1, 2. Bõe la a Zezi maan tɩ wilgdẽ t’a nonga ninsaalbã wʋsgo?

WẼNNAAM sẽn naan a pipi Bi-riblã to-to wã wilgdame t’a yamã ka koak ye. Sɩd me, a sẽn naan-a to-to wã n wilgd a yam-kãsengã n yɩɩd bõn-naandsã fãa. Wẽnnaam sẽn wa n naand tẽngã la bũmb a taabã t’a Bi-riblã ra be a “sɛɛgẽ wa tʋʋm-mita.” Mams-y-yã a Zezi sũur sẽn yɩ noog to-to, a sẽn wa n get a Ba wã sẽn naand saasã la tẽngã. La bũmb nins Wẽnnaam sẽn naanã sʋka, ninsaalbã n kõ a Zezi sũ-noog n yɩɩda. (Yel. 8:22-31) Rẽnd a Zezi sɩng n nonga ninsaalbã nand t’a wa tẽngã zugu.

² Kaoosg zugẽ, a Zezi sẽn nong a Ba wã n sakd-a wakat fãa wã, n paas a sẽn nong ninsaalbã kɩtame t’a sak n ‘bas a naamã’ saasẽ, n wa lebg ninsaala. A maana woto sẽn na yɩl n ‘kõ a vɩɩmã tɩ yao neb wʋsg yĩnga.’ (Fil. 2:5-8; Mat. 20:28) A Zezi sẽn wa n be tẽng zugã, Wẽnnaam kõ-a-la tõog t’a maan yel-soalma. Yel-soalem nins a sẽn maanã wilgdame t’a nonga ninsaalbã wʋsgo, la wilgd bõn-sõma nins a sẽn na n maan ka la bilf ãdem-biisã yĩngã.

3. Bõe yell la d na n gom sõs-kãngã pʋgẽ?

³ A Zezi sẽn wa tẽng zugã kɩtame me t’a tõog n ‘moon  Wẽnnaam soolem koe-noogã.’ (Luk 4:43) A ra miime tɩ yaa Wẽnnaam soolmã bɩ a Rĩungã n na n kɩt t’a Ba wã yʋʋr paam waoogre. A ra kɩsa sɩd me tɩ yaa Rĩun-kãng la ninsaalbã zu-loeesã fãa tɩɩm. A sẽn wa n moond koɛɛgã, a maana yel-soalem wʋsgo. Yel-solem-kãens wilgame t’a rata ninsaalbã fãa neere. Bõe yĩng tɩ yaa sõma tɩ d gom rẽ yelle? Yaa tɩ d sẽn na n bãng bũmb ningã na n kɩtame tɩ d maneg n kɩs sɩd tɩ manegr n wate. Bɩ d gom yel-soalem a naas a Zezi sẽn maan yelle.

4. A Zezi sẽn seg wãoorã, bõe n maane?

⁴ A Zezi ra gilgd n moonda koɛɛgã, n wa ta Galile soolmẽ wã. A sẽn wa n ta tẽng a yembr pʋgẽ, a sega rao t’a nimbãaneg kẽ-a. (Mark 1:39, 40) Wãood n da tar daoã n namsd-a wʋsgo. Biiblã wilgame tɩ wãoorã sẽn yã a Zezi wã, a yĩgimda a taoore, n yeel woto: “Yãmb sã n data, yãmb tõe n maaga maam tɩ m yɩ yɩlemde.” Raoã ra kɩsa sɩd t’a Zezi tõe n maag-a lame. La a ra baood n bãnga a sã n dat n maag-a lame. A Zezi manesem da na n yɩɩ wãn ne ra-kãngã sẽn pelg a pʋg n kos sõngrã? Tõe tɩ wãoodã ra sãama a nengã. Woto wã, a Zezi sẽn wa n get-a wã, bõe yell la a ra tagsda? A ra na n maana wa fariziẽ-rãmbã sẽn da pa nand neb nins wãood sẽn tarã bɩ? Sã n da yaa yãmba, y manesem na n yɩɩ wãna?

5. A Zezi sẽn wa n na n maag wãoorã, bõe n kɩt t’a yeel tɩ: “Mam datame”?

⁵ A Moiiz tõogã wilgame tɩ wãoor sã n yã neda, a segd n zẽka a koɛɛg n yeel tɩ: “Rẽgdo! Rẽgdo!” La yaa wa wãoor ning sẽn seg a Zezi wã pa maan woto ye. La a Zezi pa yik a sũur ne rẽ ye. Sẽn da pak-a yaa raoã sẽn namsdã, la a sẽn dat sõngrã. (Maan. 13:43-46) D pa mi a Zezi sẽn da tagsd bũmb ning yellã takɩ ye. La d miime t’a zoee raoã nimbãanega. A maana bũmb sẽn ling nebã. A tẽega a nugu, n tik wãoorã. Rẽ poore, a bʋka a menga, n yeel raoã woto: “Mam datame. Paam f menga.” La zĩig pʋgẽ, raoã wãood saame. (Luk 5:13) Vẽenega, a Zeova pa kõ a Zezi tõog t’a maan yel-soalem bal ye. Yaa sẽn na yɩl t’a tõog n wilg a sẽn nong nebã to-to wã me.—Luk 5:17.

6. Bõe la d tõe n yeel yel-soalem nins a Zezi sẽn maanã wɛɛngẽ, la b wilgda bõe?

⁶ Wẽnnaam kõ a Zezi tõog t’a maan yel-soalem buud toor-toore. A sẽn maag wãoorã toor sẽn ka be, a sãooga neb sẽn da namsd ne bãas buud toor-toore, la koms-rãmba. Biiblã yeelame tɩ neb kʋʋngã sẽn “yã mugsã sẽn gomda, la koms-rãmb sẽn paam b mense, la põy sẽn kẽnda, la zoens sẽn paam b ninã,” b yɛɛsame. (Mat. 15:31) Rũndã-rũndã, logtoɛɛmb n be n tõe n maan woperasɩõ n yãk bũmb ned sẽn tar laafɩ yĩngẽ, n ning bãad yĩngẽ t’a sãooge. La a Zezi nengẽ wã pa yɩ woto ye. A ra kɩtdame tɩ neb nins sẽn namsdã yĩnsã wil fãa sãoog zĩig pʋgẽ. Wakat ning menga, a paada yɩɩg n maan dẽ. (Zã 4:46-54) Yel-soalem nins a Zezi sẽn maanã wilgda bõe? Wilgdame tɩ tõnd Rĩm a Zezi Kirist tõe n kɩtame tɩ bãas buud fãa sa, la t’a rat n maana rẽ. D sẽn bãng a Zezi manesem sẽn da yaa to-to ne nebã kɩtame tɩ d kɩs sɩd tɩ dũni-paalgã pʋgẽ, a na n zoee “far soab  ne nimbãan-ned” nimbãanega. (Yɩɩl 72:13) Wakat kãnga, a na n sõnga neb nins fãa sẽn namsdã ne yamleoogo.

7, 8. A Zezi sẽn yi Galile n kẽng Zide wã, bõe la a maan-yã?

⁷ Kiis a wãn a Zezi sẽn sãoog wãoorã poore, a yii Galile n kẽng Zide n na n tɩ moon Wẽnnaam Rĩungã koe-noogã beenẽ. Rẽ tɩ neb tusa n zoe n wʋm koɛɛg ning a Zezi sẽn moondã, la b yã a sẽn maan bũmb toor-toor sẽn wilgd t’a nongã nebã. Vẽenega, a ra rat n togsa naong rãmbã koe-noogã, la a bels sũ-sãoong rãmbã ne a sũur fãa.—Ezai 61:1, 2; Luk 4:18-21.

⁸ Nizã kiuugã sẽn wa n ta, a Zezi kẽnga Zerizalɛm n na n tɩ maan Pakã. Rẽ tɩ tẽngã ra pida ne neb sẽn wa n na n maan Pakã sẽn yaa tigr Wẽnnaam sẽn da yeel tɩ b maandẽ wã. Wẽnd-doogã rɩtg sẽnese, bãk n da be be tɩ b boondẽ tɩ Betɛsda bãkã. A Zezi kẽnga be, n yã rao sẽn yaa bãada.

9, 10. a) Bõe yĩng tɩ nebã ra kẽnd Betɛsda bãkẽ wã? b) Bõe la a Zezi maan bãkẽ wã, la rẽ wilgda tõnd bõe? (Ges-y sõsgã sɩngrẽ fotã.)

⁹ Bãad-rãmb la koms-rãmb wʋsg n da be Betɛsda. Bõe n wa ne-b be? Yaa tɩ b ra tẽedame tɩ bãad sã n kẽ koomã pʋg wakat ning koomã sẽn dãmbde, yel-solemd n da na n maan t’a paam laafɩ. Mams-y n ges-y yɛlã sẽn da yaa to-to zĩ-kãnga. Ra yaa neb sũy sẽn sãame, sẽn maand yɩɩre, la sẽn pa tar b sẽn maandg n seg taaba. La bõe n kɩt t’a Zezi sẽn da zems zãng n tar keelmã kẽng be? Yaa a sẽn da nong nebã yĩnga. A sẽn ta be, a yãa rao sẽn yaa bãad hal sẽn kaoose. A bãagã sɩngame t’a Zezi nan pa rog meng ye.—Karm-y Zã 5:5-9.

¹⁰ A Zezi soka raoã a sã n dat n paama laafɩ, tɩ raoã leok t’a ratame, la t’a pa tar ned sẽn na n sõng-a t’a kẽ koomã ye. Sãmbg sẽn kae, a sẽn wa n gomd ne a Zezi wã t’a sũurã sãama wʋsgo. La a Zezi yeel-a lame t’a maan bũmb a sẽn da pa tẽed t’a tõe n maaname ye. A yeel-a lame t’a yik n dɩk a pĩir n kẽne. Raoã sɩd tik n yikame, n dɩk a pĩirã n sɩng kẽna. Yel-solem-kãngã wilgda bõn-sõma nins a Zezi sẽn na n maan dũni-paalgã pʋgẽ wã bal kɛpɩ! La a wilgdame me t’a Zezi nonga nebã. Yɩɩ yẽ meng n babs neb nins sẽn baood sõngrã. A sẽn maan woto wã, a kõo tõnd mak-sõngo. D segd n ket n baooda neb nins sẽn be tõnd moonegã zĩigẽ tɩ b sũy sãamd ne yel-beed nins sẽn maand dũniyã pʋgẽ wã.

11. Wãn to la kibar ning sẽn be Mark 5:25-34 wilgd t’a Zezi zoeta bãad-rãmbã nimbãanega?

¹¹ Karm-y Mark 5:25-34. Yʋʋm 12 la bãagã yaal pagã. A bãagã yĩnga, bũmb wʋsg la a ra pa tõe n maane. A ra pa tõe n kẽng wẽnd-doogẽ wã n tɩ pʋʋs Wẽnnaam meng ye. Baa a sẽn da ‘nams wʋsg tɩpdb wʋsg nengẽ tɩ b reeg a sẽn tarã fãa’ wã, a bãagã ra tara paasg bala. La daar a yembre, a maana bũmb a to sẽn na yɩl n paam a menga. A wẽdga kʋʋngã n tɩ sɩɩs a Zezi fuugã. (Maan. 15:19, 25) A Zezi bãngame tɩ pãng n yi a nengẽ n sãoog neda, t’a sok n dat n bãng ned ning sẽn sɩɩs yẽ wã. “Rabeem yõka pagã t’a rigda.” A “wa n yĩgimda a Zezi taoor n pelg a pʋgã fãa n togs” sɩda. A Zezi sẽn bãng t’a Zeova maaga pagã, a bʋka a meng n yeel-a  woto: “M biiga, fo tẽeb n maag foom. Kẽng ne laafɩ n paam f meng ne bãag ning sẽn tar foomã.”

12. a) Y sã n na n tik bũmb nins d sẽn zoe n yã wã zugu, bõe la y tõe n yeel a Zezi zugu? b) Mak-sõng bʋg la a Zezi kõ tõndo?

¹² A Zezi sɩd nonga nebã, sẽn yɩɩd fãa, neb nins sẽn namsd ne bãasã. D sã n tags rẽ yelle, pa kengd d raood sɩda? A Sʋɩtãan maanda a sẽn tõe fãa n dat tɩ d tẽ tɩ d ka barka, la tɩ ned kae n nong tõnd ye. La yel-soalem nins a Zezi sẽn maanã wilgdame tɩ tõnd yell pak-a lame, la t’a nee d zu-loeesã. D sẽn paam n tar Rĩm la Maan-kʋʋdb kãsem sẽn yaa nimbãan-zoɛt woto wã pa noom-d sɩda? (Heb. 4:15) D sã n yã ned sẽn tar bãag hal sẽn kaoose, tõe n yɩɩ toog tɩ d bãng bãagã sẽn namsd-a to-to wã. Sẽn yɩɩd fãa, d sã n zɩ n lʋɩ bãag tɩ kaoos woto. La tẽeg-y-yã a Zezi yelle. Baa a sẽn zɩ n lʋɩ bãagã, a ra zoeta bãad-rãmbã nimbãanega. Bɩ d maan d sẽn tõe fãa n dɩk a togs-n-taare.—1 Pɩɛ. 3:8.

13. A Zezi sẽn vʋʋg a Lazaarã sõngda tõnd tɩ d bãng bõe yẽ mengã zugu?

¹³ A Zezi sã n da yã ned sũur sẽn sãame, yẽ me sũur sãamdame. Wala makre, a zoa a Lazaar kũumã poore, a sẽn yã a Lazaar zakã rãmb la a zo-rãmbã sũy sẽn sãamã, a “wẽe sir-kãsenga.” A “sũur sãamame.” (Karm-y Zã 11:33-36.) Baa a Zezi sẽn da mi tɩ pa na n kaoos la a vʋʋg a Lazaarã, a yãbame. A pa zoe yãnd ne rẽ ye. Neb nins sẽn zĩnd be wã yãa vẽeneg t’a Zezi nonga a Lazaar ne a tãopã wʋsgo. A zoee b nimbãanega, n vʋʋg a Lazaare.—Zã 11:43, 44.

14, 15. a) Bõe n wilgd t’a Zeova raab yaa kɩt tɩ namsg buud fãa sa? b) A Zezi sẽn gom sẽn be-b “yaad pʋsẽ” yellã, yaa ãnd dãmb yell la a ra gomda?

 ¹⁴ Biiblã yeelame t’a Zezi “wẽnda Wẽnnaam zãng fasɩ.” (Heb. 1:3) Rẽnd yel-soalem nins a Zezi sẽn maanã wilgdame tɩ yẽ ne a Ba wã fãa ratame tɩ bãasã la kũumã sẽn wat ne tood ninsã sa. Ka la bilfu, a Zeova ne a Zezi na n vʋʋga neb wʋsg sẽn da ki. A Zezi yeelame tɩ “wakat watame tɩ fãa sẽn be yaad pʋsẽ” na n vʋʋge.—Zã 5:28, 29.

¹⁵ A Zezi sẽn gom sẽn be-b “yaad pʋsẽ” yellã, yaa neb nins sẽn ki tɩ Wẽnnaam tẽr b yellã yell la a ra gomda. Rẽ zemsame. Bala, yɩl n vʋʋg-ba, rẽnda Wẽnnaam tẽeg b yelle. Wẽnnaam Sẽn-tõe-a-fãa wã sẽn yaa ãndũniyã fãa naandã tõe n tẽega tõnd neb nins sẽn ki wã yelle. A tõe n tẽega b yalẽ wã, la b zʋgã sẽn da yaa a soaba. (Ezai 40:26) La a Zeova sẽn tõe n tẽeg sẽn ki-bã yellã toor sẽn ka be, yẽ ne a Bi-riblã rat n tẽega b yelle. A Lazaar vʋʋgrã sẽn yãk a toogo, Biiblã tara kibay a taab sẽn gomd neb sẽn vʋʋg yelle. Kiba-kãens wilgda bũmb ning sẽn na n maan dũni-paalgã pʋgẽ wã.

16. Bõe la neb nins sẽn sakd Wẽnnaam rũndã-rũndã wã tõe n wa paam n yã?

¹⁶ D sã n kell n sak a Zeova, tõe tɩ d paam n yã yel-solem-kãseng ka la bilfu. D tõe n paam n põsa to-kãsengã sasa. Armagedõ zabrã poore, d na n yãa yel-soalem a taaba. Wala makre, ninsaalbã fãa na n paama laafɩ. (Ezai 33:24; 35:5, 6; Wil. 21:4) Wakat kãnga, sẽn ningd-b linet-rãmb sẽn na yɩl n paam n yã sõma wã na n loba b linet-rãmbã, tɩ zoensã lob b rasabã, tɩ koms-rãmb nins sẽn tikd raadã lob b raadã, tɩ põyã yik n bas b wiidã. Pa zaalem yĩng la a Zeova sẽn na n maan yel-soalem tɩ sẽn na n põs-b Armagedõ sasa wã paam laafɩ wã ye. Yaa sẽn na yɩl tɩ b paam keelem, n maneg tẽngã tõr t’a lebg arzãna.—Yɩɩl 115:16.

17, 18. a) Bõe n kɩt t’a Zezi maan yel-soalmã? b) Bõe yĩng tɩ y rat n maan y sẽn tõe fãa n wa paam n kẽ dũni-paalgã pʋgẽ?

¹⁷ Rũndã-rũndã, kʋʋn-kãsengã neb sã n karemd kibay nins sẽn gomd a Zezi sẽn maag bãas buud toor-toor yellã, kengda b raoodo, tɩ b maneg n kɩs sɩd tɩ b na n wa paama b mens ne bãasã. (Wil. 7:9) A Zezi sẽn maan yel-soalem ninsã wilgdame t’a nonga ninsaalbã wʋsgo. (Zã 10:11; 15:12, 13) Sẽn paase, a sẽn wilg t’a zoeta nebã nimbãanegã wilgdame t’a Zeova nonga tõnd ned kam fãa.—Zã 5:19.

¹⁸ Ninsaalbã wẽeda sir n namsd ne toog buud toor-toore, la b yaa kiidba. (Rom 8:22) Yaa rẽ n kɩt tɩ d gũud Wẽnnaam dũni-paalgã ne yãgbo. Wẽnnaam pʋlmame tɩ dũni-paalgã pʋgẽ, ninsaalbã fãa na n paama laafɩ hakɩka. Malaki 3:20 wilgame tɩ d sã n wa paam d mens n lebg neb sẽn zems zãnga, d na n kɩdma sũ-noog “wa nag-bi sẽn yi n zoet n kɩdemdẽ.” Rũndã-rũndã menga, d sũur zoe n nooma ne bũmb nins a Zeova sẽn kõt-dã. Bɩ sũ-no-kãnga, n paas d sẽn tẽed a pʋlemsã kɩt tɩ d maan d sẽn tõe fãa, n wa paam n kẽ dũni-paalgã pʋgẽ. D bãngame tɩ yel-soalem nins a Zezi sẽn maanã wilgdame tɩ ka la bilfu, a sã n wa rɩt a naamã tẽngã zugu, ãdem-biisã na n paama b mens ne namsg buud fãa. Rẽ pa kengd d raood sɩda?