1, 2. a) Yel-bũn bʋs la a Zezi wẽ-yã? (Ges-y fotã sẽn be yĩngrã.) b) Bõe la d segd n bao n bãng piis ne bʋʋs yel-bũndã wɛɛngẽ?

A ZEZI ra sõsda ne a Pɩɛɛre, a Ãndere, a Zak la a Zã sẽn yaa a zo-rãmbã. A wẽe tʋm-tʋmd sẽn tũud sɩd la sẽn tar yamã yel-bũndã, pʋg-sadb piigã yel-bũndã, la talã-rãmbã yel-bũndã. Rẽ poore, a baasa a sõsgã ne yel-bũnd a to. A goma wakat ning “Ninsaal Biigã” sẽn na n wa kao “buudã fãa” bʋʋdã yelle. Yaa vẽeneg t’a karen-biisã ra rat n wʋma yel-bũn-kãng võore. A Zezi goma neb sul a yiib yelle, n mak sull a ye wã ne piisi, la a to wã ne bʋʋse. Rẽ poore, a goma sull a tãab-n-soab yelle, n yeel tɩ b yaa “rĩmã” “ba-biisi.”—Karm-y Matɩe 25:31-46.

² A Zeova nin-buiidã sɩng n baood n wʋma piis la bʋʋs yel-bũndã võore, n be bʋʋm me. Bala, yel-bũndã gomda ninsaalbã bʋʋd kaoob sẽn na n yɩ to-to wã yelle. A Zezi yeelame tɩ kẽer na n paama vɩɩm sẽn kõn sa, tɩ sãnda nengẽ yɩ sãoong sẽn ka sɛta. Yaa rẽ la d sẽn segd n bao n wʋm yel-bũndã võore, la d bao n bãng d sẽn segd n maaneg n wa paam vɩɩm sẽn kõn sa wã. Rẽ n so tɩ sõs-kãngã pʋgẽ, d na n leoka sogs-kãensã: Wãn to la a Zeova  sõng tõnd tɩ d wʋm yel-bũndã võore? Wãn to la yel-bũndã wilgd tɩ koɛɛgã mooneg tara yõodo? Ãnd dãmb n segd n moon koɛɛgã? La bõe yĩng tɩ yaa masã la d segd n zĩnd “rĩmã” poorẽ, la d teel a ‘ba-biisã’ ne d sũur fãa?

3, 4. a) Sẽn na yɩl n wʋm piis la bʋʋs yel-bũndã võor sõma, bõe la d segd n bãnge? b) Yʋʋmd 1881, wãn to la Gũusg Gasgã bilg yel-bũndã võore?

³ Sẽn na yɩl n wʋm piis la bʋʋs yel-bũndã võor sõma, d segd n bãnga bũmb a tãabo: 1) Yel-bũndã sẽn gomd b rãmb yellã makda ãnd dãmba? 2) Bʋʋdã sẽn na n yɩ wakat ninga. La 3) bũmb ning sẽn kɩt tɩ b mak kẽer ne piisi, n yaool n mak sãnda ne bʋʋsã.

⁴ Yʋʋmd 1881, Gũusg Gasgã yeelame tɩ “Ninsaal Biigã” b sẽn boond me tɩ “rĩmã” yaa a Zezi. A paasame tɩ Rĩmã ‘ba-biisã’ yaa neb nins sẽn na n tɩ rɩ naam ne a Zezi saasẽ wã, la neb nins sẽn na n lebg neb sẽn zems zãng n vɩɩmd tẽng zugã. Gũusg Gasgã yeelame tɩ yaa Kiristã naam sẽn na n kaoos yʋʋm tusrã sasa la b na n welg ninsaalbã, la tɩ yaa neb nins sẽn na n dɩk Wẽnnaam togs-n-taar n nong b taabã la b sẽn mak ne piisã.

5. Yʋʋmd 1923, wãn to la Wẽnnaam nin-buiidã wʋm yel-bũndã võor n paase?

⁵ Kaoosg zugẽ, a Zeova sõnga a nin-buiidã tɩ b wʋm yel-bũndã võor n paase. Yʋʋmd 1923 zĩ-likr kiuug rasem 15 Gũusg Gasgã yeelame tɩ “Ninsaal Biigã” yaa a Zezi. La a tika Biiblã goam n wilg tɩ yel-bũndã pʋgẽ, Kirist ‘ba-biisã’ yaa neb nins sẽn na n naag-a n dɩ naamã bala. A leb n wilgame tɩ piisã makda neb nins sẽn na n vɩɩmd tẽngã zug wakat ning a Zezi ne a ba-biisã sẽn na n dɩ naamã. La piisã ne bʋʋsã welgrã na n yɩɩ wakat bʋgo? Sõsga pʋgẽ, b wilgame t’a Zezi ba-biisã na n naag-a-la saasẽ n dɩ naam yʋʋm tusri. Wakat kãnga, neb nins sẽn vɩ tẽng zugã pa tõe n sõng-b ye. Rẽnd piisã la bʋʋsã welgrã segd n zĩnda nand tɩ b sɩng b naamã rɩɩbo. Sõsgã wilga bũmb ning sẽn kɩt tɩ b na n mak neb kẽer ne piisã, n yeel tɩ yaa b sẽn tẽed a Zezi wã yĩnga, la b tẽed tɩ yaa Wẽnnaam Rĩungã n na n welg ninsaalbã zu-loeesã yĩnga.

6. Yʋʋmd 1995 wã, wãn to la d wʋm yel-bũndã võor n paase?

⁶ Yʋʋm wʋsg pʋgẽ, d ra tẽedame tɩ yaa yaoolem wakatã la b kaood nebã bʋʋdo, la tɩ b maanda rẽ ne koe-moonegã maasem. D ra yetame tɩ neb nins sẽn sakd koɛɛgã la piisã, tɩ sẽn zãgsd-bã la bʋʋsã. La yʋʋmd 1995 wã, d wʋma yel-bũndã võor n paase. Zĩ-likr kiuug rasem 15 Gũusg Gasgã sõss a yiib n wilg t’a Zezi goam nins sẽn be Matɩe 24:29-31 wã, (karm-y-yã) ne b rãmb nins sẽn be Matɩe 25:31, 32 (karm-y-yã) wõnda taaba. * Rẽ kɩtame tɩ d bãng bõe? Pipi sõsgã yeela woto: “Piisã ne bʋʋsã welgrã yaa bũmb sẽn nan wate.” La na n yɩɩ wakat bʋgo? “Na n yɩɩ ‘to-kãseng’ ning yell b sẽn gomd Matɩe 24:29, 30 wã sɩngr poore, wakat ning ‘Ninsaal Biigã sẽn na n wa ne a naamã.’ . . . Wakat kãnga, a Zezi na n kaoo ninsaalbã bʋʋd la a sãam nin-wẽnsã, tɩ yɩ dũni-kãngã sɛɛbo.”

7. Wãn to la d wʋmd yel-bũndã võor rũndã-rũndã?

 ⁷ Rũndã-rũndã, d wʋmda piis la bʋʋs yel-bũndã võor sõma. D bãnga yel-bũndã sẽn gomd b rãmb yellã sẽn makd neb ninsi. “Ninsaal Biigã” b sẽn boond me tɩ “rĩmã” yaa a Zezi. A sẽn bool b rãmb t’a ‘ba-biisã’ yaa neb nins sẽn paam vʋʋsem sõng zaeebã. (Rom 8:16, 17) ‘Piisã’ la ‘bʋʋsã’ makda buudã fãa nebã. Bãmb pa paam vʋʋsem sõngã zaeeb ye. D bãnga bʋ-kaoorã sẽn na n yɩ wakat ningã me. Na n yɩɩ to-kãsengã sẽn na n sɩng ka la bilfã baasg sẽnese. D leb n bãnga bũmb ning sẽn na n kɩt tɩ b mak kẽer ne piisi, la sãnda ne bʋʋsã. Yaa b manesem sẽn yɩ to-to ne Kirist ba-biis nins sẽn paam vʋʋsem sõng zaeeb n ket tẽng zugã. D miime tɩ dũni-kãngã sɛɛbã kolgame. Rẽ n so t’a Zeova sẽn sõng tõnd tɩ d wʋm piis la bʋʋs yel-bũndã võorã, n paas Matɩe sak 24 la 25 yel-bũn a taabã võorã noom-d wʋsgo.

8, 9. Bõe yĩng t’a Zezi bool neb nins a sẽn mak ne piisã tɩ ‘nin-tɩrse’?

⁸ Piis la bʋʋs yel-bũndã pʋgẽ, a Zezi pa gom koɛɛgã mooneg yell ye. La bõe yĩng tɩ d yetẽ tɩ yel-bũndã wilgdame tɩ koɛɛgã mooneg tara yõodo?

⁹ Pipi, d tẽeg tɩ yaa yel-bũnd la a Zezi sẽn wẽ wã. Yaa vẽeneg t’a pa gom piis la bʋʋs welgr sɩdem-sɩdem yell ye. Rẽnd a ra pa rat n yeel tɩ neb nins a sẽn mak ne piisã ned kam fãa sɩd kõ a sẽn bool b rãmb t’a ba-biisã futu, rɩɩbo, n ges b yell b sẽn wa n bẽedẽ, pa rẽ bɩ n tɩ ges-b bãens rotẽ ye. A ra rat n wilga neb nins a sẽn mak ne piisã sẽn tall manesem ning ne a ba-biisã sẽn paam vʋʋsem sõng zaeebã. A yeelame tɩ b yaa ‘nin-tɩrse,’ bala b sak n deegame t’a Zezi tara ba-biis tẽng zugu, n sõng-b yaoolem wakatã sẽn yaa toog wakatã.—Mat. 10:40-42; 25:40, 46; 2 Tɩm. 3:1-5.

10. Bõe la neb nins b sẽn mak ne piisã tõe n maan n sõng Kirist ba-biisã?

¹⁰ Yiibu, d tẽeg tɩ yaa a Zezi sẽn wa n gomd bũmb nins sẽn na n zĩnd dũniyã sɛɛb wakatã yellã la a wẽe piis la bʋʋs yel-bũndã. (Mat. 24:3) Wala makre, a yeela woto: “Wẽnnaam soolem koe-no-kãngã na n moona dũniyã tɛk fãa tɩ yɩ kaset buud fãa yĩnga.” (Mat. 24:14) La nand t’a gom piis la bʋʋs yellã, a wẽe talã-rãmbã yel-bũndã. A Zezi wẽe yel-bũn-kãng n na n wilg sẽn paam-b vʋʋsem sõng zaeebã tɩ b segd n moona koɛɛgã ne yẽesem. La b sʋkã, sẽn ket-b tẽng zugã yaa bilfu, tɩ tʋʋmã yaool n yaa wʋsgo. Bala, b segd n moona koɛɛgã ‘buudã fãa’ nand tɩ dũniyã sɛɛb ta. La piis la bʋʋs yel-bũndã wilgdame tɩ b sẽn mak b rãmb ne ‘piisã’ na n sõnga a Zezi ba-biisã. Bũmb b sẽn tõe n maan n sõng-b yaa b sẽn na n teel-b koɛɛgã mooneg pʋgẽ. La b sã n kõt ligd wall b kengd b raood bala, sekame bɩ?

11. Sok-bʋg la neb kẽer tõe n sok b mense, la bõe yĩnga?

¹¹ Rũndã-rũndã, a Zezi karen-biisã yaa milyõ a nii, tɩ b wʋsgã pa paam vʋʋsem sõng zaeebã ye. Yaool n yaa a ba-biisã sẽn paam vʋʋsem sõng zaeebã la a kõ talã-rãmbã. (Mat. 25:14-18) Rẽnd tõe tɩ neb kẽer sok b mens woto: ‘Sẽn pa paam-b vʋʋsem sõng  zaeebã me segd n moona koɛɛgã bɩ?’ D ges bũmb nins sẽn wilgd tɩ bãmb me segd n moona koɛɛgã.

12. Bõe la a Zezi goam nins sẽn be Matɩe 28:19, 20 wilgd tõndo?

¹² A Zezi yeelame t’a karen-biisã fãa segd n moona koɛɛgã. A vʋʋgrã poore, a yeela a poorẽ dãmbã tɩ b moon n maan karen-biisi, la b zãms nin-kãens tɩ b sak “bũmb nins fãa” yẽ sẽn togs-bã. Rẽnd karen-bi-paalsã me segd n saka a Zezi noorã, n moon koɛɛgã. (Karm-y Matɩe 28:19, 20.) Vẽenega, d saagd n na n tɩ vɩɩmda saasẽ tɩ yaa tẽngã zug me, d fãa segd n moona koɛɛgã.—Tʋʋ. 10:42.

13. Bũmb ning tʋm-tʋmd a Zã sẽn yã wã sõngda tõnd tɩ d bãng bõe?

¹³ Wilgr sebrã reng n wilgame tɩ sẽn paam-b vʋʋsem sõng zaeebã la neb a taab n na n moon koɛɛgã. A Zezi vẽnega tʋm-tʋmd a Zã t’a yã ‘pʋg-paal’ sẽn boond neb tɩ b wa “reeg vɩɩm koom zaalem.” Pʋg-paalã makda neb nins sẽn paam vʋʋsem sõng zaeebã n na n tɩ naag a Zezi n dɩ naam saasẽ wã. (Wil. 14:1, 3; 22:17) Vɩɩm koomã makda bũmb nins fãa Wẽnnaam sẽn maane, sẽn na yɩl tɩ nebã wa tõog n paam b mens ne yel-wẽndã la kũumã. Yaa Kiristã sẽn ki tɩ yɩ maoongã maasem yĩng la a maan rẽ. (Mat. 20:28; Zã 3:16; 1 Zã 4:9, 10) Sẽn paam-b vʋʋsem sõng zaeebã moonda ne yẽesem n gomd a Zezi sẽn ki tɩ yɩ maoongã yelle, la b wilgd nebã b sẽn tõe n maan to-to n dɩ a nafa. (1 Kor. 1:23) La a Zã yãa neb a taab sẽn pa naag b rãmb nins b sẽn mak ne pʋg-paalã ye. Nin-kãens saagd n na n wa vɩɩmda tẽngã zug wakat sẽn kõn sa. Bãmb me segd n boola nebã, n yeel tɩ: “Wa-y-yã.” B sakame n moond koe- noogã. Rẽnd bũmb ning a Zã sẽn yã wã wilgdame tɩ neb nins fãa sẽn sak koe-noogã segd n mooname.

14. Bõe la d tõe n maan n wilg tɩ d sakda ‘Kirist tõogã’?

¹⁴ Neb nins fãa sẽn sakd ‘Kirist tõogã’ segd n moona koɛɛgã. (Gal. 6:2) A Zeova ratame tɩ neb nins fãa sẽn tũud-a wã sak a noyã. Wala makre, a ra yeela Israyɛll nebã woto: “Tõogã yaa a yembre, tẽngã ned yĩnga, la sãan yĩnga.” (Yik. 12:49; Maan. 24:22) Pa tɩlae tɩ kiris-nebã tũ noy nins fãa a Zeova sẽn kõ Israyɛll nebã ye. La d paama vʋʋsem sõng zaeeb tɩ d pa paam me, d segd n saka ‘Kirist tõogã.’ Tõ-kãng yaa bũmb nins fãa a Zezi sẽn zãms a karen-biisã. Sẽn yɩɩd fãa, a wilgame tɩ zʋg-sõng ning b sẽn segd n tallã yaa nonglem. (Zã 13:35; Zak 2:8) D sã n moond Rĩungã koɛɛgã, d wilgdame tɩ d nonga Wẽnnaam, a Zezi, la d taabã.—Zã 15:10; Tʋʋ. 1:8.

15. Bõe n wilgd t’a Zezi karen-biisã fãa segd n moona koɛɛgã?

¹⁵ A Zezi tõe n togsa neb a wãn gomde, tɩ gomdã yaool n yaa neb wʋsg yĩnga. Wala makre, a maana Rĩungã kaool ne a karen-biis piig la a yembre, n pʋlem tɩ b na n dɩɩ naam ne yẽ. La yaa neb 144 000 n na n dɩ naam ne-a. (Luk 22:29, 30; Wil. 5:10; 7:4-8) A Zezi vʋʋgrã poore, a goma ne a karen-biis kẽere, n yeel tɩ b segd n moona koɛɛgã. (Tʋʋ. 10:40-42; 1 Kor. 15:6) La baa sẽn pa yɩ ne a karen-biisã fãa la a gom-yã, b fãa sakame n moon koɛɛgã. (Tʋʋ. 8:4; 1 Pɩɛ. 1:8) Rũndã-rũndã me, d miime tɩ d segd n moona koɛɛgã, baa a Zezi sẽn pa gom ne-d n yeel tɩ d moonã. Sɩd me, tõnd yaa neb milyõ a nii n moond koɛɛgã, n miẽ tɩ d sẽn maand woto wã, d wilgdame tɩ d tẽeda a Zezi.—Zak 2:18.

16-18. Bõe la d tõe n maan n sõng Kirist ba-biisã? Bõe yĩng tɩ yaa masã la d segd n maan dẽ?

¹⁶ A Sʋɩtãan maneg n zabda ne Kirist ba-biisã sẽn paam vʋʋsem sõng zaeeb n ket tẽng zugã, a sẽn mi t’a ‘wakatã yaa bilfã yĩnga.’ (Wil. 12:9, 12, 17) La baa a Sʋɩtãan sẽn zabd ne-bã, b ket n lʋɩta taoor n moond koɛɛgã, tɩ neb nins sẽn wʋmd koe-noogã sõor tar paasgo. B zɩ n moon koe-noogã tɩ neb wʋsg wʋm wa rũndã-rũndã ye. Vẽenega, a Zezi bee ne sẽn paam-b vʋʋsem sõng zaeebã, n wilgd-b sore.—Mat. 28:20.

¹⁷ D miime tɩ d sẽn paam n sõngd Kirist ba-biisã n moond koɛɛgã yaa zu-zẽkre. La d maanda bũmb a taab me n sõngd-ba. Wala makre, d kõta ligd n teend Wẽnnaam tʋʋmdã, d sõngd n meta Rĩung roto, tigs-kãsems roto, la siglgã rot a taabã. Sẽn paase, d sakda neb nins ‘tʋm-tʋmd sẽn tũud sɩd la sẽn tar yamã’ sẽn yãk tɩ b lʋɩt d taoorã.—Mat. 24:45-47; Heb. 13:17.

¹⁸ Ka la bilfu, sẽn paam-b vʋʋsem sõng zaeebã n ket tẽng zugã na n paama yaoolem bãndã. Rẽ poore, malɛgsã na n basa “dũniyã sobd a naasã,” tɩ to-kãsengã sɩnge. (Wil. 7:1-3) Nand tɩ Armagedõ zabrã sɩnge, a Zezi na n talla sẽn paam-b vʋʋsem sõng zaeebã n kẽng saasẽ. (Mat. 13:41-43) Woto wã, d sã n dat t’a Zezi sã n wa bɩ a mak-d ne piisi, yaa masã la d segd n teel a ba-biisã ne d sũur fãa.