SEBRÃ GOM-ZUG SÕSGÃ | PƲƲSG TÕE N NAFA NED BƖ?
Wẽnnaam sẽn yeel tɩ d pʋʋsã võore
Wẽnnaam datame tɩ d lebg a zo-rãmba.
Zo-rãmb sã n wae n sõsd ne taaba, b zoodã pãng paasdame. Woto me, Wẽnnaam datame tɩ tõnd gomd ne-a, sẽn na yɩl tɩ tõnd ne yẽ zoodã pãng paasdẽ. Ad a sẽn yeele: “Yãmb na n boola maam la y pʋʋs maam, la m na n leok-y lame.” (Zeremi 29:12) Y sã n pʋʋsd Wẽnnaam, y na n ‘kolgd-a lame,’ tɩ yẽ me ‘pẽnegd yãmba.’ (Zak 4:8) Biiblã yeela woto: “Sẽn-Ka-Saab pẽe ne neb nins sẽn boond bãmbã.” (Yɩɩn-sõamyã 145:18) D sã n pʋʋsd Wẽnnaam, tõnd ne yẽ zoodã pãng na n paasdame.
“Sẽn-Ka-Saab pẽe ne neb nins sẽn boond bãmbã.”—Yɩɩn-sõamyã 145:18
Wẽnnaam dat n sõng-y lame.
A Zeezi yeela woto: “Ãnda yãmb sʋkã biig n na n kos-a bur t’a kõ-a kugri? Wall a kos-a zĩnf t’a kõ-a waafo? Dẽ, yãmb . . . sã n mi tɩ kõ y kambã bõn-sõama, ka Wẽnnaam n mi n yɩɩd n na n ko neb nins sẽn kot bãmbã bõn-sõama sɩda?” (Matye 7:9-11) Yaa Wẽnnaam sẽn “get yãmb yelle,” n dat n sõng-y-yã yĩng la a sẽn dat tɩ y pʋʋs-a wã. (1 Pɩyɛɛr 5:7) A pʋd n datame tɩ y sã n wa tar zu-loees bɩ y pʋʋs-a n togse. Biiblã yeela woto: “Da maan-y yɩɩr ne bũmb baa fʋɩ ye. La bũmbã fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.”—Filip-rãmbã 4:6.
Ninsaal fãa tog n bao n bãnga Wẽnnaam.
Bãngdb n vaees n mik tɩ neb milyõ kobs n tagsd tɩ b segd n pʋʋsame. Baa sẽn tẽed-b tɩ Wẽnd kae, la sẽn tẽed-b t’a toog kae ne ninsaalbã kẽer n tagsd woto. * Rẽ wilgdame tɩ Wẽnnaam naana ninsaal t’a miẽ t’a segd n bao n bãnga yẽnda. A Zeezi yeelame: “Ninsaal ka na n vɩ ne rɩɩb bal ye, la yaa ne goam nins fãa sẽn yit Wẽnnaam noorẽ wã.” (Matye 4:4) Bũmb a ye d sẽn tõe n maan n bãng Wẽnnaam yaa d sẽn na n pʋʋsd-a daar fãa.
D sã n sak Wẽnnaam saglgã n pʋʋsd-a, wãn to la na n naf-do?
^ sull 8 Yʋʋmd 2012, Etazĩni siglg a ye n maan vaeesgo, n wilg tɩ neb nins sẽn tẽed woto wã bãmb koabg zugu, 11 n pʋʋsd vugr wall naoor wʋsg kiuug fãa.
