SẼN nan pa kaoose, rao a ye n gilg n sok kom-bɩɩs 800 la zak sẽn yaa kiris-neb tũudum toor-toor neba, n dat n bãng b sã n tẽedame t’a Zezi leokda pʋʋsgo. Sẽn yɩɩd pʋɩ-sʋk yeelame tɩ bãmb kɩsa sɩd t’a Zezi leokda pʋʋsgo. La bi-pugl a ye n yeel tɩ yaa Wẽnnaam n leokd pʋʋsgo, tɩ pa a Zezi ye.

La yãmb yẽ tagsg yaa bõe? D segd n pʋʋsa a Zezi bɩ, bɩ yaa Wẽnnaam la d segd n pʋʋse? * Sẽn na yɩl n bãng sok-kãngã leoore, d na n tẽega a Zezi sẽn zãms a karen-biisã tɩ b pʋʋs to-to wã.

A Zezi sẽn zãms nebã bũmb ninsã, n paas a mak-sõngã wilgda tõnd d sẽn segd n pʋʋs a soabã.

A SẼN ZÃMS NEBÃ BŨMB NINSÃ: Daar a ye, a Zezi karen-biig n kos-a woto: “Zu-soaba, bɩ y zãms tõnd pʋʋsgo.” T’a leoke: “Yãmb sã n pʋʋsdẽ, bɩ y yeele: ‘Tõnd Ba.’” (Luk 11:1, 2) Sẽn paase, a Zezi sẽn wa n zãmsd nebã tãngã zugã, a sagl-b lame tɩ b pʋʋs Wẽnnaam, la a paas woto: “Yãmb Ba mii yãmb sẽn datã, tɩ yãmb nan ka kos bãmb ye.” (Matɩe 6:6, 8) Yʋng ning b sẽn yõk a Zezi wã, a yeela a karen-biisã woto: “Bũmb ning fãa yãmb sẽn na n kos m Ba ne mam yʋʋre, bãmb na kõ yãmba.” (Zã 16:23) Rẽnd a Zezi wilgame tɩ d segd n pʋʋsda Wẽnnaam a Zeova sẽn yaa yẽ Ba, la tõnd me Ba wã.—Zã 20:17.

A MAK-SÕNGÃ: A Zezi sẽn da pʋʋsd to-to wã zemsa ne a sẽn zãms nebã bũmb ningã. Daar a ye, a pʋʋsame n yeel woto: “M Ba sẽn yaa arzãn la dũniyã Zu-soaba, mam pẽgda yãmba.” (Luk 10:21) Daar a to me, a Zezi naka a neng n ges yĩngri, n yeele: “M Ba, mam pʋʋsda yãmb barka, yãmb sẽn leok maamã yĩnga.” (Zã 11:41) A sẽn wa n na n ki wã me, a pʋʋsame n yeel woto: “M Ba, mam basda m sɩɩgã yãmb nugẽ.” (Luk 23:46) A Zezi sẽn da pʋʋsd a Ba sẽn be saasẽ wã, a kõo mak-sõng tõnd fãa sẽn segd n tũ. (Matɩe 11:25; 26:41, 42; 1 Zã 2:6) La rẽ yĩnga a Zezi pipi karen-biisã me ra tẽeda woto bɩ?

A Zezi sẽn vʋʋg n leb saasẽ wã rasem a wãn poore, a bɛɛbã sɩnga a karen-biisã namsgo. (Tʋʋma 4:18) B pʋʋsame n kos sõngre. La yaa ãnd la b pʋʋs n kos sõngre? Biiblã yeelame tɩ b “fãa lagmame n zẽk b koees n pʋʋs Wẽnnaam,” n kos t’a sõng-b ne a Zezi sẽn yaa a “tʋm-tʋmd-sõngã” yʋʋre. (Tʋʋma 4:24, 30) Rẽnd a Zezi karen-biisã rɩk a togs-n-taar pʋʋsgã wɛɛngẽ. B ra pʋʋsda Wẽnnaam. B ra pa pʋʋsd a Zezi ye.

Kaoosg zugẽ, tʋm-tʋmd a Poll goma yẽ ne a tʋmd-n-taasã sẽn da pʋʋsd to-to wã yelle. A gʋlsa a tẽed-n-taasã lɛtre, n yeel woto: “Tõnd pʋʋsda Wẽnnaam sẽn yaa tõnd Zu-soab a Zezi Kirist Ba wã barka, la tõnd pʋʋsda yãmb yĩng n ka basdẽ ye.” (Kolos rãmba 1:3) A yeela a tẽed-n-taasã woto me: “Bɩ y pʋʋs Wẽnnaam sẽn yaa tõnd Ba wã bark bũmb fãa yĩng wakat fãa ne tõnd Zu-soab a Zezi Kirist yʋʋre.” (Efɛɛz rãmba 5:20)  Rẽnd yaa vẽeneg t’a Poll ra sagenda a taabã tɩ b pʋʋs “Wẽnnaam sẽn yaa tõnd Ba wã” bũmb fãa yĩnga, ne a Zezi yʋʋre.—Kolos rãmba 3:17.

Tõnd me tõe n tũu saglg ning a Zezi sẽn kõ pʋʋsgã wɛɛngẽ wã wa pipi kiris-nebã, n wilg tɩ d nong-a lame. (Zã 14:15) D sã n pʋʋsd d Ba sẽn be saasẽ wã bala, d na n kɩsa sɩd t’a leokda d pʋʋsgã. D wat n tõog n yeela wa yɩɩl-gʋlsdã sẽn da yeelã. A yeela woto: “Mam nonga Zu-soabã, bãmb bal n wʋmd mam koɛɛgã. . . . Woto yĩnga, mam na n boola bãmb m vɩɩm tɛka.” *—Yɩɩl Sõamyã 116:1, 2.