Levi neb nins sẽn da pa maan-kʋʋdbã ra tara tʋʋm a taaba, wala makre kẽer da yaa gũudba, n be wẽnd-doogẽ wã. Gũudbã ra tara taoor soab sẽn get b tʋʋmdã yelle. Seb-gʋlsd a Philo sẽn yaa zʋɩfã goma gũudbã tʋʋmd yelle, n yeele: “Levi nin-kãensã kẽer da yasa wẽnd-doogã kʋɩlensã noore, tɩ kẽer da be pʋgẽ, sɛk-roogã taoore, sẽn na yɩl n gɩdg tɩ ned sẽn pa tar sor ra wa beenẽ, a soab maana ne pʋ-toog t’a pa maan ne pʋ-toog me. Gũudb a taab me ra gilgda wẽnd-doogã yibeoog la yʋngo, n da maand woto n deesd taaba.”

Sãnedrẽ wã ra tõe n kosa gũudbã tɩ b sõng-ba. Yaa gũudbã bal n da yaa zʋɩf rãmb Rom-dãmbã sẽn kõ sor tɩ b tõe n sui sʋʋse.

Bãngd a Joachim Jeremias wilgame tɩ “gũudbã sẽn wa n na n yõk a Zeezi t’a sok-b tɩ bõe yĩng tɩ b pa yõk-a a sẽn wa n be wẽnd-doogẽ wã (Mat. 26:55), wilgdame tɩ nin-kãensã sɩd ra yaa wẽnd-doogã gũudba. Sã n pa rẽ, a Zeezi ra pa na n sok-b sok-kãngã ye.” Bãngd kãng leb n tagsdame tɩ sẽn deng rẽ, neb nins b sẽn da tʋm tɩ b na n tɩ yõk a Zeezi wã me ra yaa wẽnd-doogã gũudba. (Zã 7:32, 45, 46) Kaoosg poore, Sãnedrẽ wã tʋma gũudbã taoor soab ne gũudb kẽere, tɩ b na n tɩ yõk tʋm-tʋmdbã. Tog n yaa wẽnd-doogã gũudb me la sẽn da tɛ tʋm-tʋmd a Poll n yiis wẽnd-doogẽ wã.—Tʋʋ. 4:1-3; 5:17-27; 21:27-30.