“Paas-y d tẽebã”
“Sõng-y-ma, tɩ m tẽebã paoodame.”—MARK 9:24.
YƖƖLA: 81, 135
1. Bõe yĩng tɩ tẽeb tar yõod wʋsgo? (Ges-y fotã sẽn be yĩngrã.)
YÃMB zoe n soka y meng a Zeova sã n na n fãag-y-la to-kãsengã sasa bɩ? Yaa sɩd tɩ sẽn na yɩl n wa paam n põse, bũmb wʋsg n yaa tɩlɛ. La tʋm-tʋmd a Poll wilga sẽn yaa-a tɩlɛ n yɩɩdã, n yeel woto: “Tẽeb sã n kaẽ, ned ka tõe n ta Wẽnnaam yam ye.” (Ebre. 11:6) Nina tõe n tagsame tɩ sã n yaa woto, rẽnd pa toog ye. La Biiblã yeelame tɩ pa nebã “fãa n tar tẽeb ye.” (2 Tes. 3:2) Vɛrse-kãensã wilgda vẽeneg tɩ d segd n modgame n paam tẽeb sẽn tar pãnga.
2, 3. a) Bõe la a Pɩyɛɛr yeel tɩ wilgdẽ tɩ tẽeb tara yõodo? b) Sogs-bʋs la d na n leoke?
2 Tʋm-tʋmd a Pɩyɛɛr goma tẽebã yõod yelle. A yeelame tɩ b makda d tẽebã n getẽ, sẽn na yɩl “t’a Zeezi Kiris waoongã daare, bɩ [d] paam pẽgre la ziiri ne waoogre.” (Karm-y 1 Pɩyɛɛr 1:7.) D miime tɩ to-kãsengã ta n saame. Rẽ n so tɩ d rat n modg tɩ d tẽebã tall pãnga, t’a Zeezi sẽn yaa Rĩmã sã n wa bɩ a pẽg-do. D rat n zĩnda ‘b rãmb nins sẽn tẽed n na n põsã sʋka.’ (Ebre. 10:39) Rẽ n so tɩ tõnd me tõe n maan wa rao ning sẽn da kos a Zeezi sõngre, n yeel woto wã: “Sõng-y-ma, tɩ m tẽebã paoodame.” (Mark 9:24) Pa rẽ bɩ d maan wa a Zeezi tʋm-tʋmdbã sẽn da kos-a tẽeb n yeel woto wã: “Paas-y d tẽebã.”—Luk 17:5.
3 Sõs-kãngã pʋgẽ, d na n leoka sogs-kãensã: Bõe la d tõe n
maan n paas d tẽebã pãnga? Wãn to la d tõe n wilg tɩ d tara tẽebo? Bõe yĩng tɩ d tõe n kɩs sɩd tɩ d sã n kos Wẽnnaam t’a paas-d tẽebo, a na n leokame?D SÃ N PAASD D TẼEBÃ PÃNGA, NOOMA WẼNNAAM
4. Kiba-bʋs n tõe n kɩt tɩ d rat n paas d tẽebã pãnga?
4 Tẽeb sẽn tar yõod wʋsgã yĩnga, a Zeova kɩtame tɩ b gʋls neb sẽn kõ mak-sõng tẽebã wɛɛngẽ kibay Biiblã pʋgẽ. Kiba-kãens “gʋlsa tõnd zãmsg yĩnga.” (Rom. 15:4) D sã n bãng a Abrahaam, a Saara, a Izaak, a Zakoob, a Moyiiz, a Rahaab, a Zedeõ, a Barak, la wẽn-sakdb a taab sẽn wilg to-to tɩ b tara tẽebã, tõe n kɩtame tɩ tõnd me rat n paas d tẽebã pãnga. (Ebre. 11:32-35) Rũndã-rũndã me, d tara tẽed-n-taas sẽn wilg tɩ b tẽebã tara pãnga. D sã n karem b kibayã, tõe n kɩtame tɩ d mao n paas d tẽebã pãnga. *
5. Bõe la a Eli maan tɩ wilg t’a kɩsa a Zeova sɩd ne a sũur fãa, la sok-bʋg la d segd n sok d menga?
5 Ned a to sẽn kõ mak-sõng tẽebã wɛɛngẽ tɩ Biiblã gomd a yelle, yaa no-rɛɛs a Eli. Y sã n karem a kibarã, y na n yãa bũmb toor-toor sẽn wilgd t’a ra kɩsa a Zeova sɩd ne a sũur fãa. A sẽn wa n na n togs rĩm a Akaab t’a Zeova na n kɩtame tɩ war zĩnd a soolmã pʋgẽ wã, a yeela woto: “Mam wẽenda ne Sẽn-Ka-Saab sẽn yaa Israyɛll Wẽnnaamã sẽn vɩ wã, . . . meenem ka na n zĩndi, la saag me ka na n ni, hal tɩ mam leb n wa gome.” (1 Rĩm. 17:1) A Eli ra kɩsa sɩd tɩ warã sasa, a Zeova na n sõnga yẽ ne neb a taab tɩ b paam b noor dɩɩbo. (1 Rĩm. 17:4, 5, 13, 14) A ra kɩsa sɩd t’a Zeova tõe n vʋʋga pʋg-kõor a ye biig sẽn maan kaalem. (1 Rĩm. 17:21) A sẽn wa n kʋ maoong Karmell tãngẽ wã, a tẽe ne a sũur fãa t’a Zeova na n tʋma bugum tɩ wa rɩ maoongã. (1 Rĩm. 18:24, 37) A Zeova sẽn wa n dat n kɩt tɩ warã sa wã, baa bũmb sẽn da kae n wilgdẽ tɩ saagã na n niime wã, a Eli yeela a Akaab woto: “Lebg-y n tɩ rɩ-y la y yũ, bala mam wʋmda saag kɛleng rãamde.” (1 Rĩm. 18:41) D sẽn bãng a Eli sẽn maan bũmb nins n wilg t’a kɩsa a Zeova sɩd ne a sũur fãa wã, tõnd ned kam fãa tõe n soka a meng woto: ‘Mam tẽebã tara pãng wa a Eli bɩ?’
BÕE LA D TÕE N MAAN N PAAS D TẼEBÃ PÃNGA?
6. D sã n dat n paas d tẽebã pãnga, bõe la d segd n kos a Zeova?
6 Sã n pa tũ ne Wẽnnaam sõngre, d pa tõe n paam tẽeb sẽn tar pãng ye. Tẽeb naaga zʋg-sõma nins vʋʋsem sõngã sẽn kɩtd tɩ ned tallã sʋka. (Gal. 5:22, Wẽnnaam Sebre, 1983) Rẽnd yɩta sõma tɩ d tũ a Zeezi saglgã, n pʋʋsd Wẽnnaam n kot a vʋʋsem sõngã. A Zeezi yeelame tɩ d sã n pʋʋs n kos vʋʋsem sõngã, a Zeova na n kõ-d lame.—Luk 11:13.
7. Rɩk-y makr n wilg d sẽn tõe n maan to-to tɩ d tẽebã kell n tall pãnga.
7 D sã n tõog n paas d tẽebã pãnga, d segd n modgame t’a kell n tall pãnga. D tõe n dɩka d tẽebã n mak ne bugum. D sã n yõgen bugum, bugmã tõe n yõkame n dɩt ne pãnga. La d sã n pa paasd raado, bugmã wat n kiime, n lebg tompɛglem. La d sã n ningd raado, bugmã na n ket n dɩtame. Yaa woto me ne tõnd tẽebã. D sã n karemd Biiblã la d zãmsd-a daar
fãa, d na n maneg n nonga Biiblã, tɩ d sẽn nong a Zeova to-to wã me paasdẽ. Rẽ na n kɩtame tɩ d tẽebã kell n tall pãnga.8. Bõe la y tõe n maan tɩ y tẽebã kell n tall pãnga?
8 Bõe me la y tõe n maan tɩ y tẽebã kell n tall pãnga? Ra pa-y ne bũmb nins y sẽn bãng n yaool n tõog n deeg lisgã ye. (Ebre. 6:1, 2) Y tõe n bao n bãnga Biiblã bãngr-goam kẽer sẽn zoe n pids to-to. Rẽ na n kɩtame tɩ y maneg n kɩs sɩd ne Biiblã sẽn yetã. Y leb n tõe n karma Biiblã sẽn yet bũmb ning tẽeb hakɩɩkã wɛɛngẽ wã, n fees y meng n ges y tẽebã sã n sɩd tara pãnga.—Karm-y Zak 1:25; 2:17, 24.
9, 10. a) Bõe yĩng tɩ d sã n tar tũud-n-ta-sõma bɩ tõe n keng d tẽebã? b) Bõe yĩng tɩ d sã n kẽnd tigissã bɩ tõe n keng d tẽebã? d) Bõe yĩng tɩ d sã n moond koɛɛgã bɩ tõe n keng d tẽebã?
9 Tʋm-tʋmd a Poll yeelame tɩ kiris-nebã tõe ‘n naaga taab n paam raood paoosg ne tẽeb a yembre.’ (Rom. 1:12) A gomdã võor yaa bõe? D sã n wa be ne d tẽed-n-taasã, d tõe n kenga taab tẽebo. Sẽn yɩɩd fãa, d sã n be ne b rãmb nins sẽn zoe n paam makre, n wilg tɩ b tẽebã tara pãngã. (Zak 1:3) Tũud-n-ta-wẽns sãamda tẽebo, la d sã n bao zo-rãmb sẽn tar zʋg-sõma, paasda d tẽebã pãnga. (1 Kor. 15:33) Yaa rẽ yĩng la d sẽn segd n tũ Biiblã saglgã, n kẽnd tigissã n pa vaandẽ wã. Tigissã zĩigẽ, d tõe n kenga taab raoodo. (Karm-y Ebre-rãmb 10:24, 25.) Sẽn paase, sõss nins d sẽn kelgd tigissã sasa wã kengda d tẽebo. Sɩd me, tʋm-tʋmd a Poll yeelame tɩ “yaa bũmb ning ned sẽn wʋmdã n wat ne tẽebo.” (Rom. 10:17) Bɩ y sok y meng woto: ‘Mam kẽnda tigissã n pa vaandẽ bɩ?’
10 D sã n wa moond koɛɛgã, d pa kengd d taabã tẽeb bal ye. D kengda tõnd mengã tẽeb me. D rɩka pipi kiris-nebã togs-n-taare, n teeg a Zeova n moond koɛɛgã ne yẽesem wakat buud fãa.—Tʋʋ. 4:17-20; 13:46.
11. Bõe n kɩt t’a Kalɛɛb ne a Zozoe tẽebã tall pãnga, la bõe la d tõe n maan n yɩ wa bãmba?
11 D sã n gũusd n get a Zeova sẽn sõngd-d to-to, la a leokd d pʋʋsgã to-to wã, kengda d tẽebã. A Kalɛɛb ne a Zozoe maana woto. B sẽn wa n tʋm-b tɩ b tɩ soos n ges kãabg tẽngã, b talla tẽebo. La b sẽn yã a Zeova sẽn wilg-b sor b vɩɩmã nens fãa pʋsẽ wã, b tẽebã pãng maneg n paasame. Rẽ n so t’a Zozoe wa tõog n yeel Israyɛll nebã woto: “Sẽn-Ka-Saab sẽn yaa yãmb Wẽnnaamã sẽn dag n kãab yãmb kãab-nood ninsã fãa paama pidsg n ka vaal ye.” Kaoosg zugẽ, a le wa n yeel-b lame: “Bɩ y zoe Sẽn-Ka-Saab la y sak bãmb ne burkĩnd la ne pʋ-peelem. . . . Maam ne m zakã rãmb yẽ, tõnd na n tũu Sẽn-Ka-Saabo.” (Zoz. 23:14; 24:14, 15) D sã n teeg a Zeova, n ne a sẽn sõngd-d to-to wã, d tẽebã pãng na n paasdame.—Yɩɩn. 34:9.
D SẼN TÕE N WILG TO-TO TƖ D TARA TẼEBO
12. Bõe la d tõe n maan n wilg tɩ d tẽebã tara pãnga?
12 Bõe la d tõe n maan n wilg tɩ d tẽebã tara pãnga? Karen-biig a Zak yeela woto: “Mam na n talla m tʋʋma n wilg foo m tẽebo.” (Zak 2:18) Rẽnd yaa tõnd tʋʋmã n wilgd d sã n sɩd tara tẽebo. Bɩ d gom makr a wãn yelle.
Neb nins sẽn moond koɛɛgã ne yẽesmã wilgdame tɩ b tẽebã tara pãnga (Ges-y sull 13)
13. Bõe yĩng tɩ d tõe n yeel tɩ d sã n moond koɛɛgã, d wilgdame tɩ d tẽebã tara pãnga?
13 Bũmb d sẽn tõe n maan n wilg tɩ d tara tẽeb yaa d sẽn na n moond koɛɛgã. Bõe yĩnga? D sã n moond koɛɛgã, d Hab. 2:3) D sã n dat n bãng d tẽebã sã n sɩd tara pãnga, d tõe n gesa d sẽn moond koɛɛgã to-to wã. D maanda d sẽn tõe fãa koɛɛgã mooneg pʋgẽ bɩ? D modgda sẽn na yɩl n paas d koe-moonegã bɩ? (2 Kor. 13:5) Bɩ d ‘kɩs kaset ne d no-goama,’ n wilg tɩ d tẽebã tara pãnga.—Karm-y Rom-dãmb 10:10.
wilgdame tɩ d kɩsa sɩd tɩ dũniyã saab kolgame, la t’a “ka na n vaal n ka pids ye.” (14, 15. a) Bõe la d tõe n maan daar fãa n wilg tɩ d tara tẽebo? b) Bõe la zak a ye neb maan n wilg tɩ b tara tẽebo?
14 D sã n tar zu-loeese, la d ket n tũud a Zeova ne d sũur fãa me, d wilgdame tɩ d kɩs-a-la sɩda. D sã n maood ne naongo, bãaga, pa rẽ bɩ d komsa raoodo, wall d yam n yi d menga, pa rẽ bɩ yaa zu-loees a taab la d tara, d segd n kɩsa sɩd t’a Zeova ne a Zeezi na n sõnga tõnd ‘wakat ning d sẽn tog n paam’ sõngrã. (Ebre. 4:16) D sã n pʋʋsd a Zeova n kot sõngre, d wilgdame tɩ d kɩs-a-la sɩda. A Zeezi yeelame tɩ d tõe n kosa a Zeova t’a kõ “tõnd d daar o daar dɩɩbã daar fãa.” (Luk 11:3) Kibay wʋsg n be Biiblã pʋgẽ n wilgdẽ t’a Zeova tõe n gesame tɩ d paam d noor dɩɩbo. Wala makre, warã sẽn wa n kẽ Israyɛll soolmã n kaoosã, a Zeova gesame t’a Eli paam rɩɩb la koom. Biiblã yeela woto: “Yibeoog ne zaabr fãa, gãabdã rag n kẽnd n kõta a Eli buri, ne nemdo, la yẽnda rag n yũuda Kerit ko-soogã koom.” (1 Rĩm. 17:3-6) Tõnd me tõe n kɩsa sɩd t’a Zeova tõe n gesame tɩ d paam bũmb nins sẽn yaa tɩlɛ ne-dã.
D sã n tar zu-loeese, la d ket n tũud a Zeova ne d sũur fãa, d wilgdame tɩ d kɩs-a-la sɩda (Ges-y sull 14)
15 D leb n tõe n kɩsa sɩd tɩ d sã n tũud Biiblã saglsã, d na n tõog n gesa d zakã rãmb yelle. Saam-bi-poak a ye sẽn be Aazi t’a yʋʋr boondẽ t’a Rebeka wilga yẽ ne a zakã rãmb sẽn tũ Matye 6:33, la Yel-bũn 10:4 saglsã to-to. A yeelame tɩ yẽ sɩdã wa n mikame tɩ tʋʋmd ning a sẽn tʋmdã tõe n sãama bãmb ne a Zeova zoodã, t’a bas tʋʋmdã. La b ra tara kamb a naas n segd n ges b yelle. Rẽ kɩtame tɩ b segend rɩɩb n koosdẽ. B sẽn da tʋmd ne b sũur fãa wã kɩtame tɩ b paamd ligd sẽn sekd b zakã rãmb yell gesgo. A Rebeka yeela woto: “Tõnd nee vẽeneg t’a Zeova pa tol n bas-d ye. D zɩ n sõs kom wall d gãand kom ye.” Yãmb me zoe n wilgame tɩ y kɩsa sɩd tɩ sagls nins sẽn be Biiblã pʋgẽ wã tũub la sõma n yɩɩd bɩ?
16. D sã n kɩs a Zeova sɩda, wãn to la na n naf-do?
16 Wakat fãa, d segd n kɩsa sɩd tɩ d sã n tũ Wẽnnaam saglsã, nafd-d lame. A Poll lebs n dɩka no-rɛɛs a Habakuk goama, n yeel woto: “Nin-tɩrg na n vɩɩ ne tẽebo.” (Gal. 3:11; Hab. 2:4) Rẽnd d segd n kɩsa Wẽnnaam sɩda, bala yẽ la a soab ning sẽn tõe n sõng tõndã. Sɩd me, a Poll yeelame tɩ Wẽnnaam tõe n sõnga tõnd “hal wʋsg n yɩɩg tõnd sẽn kot fãa, wall d sẽn tagsd fãa.” (Efɛ. 3:20) A Zeova nin-buiidã maooda b pãng tɛk n maand a raabã. La b sẽn mi tɩ b yaa pãn-komsem dãmbã, b teeg-a lame n kɩs sɩd t’a na n ninga b modgrã barka. A Zeova sẽn be ne tõnd n sõngd tõndã pa noom-d sɩda?
B KOSA TẼEBO, N PAAME
17. a) Bõe n maan tɩ tʋm-tʋmdbã paam b sẽn da kosã? b) Bõe n kɩt tɩ d miẽ tɩ d sẽn pʋʋsd n kot tẽebã, Wẽnnaam na n leok-d lame?
17 Tõe tɩ d sẽn gom bũmb nins yellã kɩtame tɩ d rat n maan wa a Zeezi tʋm-tʋmdbã. Daar a ye, b kosa a Zeezi woto: “Paas-y d tẽebã.” (Luk 17:5) Yʋʋmd 33 Pãntekotã daare, tʋm-tʋmdbã paama bũmb sẽn pa wõnd a taaba, tɩ sõng-b tɩ b paam b sẽn da kosã. Baraar la b paam vʋʋsem sõngã, tɩ sõng-b tɩ b tõog n wʋm Wẽnnaam daabã võor sõma. Rẽ kenga b tẽebo, tɩ b moon koɛɛgã n yɩɩg neb nins fãa sẽn deng bãmbã. (Kol. 1:23) Tõnd me pʋʋsda a Zeova n kot tẽebo. La d tõe n kɩsa sɩd t’a na n leoka d pʋʋsgã bɩ? N-ye! Bala, Biiblã yeelame tɩ “tõnd sã n kos bũmb sẽn zems ne bãmb daabo, b kelgda tõndo.”—1 Zã 5:14.
18. Wãn to la a Zeova ningd sẽn modgd-b n dat tɩ b tẽebã pãng paasã barka?
18 D sã n kɩs a Zeova sɩd ne d sũur fãa, noom-a lame. D sẽn pʋʋsd-a n kot tẽebã, a na n leok-d lame. A na n sõng-d lame tɩ d tẽebã pãng paase, tɩ d wa “zems ne Wẽnnaam soolem kõom.”—2 Tes. 1:3, 5.
^ sull 4 Y tõe n karma a Lillian Gobitas Klose kibarã sẽn be yʋʋmd 1993 sẽoog kiuug rasem 22 Réveillez-vous ! wã pʋgẽ wã, a Feliks Borys kibarã sẽn be yʋʋmd 1994 wao-fugdg kiuug rasem 22 Réveillez-vous ! wã pʋgẽ wã, la a Josephine Elias kibarã sẽn be yʋʋmd 2009 bõn-bɩʋʋng kiuug Réveillez-vous ! wã pʋgẽ wã.