniyã la y kõt-a-la koom wʋsgo, yãmb kõt-a-la arzegs wʋsgo.” Zĩigã sẽn na n yɩ to-to wã, la sẽn yɩɩd fãa, Wẽnnaam barkã yĩnga, tẽngã na n lebga arzãna, n sakd koodo.—Yɩɩl Sõamyã 65:10-14.

A Pyarelal sẽn yɩ Ẽnd naab a Mohandas Gandhi sekertɛɛrã yeelame t’a Mohandas Gandhi ra yeela woto: “Tẽn-gãongã sẽn kõt nebã bũmb ninsã sekda ned fãa na paam sẽn yaa tɩlae ne-a, la pa sekd ned fãa na kãag n sam ye.” Wẽnnaam soolmã na n welga yellã a yẽgrẽ wã, n kɩt tɩ ninsaalbã sũy tagsg meng teke. Wẽnnaam no-rɛɛs a Ezai ra pĩnd n togsame tɩ Wẽnnaam soolmã sã n wa so tẽngã, “wẽng ne sãoong ka na n tol n le zĩnd” tẽngã zug bɩ nebã ne taab sʋk ye. (Ezai 11:9) Rũndã-rũndã menga, neb buud toor-toor milyõ-rãmb n zoe n zãmsd Biiblã, n bãngd Wẽnnaam noyã. Nin-kãensã paamda zãmsgo, tɩ rẽ kɩt tɩ b nong Wẽnnaam la b taabã, n yaa neb sẽn mi beoogo, n zãad tẽngã sõma, n pa sãamd tẽn-gãongã ne weoogã, la b modgd n maand bũmb fãa tɩ zemsd ne Naandã sẽn dat tɩ tẽngã yɩ to-to wã. B segenda b mens n na n wa tõog n vɩɩmd arzãnã pʋgẽ, tẽngã zugu.—Koɛɛg Soaba 12:13; Matɩe 22:37-39; Kolos rãmba 3:15.

Sɩngr sebrã pʋgẽ b sẽn togs Wẽnnaam sẽn naan bũmb ninsã, b yeela baasgẽ wã woto: “Wẽnnaam yãa bũmb nins fãa bãmb sẽn naanã, la gese, a yaa sõma wʋsgo.” (Sɩngre 1:31) Hakɩka, Wẽnnaam pa na n bas tɩ b sãam tẽngã a sẽn naan tɩ yaa sõma wã fasɩ ye. D sẽn mi tɩ Wẽnnaam a Zeova sẽn yaa d Naand sẽn nong-dã na n gesame tɩ bũmb da wa sãam tẽngã fasɩ wã kengda d pɛlga. A yeelame: “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” (Yɩɩl Sõamyã 37:29) Wẽnd na kɩt tɩ y wa naag nin-kãensã, n paam n soog tẽngã wakat sẽn kõn sa.