Sõsg ning sẽn loogã pʋgẽ, d bãngame tɩ sẽn da pak a Zezi n yɩɩd yaa ‘moon Wẽnnaam soolem koe-noogã.’ (Luk 8:1) A maana rẽ ne a sũur fãa. A kẽna nao kilometr kobse, n saag Israyɛll tẽnsã n sõng nebã tɩ b bãng Wẽnnaam Rĩungã. Evãnzill rãmb a naasã pʋgẽ, b gomda a Zezi koɛɛgã mooneg yelle. Sẽn yɩɩd naoor 100 la b gom Rĩungã yelle, la wʋsgã fãa yaa a Zezi goama. Baasgo, d tõe n yeelame tɩ b sẽn gʋlsã yaa fĩ-fĩi, bala pa bũmb nins fãa a Zezi sẽn togs Rĩungã wɛɛngẽ wã la b sẽn gʋlsã ye.—Zã 21:25.

A Zezi sẽn wa n be tẽngã zugã, bõe yĩng tɩ Rĩungã ra tar yõod wʋsg ne-a? Bala a ra miime tɩ yaa yẽ la Wẽnnaam yãk t’a na n wa yɩ Rĩungã Rĩma. (Ezai 9:6; Luk 22:28-30) La pa a sẽn da na n wa paam ziir bɩ naamã n da pak-a ye. (Matɩe 11:29; Mark 10:17, 18) A sẽn teel Rĩungã pa a mengã nafr la a ra baood ye. Sẽn yɩɩd fãa, yaa neb nins a sẽn nongã nafr yĩnga, a Ba wã la wẽn-sakdbã. A Zezi ket n teenda Rĩungã. *

A Zezi nonga a Ba sẽn be saasẽ wã hal wʋsgo. (Yelbũna 8:30; Zã 14:31) A nanda a Ba wã zʋg-sõma. Wala a nonglmã, a nimbãan-zoeerã la a sẽn nong tɩrlmã. (Tõodo 32:4; Ezai 49:15; 1 Zã 4:8) Dẽnd b sẽn mi n togsd goam sẽn pa sɩd a Ba wã zugã pa noom-a baa bilf ye. Wala makre, b yetame tɩ Wẽnnaam toog kae ne ninsaalbã sẽn namsdã, la t’a pʋd n datame tɩ d namse. Rẽ n so t’a Zezi ra rat ne a sũur fãa n ‘moon Wẽnnaam soolem koe-noogã.’ A ra miime tɩ wakat sã n ta, ne Rĩungã maasem Wẽnnaam pa na n le paam taal ye. (Matɩe 4:23; 6:9, 10) Bõe la Rĩungã na n maane?

Ne Rĩungã maasem, a Zeova na n maana bũmb wʋsg sẽn na n naf ãdem-biisã. A na n “yẽesa nintãmã fãa” wẽn-sakdbã ninẽ. A na n kɩtame tɩ yɛl nins fãa sẽn kɩt tɩ nebã raagd nintãmã sa. “Kũum ka na n le zĩnd ye. La sũ-sãoong bɩ yãbr wall toog kõn le zĩnd yɛs ye.” (Wilgri 21:3, 4) Ne Rĩungã maasem, Wẽnnaam na n kɩtame tɩ namsg buud fãa sa. *

 A Zezi sẽn moon koɛɛgã ne a sũur fãa n sõng nebã tɩ b bãng Rĩungã pa ling tõnd ye. A ra miime tɩ rẽ n da na n kɩt tɩ nebã bãng t’a Ba wã yaa nimbãan-zoeta, la pãng sẽn ka to soaba. (Zak 5:11) A ra miime me tɩ na n nafa neb a taab yẽ sẽn nonge, wẽn-sakdbã.

A Zezi vɩɩmda saasẽ ne a Ba wã n kaoose, n yaool n wa tẽngã zugu. Yaa ne yẽ maasem la Wẽnnaam naan bũmb fãa, wala makre, ãds ka tɛkã, tẽngã la rũmsã buud toor-toorã. (Kolos rãmba 1:15, 16) La sẽn da noom a Zezi n yɩɩd yaa ninsaalbã Wẽnnaam sẽn naanã.—Yelbũna 8:31.

A Zezi koɛɛgã mooneg ra wilgdame t’a nonga ãdem-biisã. A tʋʋmdã sɩngrẽ bala, a kɩtame tɩ nebã bãng vẽeneg t’a waame n na n “moon Koe-noogã,” n sõng sẽn namsd-bã. (Luk 4:18) La a Zezi pa togs bal tɩ ninsaalbã na n wa paama b mens ye. Naoor ka tɛka, a maana bũmb n wilg t’a sɩd nonga nebã. Wala makre vugri, neb n wa n tigim n na n kelg-a, la b ‘nimbãaneg yõk-a lame, t’a maag bãad dãmbã.’ (Matɩe 14:14) Daar a to me, rao a ye sẽn da tar bã-kɛgeng waa a Zezi nengẽ. A ra tara tẽeb t’a Zezi sã n data, a tõe n sãoog-a lame. Raoã nimbãaneg yõka a Zezi, t’a yeel-a woto: “Mam datame. Paam f menga.” (Luk 5:12, 13) A Lazaar kũumẽ wã me, a Zezi sẽn yã a Maari sũurã sẽn sãam wʋsg t’a ra yãbdã, a “wẽe sir-kãsenga,” t’a ‘sũurã sãame,’ la a “yãbame.” (Zã 11:32-36) Baraare, a maana yel-solemde, n vʋʋg a Lazaare, baa ne a sẽn da ki na maan rasem a naasã.—Zã 11:38-44.

La a Zezi ra miime tɩ yel-soalem kãensã yaa wakat bilf yĩnga. Bala neb nins a sẽn sãoogã ra na n le lʋɩɩ bãase, a sẽn vʋʋg-b rãmbã me ra na n kiime. La a Zezi ra miime me tɩ yaa Wẽnnaam Rĩungã n na n wa kɩt tɩ yel-kãensã fãa sa fasɩ. Rẽ n so t’a pa maan yel-soalem bal ye. A ‘moona Wẽnnaam soolem koe-noogã’ me ne yẽesem. (Matɩe 9:35) A Zezi yel-soalmã sõngdame tɩ d bãng bũmb nins Wẽnnaam Rĩungã sẽn na n wa maan ka la bilfu, ãdem-biisã neer yĩnga. Ad Biiblã sẽn yet rẽ wɛɛngẽ:

•  Bãasã buud fãa na n saame.

  “Zoens nin na n pukame, la wʋms tʋb na n yoosame. Dẽ, wobs na n yɩkame n tĩims wa yãgse, la mugs zɛlma na n laka ne sũ-noog yɩɩla.” Sẽn paase, “ned baa a ye ka na n le yeel t’a ka laafɩ ye.”—Ezai 33:24; 35:5, 6.

• Kũum ka na n le zĩnd ye.

  ‘Nin-tɩrs na n sooga dũniyã, la bãmb na n zĩnda a zug wakat sẽn ka sɛta.’—Yɩɩl Sõamyã 37:29.

  “Bãmb na n sãama kũum wakat sẽn ka sɛta. Zu-soabã sẽn yaa Soaalã na n yẽesa nintãm nins fãa sẽn be nebã ninẽ wã.”—Ezai 25:8.

• Sẽn ki-bã na n vʋʋgame.

  ‘Fãa sẽn be yaad pʋsẽ na n wʋma bãmb koɛɛg n yi.’—Zã 5:28.

  “Yãmb neb nins sẽn ki wã na n leb n yikame. Bãmb kũumã na n vʋʋgame.”—Ezai 26:19.

• Nebã na n paama zags la tʋʋma.

  “B na n mee zags n zĩnd b pʋsẽ. Bãmb na n sela tɩɩs n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. . . . Neb nins mam sẽn yãkã na n paama b tʋʋmã nafre.” —Ezai 65:21, 22.

• Zabã na n saame.

  “Bãmb kɩtdame tɩ zabr sɛ hal dũniyã tɛk fãa.”—Yɩɩl Sõamyã 46:10.

  “Buud ka na n le zẽk sʋʋg ne buud a to ye, la b ka na n le zãms zabr yell yɛs ye.”—Ezai 2:4.

• Kom ka na n le zĩnd ye.

  “Tẽngã bõn-koaadlã womda biisi. Wẽnnaam sẽn yaa tõnd Wẽnnaamã ningda tõnd zut barka.”—Yɩɩl Sõamyã 67:7.

  “Ki wʋsg na n zĩnda soolmã pʋgẽ. A na n miima tãens zutu.”—Yɩɩl Sõamyã 72:16.

• Far pa na n le zĩnd ye.

  “B ka na n kell n yĩm naong rãmbã yell daar fãa ye.”—Yɩɩl Sõamyã 9:19.

  “Yẽ na n fãaga nimbãan-ned sẽn kelemda, la naong soab sẽn ka tar sõangda. Far soab ne nimbãan-ned nimbãaneg tara yẽnda, la yẽ na n fãaga nimbãan-dãmbã vɩɩm.”—Yɩɩl Sõamyã 72:12, 13.

Y bãnga bark nins Wẽnnaam Rĩungã sẽn na n wa ne ka la bilfã. Rẽ pa sõng-y tɩ y bãng bũmb ning sẽn kɩt tɩ Rĩungã tar yõod wʋsg ne a Zezi wã sɩda? A sẽn da be tẽngã zugã, a goma Wẽnnaam Rĩungã yell ne neb buud fãa. Bala a ra miime tɩ yaa Rĩungã bal n na n wa welg ninsaalbã zu-loeesã fãa.

Biiblã sẽn wilgd Rĩungã sẽn na n maan bũmb ninsã pa noom yãmb sɩda? Bõe la y tõe n maan n bãng Rĩungã sõma n paase? Bõe la y tõe n maan n wa paam n dɩ Rĩungã nafa? Sõsg ning sẽn pʋgdã na n sõng-y lame tɩ y bãnge.