Neb kẽer getame tɩ vɩɩmã yaa reemdẽ, n tʋmdẽ, n wa kẽ kãadem, n dog kamb la f wa baas n kʋʋle. Yãmb zoe n soka y meng n ges sã n yaa vɩɩmã tɛk la woto bɩ? (Zoob 14:1, 2) Biiblã wilgame tɩ neb sẽn tall yam wʋsg meng n sok b mens sok-kãngã.—Karm-y Koɛɛg soab 2:11.

La vɩɩmã yõod yaa bõe? Yɩl n leok sok-kãngã, rẽnda d reng n bãng sẽn sɩng to-to tɩ d wa beẽ wã. Neb kẽer sẽn maag b yĩng n ges ninsaal yĩngã sẽn naan to-to wã kɩtame tɩ b kɩs sɩd tɩ Naand n be. (Karm-y Yɩɩn-sõamyã 139:14.) Sã n yaa woto, rẽnd pa zaalem la a sẽn naan tõndã ye. D sã n bãng a sẽn naan tõnd bũmb ning yĩngã, tõe n kɩtame tɩ d vɩɩmã tall barka.

Wẽnnaam sẽn naan d yaab a Ãdem ne a Hawa wã poore, a ning-b-la bark la a kõ-b tʋʋmd sẽn tar yamleoogo. A ra ratame tɩ b rog kamb n pid dũniyã, la b kɩt tɩ tẽngã tõr lebg arzãna, la b vɩɩmd wakat sẽn kõn sa.—Karm-y Sɩngr 1:28, 31.

A Ãdem ne a Hawa sẽn kɩɩs Wẽnnaamã kɩtame t’a raabã nan pa pids ye. La Wẽnnaam pa bas ninsaalbã ye. A pa toeem a raabã me ye. Biiblã wilgame t’a maanda bũmb toor-toor sẽn na yɩl n wa fãag neb nins sẽn sakd-a wã, la a pids raab ning a sẽn sɩng n tar ne tẽngã. Rẽnd Wẽnnaam datame tɩ y wa paam vɩɩm ning a sẽn sɩng n dat tɩ ninsaalbã vɩɩmdã. (Karm-y Yɩɩn-sõamyã 37:29.) Biiblã tõe n sõng-y lame tɩ y bãng y sẽn tõe n maan to-to tɩ Wẽnnaam daabã sã n wa pids bɩ naf-yã.